Ukwafwa Kwenu Kulekabilwa

¹ “Tulatasha pa fyo mutucitila. Ala tulanonkelamo.” Aya mashiwi yalelangilila ifyo tumona baeluda besu na babomfi batumikila. Ilyo ukuteyanya kwa kwa Lesa kulekulilako, abaume bafikapo na bo lyonse balekabilwa ukubomba mu filonaganino ifili mupepi na 100,000 mwi sonde lyonse. Nga muli munyina wabatishiwa, tulekabila ukwafwa kwenu.

² ‘Tinamineni’: Kuti mwatinamina shani amashuko ya mulimo ayalundwako? (1 Tim. 3:1) Icifwaikwa sana sana, kuba ica kumwenako cisuma mu mbali fye shonse isha bumi bwenu. (1 Tim. 4:12; Tito 2:6-8; 1 Pet. 5:3) Mulingile ukubombesha mu mulimo wa kushimikila, no kwafwa bambi ukucita cimo cine. (2 Tim. 4:5) Fwaisheni ukwafwa abasumina banenu. (Rom. 12:13) Bikeniko amano ku kusambilila Icebo ca kwa Lesa, no kulundulula ‘ukulamuka kwa kusambilisha.’ (Tito 1:9; 1 Tim. 4:13) Mulebomba bwino bwino imilimo yonse iyo mwapeelwa na baeluda. (1 Tim. 3:10) Nga mwalikwata abakashi na bana, ‘mulingile ukutungulula bwino aba mu ng’anda yenu.’—1 Tim. 3:4, 5, 12.

³ Bueluda nangu ubutumikila busanshamo ukubombesha kabili bufwaya ukuipeelesha ku kubombela bambi. (1 Tim. 5:17) E ico, ilyo muletinamina aya mashuko ya mulimo, tontonkanyeni sana pa kupyungila bambi mu kuicefya. (Mat. 20:25-28; Yoh. 13:3-5, 12-17) Etetuleni pa mibele yali na Timote, kabili esheni ukumupashanya. (Fil. 2:20-22) Nga filya Timote aali, lekeni imibele yenu iisuma imulandileko. (Imil. 16:1, 2) IIyo mulelundulula imibele yakabilwa iya Bwina Kristu ku kubomba imilimo yalundwako no kusumina ukufunda konse uko mwingapeelwa, ‘ukulunduluka kwenu kukamoneka kuli bonse.’—1 Tim. 4:15.

⁴ Mwe Bafyashi, Kansheni Abana Ukwafwa Bambi: Abana kuti batendeka ukusambilila ukwafwa bambi ilyo bali fye abanono. Bakansheni ukukutika pa kulongana, ukushimikila, no kuba ne mibele isuma pa Ng’anda ya Bufumu na ku sukulu. Basambilisheni ukupyungila bambi, pamo nga ukulawamyako Ing’anda ya Bufumu, ukwafwa abakoloci, no kubombe milimo imbi. Balekeni bamone insansa shaba mu kupeela. (Imil. 20:35) Ukukansha kwa musango yu kuti kwabafwa ukwisaba bapainiya, ababomfi batumikila nelyo baeluda ku ntanshi.

Ulubali 4—Ukutungulula Amasambilo ya Baibolo Ayalunduluka

Ukukansha Abasambi Ukupekanya

¹ Umusambi uupekanishisha isambililo libela, uushila ifyasuko, kabili uutontonkanya ifyo engasuka mu mashiwi yakwe ilingi alalunduluka bwangu lwa ku mupashi. E ico lintu fye isambililo lya lyonse lyatantikwa, pekanyeni isambililo pamo no musambi no kumulangilila ifya kucite co. Kuti caba ica kwafwa ku basambi abengi ukupekanishisha pamo na bo icipandwa conse nangu isambililo lyonse.

² Ukushila Ifyasuko no Kulemba Ifyebo mu Mbali: Londololeni ifya kusanga ifyasuko fya kulungatika ku fipusho. Langeni umusambi icitabo cenu ico musambililamo nankwe umo mwashila amashiwi ne fishinka fikalamba epela. Ilyo mulesambilila nankwe, kuti afwaya ukupashanya ifyo mucita, ukushila mu citabo cakwe ifyebo ifingamwafwa fye ukwibukisha icishinka. (Luka 6:40) Lyene kuti mwamweba ukwasuka mu mashiwi yakwe. Ukucite fyo kuti kwamwafwa ukwishiba nga naumfwikisha ifyebo.

³ Ukubebeta bwino bwino amalembo yashambwilwe lubali lwacindama ulwa musambi ilyo aleipekanishisha kwi sambililo. (Imil.17:11) Mwafweni ukwishiba ukuti ilembo lyonse ilyasangwa muli paragrafu lilafwilisha icishinka. Mulangeni ifya kulemba ifishinka ifipi mu mbali ya citabo cakwe. Mulengeni ukwishiba ukuti ifyo alesambilila fyashimpwa pali Baibolo. Mukoselesheni ukulasanshamo sana amalembo ilyo aleasuka mwi sambililo.

⁴ Moneni Ifilimo Kabili Pitulukenimo: Ilyo umusambi talaingila sana mu kupekanya isambililo, cikamwafwa nga abalilapo ukwishiba ifilimo. Mulangilileni ukuti kuti abala amona ifili mwi sambililo pa kubebeta mu kwipifya umutwe we sambililo, utumitwe tunono, e lyo ne fikope. Mulondolweleni ukuti ilyo talaleka ukupekanya isambililo, kuti acita bwino ukupoosako akashita ukupituluka mu fishinka fikalamba ifili mwi sambililo, nalimo ukubomfya umukululo wa fipusho fya kupitulukamo nga e mo uli. Ukupitulukamo kwa musango yu kukamwafwa ukukanalaba ifishinka.

⁵ Ukukansha umusambi ukupekanya bwino isambililo lyakwe kukamwafwa ukwasuka ifyasuko fisuma mu kulongana. Kabili kukamwafwa ukulundulula imisango isuma iya kusambilila iikamunonsha nangu fye ni lintu abe napwisha isambililo lyakwe.