Ukubile Mbila ya Bufumu Mulimo Wacindama Sana

¹ Cila bushiku abantu bonse pano isonde balaipakisha ifyo Yehova atupeela ifilenga twatwalilila ukuba abomi. (Mat. 5:45) Lelo kwena, banono fye ababombako umulimo ushaiwamina uwa kutasha Kabumba ukupitila mu kubila imbila nsuma iya Bufumu bwa kwa Lesa. (Mat. 24:14) Bushe mwaliucindamika sana uyu mulimo ushaiwamina uwa kubila?

² Ukubila imbila ya Bufumu kulacindika Lesa kabili kulasansamusha abantu abalecula muli shino nshiku ishayafya. (Heb. 13:15) Abankula ku bukombe, balaba ne subilo lya kwikala umuyayaya. (Yoh. 17:3) Bushe kwaliba incito mu calo umwaba ubusuma bwa musango yu? Umutumwa Paulo alangile ukuti alicindamike sana umulimo wa kubila imbila mu fyo aleubomba. Aliucindamike icine cine.—Imil. 20:20, 21, 24; 2 Kor. 4:1, 7.

³ Ukucindamika Umulimo Twapeelwa: Inshila imo tulangilamo ukutila tulatasha pa kupeelwa umulimo wa kubila imbila, ni pa kubika amano ku kubomba bwino uyu mulimo. Bushe tulapekanishisha libela ifyebo twalayalanda ifingafika abalekutika pa mutima? Bushe kuti twawamyako ifyo tubomfya Amalembo ne fyo tuyalondolola ku bantu? Bushe tulaya mu kushimikila abantu bonse ababa mu cifulo twapeelwa ukubombelamo? Bushe twalishiba ifyo twingatendeka amasambililo ya Baibolo ne fyo twingayatungulula? Kuti twabomba bwino uyu mulimo nga twaucindamika nga filya Abena Kristu ba busumino, aba kale na ba nomba baucindamika.—Mat. 25:14-23.

⁴ Nga ca kuti tulelolenkana na mafya ya mu bukote, nangu tulalwalilila, nelyo twaliba na mafya yambi, tulasansamuka ukwishibo kuti ukucincila twacincila mu mulimo wa kushimikila kwalicindama sana. Icebo ca kwa Lesa citukoselesha ukuti Yehova alacindamika ukubombesha kwesu mu mulimo wakwe, nangu fye imibombele yenu ilemoneka nge ishacindama mu menso ya bantu.—Luka 21:1-4.

⁵ Ukubila imbila ya Bufumu kulomfwika bwino sana. Nkashi uwa myaka 92 atile: “Nga natontonkanya pa kuipeela kwandi kuli Lesa pa myaka 80, ndomfwa bwino sana! Akulaba ukubwelela ku bwaice, kuti nacita cimo cine pantu na kuba, ‘uluse lwa kwa Lesa lwacilo bumi.’” (Amalu. 63:3) Na ifwe lekeni tulecindamika uyu mulimo ushaiwamina uo Lesa atupeela uwa kubila imbila ya Bufumu.

Ulubali 12—Ukutungulula Amasambililo ya Baibolo Ayalunduluka

Ukwafwa Abasambi Ukutendeka Amasambililo ya Baibolo no Kulayatungulula

¹ Ilyo abasambi besu aba Baibolo batendeka ukuya mu mulimo wa mwi bala, kuti baba no mwenso wa kutendeka amasambililo ya Baibolo no kulayatungulula. Bushe kuti twabafwa shani ukukanaba no mwenso?—Mat. 24:14; 28:19, 20.

² Ilyo umusambi wa Baibolo afikapo ukuba kasabankanya ushabatishiwa, ilingi line ninshi alilembesha kale mwi Sukulu lya Butumikishi Ilya Bulesa. Ukusambilila ukupekanya no kulanda mwi sukulu kukamwafwa ukwishiba ifyo engasambilisha bwino pantu e cifwaikwa ku “mubomfi uushingaba na ca kukwatilapo insoni, uulungika bwino icebo ca cine.”—2 Tim. 2:15.

³ Sambilisheni ku Micitile Yenu: Yesu asambilishe abasambi bakwe ukupitila mu kubalangilila bwino bwino ifya kucita no kucita fyonse ifyo alelanda. Atile: “Onse uwasambilishiwa bwino akaba nga kasambilisha wakwe.” (Luka 6:40) Icacindama sana sana kulapashanya Yesu mu kulacita ifyo mulesosa ilyo muli mu mulimo. Ilyo umusambi wenu alemona ifyo mulebomba bwino, akeshiba bwino sana ukuti icikalamba ico tupempwila abo twalanshenye na bo, kutendeka ukusambilila na bo Baibolo.

⁴ Mulondolweleni ukuti ilyo twaeba umuntu ukuti tulefwaya ukulasambilila nankwe, tatufwile ukulondolola fyonse fye ifyo tucita pa kusambilila na bantu. Ilingi cilawama ukubalangilila fye ifyo ciba pe sambililo ukubomfya paragrafu imo nelyo yabili mu lupapulo tubomfya pa kusambilila. Ifyebo fimbi ifingamwafwa ukutendeka amasambililo fili pe bula 8 muli buno bwine Ubutumikishi Bwesu Ubwa Bufumu e lyo na mu bwa January 2002, pe bula 6.

⁵ Nga calinga, kuti mwaeba umusambi ukuya na imwe ku masambililo yambi aya Baibolo nelyo kuti aya na kasabankanya umbi uwaishiba bwino uyu mulimo. Kuti alandapo pali paragrafu imo nelyo pe lembo limo ililelanda sana pa cishinka mwi sambililo. E ico mu fyo umusambi alemona, kuti asambilila ifingi pa fyo engatungulula amasambililo ya Baibolo ayalunduluka. (Amapi. 27:17; 2 Tim. 2:2) Mutasheni, kabili mwebeniko umo alekabila ukuwamyako.

⁶ Ukusambilisha bakasankanya bapya ukuba bakasambilisha wa Cebo ca kwa Lesa kukabafwa ukubomba ‘umulimo usuma’ uwa kutendeka amasambililo no kulayatungulula. (2 Tim. 3:17) Ala cilomfwika bwino ukubombela pamo na bo mu bwite bushaiwamina ubwa kuti: “Onse uulefwaya abuule amenshi ya bumi aya bupe fye”!—Ukus. 22:17.