Ibakeni Kuli bu Simone!
SIMONE umwina Samaria alicindikwe sana mu bwikashi bwakwe. Aliko mu mwanda wa myaka uwa kubalilapo C.E., kabili abantu balecincimushiwa ku fya manga alecita ica kuti baletila: “Uyu e Maka ya kwa Lesa ayetwa Yakalamba.”—Imilimo 8:9-11.
Nangu cibe fyo, pa numa lintu Simone asangwike Umwina Kristu wabatishiwa, asumine mu maka yakulisha ukucila yantu alelangisha. Yali maka yapeelwe ku batumwa ba kwa Yesu, ayabalengele ukulapeela bambi ifya bupe fya cipesha amano ifya mupashi wa mushilo. Simone alikoseleshiwe ica kuti apeele abatumwa indalama no kulomba ukuti: “Mpeeleniko na ine amaka aya, ukuti uyo ningabikapo iminwe, apokelele Umupashi wa mushilo.”—Imilimo 8:13-19.
Umutumwa Petro akalipile Simone, ati: “Indalama shobe shiye pamo nobe mu bonaushi, ico utile mu ndalama e mwingamwenwe ca bupe ca kwa Lesa. Muli ici cintu taukwete cakaniko nangu icapendulwa. Pantu umutima obe taulungeme ku cinso ca kwa Lesa.”—Imilimo 8:20, 21.
Ni kuli ici calembwa ca Baibolo e kwafuma ishiwi lya kuti “bu Simone” ilyapilibulwa nga “ulubembu lwa kushita nelyo ukushitisha icifulo nelyo ukusumbulwa mu calici.” Icitabo ca New Catholic Encyclopedia cisumina ukuti ukucilisha ukufuma mu mwanda wa myaka uwalenga 9 ukufika ku wa 11 “bu Simone bwalyanene mu fikuulwa mwikala bashimapepo abashimbe, muli bashimapepo banono, bashikofu, nangu fye fifulo fya ba paapa.” Icitabo calenga 9 ica The Encyclopædia Britannica (1878) cilandapo ifi: “Ukusambilila pa lwe lyashi lya kale ilya kukumana kwa mu nkama ukwa ba Paapa kushinina umusambi ukuti takwatala akuba ukusala kwa mu calici ukwabula bu Simone. Ilingi line, bu Simone buba mu nkama e bwabipisha, ubwa kulenga insoni, kabili e bucilapo ukumonekesha.”
Abena Kristu ba cine ilelo balingile ukuibaka kuli bu Simone. Ku ca kumwenako, bamo kuti balumbanya mu kucishamo nelyo ukupeela ifya bupe abo bengabapeela ifishingamo fyalundwako. Lubali lumbi, abo bakapeela ba fishingamo kuti basobolola abo batemwa ababapeela ifya bupe. Iyi mibele ibimbamo bu Simone, kabili Amalembo yalasuusha iyo nshila mu kumfwika. Petro akoseleshe Simone ukuti, “E ico lapila pali ubu bubi bobe no kulomba kuli Shikulu nga wingalekelelwo kupanga kwa mutima obe [“ubu bucenjeshi bobe,” New Jerusalem Bible]. Pantu ndemona uli mu bwanga bwa bululu kabili mu myando ya kuulungana.”—Imilimo 8:22, 23.
Icaweme ca kuti Simone alimwene ububi bwa kufwaisha kwakwe ukwalubana. Alombele abatumwa ukuti: “Nombeleni ni mwe kuli Shikulu, ukuti ciisamponena cimo pali ifyo mwasosa.” (Imilimo 8:24) Abena Kristu ba cine cine besha ukusengauka ukukantaikwa ukuli konse ukwa bu Simone, mu kumfwila isambililo lyakatama ilyaba muli ici calembwa.