Isukulu lya Butumikishi bwa Teokrasi mu 2000
1 Isukulu lya Butumikishi bwa Teokrasi lyaliba lipaalo ilishaiwamina ku bantu ba kwa Yehova. Ukucila pa myaka 50, lyalyafwa abantu na bantu ukulundulula ukukampuka kwa kulanda ku cintubwingi no kuba bakasambilisha ba cine ca mu Baibolo. (Amalu. 145:10-12; Mat. 28:19, 20) Bushe kuti mwashimika ifyo isukulu lyamwafwa? Kuti lyatwalilila ukumwafwa na mu 2000 mwine nga mulelandako amalyashi no kucita umwabela ifyo mukalafundwa.
2 Amakambisho pa lwa malyashi ne mpapulo umukalafuma amalyashi fyaba pe bula lya kubalilapo ilya kutantika isukulu mu 2000. Ubutali bwa cila lyashi, umwa kufumya ifyebo, ifya kulanda ilyashi, ne fishinka fimbi fyalilondololwa mulya. Shi belengesheni amakambisho no kulayakonka.
3 Ukubelenga Baibolo Ukwa Cila Mulungu: Mu kutantika kwe sukulu, mwaba ukutantika kwa kubelenga Baibolo kubili ukwapusana. Kumo ni kulya ukwa lyonse ukwa kubelenga amabula nakalimo yasano aya Baibolo. Mulya e mufuma ifishinka fikalamba. Ukutantika kumbi ni kulya ukwalundwapo, kabili kwa kubelenga amabula nakalimo 10 mu Baibolo. Nga mulekonka uku kutantika kuti mwapwisha ukubelenga Baibolo onse mu myaka itatu. Kwena ca cine ukuti bamo kuti batemwa ukucishapo ukubelenga pali filya fyatantikwa, bambi na bo te kuti bakumemo. Mwilailinganya kuli bambi, imwe sekeleleni ukulingana na pa pelele amaka yenu. (Gal. 6:4) Icacindama kubelenga Icebo ca kwa Lesa cila bushiku.—Amalu. 1:1-3.
4 Nga mulefwaya ukulembesha mu Isukulu lya Butumikishi bwa Teokrasi, landeni na kangalila we sukulu. Shi pooseni amano ku kulanda amalyashi bakulamupa, kabili mwilafilwa ukulanda apabula no mulandu wine wine. Tesekesheni isukulu nge ca bupe ukufuma kuli Yehova. Pekanyeni bwino, nga bamupa ilyashi lipitulukenimo bwino bwino, landeni ukufuma pa nshi ya mutima, lyene mukamwenamo nga nshi muli ili sukulu lyaibela.