Ukukonkomesha Kubomba

BAELUDA ba Bwina Kristu bafwile ukuba na maka ya “kukonkomesesha mwi sambilisho lituntulu.” (Tito 1:9) Inshita shimo kuti bacite ci ilyo ifintu fyafishe nga nshi. Calicindama ukuti ukufunda kulingane ne fyaba mu Malembo. Kanshi baeluda bafwile ukumfwila ukufunda kwa kuti: “Ubike umutima pa . . . kucincisha.” (1 Tim. 4:13) Nangula muli cino cipande twalalanda maka maka kuli baeluda nelyo abaletinamina uyu mulimo, inshita shimo abafyashi bafwile ukukonkomesha abana babo na batungulula amasambililo ya Baibolo na bo bakabila ukukonkomesha abasambi babo aba Baibolo. Ifyalalandwapo kuti bafibomfya na bo bene.

Ifilenga Ukukonkomesha. Pa kwishiba ilyo ukukonkomesha kulefwaikwa, icingamwafwa kubebeta ifyalembwa mu Baibolo ukumona ifyo caleba pa kuti kube ukukonkomesha. Umutumwa Petro akonkomeshe abakalamba ukwangwa ku mulimo wabo uwa kucema umukuni wa kwa Lesa. (1 Pet. 5:1, 2) Paulo afundile Tito ukukonkomesha abalumendo “ukuba abatekanya.” (Tito 2:6) Paulo acincishe Abena Kristu banankwe ‘ukusosa bonse akanwa kamo kene’ no kutaluka ku bafwaya ukuleta amalekano pa ba bwananyina. (1 Kor. 1:10; Rom. 16:17; Fil. 4:2) Nangula Paulo atashishe aba mu cilonganino ca ku Tesalonika pa fisuma balecita, abakonkomeshe ukubomfya sana ukufunda bapokelele. (1 Tes. 4:1, 10) Petro apaapeete Abena Kristu banankwe ‘ukutalukako ku fya lunkumbwa lwa mubili.’ (1 Pet. 2:11) Yuda akonkomeshe bamunyina ‘ukulwile icitetekelo’ pa mulandu wa kusonga kwa bashipepa abalecita bucilende. (Yuda 3, 4) Abena Kristu bonse bacincishiwe ukukonkomeshanya pa kuti peumikwa nangu umo uwa muli bene ku longolo lwa lubembu. (Heb. 3:13) Petro acincishe abaYuda abali tabalatetekela Kristu ati: “Muituule ku nkulo iyi iyapondama.”—Imil. 2:40.

Mibele nshi ikabilwa pa kucincisha ilyo ifintu fili fyo? Uulekonkomesha kuti alenga shani ukukonkomesha kwakwe ukukanaumfwikamo umutitikisha no bunkalwe?

“Pa Mulandu wa Kutemwa.” Nga tatukonkomeshe “pa mulandu wa kutemwa,” ukukonkomesha kuti kwaumfwika ukwaluma. (File. 9) Ca cine ukuti icintu nga cilekabila ukubombelwapo mu kampampa, imilandile ya kwa kalanda ifwile ukumfwika ukuti ico alesosa nacipamfya. Nga alanda mu kunakilila kuti caumfwika kwati alelomba ubwelelo. Pa nshita imo ine, uko kukoselesha kufwile ukumfwika ukwa kucincisha kabili ukwa kulangulukilako. Ukukoselesha kwa kutemwa ilingi line e kwingacincisha abantu. Ilyo Paulo aleisosela no kusoselako abanakwe, aebele abena Tesalonika ati: “Pantu mwaishibo kuti, umo shibo acitila abana bakwe bene, e mo twacitile umuntu onse wa muli imwe, ukukonkomesha imwe.” (1 Tes. 2:11) Balya bakangalila ba Bwina Kristu balepaapaatila bamunyinabo no kutemwa. Lekeni ifyo mulesosa fibe pa mulandu wa kwangwa sana abalemumfwa.

Cenjeleni. Mwikalifya abo mulefwaya ukucincisha. Lelo, mwishimba ukweba ibumba “ukupanga konse kwa kwa Lesa.” (Imil. 20:27) Abatemwa ukufundwa tabakakalipe nelyo ukumusuula pa mulandu wa kuti mu cikuuku mwabacincisha ukucita icalungama.—Amalu. 141:5.

Ilingi line, cisuma ukubalilapo ukutasha abantu mu bufumacumi ilyo mushilabakonkomesha. Tontonkanyeni ifisuma ifyo bamunyinenwe balecita—ifintu ifyo Yehova atemwinwamo: icitetekelo cimonekela mu milimo yabo, ukutemwa ukubalenga ukubombesha, no kushipikisha ilyo bali na mafya. (1 Tes. 1:2-8; 2 Tes. 1:3-5) Ici cikaafwa bamunyinenwe ukumfwa ukuti kanshi mwalibatemwa kabili mulabalangulukilako, kabili cikalenga bangweko ku fyo mukabacincisha.

“Mu Kutekanya Konse.” Pa kukonkomesha mulingile ukukonkomesha “mu kutekanya konse.” (2 Tim. 4:2) E kutila shani? Mu kutekanya mwaba ukushipikisha mu mutekatima ilyo bamulufyanya nelyo ukumukalifya. Uwatekanya alasubila ukuti bakomfwa wakwe bali no kucita ifyo alesosa. Nga namutekanya pa kukonkomesha, bakomfwa wenu tabakatile mulebamona kwati tabengacita bwino. Nga mwacetekela ukuti bamunyinenwe ne nkashi balefwaya ukubombela Yehova ukufika apo bengapesha, ico cikabacincisha ukufwaya ukucita icalungama.—Heb. 6:9.

“Mwi Sambilisho Lituntulu.” Cinshi eluda engacita pa “kukonkomesesha mwi sambilisho lituntulu”? Ni pa kuba “uwaikatishe Cebo ca cishinka umwabele sambilisho.” (Tito 1:9) Ukucila ukulanda ifyo muletontonkanya, lekeni Icebo ca kwa Lesa cibe e cibombelo ca kubomfya ku kucincisha. Lekeni Baibolo imwafwe ukwishiba ifyo mufwile ukusosa. Tantawileni ubunonshi bwaba mu kucita ifyo Baibolo isosapo pa fyo mulelanda. Muleibukisha ne ficitikila abashikonka ifyaba mu Cebo ca kwa Lesa pali ino nshita ne fikabacitikila ku ntanshi, kabili bomfyeni ifi ku kushinina abo mulelandako ukuti balekabila ukucitapo cimo.

Shininkisheni ukuti mwalondolwela abali mwi bumba ico balingile ukucita ne nshila balingile ukucitilamo ico cintu. Lekeni cishibikwe bwino bwino ukuti ukupelulula kwenu kushintilile fye pa Malembo. Nga ca kuti Amalembo yalepeela umuntu ubuntungwa bwa kuipingwila umwine mu fyo mulelanda, londololeni apo ubo buntungwa bufika. Lyene pa kusondwelela, paapaateni bakomfwa wenu umuku wa kulekelesha ica kuti bakoseleshiwa ukubombela pa co baumfwa.

“No Kushipa Ukwingi.” Pa kukonkomesha bwino, umo afwile ukuba “no kushipa ukwingi mu citetekelo.” (1 Tim. 3:13) Cinshi cilenga umuntu ukulanda no kushipa? Nga ca kuti “ica kumwenapo [cakwe] ca milimo isuma” nacilingana ne fintu alecincisha bamunyina ukucita. (Tito 2:6, 7; 1 Pet. 5:3) Nga cili fi, abalecincishiwa ukubombelapo bakamona ukuti uulebacincisha taleenekela ukuti bali no kucita ifyo wena ashicita. Bakamona ukuti kuti bapashanya icitetekelo cakwe kwati fintu na o apashanya Kristu.—1 Kor. 11:1; Fil. 3:17.

Ukukonkomesha kwashintilila pa Cebo ca kwa Lesa kabili ukwa kutemwa kuti kwabomba bwino sana. Abapeelwa umulimo wa kukonkomesha balingile ukubikako umutima pa kuti balekonkomesha bwino.—Roma 12:8.