Umwalola Ukuicefya kwa kwa Yehova Kuli Ifwe

DAVIDI ali muntu uwaculile sana. Alicululushiwe ku Mfumu Shauli, shifyala uwali sana na kalumwa. Imiku itatu Shauli aeseshe ukwipaya Davidi ukubomfya ifumo kabili pa myake iingi amulungile ukwabulo kuleka, ukumupatikisha ukuba imbutushi. (1 Samwele 18:11; 19:10; 26:20) Lelo, Yehova ali na Davidi. Yehova amupuswishe te kuli Shauli kweka lelo na ku balwani bambi. Na muli fyo kuti twaumfwikisha umulandu Davidi aimbiile ulwimbo ulutila: “Yehova e cilibwe candi icasumbuka, licele lyandi, kabili kapokolola wandi. . . . [Mwe Yehova] mwampeele nkwela ya kupususha kwenu, kabili [ukuicefya, NW] kwenu kulankusha.” (2 Samwele 22:2, 36) Davidi alicindeme eyefilya mu Israele. Lelo nomba ukuicefya kwa kwa Yehova kwaisamo shani?

Ilyo Amalembo yalanda ukuti Yehova aliicefya, tayalosha mu kuti amaka yakwe yalipelebela nelyo ukuti kwaliba abamucila. Lelo, iyi mibele ishaiwamina ilangilila ukuti alekatilwa inkumbu abafwaisha ukusenaminwa na wene kabili alababelelo luse. Pa Amalumbo 113:6, 7, patila: ‘[Yehova] alolesha apatali pa myulu na pe sonde. Emyo mulanda mu lukungu.’ Amashiwi yapilibulwa ukuti “alolesha apatali” yalola mu kuti “alakokako ku kumona” nelyo ukuti “alaicefya pa kuti aloleshe.” (Today’s English Version; Young’s Literal Translation of the Holy Bible) E ico ukufuma ku muulu Yehova ‘alikokeleko,’ nelyo ‘aliicefeshe,’ pa kuti akutike kuli Davidi, umuntu uushapwililika lelo uwaicefya uwalefwaisha ukubombela Lesa. E ico, Davidi atwebo kuti: “Yehova alisansabala, lelo alolesha abasokopala.” (Amalumbo 138:6) Inshila yabamo uluse, ukutekanya, ne nkumbu iyo Yehova abombelemo na Davidi ifwile ukukoselesha bonse abafwaya ukucito kufwaya kwa kwa Lesa.

Nangu line Yehova aba e Mulopwe wa kubumbwa konse, alaitemenwa ukukutika kuli ifwe umo umo. Ici citulenga ukucetekela ukuti kuti twashintila pa kwafwa kwakwe ukushifilwa na lintu ifintu fyafishe nga nshi. Tatufwile ukusakamikwa ati akatulekelesha. Ukukuma ku bantu bakwe abena Israele ba pa kale, Yehova alilandilwako bwino ati e ‘wabebukishe mu kucendwa kwabo; pantu lwa muyayaya uluse lwakwe.’—Amalumbo 136:23.

Na ifwe pali lelo fwe babomfi ba kwa Yehova kuti twacula nge fyaculile Davidi. Napamo abashaishiba Lesa kuti batupumya, nelyo limbi tulalwalilila nangu twalifwilwa. Te mulandu no bwafya tulimo, nga ca kutila umutima wesu uli uwafumaluka, kuti twapepa kuli Yehova, ukulomba uluse lwakwe. Yehova ‘akakokako’ ku kutulolesha no kukutika ku mapepo yesu. Kemba wa malumbo uwapuutwamo alembele ati: “Amenso ya kwa Yehova alosha pa balungama, na matwi yakwe alosha ku nkuuta yabo.” (Amalumbo 34:15) Ukutontonkanya sana pali iyi mibele ya kwa Yehova iya kuicefya kulatufika sana pa mutima!

[Ifikope pe bula 30]

Yehova alaitemenwa ukukutika ku mapepo yesu pali lelo nga filya fine fye akutike ku mapepo ya kwa Davidi

Amepusho Ukufuma ku Babelenga

Bushe icilonganino ca Bena Kristu cimona shani ubuliili?

Icebo ca kwa Lesa calikaanya abantu ababombela Lesa ukukolwa no kuba aba buliili. E ico, icilonganino ca Bena Kristu cimona uwa buliili nga filya fine cimona cakolwa. Cakolwa no muliili teti babe mu cilonganino ca Bena Kristu.

Amapinda 23:20, 21 yatila: “Wiba pa banwensho mwangashi, pa bafunukile nama; pantu umunwi no mubuuke bafika ku kubulwa, no kushinshila kufwiko muntu indelemba.” Pa Amalango 21:20, tubelengapo ulwa muntu “umuumankonso kabili icintala,” uwalingile ukwipaiwa ukulingana ne Funde lya kwa Mose. Ukulingana ne ci cikomo, uyu muntu icintala, uushilapila aali na kabili ‘umubuuke, kabili umunwi.’ Kanshi, mu Israele wa ku kale, ubuliili bwali cintu cishalinga ku balefwaya ukubombela Lesa.

Lelo, calola mwi ukuba umuliili, kabili cinshi cintu Amalembo ya ciGriki aya Bwina Kristu yalanda pali ili lyashi? Umuntu uwa buliili muntu “umubuuke uwa bufunushi uufwaya fye ukulya no kunwa lyonse.” E co, kanshi, ubuliili bufunushi, kabili Icebo ca kwa Lesa citweba ukuti “abafunushi” tabakengile mu Bufumu bwa kwa Lesa. (1 Abena Korinti 6:9, 10; Abena Filipi 3:18, 19; 1 Petro 4:3) Na kabili, ilyo umutumwa Paulo asokele Abena