Ifyebo Ififumine mu Mpapulo Shili mu Katabo ka Mikalile no Mulimo Tubomba
NOVEMBER 4-10
ICUMA ICABA MU CEBO CA KWA LESA | 1 YOHANE 1-5
“Mwitemwa ici Calo Nelyo Ifya Muli ici Calo”
Pashanyeni Yesu
13 Bamo kuti batila ifya pano calo fimo tafyabipa. Ico kwena ca cine, lelo icalo ne fya kupumbula fya ciko kuti fyatupumfyanya fye ukubombela Yehova. Pali fyonse ifya pano calo tapaba nangu cimo icabelako ukutupalamika kuli Lesa. E ico kanshi, nga twatemwa ifya pano calo, nangu fye fintu ifishabipa no kubipa, ninshi tule-enda mu nshila yalubana. (1 Timote 6:9, 10) Na kuba, ukulanda fye icishinka, ifingi ifya pano calo fibi kabili kuti fyatonaula. Nga tuletamba amavidio nelyo amaprogramu ya pa TV aya lukaakala, ayakoselesha ukukonke cuma, ayalanga ifya bulalelale, na ifwe kuti twalamona kwati fisuma, kabili kuti twafitemwa sana. Lyonse nga tuleampana pamo na bantu abafwaisha imikalile ya pa muulu nelyo abafwaisha amano ya kupangilamo indalama ishingi, na ifwe bene kuti twatampa ukucindika sana ifyo fine fintu mu mikalile yesu.—Mateo 6:24; 1 Abena Korinti 15:33.
Muletontonkanya pa Musango wa Muntu uo Mufwile Ukuba
18 Cimbi icingatwafwa ukukaana “ifya muli ici calo” kulatontonkanya pa mashiwi Lesa aebele Yohane ukuti: “Ici cine calo cileya pamo no lunkumbwa lwa ciko, lelo uucita ukufwaya kwa kwa Lesa akekalilila umuyayaya.” (1 Yoh. 2:17) Icalo ca kwa Satana cimoneka kwati tacakonaulwe. Lelo kasuba kamo cikonaulwa. Fyonse ifyaba mu calo ca kwa Satana fikonalulwa. Nga tuleibukisha ukuti fyonse ifyaba mu calo ca kwa Satana fikonaulwa, cikatwafwa ukukanabelelekwa na Satana Kaseebanya.
Ukufwayafwaya Icuma Icaba mu Cebo ca kwa Lesa
Ifyo Yehova Atwibukishako Fyalicetekelwa
14 Mu Malembo ya Bwina Kristu aya ciGriki mwaliba sana ifya kutwibukishako pa fyo tufwile ukutemwana. Yesu atile ifunde lya bubili ilikalamba lya kuti, “uletemwa umunobe nge fyo waitemwa we mwine.” (Mat. 22:39) Yakobo munyina kwa Yesu aitile ukutemwa ukuti “ifunde lya mfumu.” (Yako. 2:8) Umutumwa Yohane atile: “Mwe batemwikwa, ifunde ndemulembela te lipya, ni lilya line ilya kale ilyo mwakwata ukufuma ku kutendeka.” (1 Yoh. 2:7, 8) Finshi ifyo Yohane alelandapo ilyo atile ‘ifunde lya kale’? Alelanda pe funde lya kutemwa. Ili funde lyali lya “kale” pantu Yesu alililandilepo imyaka iingi mu kubangilila, “ukufuma ku kutendeka.” Lelo lyali “ilipya” pantu abasambi bali no kutemwa bambi ukucila ifyo baitemenwe na lintu ifintu fyayaluka. Apo tuli basambi ba kwa Kristu, bushe tulatasha pa kusoka tupokelela ukutwafwa ukukanaba na bukaitemwe?
it-1-E ibu. 862 para. 5
Ukweleelwa
Ukupepelako abantu pa kuti Lesa abeleele kwaliba fye bwino, nangu fye kupepelako icilonganino. Mose alipepeleko abena Israele ilyo alandile imembu isho bacitile, alilombele no kuti Yehova abeleele kabili Yehova alyumfwile ipepo lya kwa Mose no kubeleela. (Impe. 14:19, 20) Na Solomone wine ilyo balepeela itempele nao alipepele kuli Yehova ukuti akeleele abantu bakwe nga bamubembukila lyena balapila no kuleka ifyabipa ifyo balecita. (1 Isha. 8:30, 33-40, 46-52) Esra alilandileko abaYuda babwelele muli bunkole kuli Yehova pa membu bacitile. Ipepo apepele ilyafumine pa nshi ya mutima lyalengele abantu ukucitapo fimo pa kuti Yehova abeleele imembu shabo. (Esra 9:13–10:4, 10-19, 44) Yakobo akoseleshe uulwele lwa ku mupashi ukwita abakalamba ba cilonganino pa kuti bamupepeleko, kabili “nga alicita imembu, imembu shakwe shikelelwa.” (Yako. 5:14-16) Na lyo line, kwaliba “ulubembu ululeta imfwa,” e kutila ukubembukila umupashi wa mushilo. Umuntu nga ca kuti alecitila fye imembu ku mufulo teleelwa. Abena Kristu tabalingile ukupepelako umuntu uubembuka fye ku mufulo.—1 Yoh. 5:16; Mat. 12:31; Heb. 10:26, 27.
Amepusho Ukufuma ku Babelenga
Ilyo umutumwa Yohane alembele ukuti “ukutemwa kwapwililika kupoosa umwenso ku nse,” ni mwi aloseshe ilyo atile “ukutemwa kwapwililika,” kabili “mwenso” wa musango nshi uupooswa ku nse?
Umutumwa Yohane alembele ukuti: “Mu kutemwa tamwaba mwenso, lelo ukutemwa kwapwililika kupoosa umwenso ku nse, pantu umwenso ulacilikila. Cine cine, uuli no mwenso taba uwapwililika mu kutemwa.”—1 Yohane 4:18.
Aya mashiwi yalangilila ukuti Yohane alelosha mu kuti tufwile ukulanda ukwabula umwenso—maka maka alelosha pa kuumfwana kwaba pa kutemwa Lesa e lyo no kulanda na Wena ukwabulo mwenso. Kuti twashininkisha ici ilyo twabelenga amashiwi yaba pa cikomo 17 ayatila: “Ifi e fyo ukutemwa kwalengwa ukupwililika muli ifwe, ukuti tube abalandikisha mu bushiku bwa bupingushi.” Ukutemwa Lesa ukwa Mwina Kristu e lyo no kwishiba ukuti na o alitemwikwa kuli Lesa, kuti kwamulenga alanda ukwabula umwenso ilyo alepepa kuli Lesa.
Amashiwi ya kuti “ukutemwa kwapwililika” yalikwata ubupilibulo. Nga fintu ishiwi lya kuti “ukupwililika” limo limo libomfiwa muli Baibolo, talilosha ku kupwililika kwa cine cine, e kuti ukupwililika kwafikapo, lelo lyabomfiwa mu mampalanya. Ku ca kumwenako, mu Lyashi lya pa Lupili, Yesu atile: “E ico na imwe mufwile ukuba abapwililika, ifyo na Shinwe wa mu muulu aba uwapwililika.” Yesu aleeba abakonshi bakwe ukuti nga ca kuti baletemwa fye ababatemwa, ninshi ukutemwa kwabo kuti kwaba ukwapelebela kabili ukwabamo akalema. Bafwile baba no kutemwa kwapwililika nelyo ukuba no kutemwa kwafikapo ilyo baletemwa na balwani babo bene. E ico, nangu fye ni Yohane ilyo alembele ukuti “ukutemwa kwapwililika,” alelanda pa kutemwa Lesa ukwa kufuma pa nshi ya mutima, ukwa cine cine, kabili ukutungulula imibele yonse iya muntu.—Mateo 5:46-48; 19:20, 21.
Ilyo Umwina Kristu alepepa kuli Lesa, aleshiba ukuti mubembu kabili tapwililika. Lelo takasuminishe ukuyumfwa kwa kuti mubembu kabili uwakaanwa kuli Lesa ukumulenga ukukanapepa kuli wene nga ca kuti cine cine alitemwa Lesa kabili aliluka ukuti na o alimutemwa. Lelo alaipakisha ukulanda na Lesa mu kushipa ukulondolola ifili mu mutima wakwe no kulomba ubwelelo pa cishinte ce lambo lya cilubula ilyo Lesa atupeela ukupitila muli Yesu Kristu. Alacetekela ukuti Lesa alakutika ku kulomba kwakwe.
Lelo bushe umuntu kuti aba shani “uwapwililika mu kutemwa” ica kuti ‘apoosa ku nse’ umwenso wa kuti mubembu kabili alikaanwa kuli Lesa? Umutumwa Yohane atile: “Onse uubaka icebo [ca kwa Lesa], cine cine muli wene ukutemwa Lesa kwalipwililika.” (1 Yohane 2:5) Tontonkanyeni pali ci: Apo Lesa atutemenwe ilyo twali tucili ababembu, bushe te kuti atutemwe ukucilapo nga ca kuti twalapila icine cine kabili ‘tulebaka icebo cakwe’? (Abena Roma 5:8; 1 Yohane 4:10) Cine cine, kulila fye twatwalilila ukuba aba busumino, na ifwe bene kuti twacetekela nge fyo umutumwa Paulo acitile ilyo alandile pali Lesa ukuti: “Uyo uushakeenye Umwana wakwe wine lelo apeele wene pa mulandu wa ifwe bonse, cinshi ico ku cikuuku ashingatupeelela ne fintu fyonse pamo nankwe?”—Abena Roma 8:32.
Lekeni Ifyo Mucita Filelanga Ukuti Mwalikwata Icitetekelo
10 Abena Kristu abaleupana balafwaya ukulinga no kucita iciweme, kabili Baibolo kuti yabaafwa ukucite fyo. Nangu ca kuti ubushiku bwa bwinga bwalicindama, balishiba ukuti e bushiku bwa kubalilapo fye ukuba mu cupo ukwa Bena Kristu babili abakwata isubilo lya kwikala ku ciyayaya. Kanshi teti baipamfye abati kano fye tupishe ubwinga bwa lulumbi. Nga bapingulapo ukuti kukabe ukwangalila pamo, balekala pa nshi no kumona indalama bengapoosapo ne fyo ukusefya kwine kukaba. (Luka 14:28) Ukulingana na Malembo, ilyo bakopana umulume e ukaba umutwe wa lupwa. (1 Abena Korinti 11:3; Abena Efese 5:22, 23) Kanshi shibwinga e washingamwa ukupekanya ukusefya. Lelo kwena akalanshanya no ukaba umukashi wakwe pa fintu fimo, pamo nge mpendwa na bantu abo bengeta ku kusefya. Teti cicitike ukwita balupwa ne fibusa fyonse; e co nalimo kuti balinga pa kwita aba kusangwa ku kusefya. Abaleupana balingile ukwishiba ukuti nga tabetileko Abena Kristu banabo bamo, tabakabafulilwe pantu balishiba ukuti teti bete abantu bonse.—Lukala Milandu 7:9.
NOVEMBER 11-17
ICUMA ICABA MU CEBO CA KWA LESA | 2 YOHANE 1–YUDA
“Tulingile Ukulwisha pa Kuti Tutwalilile Ukuba mu Cine”
w04 9/15 amabu. 11-12 amapara. 8-9
“Mulekosa Muli Shikulu”
8 Tatwaluba amapange ya kwa Satana pantu Amalembo yasokolola ubucenjeshi ubo abomfya. (2 Abena Korinti 2:11) Pa kulwisha umuntu watambalala Yobo, Kaseebanya aonawile icuma cakwe, amwipaile abatemwikwa, amuletele ukukaanya kwa mu ng’anda, alimulwalike, na baleitunga ukuba abanankwe bamutungenye ifya bufi. Yobo aumfwile ubulanda no kumona kwati Lesa namulekelesha. (Yobo 10:1, 2) Nangu line Satana te kuti alete aya mafya mu kulungatika pali leelo, yalakuma Abena Kristu abengi, kabili Kaseebanya kuti ayabomfya nga apa kwingilila.
9 Ifingonaula bumupashi nafifula muno nshiku sha ku mpela. Twaba mu calo umo ukusupila icuma kumoneka ukucindama ukucila ukukonkelela ifya ku mupashi. Lyonse fye abasabankanye lyashi balenga camoneka kwati ubulalelale bulaleta insansa, kwati tamwaba na bubi. Abengi na bo, baba “abatemwo kwangala ukucisho kutemwa Lesa.” (2 Timote 3:1-5) Ukutontonkanya kwa musango yu kuti kwalenga ukushangila kwesu ukwa ku mupashi kwaba mu bwafya, kano nga ‘twalwila icitetekelo,’ ninshi kuti twatwalilila abashangila.—Yuda 3.
Ukufwayafwaya Icuma Icaba mu Cebo ca kwa Lesa
it-2-E ibu. 279
Imitebeto ya Kulanga Ukutemwana
Baibolo tailondolola ifyo iyi mitebeto yaleba kabili tayalandapo ne miku yalebako. (Yuda 12) Shikulu Yesu Kristu nelyo batumwa bakwe tabaebele abantu kuti balingile ukulasefya iyi mitebeto. Kabili te kutila Umwina Kristu onse alesefyako iyi mitebeto nelyo yalitwalilile ukubako. Abantu bamo batila kuli iyi mitebeto, Abena Kristu abali ne fyuma balepanga umutebeto uko baleita Abena Kristu banabo abapiina. Kanshi aba fyuma, abana banshiwa, bamukamfwilwa e lyo na bapiina baleliila pamo ifya kulya pa kulanga ifyo batemwana.
it-2-E ibu. 816
Amabwe
Ishiwi limbi ilya ciGriki ni spi·lasʹ, ililosha nalimo kwi libwe nelyo amabwe ayashikama pa nshi ya menshi. Yuda alandile pali aya mabwe ilyo alelanda pa baume bamo abasokelele mu cilonganino ca Bena Kristu abalefwaya ukulufya aba mu cilonganino. Nga filya fine amabwe yaleleta ubwafya ku maato, aba baume nabo bali no kulaleta amafya ku bali mu cilonganino. E calengele Yuda alande pali aba baume ati: “Aba bantu baba nga mabwe ayabelama mu menshi ilyo balelya pamo na imwe mu mitebeto yenu iya kulanga ukutemwana.”—Yuda 12.
“Alesekesha Lesa”
Finshi Enoke aseseme? Aseseme ati: “Moneni! Yehova aishile ne minshipendwa ya ba mushilo bakwe, ku kupingula bonse, no kushinina bonse abashipepa pa micitile yabo yonse iyabipa iyo bacitile mu nshila yabipa, na pa fya bunani fyonse ifyo ababembu abashipepa balandile pali ena.” (Yuda 14, 15) Nomba nga fintu mwamona, ifyo Enoke alandile fyumfwika kwati alelanda pa fyo Lesa acita kale. Ifi fine e fyaba na masesemo ayengi aya mu Baibolo ayakonkelepo. Ico tulelandapo ca kuti, kasesema nga alelanda muli iyi nshila ninshi nashininkisha ukuti ifyo alelanda fya cine kabili alemona kwati no kucitika fyalicitika kale.—Esaya 46:10.
“Alesekesha Lesa”
Icitetekelo Enoke akwete kuti calenga twalayipusha nga ca kuti tumona icalo twikalamo nge fyo Yehova acimona. Ubupingushi Enoke alebila ku bantu mu kushipa bwalitukuma na muno nshiku. Nga filya Enoke asokele abantu, Yehova aliletele Ilyeshi likalamba pa bantu abashalemupepa abaliko mu nshiku sha kwa Noa. Filya Lesa aonawile abantu pali ilya nshita, filanga ifyo akacita ku ntanshi. (Mateo 24:38, 39; 2 Petro 2:4-6) Na muno nshiku mwine, Lesa aliiteyanya capamo ne minshipendwa ya ba mushilo ku kupingula abantu abashipepa. Bonse tulingile ukubika amano ku fyo Enoke atusokele e lyo no kulaebako bambi ifyo alandile. Balupwa wesu ne fibusa kuti batulekelesha kabili kuti tuleumfwa ububi. Na lyo line, na muno nshiku mwine Yehova talekelesha ababomfi bakwe aba cishinka, nga filya fine ashalekeleshe Enoke.
NOVEMBER 18-24
ICUMA ICABA MU CEBO CA KWA LESA | UKUSOKOLOLA 1-3
“Nalishiba Ifyo Ucita”
Bushe Mibele Nshi Mwakwata?
8 Pa kutaluka kuli iyi mibele, tufwile ukulaibukisha ukuti Yesu bamulondolola muli Baibolo ukuti alikata ‘intanda 7 mu lupi lwakwe ulwa ku kulyo.’ “Intanda” shimininako baeluda abasubwa e lyo na baeluda bonse aba mu filonganino. Yesu kuti atungulula ishi “ntanda” ishaba mu lupi lwakwe ukulingana ne fyo alefwaya. (Ukus. 1:16, 20) E ico, apo Yesu e Mutwe wa cilonganino ca Bena Kristu, e utungulula baeluda bonse. Nga ca kuti eluda alekabila ukumulungika, Yesu, uwakwata ‘amenso ayaba kwati lubingu lwa mulilo,’ akashininkisha ukuti amulungika pa nshita yalinga na mu nshila yakwe umwine. (Ukus. 1:14) Ilyo Yesu acili talabombelapo, tufwile ukutwalilila ukucindika baeluda abasontwa no mupashi wa mushilo, pantu Paulo alembele ukuti: “Umfwileni abalemutungulula no kubanakila, pantu balinda imyeo yenu nga bantu abakalubulula; pa kuti bacite ici ne nsansa, te mu bulanda iyo, pantu nga caba ifi kuti camubipila.”—Heb. 13:17.
Yehova Alatucingilila pa Kuti Tukapusuke
11 Mu cimonwa icaba mu Ukusokolola ifipandwa 2 na 3, Yesu Kristu alicecetele ifilonganino 7 ifyali mu Asia Minor. Icimonwa cilangilila ukuti Kristu alamona fyonse ificitika mu filonganino pantu alelumbula na mashina ya bantu. Na kabili alefunda aba mu filonganino nelyo ukubatasha. Bushe ici calelangilila cinshi? Mu kufikilishiwa kwa ici cimonwa, ifilonganino 7 fimininako Abena Kristu abasubilwe pa numa ya 1914, e lyo ifyo abafundile filabomba na ku filonganino fyonse ifya bantu ba kwa Lesa. Kanshi kuti twatila Yehova alabomfya Umwana wakwe ku kutungulula abantu bakwe. Kuti twanonkelamo shani mu butungulushi bwakwe?
w01 1/15 amabu. 20-21 para. 20
Endeleni Pamo no Kuteyanya kwa kwa Yehova
20 Ukwendela pamo no kuteyanya kwa kwa Yehova ukulunduluka kufwaya ukuti twaishiba umulimo Lesa apeela Yesu Kristu pa kuba “umutwe wa lukuta.” (Abena Efese 5:22, 23) Ilembo lya pali Esaya 55:4 nalyo lyalicindama apo twaebwa ukuti: “Moneni, [ne Yehova] namupeele ukube nte ku bantu na bantu, cilongoshi kabili mushika wa bantu na bantu.” Ukwabula no kutwishika Yesu alishiba ifya kutungulula. Alishiba impaanga shakwe, kabili alishiba ne milimo yabo. Na kuba, ilyo aceeceetele ifilonganino 7 mu Asia Minor, imiku isano atile: “Naishibe milimo yobe.” (Ukusokolola 2:2, 19; 3:1, 8, 15) Na kabili Yesu alishiba ifyo tukabila, nga filya fine fye Wishi Yehova aishiba. Ilyo ashilalondolola Ipepo lya We Shifwe, Yesu atile: “Shinwe aishibe fintu mukabila, ilyo tamulamulomba.”—Mateo 6:8-13.
Ukufwayafwaya Icuma Icaba mu Cebo ca kwa Lesa
Ubufumu bwa kwa Lesa Bwaonaula Abalwani ba Buko
10 Inshita ya bupingushi. Abalwani bonse aba Bufumu bwa kwa Lesa bakapatikishiwa ukumona icintu icikalenga ukuti bakabe sana no mwenso. Yesu atile: “Bakamona Umwana wa muntu aleisa mu makumbi ali na maka ayengi no bukata.” (Marko 13:26) Uku kumoneka na maka kukalanga ukuti Yesu aisa ku kupingula. Mu busesemo bumo bwine, ubwaba na mu Mbila Nsuma iya kwa Mateo, ubulanda pa nshiku sha kulekelesha, Yesu alilandile na fimbi pa fyo ubu bupingushi bukaba. Ifi fyebo fyaba mu cilangililo ca mpaanga ne mbushi. (Belengeni Mateo 25:31-33, 46.) Ababa ne cishinka ku Bufumu bwa kwa Lesa bakabapingula ukuti ni “mpaanga” kabili ‘bakenuna imitwe yabo,’ pantu bakeshiba ukuti ‘ukulubuka kwabo nakupalama.’ (Luka 21:28) Lelo abalwani ba Bufumu abo bakapingula ukuti ni “mbushi,” ‘bakaloosha nga nshi,’ pantu bakeshiba ukuti ‘balaonaulwa umuyayaya.’—Mat. 24:30; Ukus. 1:7.
Ifyo Twingafwaisha Ukwishiba mwi Buuku lya Ukusokolola—1
2:7—Bushe “ibala lya kwa Lesa” libala nshi? Apo asosele aya mashiwi ku Bena Kristu basubwa, ibala lifwile ukuba libala lya mampalanya, e kutila ku muulu, ukwaba Lesa umwine. Abasubwa aba cishinka bakapeelwa insambu sha kulalyako “ku muti wa mweo.” Bakapokelela umweo uushifwa.—1 Kor. 15:53.
NOVEMBER 25–DECEMBER 1
ICUMA ICABA MU CEBO CA KWA LESA | UKUSOKOLOLA 4-6
“Abaume Bane Abanina Pali Bakabalwe”
Bushe Abaume Bane Abanina Pali Bakabalwe ni Bani?
Nani wanina pali kabalwe wabuuta? Icasuko kuli icipusho kuti twacisanga muli ili line ibuuku lya mu Baibolo ilya Ukusokolola, ilyalanda pa wanina pali uyu kabalwe ukuti ni “Cebo ca kwa Lesa.” (Ukusokolola 19:11-13) Baibolo ita Yesu Kristu ukuti Cebo, pantu e ulandilako Lesa. (Yohane 1:1, 14) Na kabili etwa ukuti “Imfumu ya shamfumu kabili Shikulu wa bashikulu” kabili imwita no kuti “Uwa Cishinka kabili Uwa Cine.” (Ukusokolola 19:16) Ukwabula no kutwishika, Yesu alikwata amaka ya kuba imfumu ya bulwi, kabili tabomfya amaka bubi bubi nelyo mu bufumfuntungu. Na lyo line, kuli amepusho ayo twalayasuka.
wp17.3 ibu. 4 para. 5
Bushe Abaume Bane Abanina Pali Bakabalwe ni Bani?
Ni lilali ilyo aba abaume 4 baninine pali bakabalwe? Moneni ukuti Yesu, uwabalilepo ukunina pali kabalwe, aninine ilyo bamupeele icisote ca bufumu. (Ukusokolola 6:2) Ni lilali Yesu bamupeele Ubufumu ku muulu? Yesu tabamupeele Ubufumu lintu abweleelemo ku muulu pa numa fye ya kubuushiwa. Baibolo itila ilyo abweleelemo ku muulu, alitendeke ukulalolela ukuba Imfumu. (AbaHebere 10:12, 13) Yesu alyebele abasambi bakwe ifya kwishibilako ilyo inshita ya kulolela ukupeelwa Ubufumu yali no kupwa e lyo na lintu aali no kutendeka ukuteka ku muulu. Yesu atile nga atendeka ukuteka, ifintu mu calo fyali no kubipilako. Kwali no kuba inkondo, ifikuko ne fipowe. (Mateo 24:3, 7; Luka 21:10, 11) Kanshi ilyo Inkondo ya Calo iya Kubalilapo yatendeke mu 1914, calishibikwe ukuti inshita iyo Baibolo iita ukuti “inshiku sha kulekelesha,” yalitendeke.—2 Timote 3:1-5.
Bushe Abaume Bane Abanina Pali Bakabalwe ni Bani?
Uyu uwanina pali kabalwe emininako inkondo. Moneni ukuti uyu kabalwe tafumya fye umutende mu fyalo fimo, lelo aufumya mwi sonde lyonse. Mu 1914, e lyo kwali inkondo ya calo iya kubalilapo. Lyena pa numa, kwali inkondo ya calo iya bubili umo abantu bafwile sana ukucila mu ya kubalilapo. Bamo abafwailisha pa fintu balanda ukuti abantu abafwa mu nkondo ukutula mu 1914 balicila amamilioni 100. Na kabili abantu abengi sana balicenekwe icine cine.
wp17.3 ibu. 5 amapara. 4-5
Bushe Abaume Bane Abanina Pali Bakabalwe ni Bani?
“Naliloleshe, kabili, moneni! kwali kabalwe uwafiita; no waikelepo ali na sekelo mu minwe yakwe. E lyo naumfwile ishiwi kwati lilefuma pa kati ka fya mweo fine, aliti: ‘Icipimo cimo ica ngano mu ndalama imo iya denari, ne fipimo fitatu ifya barle mu ndalama imo iya denari; lelo wionaula amafuta ya miolife no mwangashi.’”—Ukusokolola 6:5, 6.
Uyu uwanina pali kabalwe emininako ifipowe. Uwanina pali kabalwe aliletele icipowe ica kuti icipimo cimo (amalita 1.08) ica ngano balecishita mu ndalama ya denari imo. Na kuba iyi e ndalama umuntu alefola mu nshita ya batumwa nga abomba ubushiku ubutuntulu. (Mateo 20:2) Mu ndalama imo ine umuntu kuti ashitamo fye ifipimo fya barle fitatu (amalita 3.24). Bushe abakwata ulupwa ulukalamba kuti balya ifi ifya kulya imiku inga? Ici icimonwa cilasoka abantu ukuti balingile ukulasungilila ifya kulya ifyo balya sana, pamo nga filya caleba ku mafuta ya miolife no mwangashi.
wp17.3 ibu. 5 amapara. 8-10
Bushe Abaume Bane Abanina Pali Bakabalwe ni Bani?
Uwanina pali kabalwe walenga 4 emininako imfwa ne filenga abantu balefwa. Ilyo papitile imyaka iinono ukufuma mu 1914, kwali icikuko baleita ukuti Spanish influenza icaipeye abantu abengi sana. Cimoneka kwati abantu amamilioni 500 balilwele ubu bulwele, e kutila umuntu umo pa bantu batatu abaliko pali ilya nshita.
Nomba ici icikuko tecalekelesheko. Abafwailisha pa fintu balanda ukuti abantu abengi icine cine balifwile ku bulwele bwa kampasa muli ba 1900. Na muno nshiku mwine, abantu abengi balafwa ku bulwele bwa AIDS, icifuba ca ntandabwanga, e lyo no bulwele bwa mpepo, nangu ca kuti abantu balabombesha sana ukufwailisha imiti.
Abantu abengi balafwa mu nkondo, ku fipowe, na ku malwele kabili tabakwata isubilo.
Ukufwayafwaya Icuma Icaba mu Cebo ca kwa Lesa
Ukupuulama kwa Cipuna ca Bufumu ca kwa Yehova ica mu Muulu
8 Yohane alishibe ukuti bashimapepo basontelwe ukubomba mwi hema lya pa kale. E co limbi alisungwike pa kumona cintu alondolola mu kukonkapo ukuti: “Kabili ukushinguluke cipuna ca bufumu kwali ifipuna fya bufumu amakumi yabili na fine, na pa fipuna ifi abakalamba amakumi yabili na bane baikelepo, nabafwala amalaya yabuuta, ne filongwe fya golde pa mitwe yabo.” (Ukusokolola 4:4) Ee, mu cifulo ca bashimapepo, kuliko abakalamba 24, abaikala pa fipuna fya bufumu no kufwikwa ifilongwe ukupale shamfumu. Ni bani aba bakalamba? Tabali bambi ukucila pa basubwa ba cilonganino ca Bwina Kristu, ababuushiwa no kwikala mu cifulo ca mu mulu ico Yehova abalaya. Twaishiba shani ico?
Ukupuulama kwa Cipuna ca Bufumu ca kwa Yehova ica mu Muulu
19 Cinshi ifi fibumbwa ficitako icikope? Icimonwa cashimikwe na kasesema umbi, Esekiele, citwaafwa ukusanga icasuko. Esekiele amwene Yehova naikala pa cipuna ca bufumu pe celeta lya mu mulu, ilyashindikwe ku fya mweo fyakwete imimonekele iyapala kuli iyo yalondololwa kuli Yohane. (Esekiele 1:5-11, 22-28) Pa numa, Esekiele na kabili amwene cilya cipuna ca bufumu ce celeta na cishindikwa ku fya mweo. Iyi nshita, nangu cibe fyo, aloseshe ku fya mweo pamo nga bakerubi. (Esekiele 10:9-15) Ifya mweo fine ifyo Yohane amwene filingile ukwimininako bakerubi abengi aba kwa Lesa—ifibumbwa fya cifulo ca pa mulu mu kuteyanya Kwakwe ukwa ku mupashi. Yohane te kuti acitontonkanye ukukanabe ca lyonse ukumona bakerubi beminine mu kupalamina ku buntu bwa kwa Yehova, apo mu mitantikile ya mwi hema lya pa kale, bakerubi babili aba golde balangishiwe pa nkupiko ya cipao ca cipingo, iyaleimininako icipuna ca bufumu ca kwa Yehova. Ukufuma pa kati ka aba bakerubi, ishiwi lya kwa Yehova lyalepeela amakambisho ku luko.—Ukufuma 25:22; Ilumbo 80:1.
“Mona! Inkalamo ya Mukowa wa kwa Yuda”
5 Inkalamo yaishibikwa ukuti yalishipa. Bushe mwalimonapo inkalamo iikalamba iyilume? Nga mwaliimonapo, mufwile mwaliko apatali, limbi mwali ku nse ya cifulo basungilamo inkalamo. Lelo kwena mufwile mwalyumfwile umwenso. Nga mwalolesha ici cinama pa menso, icinama icishaikulila kabili ica maka, e lyo na co camulolesha, awe kuti mwamona ukutila takwaba nangu cimo ico ici cinama cingatiina. Baibolo ilanda pa ‘nkalamo, ukuti yalikwatisha amaka pa finama kabili taifulumuka pa cinso ca mulwani nelyo umo.’ (Amapinda 30:30) Ifi e fyo na Kristu ashipa, kwati ni nkalamo.
6 Nomba natulande pa fintu fitatu umo Yesu alangilile ukuti alishipa kwati ni nkalamo: ifyo atungilile icine, ifyo aali uwa mulinganya, ne fyo acitile ilyo bamulwishishe. Twalamona no kuti ifwe bonse kuti twapashanya Yesu ukushipa, nampo nga twalishipa nelyo iyo.