Imbeni Inyimbo sha Kulumbanya Yehova
1 Inyimbo e bupe bumo ubwa kwa Lesa ubo umuntu engabomfya ku kulumbanya no kutatakula Kabumba no kulanga insansa akwete. Ukutula na kale ukwimba kwaba lubali lwapulamo ulwa kupepa Yehova Lesa. Mu Baibolo, balilandapo sana pa lwa kwimba ku mashiwi no kubomfya ifilimba.—Ukute. 4:21; 31:27; 1 Imila. 25:1; Ukus. 18:22.
2 Pe tempele mu Yerusalemu, ukwimba kwali lubali lwacindama nga nshi ulwa kupepa ica kuti abena Lebi 4,000 bapeelwe fye umulimo wa kulisha ifilimba. (1 Imila. 23:4, 5) Aba bali no kulalishisha bakemba. Inyimbo, maka maka bakemba bali abacindama sana mu kupepa, te ku kukosha ifyafinako ifya mu Malango, lelo ku kulenga imibele ibe iyayana ku kupepa. Ukwimba kwalepekanishiwa bwino no kupooswako amano. (Belengeni 1 Imilandu 25:7) Mwamona ifyo bakatamike ukwimbila Yehova amalumbo. Balisambilishiwe ukwimba kabili bonse bali abacenjela!
3 Ifwe nge Nte sha kwa Yehova, twalishiba ukuti Yehova awamina ukulumbanishiwa. Ni Mulopwe wa Kubumbwa Konse, Uwapulishamo, Imfumu ya muyayaya, e Kabumba kabili Uutunonsha, e Kamfukumfuku, kabili Intulo ya bumi bonse. Ukwabula no kutwishika awamina ukulumbanishiwa. Bushe napamo tutila ukwimba inyimbo sha bufumu takwacindama sana ica kuti teti twimbe no mutima onse? Mu mabungano ayengi, inyimbo shicili tashimbwa bwino te mulandu no kutwebela kabela inyimbo shili no kwimbwa. Baeluda balekoseleshiwa ukupekanya imitantikile yashininkishiwa iya kuti ifilonganino fitampe ukubelesha inyimbo shili no kwimbwa kwi bungano. Afweni bonse ukukwata icitabo cabo ica lwimbo. Baibolo ilanda ukuti tulingile ukwimbila Yehova isha malumbo.—Efes. 5:18, 19; Ukufu. 15:1.
4 Pa kutwafwa ukupekanya no kwimbako pa Mabungano ya Citungu aya uno mwaka ayaleti “Bakasambilisha wa Cebo ca kwa Lesa,” Sosaite naisala inyimbo sha kwimba ishakonkapo: 8, 18, 29, 34, 37, 39, 52, 74, 100, 115, 158, 189, 195, 204, 205, 208, 209, 212. Natubeleshe ishi nyimbo bwino ilyo kucili nshita pa kuti tukembe na maka inyimbo sha kulumbanya Yehova.