Ifipusho Ukufuma ku Babelenga

Bushe tufwile ukumfwikisha ukufuma pali Yobo 1:8 ukuti mu kati ka ciputulwa ca nshita Yobo ali uwa mweo, ali e muntunse eka uwa busumino kuli Yehova?

Iyo. Iyo nsondwelelo tailungamikwa kuli Yobo 1:8, apasoso kuti:

“Yehova atile kuli Mwansakabinga, Bushe walolekesho mubomfi wandi Yobo no kumono kuti tapaba pe sonde uwaba nga wene, umuntu wa mpomfu kabili uwatambalala, uutiina Lesa kabili uwatalukako ku bubi?” Lesa apayenye ukupima kwapalako pali Yobo 2:3, ukwipusha Satana ukuti: “Bushe walolekesho mubomfi wandi Yobo, no kumono kuti tapaba pe sonde uwaba nga wene, umuntu uwa mpomfu kabili uwatambalala, uutina Lesa kabili uwatalukako ku bubi?”

Ibuku lya kwa Yobo iline lilangilila ukuti Yobo taali e muntunse eka uwa mweo uo Lesa apokelele pamo ngo wa busumino. Ukutampa mu cipandwa 32, tubelenga ulwa kwa Elihu. Nangu ca kuti ali umulumendo, Elihu alilungike icilubo ca mimwene ya kwa Yobo no kukusha Lesa wa cine.—Yobo 32:6–33:6, 31-33; 35:1–36:2.

Pali uyu mulandu, ukulandapo kwa kwa Lesa ukwa kuti ‘tapali pe sonde uwali nga Yobo’ kufwile ukupilibula ukuti Yobo aali ukucilisha umwaume wapulamo ukutambalala. Mu kupalako Yobo aikeleko pa ciputulwa ca nshita pa kati ka mfwa ya kwa Yosefe mu Egupti no kutendeka kwa mulimo wa kwa Mose pamo nga kasesema wa kwa Lesa. Mu kati ka cilya ciputulwa ca nshita impendwa ikalamba iya bena Israele baikele mu Egupti. Tapali umulandu uwa kutontonkanishisha ukuti bonse aba bene tabali aba busumino kabili abashapokelelwa kuli Lesa; nakalimo kwaliko abengi abacetekele muli Yehova. (Ukufuma 2:1-10; AbaHebere 11:23) Nalyo line, tapali uuli onse uwa bene uwabombele ulubali lukalamba, nge fyacitile Yosefe, kabili balya bakapepa tabaali abapulamo ukukuma ku kupepa kwa cine, nga fintu Mose aali no kuba mu kutungulula uluko lwa kwa Israele ukufuma mu Egupti.

Uwaleikala kumbi, nangu ni fyo, aali mwaume wa bumpomfu bukalamba. “Kwali umuntu mu calo ca Usi, ishina lyakwe ni Yobo; kabili uyo muntu ali uwa mpomfu kabili uwatambalala, uutina Lesa kabili uwatalukako ku bubi.”—Yobo 1:1.

Yehova muli ifyo kuti alumbula Yobo nge ca kumwenako camonekesha nelyo icalumbuka ica busumino no kuipeelesha. Mu nshila imo ine, bakalemba ba Baibolo Esekiele na Yakobo mu kulosha ku numa basobwelepo Yobo ngo waimike icipasho ca bulungami no kushipikisha.—Esekiele 14:14; Yakobo 5:11.

Ukukumana kwa pa Mwaka—October 3, 1992

UKUKUMANA KWA PA MWAKA ukwa filundwa fya Watch Tower Bible and Tract Society of Pennsylvania kukabako pa October 3, 1992, pa Ŋanda ya Kulongana Kukalamba iya Nte sha kwa Yehova, 2932 Kennedy Boulevard, Jersey City, New Jersey. Ukukumana kwa kubalilapo ukwa filundwa fyeka kukabako pa 9:30 a.m., ukukonkwapo no kukumana kwa pa mwaka ukwa cinkumbawile pa 10:00 a.m.

Ifilundwa fya Kulembesha balingile ukwishibisha Iofesi lya kwa Kalemba nomba pa lwa kwaluka ukuli konse mu maadresi yabo yonse aya makalata mu kati ka mwaka wapita pa kuti amakalata ya lyonse aya cishibilo ne fyalembwa fya kwimininwako fingafika kuli bene mu kwangufyanya fye pa numa ya August 1.

Ifyalembwa fya kwimininwako, ifikatumwa ku filundwa fyonse pamo ne cishibilo ca kukumana kwa pa mwaka, fili no kubweshiwa pa kuti fingafika kwi Ofesi lya kwa Kalemba wa Sosaite te kucila pa August 15. Icilundwa cimo na cimo cilingile ukwisushisha no kubwesha icalembwa cakwe ica kwimininwako mu kwangufyanya, ukulondolola nampo nga akabapo pa kukumana pa lwakwe nelyo iyo. Ifyebo fyapeelwa pa calembwa ca kwimininwako cimo na cimo filingile ukulondolola mu kulungatika pali ici cishinka, apantu cikashintililwapo pa kupima mu kubangilila abo mu cituntulu bakabapo pa lwabo.

Cileenekelwa ukuti ukukumana konse, ukusanshako ukukumana kwa mwi funde na malipoti, fikasondwelelwa ukufika pa 1:00 p.m. nelyo mu kwipipa pa numa. Takwakabeko ukukumana kwa cungulo. Pa mulandu wa ncende yapelela, ukusuminishiwa kukaba ku bamatikiti epela. Takwakabe ukutantika kwa kulundinkanya ukukumana kwa pa mwaka ku nsale sha telefoni ku fifulo ifili fyonse fimbi.