Isambililo 2

Isukulu lya Butumikishi bwa Teokrasi Lilanonsha

1-5. Kukansha nshi uko isukulu lya butumikishi lipayanya ku kutwaafwa mu mulimo wesu wa kuli Lesa?

¹ Ni shani fintu Yehova atukansha pamo nga babomfi bakwe ukuba aba kufumamo cimo mu butumikishi? Atukansha ukupitila mu kuteyanya kwakwe. Mu fyalo ifingi ukukansha kutendeka no kulamuka kwa citendekelo pamo nga ukusambilila ukubelenga. Kuli abo abasambililo kubelenga no kulemba, ulutampulo lukonkapo kulembesha mwi Isukulu lya Butumikishi bwa Teokrasi.

² Ili sukulu lipayanya ukukansha kwa pa fye ku butumikishi. Libombele cilonganino mu nshila shibili: (1) Umusambi umo umo apeelwa programu wa kusambilila uumwafwilisha ukuwamyako amaka yakwe aya kulonganya ifyebo, ukufilundulula no kufipeela mu kubamo kupelulula kuli bambi; kabili (2) icilonganino conse cipokelele fyebo fyakwatisho mutengo muli kosi wa programu wa mulungu umo umo. Ukutesekesha kwa ku mupashi ukwawamishiwa ne mibombele ya butumikishi e fingashininkishiwo kufumamo.

³ Programu mu calo cimo na cimo atantikwa ne ofesi lya musambo ilya Watch Tower Society kabili ukutantika kwa cila mwaka kulapayanishiwa. Programu kwena, ashintilila pa mpapulo shilipo mu lulimi nelyo indimi sha calo. Ashintilila apakalamba pali Baibolo.

⁴ Amalyashi ya kwaafwa ayafulilako yalapeelwa na basambi umulungu umo umo. Ilikalamba litwa ilyashi lya kufunda kabili lyalilepako kucila pa yabiye. Lipeelwa kuli munyina wakampuka, mu kuti icilonganino cinganonkelamo mu kukumanina muli lyene. Amalyashi yambi yepi kabili limbi kuti yapeelwa ku mwaume nelyo umwanakashi nge fyo ukutantika kwe sukulu pambi kwingapayanya. Limo ilya malyashi ya basambi ayepi, ukushintilila pa kutantika kwe sukulu, limbi kuti lyaba kubelenga ukufuma mu Baibolo. Amalyashi yambi kuti yalundulule mitwe ya malyashi yapeelwa kabili pambi ukupeelwa mu mitantikile ibomba, nga nailingana ne fyebo. Imbali shibombwapo na bankashi ilingi shiba mu mibele ya mipeelele ya mu butumikishi bwa ku ŋanda ne ŋanda, napamo ukulanshanya kwa pa cipempu ca kubwelelamo nelyo ukwa pa numa ye sambililo lya Baibolo, ubunte bwa mu lyashi, nelyo ukulanshanya ne filundwa fya lupwa lwa umo nelyo na kasabankanya umbi.

⁵ Mu filonganino finono ifyakwata abanakashi beka beka ifyebo fyonse kuti fyapeelwa nalyo line. Shani? Ku kulanda kwa kushimika, ukulanshanya pa kati ka bankashi babili, ifipusho ne fyasuko nelyo mu kubelenga fye ifyebo fyasabankanishiwa.

6. Milingo nshi ifwaikwa kuli kangalila we sukulu?

⁶ Kangalila we sukulu. Kangalila we Isukulu lya Butumikishi bwa Teokrasi alasontwa mu cilonganino cimo na cimo. Alingile ukuba ni kasambilisha wafikapo. Alingile ukukwato ubwishibilo busuma ubwa cine ca Baibolo no kwishiba kwa cine cine ukwa lulimi lwa basambi bakwe abengi. Akabilo kuba uwacenjela no wa cikuuku. Lwa ku mupashi, alingile ukuba “umukalamba.” Waba mulimo wakwe ukukulemba pamo ngo musambi, ukukupeela amalyashi no kukupeela ukufunda mu cikuuku kabili mu kukuulilila.

7. Fya kusangwilako nshi filangulukwa pa kupeela imbali sha malyashi?

⁷ Kangalila we sukulu alasunge calembwa ca balembwa mu sukulu, maka maka ku mifwaile ya kupeele mbali. Ishi mbali sha malyashi ilingi shipeelwa mu kulemba nangu fye imilungu itatu mu kubangilila. Ici cikupeela inshita ya kubebeta no kupekanye fyebo fya kuyapeela. Kangalila we sukulu alibukila ukuti kwabako abantu ba fipimo fyalekanalekana ifya masomo mu cilonganino, na muli ifyo apeele mbali mu kuba ne ci mu muntontonkanya. Tesha ukupeela umusambi munono umutwe wa lyashi uushingalinga uwa myaka ya bwaice. Afwayo kupeele shuko lya mu nshita ilyalingana ilya kwakana muli programu ku musambi walembwa umo umo.

8. Mulandu nshi uo bakalanda abasambi bapeelelwe cishibilo lintu inshita yabo yapwa?

⁸ Kwena, ilyo isukulu liletungululwa, lilingile ukuba mu nshita yapimwa. E co, lintu amalyashi ya basambi yacila mu nshita, kangalila we sukulu nelyo uulemwaafwa akapeele cishibilo. Umusambi limbi kuti apwishe sentensi alelanda kabili lyene alingile ukufuma pa cisebele.

9-12. Ni mu nshila nshi umo kangalila we sukulu alangisho buseko bwakwe mu kulunduluka kwa abo bapeela amalyashi pamo pene na bonse mu cilonganino?

⁹ Kangalila we sukulu alafunda umusambi umo umo pa ntanshi ya cilonganino conse, pantu bambi pa mbali ya uyo kalanda kuti banonkelamo ukufuma kuli kwene. Ukutasha lyonse kwaliba ukwalinga. Na kuba, kafunda akabo wapampamina pa kukukoselesha. Ukufunda kwa kukuulilila kukapeelwa pa fishinka fya kulungatika ifyatantikwa pali slipi wa Ukufunda kwa Milandile, ifishinka ifyo waipushiwe ukubombelapo. (Mona ifyebo fya kulonsha mwi Sambililo 20.) Kangalila we sukulu akabikako kubombesha ku kubeleshanya pa lwakwe no kukabila kobe pamo ngo musambi, kabili akabo wasekelela apakalamba mu kulunduluka kobe.

¹⁰ Na kabili abo wapampamina pa kulenga iciputulwa cimo na cimo ice sukulu ukube paalo kuli bonse mu cilonganino. Akalakukoselesha ukwakanamo ukufika apo wingapesha, ukulandapo mu kati ka kupitulukamo kwa lyonse ukwa pa kanwa no kwakana mu kupitulukamo kwa kulemba ukwa ku nshita ne nshita. Nga tawalembesha, akakukoselesha ukulembesha, ukukwafwilisha mu mafya yobe no kukulanga ifyo na iwe wingaba kalumba wafumamo cimo wa kwa Yehova.

¹¹ Kangalila we Isukulu lya Butumikishi bwa Teokrasi na kabili akwate shuko lya kukwafwilisha pamo ngo musambi walembwa nga ulekabilo kwafwilishiwa ne mbali shobe, ukukutandalila ku mobe uko ici cingaba icalinga. Nga takuli inshita yakumanina iya kupeela kuli ici, akepusha bamunyina bakosoka kabili bakalanda babelesha ukumwaafwa. Mwe bafyashi, na imwe bene, kuti mwayafwilisha apakalamba ku kulundululo kwaafwa kwa musango yo ku bana benu, te kubapekanishisha malyashi, lelo ukupeela imitubululo no kutungulula ukulosha ku kusapika kwingafwaikwa no kupekanya. Nga ulekansha kasabankanya umupya mu butumikishi bwa mwi bala, limbi kuti waipushiwa ukumwafwilisha mu kupekanye mbali shakwe sha mwi sukulu lya butumikishi.

¹² Laibrare we Isukulu lya Butumikishi bwa Teokrasi pa Ŋanda ya Bufumu aba pe samba lya bwangalishi bwa kwa kangalila we sukulu. Akacita apo engapesha ku kulangilila abapya ifyo bengabomfya ubutala bwa iko ubwa bwishibilo bwa Baibolo. Alingile ukutukuta ukumona ukuti impapulo sha Sosaite shonse isha nomba line, pamo ne fitabo fya kuloshako fimbi ifya kwaafwa, pa mashelufu, shasangwa ku basambi na kuli bambi.

13-17. Ni shani fintu ukulunduluka kwa basambi mu kwangufyanya kumoneka kuli bambi?

¹³ Ukumwenamo ku basambi. Lintu wapeelwo lubali mwi sukulu, pokelela lwene mu kucincila pamo ngo lwaisa kuli iwe ukupitila mu kuteyanya kwa kwa Yehova. Mu kupalako pokelela no kubomfya mu kuicefya konse ukufunda kwapeelwa. Imitubululo yapeelwa kuli iwe na kafunda kuti yabomfiwa mu kulanda kobe ukwa cila bushiku na mu butumikishi bobe. Pa kubombesha ku kusambilila no kubomfya ifyebo fipayanishiwa muli ili sukulu, ukamwenamo apakalamba.

¹⁴ Abo basangwako no kwakanamo lyonse muli programu we sukulu basango kuti ukulandapo kwabo pa kulongana kulawaminako apakalamba, no kwakanamo kwabo mu butumikishi bwa mwi bala kulacilapo kufumamo cimo. Kabili isukulu lipangasha abasambi baume ukupekanya no kupeela malyashi ayacincimusha no kukunta bakomfwa, nampo nga baletungulula imbali sha muli programu wa kulongana kwa mulimo nelyo kupeela amalyashi ya cintubwingi. Abengi, pamo nge ca kufumamo ca kukansha kwe Isukulu lya Butumikishi bwa Teokrasi, baliba na maka ya kupeelo bunte bwawamisha pa ntanshi ya filye na bakateka, ilintu bambi balilanda ku mabumba ya ku sukulu nelyo aya kwangalila capamo.

¹⁵ Umusambi na kabili akasanga ukuti, lintu alebomfya ukufunda apokelela pa malyashi ya basambi mu milandile yakwe ya cila bushiku na mu kulanshanya, ilya mibele ya milandile iyashikama, iyalubana ikafumishiwamo mu kupita kwa nshita. Nampo nga ni ku ncito ya ku mubili, ku sukulu lya cintubwingi nelyo ukuli konse kumbi, ukukanshiwa kwesu pamo nge Nte sha kwa Yehova mu kwangufyanya kulamoneka ku baletumona. Nga fintu magazini umo waishibikwa acilumbulwile ukuti: “Mu myeshi inono, Inte ishipya shilasambilila Baibolo sana ukucila pa fyo Abena Kristu abengi bacita mu bumi bwabo bonse. Kabili tacaba ca mankumanya fye ica kuti mupepi na bonse baba bakalanda abaicetekela kabili abatelela.”

¹⁶ Caliwama kuli umo umo uwesu mu cilonganino ukukwata ubuyo mu kuti twingapima ukulunduluka kwesu mu butumikishi. Amabuyo ya musango yo ilingi kuti yakakanishiwa mu kupalamisha ku cipimo ca kulunduluka kwa mwi Isukulu lya Butumikishi bwa Teokrasi. Ku ca kumwenako, bushe ulayumfwa ukuba uushaipangasha ukubwelela ku balesekelela no kwasuke fipusho fyabo? Ubwingi bwa fyebo fipeelwa no kulangililwa mwi sukulu kuti fyabomfiwa kuli iyi mibele.

¹⁷ Pa kuti twingamwenamo apakalamba, isukulu talilingile kumonwa pamo nga kosi wa fye uwa maminiti 45 uwa cila mulungu. Ukucila, nga ca kuti uli musambi wasakamanisha, ukafwaya ukukonkamo muli programu wa kusambilila kwa ku ŋanda no kupekanya, ukusanshako ukubelenga Baibolo no kusapika kumbi kwafwaikwa. Te bakalanda abasambi fye beka, lelo bonse fwe basangwa pa fiputulwa fye sukulu tukanonka ukwishiba na maka pamo nga batumikishi ba kwa Yehova nga twapekanya isambililo likabako uyo mulungu mu kubangilila.

18-20. Mulandu nshi tushingasuminishisha ukukanaicetekela kwa pa lwesu ukutubwesesha pa numa ukufuma ku kwakanamo mu kukumanina mwi sukulu?

¹⁸ Bonse balekoseleshiwa ukupeele cawamisha, ukucilisha ukutontonkanya pa lwa mifwaile ye sukulu. Tayaba kulangisha kwa mataki ukwa maka ya kulanda. Nelyo ukulangisha mabunake no kufilwa kwa bamo. Mu cine cine, inkuntu iyo tubombelamo ne mbali she sukulu ikapima apakalamba icipimo ca kumwenamo tukakwata. Lwaba lubali lwa mibombele ya kusambilisha iya kwa Yehova. Aletusambilisha no kutukansha ku mifwaile yakwe. Takwabako kukabila ku musambi uuli onse ukusakamana ifyo bambi balemumona, pantu tatwesha ukusekesha abantu nelyo ukuilinganya ku fipimo fya buntunse fye ifya kusambilisha ne milandile. Twaba abasekelela mu kunonka ukusuminisha kwa kwa Lesa ne paalo lyakwe pa mibombele yesu iya butumikishi.

¹⁹ Ca cine, bamunyina bamo na bankashi limbi kuti bayumfwa nge fyayumfwile Mose lintu atile kuli Yehova: “Ine nshili muntu wa kulondolole fyebo, nangu ni ku kale.” (Ukufu. 4:10) Lelo nga naukwate citetekelo ca kuti takwaba icishingacitwa kuli Lesa, kuti wacimfya uko kuyumfwa kwa mu kubangilila. (Mat. 19:26) Na kabili, kuti wapelululo kuti ukuwamyako ukuli konse mu maka yobe aya kulanda Icebo ca mweo kwalibo kwawaminwa ukubombesha konse kufwaikwa. Nelyo fye ukuwamyako kunono kuti kwafumamo kutungulula umo mu nshila ya ku bumi, kabili bushe ico te kuti cibe ica kulengo kusekelela?

²⁰ Imifwaile ikalamba iye Isukulu lya Butumikishi bwa Teokrasi yaba kukansha ku mulimo wa butumikishi. Shi na ube umo uwa bacinkupiti wa basangwako lyonse kabili abafwayo kumwenamo kwa liko, kabili lyene ukamona ipaalo lya kwa Yehova pa kubombesha kobe ku kulunduluka.—Fil. 3:16.