Kalata Ukufuma kwi Bumba Litungulula
Mwandi fwe Nte sha kwa Yehova twalipaalwa! Twalishiba Yehova, Lesa wa cine kabili eka fye uwa mweo, Kabumba wa bubumbo bonse, twainikwa ishina lyakwe kabili tulamubombela. Takwaba amapaalo ayacila pali aya!—Esa. 43:12; Heb. 8:11.
Twalikwata isubilo lya kupusuka no mulimo wa kushimikila imbila nsuma iya Bufumu pa kuti bambi nabo bengapepa Yehova no kuba ne isubilo ilyo twakwata. (Mat. 24:14; Rom. 10:13, 14; 1 Tes. 5:8) Na kabili tulasekelela pa kuba muli bumunyina bwa mwi sonde lyonse ubwa bakapepa abatemwana kabili abaafwana mu kucincila. Mwandi fyonse fi filatuletela insansa!
Baibolo ilatulaalika aiti: “Bombeleni Lesa ne nsansa; . . . Iseni mu mpongolo shakwe no lwimbo lwa kutotela, mu mansa shakwe no lwa kutasha; cindikeni ishina lyakwe. Pantu Yehova musuma; lwa muyayaya uluse lwakwe, ne cishinka cakwe ku nkulo ne nkulo.” (Amalu. 100:2-5) Ukubombela Yehova no kusekelela kwalyampana sana no kuba na bucibusa busuma na wene. Alalenga ukuti bucibusa bwa musango yo bubeko, kabili twalikwata ishuko lya kubulundulula. Nga twaba na bucibusa bwa musango yo, tuleshiba ukuti Yehova lyonse kuti atwafwa no kutukosha ilyo twabulisha. Twalicetekela ukuti akatupeela ubukose bwa ku mupashi no butungulushi pa kuti twingacimfya amafya yaba mu kwikala mu nshiku sha kulekelesha isha buno bwikashi. Te mulandu na mafya tukwata, tulasekelela mu butumikishi bwesu, kabili tulatasha Yehova cila bushiku pantu ‘alatusakamana,’ nge fyo Icebo cakwe citucinkulako.—1 Pet. 5:7.
Uyu mwaka wapwile, Yehova alitupaalile nga nshi. Pa Kulongana kwa Citungu ukwa “Bakacita wa Cebo ca kwa Lesa,” twalisansamwike ukuba pamo na bambi abengi abakwata icitetekelo cimo cine icacindama, ukwimbila pamo no kuliila pamo pe tebulo lya ku mupashi ilya kwa Yehova. Pa Masambililo yesu aya Citabo pa Cilonganino, ukusambilila pamo icitabo ca Angweniko ku Kusesema kwa kwa Daniele! kwalikoseshe icitetekelo cesu. Na kabili, fintu twasansamwike ilyo twapokelele ibuuku 1 ilipya ilya Ukusesema kwa kwa Esaya—Ulubuuto lwa Bantu Bonse! ‘Ulukombo lwesu lwaisula paa.’—Amalu. 23:5.
Tulasansamushiwa ukwishiba ukuti ifwe fwe baba amamilioni, bamunyina na bankashi ba ku mupashi, tulebombela Yehova no kwikatana! Tulakoseleshiwa ilyo twabelenga pa mpendwa ipya iyo tufikilepo ukukuma ku butumikishi bwa mwi bala! Tulasekelela pa bantu amamilioni abasangilwe ku Cibukisho ca mfwa ya kwa Shikulu nangu ca kuti imibele ili mu calo taiweme. Ilyo twabebeta ibala lya mwi sonde lyonse, ca cine ukuti “ukulobolola kwena nakukula.” (Luka 10:2) Umwaka wapwile, nga kwakanya pa milungu yonse, cila mulungu abantu 5,555 balilundulwike ukufika na ku kulanga ukuipeela kwabo pa kubatishiwa mu menshi. Nangu ca kuti ukulobolola mu ncende shimo pe sonde nakukulisha ukucila mu ncende shimbi, bonse tulasekelela pa fyo Yehova alecita. Tulemona ubushinino bwa cine cine ubwa kuti alepaala ababomfi bakwe abalebombela pamo.
Ubukuule bwa Mayanda ya Bufumu ayapya cintu na cimbi iciletulenga ukusekelela sana! Tulesekelela nga nshi ukumona ifyo bamunyinefwe na bankashi mu fyalo ifipiina baletungilila uyu mulimo no mutima onse. Amayanda ya Bufumu ayengi yalikuulwa pa kwafwilishiwa na mabumba ya Kingdom Hall Construction Groups (Amabumba ya ba Bakakuula ba Mayanda ya Bufumu). Aba bamunyina baya ku filonganino ifyalekanalekana ifyaba mu calo cabo ku kutungilila umulimo wa kukuula Amayanda ya Bufumu. Apo Amayanda ya Bufumu ayengi yafwile ukukuulwa, tuleipusha aba kuitemenwa abengi mu fyalo ifipiina ukwafwa muli uyu mulimo wacindama. Nga mwikala mu calo ca musango yo, bushe kuti mwaipeela ukubombako uyu mulimo? Ala bamunyina na bankashi balatasha ukukwata Ing’anda ya Bufumu yabo umo bengalonganina ku kupepa! Kabili balatasha kuli bumunyina bwa mu calo conse pa kwafwilisha mu fya ndalama pa kuti yakuulwe!
Ilyashi lilanda pa kucimfya imilandu mu cilye lilatusansamusha. Lelo, mu ncende ishingi kwaliba abalashi abengafwaya ukutulesha ukupepa Yehova. Ilyo twaba na mafya ya musango yo, twalicetekela ukuti Yehova kuti atwafwa nangu abalwani bafule shani nelyo ababomfi bakwe bamoneke kwati tabacingililwa. (2 Imila. 14:11)Tulemutasha sana bamunyina na bankashi bonse mwe batwalilila ukwiminina abashangila ku kutungilila ukupepa kwa cine.
Twalilileni ukukosha icitetekelo cenu no kushintilila sana pali Yehova ku kumutungulula ilyo mulebomba imilimo yenu iya Bwina Kristu no kusekelela. (Amapi. 3:5, 6) Te mulandu ne fyo umulwani engasuminishiwa ukucita, tatufwile ukufuupulwa. Ibukisheni ifyo Elisha akoseleshe kalume wakwe uwasakamene. Amwebele ukuti: “Witiina; pantu abali kuli ifwe bengi ukucisha abali kuli bene.” (2 Isha. 6:15-17) Pali lelo, umulalo wa ku muulu uwa kwa Yehova waliipekanya ukucingilila imilimo yaba mu kupepa kwa cine nge fyo cali mu nshiku sha kwa Elisha. Natucetekela ukuti ku ntanshi kukaba ifisuma. Yehova e uletungulula. Ifyalo te kuti filwishanye nankwe. Alisonta Umwana wakwe no kumupeela amaka ya kuteka. “Balishuka bonse abooba muli wene!”—Amalu. 2:1-6, 12.
Ibukisheni ukuti tulamwibukisha lyonse bonse mwe bamunyinefwe na bankashi batemwikwa. Ipepo lyesu lya kuti bonse “mwiminine abapwililila kabili [abashininkisha, NW] muli conse ico Lesa afwaya.”—Kol. 4:12.
Ni fwe bamunyinenwe,
Ibumba Litungulula ilya Nte sha kwa Yehova