Ukulubulwa pa Kusokololwa kwa kwa Yesu Kristu

“Sekeleleni; ukuti na mu kusokololwa kwa bukata bwakwe, mukasekelele no kwanga.”—1 PETRO 4:13.

1. Ni shani fintu Yehova anonsha ababomfi bakwe?

YEHOVA alinonsha Inte shakwe mu kuba ne fya bupe ifingi. Pamo nga Kasambilisha wesu Uwakulisha, alitubuutusha no mwisulo wa kwishiba ukukuma ku kufwaya kwakwe ne mifwaile. Ukupitila mu mupashi wakwe uwa mushilo, alikusha muli ifwe amaka ya kusanika ulubuuto mu kuba no kushipa. Umutumwa wapuutwamo Paulo atweba pali 1 Abena Korinti 1:6, 7 ukuti: “Ubunte bwa kwa Kristu bwaikashiwe muli imwe. E ico imwe mwaba abashipelebela ku ca kusenamina nangu cimo, pa kuba abalolela ukusokololwa kwa kwa Shikulwifwe Yesu Kristu.”

2. Cilolelo nshi ica kusekelela ico “ukusokololwa kwa kwa Shikulwifwe Yesu Kristu” kutambika?

² “Ukusokololwa kwa kwa Shikulwifwe Yesu Kristu”—cinshi cintu ico cipilibula? Cilosha ku nshita lintu Yesu asokololwa nge Mfumu ya bukata, ukubuule ncitilo ukulambula abakonshi bakwe aba busumino no kuputunkanye cilandushi pa bashipepa. Nga fintu 1 Petro 4:13 alangilila, ikaba ni nshita ya Bena Kristu basunga bumpomfu abasubwa no mupashi na banabo ba bucishinka abe bumba likalamba ‘ukusekelela no kwanga,’ pantu cilangilila impela ya micitile ya fintu iya kwa Satana.

3. Ni shani fintu twingeminina abashangila, nge fyacitile bamunyinefwe mu Tesalonika?

³ Ilyo ilya nshita ilepalamina, Satana mu cipyu cakwe alengilishako ukutitikisha pali ifwe. Ukupala inkalamo iilelila, alesha ukutulya. Tufwile ukwiminina abashangila! (1 Petro 5:8-10) Bamunyinefwe mu Tesalonika wa pa kale, lintu baali abapya mu cine, baculile amacushi ayapala kuli ayo ayapitamo abengi aba Nte sha kwa Yehova ilelo. E ico, amashiwi ya mutumwa Paulo kuli bene yalibamo ubupilibulo kuli ifwe. Alembele ati: “Cabe calungama kuli Lesa ukubwesesho bucushi ku balemucusha, na kuli imwe, mwe balecushiwa, ukutaulukila pamo na ifwe, ilyo Shikulu Yesu akasokololwa ukufuma mu muulu pamo na bamalaika ba maka yakwe mu mulilo uulebilima, ukucite cilandushi ku bakaano kwishiba Lesa, na ku bashinakila mbila nsuma ya kwa Shikulwifwe Yesu.” (2 Abena Tesalonika 1:6-8) Ee, ukutauluka kukesa!

4. Mulandu nshi bashibutotelo bawaminwa ubupingushi ubukaputunkanishiwa pa kusokololwa kwa kwa Yesu?

⁴ Mu nshita ya kwa Paulo ubucushi ubwingi bwalengelwe ne ntungulushi sha butotelo isha ciYuda. Mu kupalako ilelo, ukukaanya ku Nte shatemwa umutende isha kwa Yehova ilingi line kwaluminishiwa na abo abatungo kwimininako Lesa, ukucilisha bashibutotelo ba Kristendomu. Aba babepekesha ukwishiba Lesa, lelo balakaana “Yehova umo” uwa mu Baibolo, ukupyanikisha pali wene Bulesa Butatu ubwa cimpa. (Marko 12:29, NW) Tabomfwila imbila nsuma iya kwa Shikulwifwe Yesu, ukulolesha ku kuteka kwa muntu ku kutauluka no kukaane mbila nsuma iya Bufumu bwa kwa Kristu ubuleisa ubwa bulungami. Aba bonse bakakaanya ba butotelo bafwile ukuloba pa nshita “Shikulu Yesu akasokololwa ukufuma mu muulu”!

‘Ukwisa’ kwa kwa Yesu Kristu

5. Ni shani fintu ukusokololwa kwa kwa Yesu kwalangililwa mu kumonekesha pali Mateo 24:29, 30?

⁵ Kulya kusokololwa kwalangililwa mu kumonekesha na Yesu pali Mateo 24:29, 30. Mu kulondolola imbali shalekanalekana isha cishibilo ca kubapo kwakwe ne ca kusondwelela kwa micitile ya fintu, atila: “Akasuba kakafiishiwa, no mweshi tawakabalike, intanda shikapona mu muulu, ne fya maka fya mu muulu fikatenkaniwa.” Pali ilya nshita “kukamoneka ne cishibilo ca Mwana wa muntu mu muulu.” Inko sha pe sonde “shikapumapo imisowa, no kumono Mwana wa muntu [Imfumu ya kwa Lesa iya buMesia] aleisa pa makumbi ya mu muulu na maka yakalamba no bukata.” Uku ‘kwisa,’ er·khoʹme·non mu ciGreek, kulosha ku kumoneka kwa kwa Yesu nga Kebela wa kwa Yehova.

6, 7. Ni shani caba ukuti “ilinso lyonse likamumona,” kabili ni bani basanshiwamo muli ci?

⁶ Uku ‘kwisa’ kwalondololwa na kabili no mutumwa Yohane pa Ukusokolola 1:7, apo atila: “Moneni, aleisa na makumbi.” Oh, balya balwani mu cituntulu tabakamone Yesu na menso yabo aya cine cine, pantu “amakumbi” cilepilibulo kuti esa mu kukanamoneka ku kuputunkanya ubupingushi. Nga ca kuti abantunse fye bali no kumona ubukata bwakwe ubwa ku muulu mu kuba na menso yabo aya fye, kuti bapofwishiwa, kwati fye ni fintu Sauli, pa kuya ku Damaseke, apaminwe no bupofu lintu Yesu wakatamikwa amonekele kuli wene mu kubyata kukalamba ukwa lubuuto.—Imilimo 9:3-8; 22:6-11.

⁷ Ubulondoloshi bwa Ukusokolola bulondolola ukuti “ne linso lyonse likamumona, na balya abamulashile, ne mikowa yonse ya pano nse ikamupuminapo imisowa.” Ici cilepilibulo kuti bakakaanya ba pe sonde bakeluka mu bonaushi ukuti Yesu alepongolola pali bene ukuti naisa na maka no bukata bukalamba pamo nga Kaputunkanya wa kwa Yehova. Mulandu nshi aba balwani balondolwelwa pamo nga “abamulashile”? Cili pa mulandu wa kuti imibele yabo iya cilulo ukulola ku babomfi ba kwa Yehova ilelo yapala ilya iya bakapakasa ba kwa Yesu. Mu cine cine, ‘bakamupuminapo imisowa.’

8. Kusoka nshi bonse babili Yesu na Paulo bapeela ukukuma ku bonaushi bwa kupumikisha?

⁸ Ni shani fintu bulya bushiku bwa cilandushi ca kwa Yehova bukesa? Mu busesemo pali Luka icipandwa 21, Yesu alondolola ifya kuponako fyabamo akayofi ifyabomba nge cishibilo ca kubapo kwakwe ukutula 1914. Lyene, mu Lu 21 fikomo 34 na 35, Yesu asoko kuti: “Muyangwe, epali imitima yenu yalemenenwa ku buliili no kukolwakolwa na masakamika ya bwikashi buno, no bushiku bulya bwaisa pali imwe no kupumikisha kwati citeyo; pantu cikesa pali bonse abaikala pano nse ponse.” Ee, bulya bushiku bwa cilandushi ca kwa Yehova bwisa mu kupumikisha, ilyo line! Umutumwa Paulo akosha ici pali 1 Abena Tesalonika 5:2, 3, ukusoso kuti: “Ubushiku bwa kwa [Yehova, NW] bukesa ngo mupupu ubushiku. Ilyo balesosa, abati, Mutende [no mutelelwe, NW], e lyo uboni ubwa kupumikisha bwabemina.” Nelyo fye ni nomba inko shilelanda pa lwa mutende no mutelelwe no kutubulula ukukosha United Nations ukuceeceeta incende shilimo imbuli ukupitila mu maka ya bashilika.

9. Ni bani “ulubuuto lusaamina,” kabili mulandu nshi?

⁹ Mu 1Th 5 fikomo 4 na 5, umutumwa atwalilila ukutwebo kuti: “Lelo imwe, mwe bamunyinefwe, tamuli mu mfifi aba kuti Ubushiku bulya bumupumikishe ngo mupupu; pantu muli bana ba lubuuto bonse, bana ba kasuba. Tatuli ba bushiku, nangu ba mfifi.” Tulasekelela ukuba abana ba lubuuto—bakasenda ba lubuuto kuli bambi abafuluka umutende wa cine no mutelelwe mu calo cipya ica kwa Lesa. Pa Ilumbo 97:10, 11, tubelengo kuti: “Mwe batemwa Yehova, pateni ububi; alinde mitima ya babile bakwe, abapokolola mu minwe ya babifi. Ulubuuto lusaamina abalungama, na ku batambalale mitima kusaamino kusekelela.”

Ukukonkana kwa fya Kuponako

10. Cishibisho nshi ica mu kubangilila tulingile ukumfwila ukukuma ku bushiku bwa kwa Lesa ubwa kulubulula? (Ukusokolola 16:15)

¹⁰ Cinshi cikaba e kukonkana kwa fya kuponako lintu ubucushi bukalamba bwabalamuka? Natwalukile ku Ukusokolola icipandwa 16. Moneni, nga fintu calondololwa mu Re 16 fikomo 13 ukupulinkana ukufika ku 16, ukuti imipashi yakowela, iya fibanda ilonganika inko sha pe sonde ku Armagedone, ukulwa kwa bushiku bukalamba ubwa kwa Lesa Wa maka yonse. Na kabili, ukwisa kwapala umupupu ukwa bushiku bwa kulubulula kwakomailwapo, kabili twasokwa ukwikala abalola—ukubake fya kufwala fyesu ifya ku mupashi ifitwishibisha kwi pusukilo. Inshita naifika iya kupingula abantu na bantu ba pe sonde, inko, kabili—no muntu umbi. Ni ani uyo?

11. Ni shani fintu umwanakashi wa pa Ukusokolola 17:5 aishibisha umwine?

¹¹ Cili mwanakashi wa mampalanya uwaesha mu cituntulu ukuilenga umwine ‘kanabesa.’ Alondololwa pa Ukusokolola 17:5 nga “[ica nkama: Babiloni Mukalamba, NW], nyina wa banakashi bacilende kabili wa fya muselu fya pano nse.” Lelo taaba na kabili ica nkama ku Nte sha kwa Yehova. Aliishibisha umwine mu kulengama ngo buteko bwa calo ubwa butotelo bwa bufi, ubo ifyakaniko fya Kristendomu fyapanga ulubali lukalamba lwa buko. Ifya kuselausha mu menso ya kwa Yehova fyaba kuyobeka kwakwe mu milandu ya bupolitiki, ‘ukukolwa kwakwe umulopa wa ba mushilo’ pa kupakasa Abena Kristu ba cine, no kuba kwakwe uwashingamwa ku mulopa “wa bonse abaipaiwe pe sonde,” ukusanshako ukucila pa mamilioni umwanda umo abaipaiwa mu nkondo sha muli uno mwanda wa myaka walenga 20 weka.—Ukusokolola 17:2, 6; 18:24.

12. Mulandu nshi ifyakaniko fya Kristendomu fyabela ifyasenukwa?

¹² Icabipisha pali fyonse, ifyakaniko fya Kristendomu fyalileta umusebanya pe shina lya kwa Lesa untu muli bubumbimunda fitunga ukwimininako. Fyalisambilisha amano ya buntunse aya cina Babiloni na ya cina Greece mu cifulo ca Cebo casanguluka ica kwa Lesa kabili fyalisangwilako ku kuulungana kwa mibele ukwa nko shonse fye pa kusuminisha imisango ya bumi iya mulekelesha iisuusha ifishinte fya Baibolo. Aba makwebo ya bucenjeshi abafunuka pa kati kabo balisenukwa ku mashiwi ya pali Yakobo 5:1, 5 aya kuti: “Yangu! mwe ba fyuma, lileni no kuwelesha pa fya bulanda ifikamwishila. Mwaikala aba cisenena pano isonde, no kusenkema; mwainye mitima yenu mu bushiku bwa kwipayaulwa.”

Ukulubukako Kuli Babiloni Mukalamba!

13. Ni shani fintu ukusansa kwa kwiswila ukwa bucushi bukalamba kwisa, kabili lipamfya nshi lyakomailwapo pa Ukusokolola 18:4, 5?

¹³ Ukusansa kwa kwiswila ukwa bucushi bukalamba kwisa pamo no kuputunkanya kwa bupingushi bwa kwa Yehova pali Babiloni Mukalamba. Ukusokolola 17:15-18 mu kumonekesha palondolola “itontonkanyo” (NW) lya kwa Lesa—ukupindulule “nsengo ikumi,” imilalo ya maka ukufuma mu kati na nkati ka “ciswango” ca United Nations cabamo inko ishingi, ku kumufumyapo. “Insengo ikumi isho umwene, shene ne ciswango fikapata uyo cilende, fikamupomona, no kumucito bwamba; fikalya no mubili wakwe, no kumulungulushisha mu mulilo. Pantu Lesa abika mu mitima ya fiko ukucite caba mu mutima wakwe.” Te ca kupapa ishiwi lya mu muulu lyabilikisha ukusoka kwe pamfya pa Ukusokolola 18:4, 5 ukuti: “Fumenimo muli wene, mwe bantu bandi, epali mwawilako mu membu shakwe, epali mwakumako ku fikunka fyakwe: pantu imembu shakwe nashilundikana ukufika na mu muulu, na Lesa naibukishe fibi fyakwe.” Ubwite bwalitwalilila: Putuleniko ukwikatana konse no butotelo bwa bufi, ilyo tacilaba kucelwa!

14. Ni bani bakaloosha pa kupomonwa kwa Babiloni Mukalamba, kabili mulandu nshi?

¹⁴ Ni shani fintu icalo cikamona ukupomonwa kwa Babiloni Mukalamba? Akatalamukila, bapolitishani babola—“ishamfumu sha pe sonde”—shaumfwa ubulanda pali wene pantu basangile pa myanda ya myaka ubuseko bwa bonse mu bulalelale bwabo ubwa ku mupashi. Na kabili abalelila no kulilishikila pali wene bali bantu bafunuka aba makwebo, “aba makwebo . . . abanonkele ifyuma muli wene.” Aba na bo bene baitalusha ukufuma kuli wene, ukusoso kuti: “Iye, iye, umusumba ukalamba, uwakupene isha kolokondwe ne shakashikila ne shakashika ce, no kusaame fya golde na mabwe ayaumo mutengo na bamargariti. Ico muli ora umo wine fyalipomwenwe ifya bucindami ifyabe fi.” Ifiyembo fyonse ifya fya kufwala fye calici na bukatebebe bwa fikuulwa fikalamba ifya macalici fikaya kuli pe na pe! (Ukusokolola 18:9-17) Lelo bushe uuli onse akaloosha Babiloni Mukalamba?

15, 16. Mulandu nshi wa kusekelela abantu ba kwa Lesa bakakwata?

¹⁵ Ukusokolola 18:20, 21 kwaasuka ukuti: “Sangalaleni pali wene, mwe ba mu muulu. Mwe ba mushilo na batumwa na bakasesema, sangalaleni, ico Lesa namulandula kuli wene.” Ukupala impelo nkalamba iyafubulwa muli bemba, “e fyo umusumba ukalamba, [Babiloni, NW] [ukaba naufubulwa] pa nshi fubu, no kumoneka kabili nakalya.”

¹⁶ We mulandu wa kusekelela! Ukusokolola 19:1-8 kushininkisha ici. Imiku ine ukubilisha, “Lumbeni Jah, imwe mwe bantu!” (NW), kwaumfwika ukufuma mu muulu. BaAleluya ba kubalilapo batatu batasha Yehova pantu aputunkanya ubupingushi bwalungama pa mwanakashi cilende wabipisha, Babiloni Makalamba. Ubuteko bwa calo ubwa butotelo bwa bufi tabulipo na kabili! Ishiwi lyaisa ukufuma ku cipuna ca Bufumu ica kwa Lesa, ukusoso kuti: “Tondeni Lesa wesu amalumbo, mwe basha bakwe bonse, mwe bamutiina abanono na bakalamba.” Fintu tukaba ne shuko ukwakana muli lulya lwimbo!

Ubwinga bwa Mwana wa Mpaanga

17. Ukulinganya Ukusokolola 11:17 na 19:6, ni mu fyashingulukako nshi fibili Yehova atampila ukuteka nge Mfumu?

¹⁷ Aleluya walenga bune aletako umutwe wa lyashi umbi ukuti: “[Lumbeni Jah, imwe mwe bantu, pantu Yehova, NW] Lesa wesu wa maka yonse ateka.” Lelo bushe iciputulwa capalako ica lwimbo tacabuulilwe pa Ukusokolola 11:17? Palya tubelengo kuti: “Twatoota kuli imwe, mwe [Yehova, NW] Lesa, wa maka yonse . . . ico mwabuula amaka yenu yakalamba, no kube Mfumu.” Ee. Nangu cibe fyo, amashiwi yashingulukako aya Ukusokolola 11:17 yalosha ku kuleta kwa kwa Yehova Ubufumu bwa buMesia mu 1914 ku “kucemene nko shonse ku nkonto ya cela.” (Ukusokolola 12:5) Ukusokolola 19:6 kwaba mu mashiwi yashingulukako aya konaulwa kwa Babiloni Mukalamba. Mu kuba no kufumishiwapo kwa butotelo bwapala umwanakashi cilende, Bulesa bwa kwa Yehova bwaebelwa kuli pe na pe. Ukupepa kwa wene nga Mulopwe Wapulamo kabili Imfumu kukaanana nomba ku ciyayaya conse!

18. Ukufumyapo Babiloni Mukalamba kwisula inshila ku kubilisha nshi ukwa kwanga?

¹⁸ E ico, ukubilisha kwa kwanga kuti pambi kwacitwa ukwa kuti: “Tusekelele no kwanga, tupeele no mucinshi kuli [Jah]: ico bwishile ubwinga bwa Mwana wa mpaanga, no mukashi wakwe naipekanya; kabili umukashi apeelwe ukufwale sha kolokondwe ishabeeka ishawama (pantu isha kolokondwe milimo iyalungama ya ba mushilo).” (Ukusokolola 19:7, 8) Lintu abasubwa abacili pe sonde bakapokelela ukubuuka kwabo ukwa ku muulu tacalondololwa. Lelo twalyebekeshiwa mu mashiwi yashingulukako pano ukuti ukwakana kwabo mu bwinga bwa Mwana wa mpaanga, Kristu Yesu, kukaba ni nshita ya nsansa, kabili ukucilishe fyo apantu bakaba nabaimwena abene ukucendwa kwa mwanakashi cilende wabipisha, Babiloni Mukalamba.

Icalo ca kwa Satana Caonaulwa

19. Ca kucitika nshi cimbi icalondololwa pa Ukusokolola 19:11-21?

¹⁹ Kabalwe wabuuta uwalumbwilwe ntanshi pa Ukusokolola 6:2 amoneka na kabili. Tubelenga pa Ukusokolola 19:11 ukuti: “No wikelepo [pali kabalwe wabuuta] uwitwa Wa cishinka kabili Wa cine; na mu bulungami e mo alepingwila no kulwa.” Muli fyo “IMFUMU YA SHAMFUMU KABILI SHIKULU WA BASHIKULU” anina ku kuume nko na ku kunyanta “umwa kukamine myangashi umwa cipyu ca bukali bwa kwa Lesa wa maka yonse.” “Ishamfumu sha pe sonde, ne milalo ya shiko” balonganine busha ku kulwa ubulwi bwa Armagedone. Uwanina pali kabalwe wabuuta apwishishisha ukucimfya kwakwe. Tapali icishele ica kuteyanya kwa pe sonde ukwa kwa Satana.—Ukusokolola 19:12-21.

20. Cinshi caponena Ciwa umwine?

²⁰ Lelo ni shani pa lwa kwa Ciwa wine? Pa Ukusokolola 20:1-6, Kristu Yesu alondololwa nga “malaika aleika mu muulu, ali no lufungulo lwa cilindi ca ku Mbo no munyololo ukalamba mu minwe yakwe.” Aikata iciŋwena, Icisoka cikote, uuli Ciwa kabili Satana, amukaka, amupoosa mu cilindi ca ku Mbo, kabili aisalako no kukomenena pali wene. Mu kuba na Satana ukufuma mu nshila kabili uushingaba na maka ya kulufya inko na kabili, Ukuteka kwa bukata ukwa Myaka Ikana Limo ukwa Mwana wa mpaanga na nabwinga wakwe kwatendeka. Takuli na kabili ifilamba fya bulanda! Takuli na kabili imfwa yafuma kuli Adamu! Takuli ukuloosha, takuli ukukuuta, takuli ukukalipwa! “Ifya ntanshi nafiya.”—Ukusokolola 21:4.

21. Ilintu tulelolela mu kupamfiwa ukusokololwa kwa kwa Yesu Kristu, cinshi cilingile ukuba umupampamina wesu?

²¹ Ilintu tulelolela mu kupamfiwa ukusokololwa kwa kwa Shikulwifwe Yesu Kristu, lekeni tulange ukupimpa mu kwebako bambi pa lwa malayo yabamo kutemwa aya Bufumu bwa kwa Lesa. Ukulubulwa kuli mupepi! Shi natuleya ku ntanshi, lyonse ukuya ku ntanshi, nga bana babuutushiwa aba kwa Shikulu Mulopwe Yehova!

Mu Kupitulukamo

◻ Cinshi cilangililo kuti ukusokololwa kwa kwa Yesu Kristu kuli mupepi?

◻ Ni shani fintu ubushiku bwa cilandushi ubwa kwa Yehova bukesa?

◻ Ni shani fintu “abatemwa Yehova” balingile ukumona imibele ya calo ca nomba?

◻ Cinshi cikaba e kukonkana kwa fya kuponako lintu ubucushi bukalamba bwabalamuka?

[Icikope pe bula 23]

Yesu ‘aisa na makumbi,’ mu kukanamoneka, ku kuputunkanya ubupingushi

[Icikope pe bula 23]

Mu kwangufyanya ubutotelo bwa bufi, imicitile ibifi iya kwa Satana, na Satana umwine fikaloba