Ifipusho Ukufuma ku Babelenga

◼ Bushe Abena Kristu bamo abasubwa bakapusunsuka “ubucushi bukalamba” ku kwikala pe sonde mu calo cipya pa ntanshi ya kusendwa ku mulu?

Mu kulungatika, Baibolo taisosa.

Abena Kristu baliba abasekelela pa nshita ntali mu mashuko yantu Lesa pambi engatambulwila kuli bene. (Imilimo 1:6) Ico e fintu ukucilisha caba mu nshita yesu ukutula pantu Ubufumu bwaimikwe. (Mateo 24:3, 24, 34) Mu kuba ne mpela ya iyi micitile ibifi ukwisa mu nshita yabo, Abena Kristu balipapa nampo nga bamo aba mu basubwa no mupashi kuti pambi baikala abomi ukupula mu “kulwa kwa bushiku bukalamba bwa kwa Lesa” no kubomba pe sonde pa nshita imo pa ntanshi ya kupokelela icilambu cabo ica ku mulu. (Ukusokolola 16:14) Baibolo tailanda ukuti ici cikacitika, nalyo line ifipasho fimo na masesemo fyalibuulwa ku kulangilila ukuti pambi kuti cacitika. Ukucila ukuba aba kupampamika, kuti twabebeta ku kumona ifyo Lesa akabomba ne fintu.

Ifya kuponako fimo ifya mu Baibolo fyalikwata ukulinganako pa numa pa kati ka bantu ba kwa Lesa. Ku ca kumwenako, twalishiba ukuti Yona aali mu cisabi cikalamba pa nshiku shitatu akasuba no bushiku. Abantu bamo kuti pambi bamona ici pamo fye nge ca kumwenako ca kupususha kwa bulesa, lelo Yesu asosele ukuti cali cipasho ca mu busesemo ica fintu aali no kuba mu nshishi pa ciputulwa ca nshita calinganako pa ntanshi ya kubuuka kwakwe. (Yona 1:17; Mateo 12:40) Ee, ica kukumanya ca kwa Yona cali musango wa mu busesemo. Mu kumfwika, ababomfi ba kwa Lesa balilolesha pa masesemo no bulondoloshi bwalembwa ubwa kulungatika ubwa Baibolo ku kumona nampo nga ifi kuti pambi fyalangilila fintu Yehova akabomba na kabili na bene.

Pamo nge ca kumwenako icibimbamo ubusesemo bwa Baibolo, The Watch Tower iya December 15, 1928, yalanshanye pali Mika 5:2-15. Ibuku lya kwa Mika lyabombele no kupomona kwa ‘bena Ashuri’ ukwa Samaria no kubwela kwa baYuda ukufuma ku kuluulwa mu Babiloni. (Mika 1:1, 5-7; 4:10) Lelo na kabili bwasontele ku fya kucitikako fya pa numa, pamo ngo kufyalwa kwa kwa Mesia mu Betlehemu. (Mika 5:2) Mika asobele ukuti pa numa ya kulubulwa kwabo ukufuma ku “Umwina Ashuri,” “abashalako ba kwa Yakobo” baali no kuba “ngo mume uufuma kuli Yehova” kabili ngo “musepela wa nkalamo mu fikunka fya mpaanga.” (Mika 5:6-8) The Watch Tower yacitile ukulandapo kuti: “Ici pambi kuti cabuulwa nge cilangililo ca kuti bamo aba mu bashalapo bakaba pe sonde nelyo fye pa numa Armagedone yalwiwa kabili lyene bakakwata umulimo umo na umbi uwa kucita mwi shina lya kwa Shikulu kabili kwi lumbo lyakwe no bukata.” Mona ululimi lwayana, ulwa kupelulula ulwabomfiwa mu kutendeka uku kucitikako: “Ici pambi kuti cabuulwa nge cilangililo.”

Ni shani pa lwa bulondoloshi bwalembwa ubwa Baibolo ubo pambi ubwingalingana no kupusunsuka kwa musango uyo pe sonde? Ica kumwenako cimo icapeelwa cikuma Noa no lupwa lwakwe. Noah alimonwa ngo ulepashanya Yesu muli ino nshita ya mpela. (Ukutendeka 6:8-10; Mateo 24:37) Pamo nga fintu Noa atungulwile umukashi wakwe na bana baume babo batatu na banafyala ukupula mu mpela ya ilya micitile ya pa kale, Kristu akapayanya ubutungulushi ku bashalapo be bumba lya kwa nabwinga wakwe na abo abasanguka abana ba kwa “Wishi wa nshita pe,” Yesu. Umukashi wa kwa Noa apusunswike Ilyeshi no kwakana mu kubukulula ukupepa kwa cine pe sonde lyasangululwa. Ukulingana pambi kuti kwaba kupusunsuka ukwingila mu calo cipya ukwa bashalapo be bumba lya kwa nabwinga.—Esaya 9:6, 7; 2 Abena Korinti 11:2; Ukusokolola 21:2, 9.a

Ubulondoloshi bumbi ubwalembwa ubwa mu Baibolo bwalimonwa na bo bwine ngo buletubulula ukuti bamo aba mu basubwa pambi kuti baikala abomi ukwingila mu calo cipya. Ku ca kumwenako, Yeremia apusunswike ubonaushi bwa Yerusalemu; “umuntu” uwali no lusengo lwa inki alishele ku kumona umulimo wa kuputunkanya ilyo talabwelela ku kupeela lipoti yakwe.—Esekiele 9:4, 8, 11.

Ukulandapo kwalicitwa pa lwa kucitikako kwa kuti bamo aba mu basubwa pambi kuti bapusunsuka ukwingila mu calo cipya kulacitwa mu kuba na mapange yasuma kabili mu lubuuto lwa fyatangililako ifya mu Baibolo ku kwesha ukumfwikisha amasesemo nelyo ifipasho ifingakwata ukulinganako kwa pa numa. Nga ca kuti casangwa ukuti takuli nangu bamo aba mu basubwa abashele pe sonde, takwakabeko umulandu wa kukanaikushiwa. Twalipokelela kale ukuti imilandu ya mu Baibolo ilomfwikishiwa mu kuwaminako ilyo inshita ilepita. Ku ca kumwenako, Ulupungu lwa kwa Kalinda ulwa January 15, 1982, lwalandile pali Mika 5:6-9 na kabili no kulondolola ukuti “abashalapo ba bena Israele wa ku mupashi tabakwata ukulolela ukufikila pa numa ya . . . Har–Magedone pa kuti babe ngo ‘mume’ wa kupembesula ku bantu.” Uku kulanshanya na kabili kwatambike ukucitikako kwa kuti abashalapo pambi kuti bapusunsuka inkondo ikalamba iya kwa Lesa kabili pa nshita imo “ukutwalilila ukuba ngo ‘mume’ wa kupembesula kwi ‘bumba likalamba’ ilya ‘mpaanga shimbi.’” Kuti twamona, nangu cingati ni fyo, ukuti ukupita kwa nshita no kwingilishako mu lubuuto lwa ku mupashi kuti fyakusha no kwalula ukumfwikisha kwesu ukwa busesemo nelyo ifilangililo fya Baibolo.—Amapinda 4:18.

Twalishiba ukuti Baibolo isuntinkanya ‘ukwisa kwa Mwana wa muntu’ no ‘kulonganikwa kwa basalwa ukufuma ku myela ine.’ (Mateo 24:29-31) Na kabili, mu kati ka “[kubapo, NW] kwa kwa Shikulu” mu maka ya Bufumu, abasubwa abalaala mu mfwa balabuushiwa ku bumi mu mulu. (1 Abena Tesalonika 4:15, 16) Aba abakakatikwa baba kulya ku kuba ulubali lwa mukashi wa Mwana wa mpaanga. Ni lilali ico cicitika?

Mwi buku lya Ukusokolola, bwangu bwangu fye pa numa lintu Yohane alanda ulwa kuputunkanya kwa kwa Lesa umwanakashi cilende wa butotelo, Babiloni Mukalamba, alondolola “ubwinga bwa Mwana wa mpaanga.” “Umwanakashi” wafiko, uwa bucisenene naseshiwa ukufuma pa mulola, kabili twamona “nabwinga, umukashi wa Mwana wa mpaanga” ‘apeelwe ukufwale shakolokondwe ishabeeka, isha busaka ishawama, icileimininako imilimo iyalungama ya ba mushilo.’ (Ukusokolola 18:10; 19:2, 7, 8; 21:9) Ubonaushi bwa Babiloni Mukalamba lubali lwa bucushi bukalamba. (Mateo 24:21; Ukusokolola 7:14) E co kuti capelululwa ukuti bamo abe bumba lya kwa nabwinga bakapusunsuka ubucushi bukalamba pamo ngo bushininkisho bwa kusuminisha kwa kwa Yehova no kucingilila. (Sefania 2:3; linganyeniko Mateo 24:22.) Nga ca kuti babakwa ifyo pe sonde, kuti batwalilila pano pene ukufikila Lesa asobolapo ukubasenda ku mulu.

Nangu cibe fyo, imipeelele yaba mu Ukusokolola tayaba mu muyano wa kukonkana kwakosesha. Kabili tacili kwati abashalapo banono aba mu basubwa bakakabilwa ku kutendeka icalo cipya, pantu kale kale balikansha amamilioni ya Bena Kristu ba bucishinka abakekala kuli pe na pe pe sonde. Mu kulinganako, Lesa kuti asenda abasubwa bakwe ku mulu bwangu bwangu fye pa numa ya bonaushi bwa Babiloni Mukalamba, ukwimika icisebele ku “bwinga bwa Mwana wa mpaanga” ukucitika. Bonse aba mushilo kuti muli ifyo bayakana na Kristu mu ‘kucemene nko ku nkonto ya cela’ mu ciputulwa cashalako ica bucushi bukalamba. (Ukusokolola 2:26, 27; 19:11-21) Nga ca kuti ifyo e fintu Lesa abomba ne fintu, bonse ba 144,000 kuti baba pamo na Yesu ku ‘kuteka na Kristu imyaka ikana limo.’—Ukusokolola 20:4.

Mu cishinka cili icawama ukuti abantu ba kwa Lesa baliba abasekelela mu kuswatuka mu kupenenga mu fintu wene akatungulula no kulambula ababomfi bakwe. (Linganyeniko 1 Petro 1:12.) Ici cibelebesha ukucetekela kwabo ukwa kuti ukufwaya kwakwe kuli no kucitwa. Nangu cingati te kuti kabili tatulingile ukuba aba kupampamika pa lwa mitubululo, kuti twalolesha ku ntanshi mu kupamfiwa ku cikacitika.

[Futunoti]