Kalata Ukufuma Kwi Bumba Litungulula

“ICIKUUKU ca bupe fye cibe na imwe no mutende ukufuma kuli Lesa Shifwe na Shikulu Yesu Kristu.” Ifi e fyo Paulo aleposha abantu mu makalata ayengi ayo alelembela filonganino. Ifi fine e fyo na ifwe twingatemwa ukweba imwe bonse.—Efes. 1:2.

Ala tulatasha icikuuku ca bupe fye icifuma kuli Yehova ukupitila mwi lambo lya kwa Kristu Yesu! Icilubula e calenga twaba ne shina lisuma kuli Lesa. Ico te kuti cicitike ku maka yesu fye, nangu twingasambilila shani Baibolo, nelyo twashimikila sana imbila nsuma, atemwa twacita ifintu fimbi ifisuma. Ukulekelelwe membu no kupeelwa umweo wa muyayaya te malipilo pa mulandu wa kubombesha, lelo fya bupe fye ifilanga icikuuku Yehova atulanga ukupitila muli Yesu Kristu.—Rom. 11:6.

Paulo alembeele abasumina banankwe ati: “Tulemupaapaata ukukanapokelela ibusha icikuuku ca bupe fye ica kwa Lesa. Pantu atila: ‘Mu nshita ya kupokelelwamo nalikuumfwile, na mu bushiku bwe pusukilo nalikwafwile.’ Moneni! Nomba ino ukucilisha e nshita ya kupokelelwamo. Moneni! Nomba e bushiku bwe pusukilo.” Kwali “inshita ya kupokelelwamo” ilyo Yerusalemu ashilaonaulwa. Abatemenwe Yehova ukufuma pa nshi ya mutima, balipusushiwe lwa ku mupashi. E calengele no kuti aba bonse abacishinka bapusuke abafulumwike mu Yerusalemu ilyo uyu musumba ushilaonaulwa mu 70 C.E.—2 Kor. 6:1, 2.

Na muno nshiku twikala “mu nshita ya kupokelelwamo” na “mu bushiku bwe pusukilo.” Abo Yehova apokelela ukuba ababomfi bakwe kabili abalepusushiwa lwa ku mupashi, bakapusuka na “mu bushiku ubukulu ubwa kwa Yehova” ubuli mupepi.—Sefa. 1:14.

Natukwata umulimo ukalamba ifi ubushiku bwa kwa Yehova bupalamine. Tufwile ukusoka abantu pali ubu bushiku no kwafwa abafumacumi ukumwenamo mu cikuuku ca kwa Yehova pa kuti na bo bene bakapusuke. Paulo alishibe sana ifyo uyu mulimo wacindama. Alembele ukutila: “Kalanda kuli ine nga nshibila mbila nsuma!” Alangile ne fyo aleyumfwa ilyo asosele amashiwi yatila: “Ku ba mano na ku bapelwa amano pamo, ndi wa misha: e co ndefwaisha ukubile mbila nsuma.”—1 Kor. 9:16; Rom. 1:14, 15.

Yehova akatupeela umulandu nga tatulebomba uyu mulimo wacindama uwa kusoka abantu. Twalishiba ifyo Yehova asosele kuli kasesema Esekiele. Atile: “We mwana wa muntu, nakucito kubo wa kucefya ku ba ng’anda ya kwa Israele; lyonse ilyo waumfwe cebo ku kanwa kandi, e lyo ubasoke ukusoka ukufuma kuli ine. Ilyo nasosa ku mubifi, nati, Ukufwa ukafwa, na iwe tausokele, kabili tausosele ku kusoko mubifi ukuti afume mu mibele yakwe iya bubifi, ku kuleka abe no mweo, umubifi wena akafwila mu mampuulu yakwe, lelo umulopa wakwe nkafwaya ku minwe yobe.”—Esek. 3:17, 18.

Ishi nshiku sha kulekelesha nashafya. Tacayanguka ukusakamana ulupwa, ukubomba incito, ukubomba imilimo ya cilonganino no kushimikila ukwabula ukulekeleshapo nangu cimo pali ifi. E lyo kabili, mwe bengi mulalwalilila, bambi mwenda ne mitima iya kungumana, bambi bakote, e lyo bambi balabakanya ukupepa. Mwe bengi ‘mwalifininwa.’ Tulefwaya ukumweba ukuti tulamulangulukilako, kwati ni filya Yesu atile: “Iseni kuli ine, imwe bonse mwe balecucutika kabili abafininwa, na ine ndemupuupuutula.” (Mat.11:28) Tulemutasha bonse mwe batwalilila ukubombela Yehova te mulandu na mafya mukwata nampo nga yanono nelyo yakalamba.

Pa mulandu wa kuti mulabombesha umulimo wa kusambilisha na pa mulandu wa mapaalo ya kwa Yehova, nga kwakanya pa mulungu, ninshi abantu 4,762 pe sonde lyonse balabatishiwa cila mulungu. Mu mwaka wa mulimo uwapwa, ifilonganino ifipya 1,375 fyalipangilwe. Tulesubila no kupepa ukutila icitabo citila Bushe Cinshi Baibolo Isambilisha?, icafuma kale mu ndimi 120, cikaafwa abengi sana ukumwenamo mu cikuuku ca bupe fye na mu mutende ufuma kuli Yehova muli ubu “bushiku bwe pusukilo.”

Muleibukisha ukutila Ibumba Litungulula lyalimutemwa no kuti tulamupepelako. Kabili tulemutasha na pa mapepo mutupepelako.

Ni fwe bamunyinenwe,

Ibumba Litungulula Ilya Nte sha kwa Yehova