‘Ukuliishiwa Ifyebo fya Citetekelo’

¹ Icikabilwa pa kuba kapepa waipeelesha, kupilikita. (1 Tim. 4:7-10) Ku maka yesu fwe bene, kuti twatompoka no kuwa ilyo tuleesha ukwikala ubumi bwa musango yo. (Esa. 40:29-31) Inshila imo twingapeelelwamo amaka kuli Yehova ‘kuliishiwa ifyebo fya citetekelo.’—1 Tim. 4:6.

² Ifya Kulya fya ku Mupashi Ifya Mulyo: Yehova apekanya ifya kulya fya ku mupashi ifya mulyo ukupitila mu Cebo cakwe e lyo na mu “musha wa cishinka kabili uwashilimuka.” (Mat. 24:45) Bushe tuleshukila ishuko twakwata ilya kuliishiwa? Bushe tulabelenga Baibolo cila bushiku? Bushe twalitantika inshita ye sambililo lya pa lwesu ne ya kwetetula? (Amalu. 1:2, 3) Imiliile isuma iya musango yo mu fya ku mupashi ilatukosha no kutucingilila ku fintu fya ici calo ca kwa Satana ifingatufuupula. (1 Yoh. 5:19) Nga tuletontonkanya pa fintu ifisuma no kwikala ukulingana ne fyo fyebo, Yehova akaba na ifwe.—Fil. 4:8, 9.

³ Mumbi umo Yehova atukoselesesha ni mu kulongana pamo ne cilonganino. (Heb. 10:24, 25) Ukufunda kwa ku mupashi ukuba pali uku kubungana no kwampana kusuma kulenga twakwata amaka ya kushangila te mulandu na mesho. (1 Pet. 5:9, 10) Umwina Kristu umusepela atile: “Imba ku sukulu akasuba konse, e ico ndanaka nga nshi. Lelo ukulongana kwaba nga menshi yatalala ku muntu uli ne cilaka sana, no ku e ko mpeelelwa amaka na yambi aya kutwalilila ukuba ku sukulu ubushiku na bumbi.” Kanshi tulapaalwa icine cine ilyo twabombesha pa kuti fye tusangwe ku kulongana!

⁴ Ukubilisha Icine: Ukushimikilako abantu bambi kwali nge cilyo kuli Yesu. Kwalemukosha. (Yoh. 4:32-34) Na ifwe tulakoseleshiwa ilyo twalanda ku bantu pa malayo ya kwa Lesa. Kabili ukupamfiwa mu mulimo kulenga amatontonkanyo ne mitima yesu ukutonta pa Bufumu na mapaalo yalaswa yese. Kulatupuupuutula icine cine.—Mat. 11:28-30.

⁵ Ala twalipaalwa nga nshi pe shuko twakwata ilya kumwenamo mu kuliishiwa ifya kulya fya ku mupashi ifya mulyo ifyo Yehova apeela abantu bakwe muno nshiku! Shi natutwalilile ukwanga ilyo tulemulumbanya.—Esa. 65:13, 14.

Ulubali 5—Ukutungulula Amasambililo ya Baibolo Ayalunduluka

Ifyo Mwingeshiba Ukufula kwa Fyebo Mwalasambilila

¹ Pa kusambilisha, Yesu aletontonkanya na pa fyo abasambi bakwe bashingakumanisha ukucita; alelanda na bo “ukulingana no mo bengomfwila.” (Marko 4:33; Yoh. 16:12) E fyo na bakasambilisha wa Cebo ca kwa Lesa muno nshiku bafwile ukwishiba ukupima ifyebo balasambilisha mwi sambililo lya Baibolo. Ifyebo mwalasambilila fikashintilila pa kucenjela kwa kwa kasambilisha no musambi e lyo ne fyo ifintu fili kuli bonse babili.

² Kuuleni Icitetekelo Cakosa: Abasambi bamo kuti bakabila ukusambilila imiku ibili nelyo itatu pa kuti beshibe ifyo abasambi bambi bengasambilila pa muku fye umo. Calicindama sana ukuleka umusambi aumfwikisha isambililo bwino bwino ukucila ukusambilila ifingi lubilo lubilo. Umusambi fye onse alekabila ukukwata intendekelo yakosa mu cisumino cipya anonkele mu Cebo ca kwa Lesa.—Amapi. 4:7; Rom. 12:2.

³ Ilyo muletungulula isambililo cila mulungu, esheni conse ico mwingacita ku kwafwilisha umusambi ukumfwikisha no kusumina ico alesambilila mu Cebo ca kwa Lesa. Mwilasambilisha lubilo lubilo pantu umusambi teti eshibe bwino ubucindami bwa cine alesambilila. Pooseni inshita ikalamba pa fishinka fikalamba e lyo no kubelenga amalembo yacindeme mwi sambililo.—2 Tim. 3:16, 17.

⁴ Mwilapumbulwa Ilyo Mulesambilisha: Ukulunda pa kukanasambilisha lubilo lubilo, tatufwile ukupumbulwa pa kusambilisha. Nga ca kutila umusambi alitemwa ukulanda sana pa milandu yakwe, kuti twamweba atuti tulanshanye nankwe inshita imbi pa numa ye sambililo.—Luk. Mil. 3:1.

⁵ Kabinge, ifi twatemwa sana icine kuti cayafya nga nshi ukukanalanda sana pe sambililo. (Amalu. 145:6, 7) Limo limo icishinka cishili mwi sambililo nelyo ica kukumanya kuti calenga isambililo ukumfwika sana, lelo twifushamo ifi nelyo ukufileefya ica kuti musambi akaana no kwishiba bwino bwino amasambililo ya kutampilapo ukwishiba Baibolo.

⁶ Nga tulesambilila ifyebo fyalinga fye cila nshita, kuti twayafwa abasambi ba Baibolo ‘ukulaenda mu lubuuto lwa kwa Yehova.’—Esa. 2:5.