Ulubali 6—Ukutungulula Amasambililo ya Baibolo Ayalunduluka

Ifya Kucita Ilyo Musambi Aipusha Icipusho

¹ Nga mwatendeka ukutungulula isambilililo lya Baibolo, cilawama ukusambilisha umusambi amasambililo ya mu Baibolo mu kukokana ukucila ukulacilaukila. Nga tatulecilaukila, tukaafwa umusambi ukuba ne ntendekelo isuma iya bwishibilo bwine bwine kabili tukaafwa umusambi ukulunduluka mu fya kwa Lesa. (Kol. 1:9, 10) Lelo, abasambi ilingi line balepusha amepusho pa malyashi ayapusanapusana ilyo mulebasambilisha. Kuti mwacita shani ici nga cacitika?

² Muleiluka: Amepusho ayalelanda pa fyo mulesambilila kuti mwayasuka apo pene fye. Nga ca kuti ico aipusha mukacisambilila ku ntanshi, kuti cawama ukweba umusambi ukuti tukesasambilila pali ci ku ntanshi. Lelo nga ca kuti ico aipusha nacipusana ne fyo mulesambilila nelyo cilekabila ukufwailisha pa kuti mukasuke bwino, nalimo kuti caba bwino ukulanshanya pa numa ya kupwisha ukusambilila nelyo ukwisalanshanya pa bushiku bumbi. Bakasabankanya bamo balalemba icaipusha umusambi pa kuti ashininkishe ukuti nabaposako amano ku fyo epwishe kabili ici cilaafwa pantu te kuti cipumfyanye ifyo mulesambilila.

³ Mu mpapulo shesu ishatantikwa ukusambilishamo abantu, ifingi ifyo Baibolo isambilisha kuba fye ukufisambilisha patali patali. Tukacita shani ngo musambi camukosela ukusumina fimo ifyo Baibolo isambilisha kabili apampamina fye pa kukonka ifisambilisho fya bufi? Napamo kuti caba bwino ukulanshanya ifyebo fyalundwapo ifilondolola bwino bwino ifyo Baibolo ilanda pali ilyo lyashi. Nga ca kuti umusambi tashininwe pa fyo mwamweba, lekeni ilyo lyashi, mukesalandapo inshita imbi. Twalilileni ukumusambilisha nga fintu mucita lyonse. (Yoh. 16:12) Nalimo akomfwikisha ifyo Baibolo isambilisha ku ntanshi na lintu alelunduluka mu fya kwa Lesa.

⁴ Muleicefya: Nga tamwishibe bwino ifya kwasuka umusambi, mwieesha ukulanda fye ifyo mwaishiba. (2 Tim. 2:15; 1 Pet. 4:11) Ebeni umusambi ukuti mukamwasuka nga mwasanga icasuko. Napamo pali iyi ine nshita kuti mwalanga no musambi ifyo tucita pa kusanga ifyo tulefwaya. Panono panono mulangeni ifya kubomfya impapulo sha mu kuteyanya kwa kwa Yehova ishitwaafwa ukusanga ifyo tulefwaya. Ukucite fi kukalenga umusambi ukusambilila ifya kuisangila umwine amasuko ku mepusho yakwe.—Imil. 17:11.

Ukupitulukamo kwe Sukulu Lya Butumikishi Ilya Bulesa

Amepusho yakonkapo yakapitulukwamo mwi Sukulu lya Butumikishi Ilya Bulesa mu mulungu wa kutampa uwa February 28, 2005. Kangalila we sukulu akatungulula ukupitulukamo ukwa maminiti 30 ukukafuma mu fyebo fyalandilwe mu malyashi ya mulungu wa January 3 ukufika February 28, 2005. [Icishibisho: Apashili ica kuloshako, mufwile ukuisapikila pa kusanga amasuko.—Moneni icitabo ca Isukulu lya Butumikishi, amabu. 36-7.]

IMILANDILE

1. Kuti twalanda shani ifyebo ifingomfwika bwino kuli bambi? [be ibu. 226 para. 1–ibu. 227 para. 1]

2. Mashiwi ya musango nshi ayo mwingakabila ukulondolola? [be ibu. 227 para. 2-5]

3. Ni nshila nshi twingabomfya pa kulanda ifyebo ifingafunda abo tulelandako? [be ibu. 231 amapara. 1-3]

4. Kuti twabelenga shani ilembo abantu baishiba kale pa kuti abo tulelandako banonkelamo? [be ibu. 231 amapara. 4-5]

5. Cinshi cingafumamo nga tulekoselesha bakomfwa besu ukupoosa amano ku fishinka fyaba mu lyashi lya mu Baibolo ilyo baishiba kale? [be ibu. 232 amapara. 2-4]

ILYASHI NA. 1

6. Ukusambilisha abantu “ukubela Lesa akatiina no kubaka amafunde yakwe” kwalola mwi? (Luk. Mil. 12:13) [be ibu. 272 amapara. 3-4]

7. Ilyo tulelanda pe shina lya kwa Yehova, kuti twalanda shani na pa mibele yakwe? (Yoele 2:32) [be ibu. 274 amapara. 2-4]

8. Bushe ukwishiba Yesu no kucitilo bunte pali wene kwacindama shani? (Yoh. 17:3) [be ibu. 275 para. 7]

9. Bushe ukukwata bucibusa bwasenaminwa na Lesa no kumfwikisha Baibolo kwampana shani na kukumfwikisha icifulo Yesu akwata? [be ibu. 276 para. 1]

UKUBELENGA BAIBOLO UKWA CILA MULUNGU

11. Bushe wishi kwa Abrahamu, Tera, ali ni kapepa wa tulubi? (Yosh. 24:2)

12. Bushe Gideone takwete icitetekelo pa kubomba umulimo Yehova amupeele? Mulandu nshi mwayasukile fyo? (Abapi. 6:25-27)

13. Cinshi twingasambilila ku fyo Gideone ayaswike abena Efraimu? (Abapi. 8:1-3)

14. Cinshi Abena Gibea balangile pa kukanaitemenwa ukuba ne cileela? (Abapi. 19:14, 15)

15. Nga ca kuti “umuntu onse alecite cawama mu menso yakwe,” bushe ici calengele kwaba icimfulumfulu? (Abapi. 21:25)