Bushe Baibolo Itila Armagedone Cinshi?
“Ifibanda . . . fyaile ku shamfumu sha ba pano isonde shonse . . . , kabili fyashilonganike ku cifulo iciitwa mu ciHebere Armagedone.”—UKUSOKOLOLA 16:14, 16.
ARMAGEDONE lishina lya cifulo. Lelo cimoneka kwati takwatalile ukuba incende ya cine cine iya musango yu.
Nomba bushe ishiwi lya kuti “Armagedone” lyalola mwi? Kabili mulandu nshi abantu batontonkanishisha ukutila lilosha ku fintu pamo nga inkondo?
Ukulonganikwa ku Cifulo Iciitwa Armagedone
Ishiwi lya ciHebere ilya kuti Har-Magedone lipilibula ukuti “Ulupili lwa Megido.” Nangu ca kutila takwali ulupili lwa cine cine ulwa Megido, incende ya Megido yena e ko yaba. Yabela pa mampaatu ya misebo lwa ku kapinda ka ku kuso, aka ncende abena Israele baleikalamo. Mupepi ne yi ncende, abantu balelwilapo inkondo ishingi ishikalamba. Kanshi abantu nga baumfwa ishina lya kuti Megido, ilingi baletontonkanya pa nkondo.a
Nomba umulandu wine wine uo incende ya Megido yacindamine, te nkondo balelwilapo, lelo mulandu balelwila. Megido yali mu Calo ca Bulayo ico Yehova Lesa apeele abena Israele. (Ukufuma 33:1; Yoshua 12:7, 21) Abalaile ukuti ali no kubacingilila ku balwani babo, kabili ifi fine e fyo acitile. (Amalango 6:18, 19) Ku ca kumwenako, ni pa Megido e po Yehova apuswishe abena Israele mu cisungusho ku bashilika ba Mfumu Yabini iya bena Kanaani e lyo na ku mukalamba wakwe uwa bashilika Sisera.—Abapingushi 4:14-16.
Kanshi ishiwi lya kuti “Armagedone” limininako icintu icacindama. Lilosha ku bulwi ubo Lesa akalwa ne shamfumu.
Ukusesema ukwalembwa mwi buuku lya Ukusokolola kulanda pa nshita iipaleme ilyo Satana ne fibanda fyakwe bakalenga amabuteko ya pano calo ukulonganika abashilika babo. Ukucita ifi kukaba kulwisha abantu ba kwa Lesa no mulimo wabo. Uku kusansa kukafumamo imfwa sha bantu abengi nga nshi ilyo Lesa akonaula abakemina abantu bakwe.—Ukusokolola 19:11-18.
Mulandu nshi Lesa, uo Baibolo yalondolola ukuti “uwa nkumbu, uukokola ukukalipa kabili uwafulisha icikuuku,” akepaila abantu bafula ifi? (Nehemia 9:17) Pa kwishiba ico Lesa akacitila ifi, tulingile ukwasuka aya mepusho yatatu: (1) Nani akatendeka iyi nkondo? (2) Cinshi cikalenga Lesa ukwiminamo? (3) Bushe cikaba shani kwi sonde na ku bantu ilyo iyi nkondo ikesa?
1. NANI AKATENDEKA IYI NKONDO?
Lesa te ukatendeka iyi nkondo ya Armagedone. Lelo akapokolola abantu bakwe ku bakafwaya ukubonaula. Abakatendeka iyi nkondo “shamfumu sha ba pano isonde shonse,” e kutila bakateka ba pano calo. Mulandu nshi bakasanshila abantu ba kwa Lesa? Pantu Satana akalenga amabuteko no tubungwe twa bashilika ukwimina abapepa Yehova Lesa.—Ukusokolola 16:13, 14; 19:17, 18.
Pa mulandu wa kuti mu fyalo fimo abantu balipeelwa insambu sha maisosele na maipepele, kuti camoneka kwati te kuti cicitike ku mabuteko ukucefyako ishi nsambu nelyo fye ukufumyapo imipepele yonse. Lelo ica musango yu calicitike mu ma 1900 kabili cilacitika na muno nshiku mwine.b Na lyo line paliba ubupusano bubili ubukalamba pa kusansa kwacitike ku numa no kukacitika pa Armagedone. Ica kubalilapo, uku kusansa kukaba fye isonde lyonse. Ica bubili ca kuti ifyo Yehova Lesa akacita pa Armagedone fikacila pa fyo acitile ku numa. (Yeremia 25:32, 33) Baibolo ilondolola ubu bulwi ukuti “ubushiku bukalamba ubwa kwa Lesa Wa Maka Yonse.”
2. CINSHI CIKALENGA LESA UKWIMINAMO?
Yehova eba abamupepa ukuba aba mutende no kutemwa abalwani babo. (Mika 4:1-3; Mateo 5:43, 44; 26:52) Kanshi ilyo abantu ba kwa Lesa bakabasansa, tabakabuule ifyanso pa kuti bakaipokolole ku balwani babo. Nga ca kuti Lesa tapokolwele abantu bakwe, ninshi bonse kuti babepaya. Kanshi ilyo abantu bakwe bakabemina, ishina lya kwa Yehova Lesa likabimbwamo. Nga ca kuti abalwani ba kwa Lesa baonaula abantu bakwe, kuti camoneka kwati Yehova takwata ukutemwa, umulinganya, nelyo amaka. Nomba Lesa te kuti aleke ica musango yu ukucitika!—Amalumbo 37:28, 29.
Lesa tafwaya ukonaula umuntu uuli onse, e mulandu wine atusokela libeela ifyo akacita ku ntanshi. (2 Petro 3:9) Ukubomfya Icebo cakwe Baibolo, alitweba ukuti ilyo abantu bakwe balebasansa, alebapokolola. (2 Ishamfumu 19:35) Na kabili Baibolo isoka ukuti ku ntanshi ilyo Satana na bantu bakwe ababipa bakasansa abantu ba kwa Lesa, Yehova na kabili akabomfya amaka yakwe ku konaula abalwani bakwe. Na kuba, kale sana Icebo ca kwa Lesa calisobele ukuti Yehova akonaula ababifi. (Amapinda 2:21, 22; 2 Abena Tesalonika 1:6-9) Pali iyi nshita, abakasansa abantu ba kwa Lesa bakeshiba ukuti nangu cibe shani, uo balelwa nankwe ni Lesa Wa Maka Yonse.—Esekiele 38:21-23.
3. FINSHI FIKAFUMA MULI IYI NKONDO?
Inkondo ya Armagedone ikalenga abantu abengi nga nshi ukupusuka. Na kuba, e ikalenga pe sonde pakabe umutende.—Ukusokolola 21:3, 4.
Ibuuku lya mu Baibolo ilya Ukusokolola lilanda pe “bumba ilikalamba” ilishingapendwa ilikapusuka iyi nkondo. (Ukusokolola 7:9, 14) Lesa akabomfya aba bantu ukuwamya isonde pa kuti likabe Paradaise nga filya fine Yehova afwaile ukuti libe pa kutendeka.
Bushe twalishiba ilyo abantu ba kwa Lesa bakabasansa?
[Amafutunoti]
a Caliseeka ku bantu ukutontonkanya pa nkondo nga baumfwa ishina lya cifulo cimo. Ku ca kumwenako, abantu nga balelanda pa musumba wa Hiroshima uwa mu Japan, uwaonaike lintu baponeshepo ibomba ilikalamba, batontonkanya pa nkondo ya manyukiliya.
b Icacitike mu Germany umo baipeye abantu abengi nga nshi e cilanga ukuti amabuteko yalafwaya ukulofya imipepele nelyo imitundu imo. Ilyo ubuteko bwa Soviet Union bwaleteka, imipepele iingi mu U.S.S.R. nayo baliinyantilile sana. Belengeni icipande caleti “Abantu ba Mutende Baisosela Ifyo Basuminamo,” mu Ulupungu lwa kwa Kalinda ulwa May 1, 2011. Abalemba iyi magazini ni Nte sha kwa Yehova.
[Icikope pe bula 6]
Yehova Lesa alipokolwele abantu bakwe ku kale
[Icikope pe bula 7]
Yehova na kabili akapokolola abantu bakwe pa nkondo ya Armagedone