Umupampamina Wesu wa Kukonkelela Imikalile Iiteemuna Yehova
1 Icapulilemo pa Mabungano yesu aya “Imikalile ya Bukapepa” cali kusuminishanya kwa mu lyashi lya kusondwelela. Kwatendeke na mashiwi ya kuti: “Ifwe . . . tulesumina no mweo onse ukuti imikalile ya bukapepa e yawamisha ukwikalilamo.” Natwibukisheko ifishinka fimo ifyapulamo muli kulya kusuminishanya uko twasumine lintu twapundile ukuti, “EE!”
2 Natupingulapo ukutwalilila ukuba aba busaka pa ntanshi ya kwa Yehova kabili ababula akabi ku fya pano isonde. Tukatwalilila ukutangisha ukufwaya kwa kwa Lesa mu mikalile yesu. Pa kubomfya Icebo cakwe Baibolo nge ca kututungulula, tatwakapumbukile ku kwa kulyo nelyo ku kwa kuso, muli fyo ukushininkisho kuti inshila ya kwa Lesa yalipulamo pa nshila sha mu calo.
3 Iminshipendwa ya bantu muno calo balikaana imikalile ya bukapepa kabili balalobolola ifya kufumamo. (Yer. 10:23) Kanshi tufwile ukutwalilila ukusambilishiwa na Kasambilisha wesu Uwakulisha, Yehova, uutweba ukuti: “Iyi e nshila, e mo mwende.” (Esa. 30:21) Imikalile iiteemuna Yehova ukuikonka fye fintu yaba mu Malembo, yalipulamo mu nshila shonse. Pa kuti tukonkelele iyi mikalile, cili icacindama nga nshi ukubomfya fyonse fintu Yehova aletufunda.
4 Programu Wapulamo Uwa kwa Yehova Uwa Kusambilisha: Yehova alatusambilisha imifwaile ine ine iya bumi na fintu twingekala imikalile yawamisha. Alatusambilisha fintu twingawamya imikalile yesu mu mintontonkanya, mu mibele, na lwa ku mupashi. Alatusambilisha ifya kwikala mu mutende na bamunyinefwe, balupwa, na bantu bonse. Atusambilishisha mu citabo cakwe, Baibolo, na mu kuteyanya kwakwe.
5 Ukulongana kwesu ukwa cilonganino kwalicindama nga nshi ku kutusambilisha. Ilyo tusangwako lyonse no kwasukapo pa kulongana konse kusano, tulakanshiwa nga nshi ifya kuba abatumikishi ba mbila nsuma kabili tulasambilishiwa ifya kwikala bwino nga Bena Kristu. (2 Tim. 3:16, 17) Kasambilisha wesu Uwakulisha na kabili alatusambilisha amasomo ya bulesa pa kulongana kukalamba na mabungano. Ubuyo bwesu bufwile ukuba bwa kukanapuswa ku kulongana konse na malyashi, kulila fye ukulwalilila nelyo amafya yambi ayakakala tafiletulesha.
6 Shi natuletukuta ukutwalilila ukukonkelela imikalile ya bukapepa ukwabula ukunenuka, ne cifumamo Yehova alalumbanishiwa na ifwe tukamwenamo ku ciyayaya!—Esa. 48:17.