Ukutemwa—E Kulenga Tulebomba Bwino Umulimo
1 “Iseni kuli ine, . . . na ine ndemupuupuutula.” (Mat. 11:28) Aya mashiwi ayasuma yalelanga ifyo Yesu atemenwe abantu no mweo onse. Ifwe fwe Bena Kristu ababila imbila nsuma, tufwaya ukutemwa bantu abalecula ku mafya yaba muli ici calo umo ukutemwa kushaseka, nga filya na Yesu abatemenwe. Bushe kuti twatemwa shani abantu ilyo tulebila imbila nsuma?
2 Mu Kulanda: Ukutemwa bantu kwalengele Yesu ukulabeba imbila nsuma konse uko alebasanga. (Yoh. 4:7-14) Ukutemwa kukalenga tukalebomba ubunte bwa mu lyashi konse fye uko tuli. Umukashana uwa myaka 6 ashimikile umwanakashi uwaikele mupepi nankwe mu muputule bekala ilyo balepembela ukumona dokota. Cinshi calengele ukuti amushimikile? Atile: “Umwanakashi amoneke kwati alekabila ukwishiba fimo pali Yehova.”
3 Kuti twalanga ukuti natutemwa abantu nga ca kuti ilyo tulelanda nabo tulemwentula na mashiwi ayo tulelanda yali ayasuma. Na kabili kuti twalanga ukuti natutemwa bantu nga ca kuti tulekutika ilyo balelanda, twaishiba ifibasakamika, kabili twalenga baishiba ukuti natubasakamana. (Amapi. 15:23) Apo tupashanya Yesu tulingile ukukomaila pa mbila nsuma iya Bufumu na pa kutemwa Yehova atemwa bantu.—Mat. 24:14; Luka 4:18.
4 Ukubacitila Fimo: Yesu aleishiba ifyo abantu balekabila kabili alebacitila fimo. (Mat. 15:32) Na ifwe kuti kwaba inshita twingalanga abantu ukuti twalibatemwa ukupitila mu kubabombela imilimo imo imo ilyo tulebomba umulimo wa kubila. Nkashi umo amwene umwanakashi ale-esha ukumfwa amashiwi yacindama ayaishile pali foni nomba alifililwe. Nkashi yesu alimwafwile ukumfwa ayo mashiwi ilyo amupilibwilile ifyalelanda uwatumine ulya foni. Ici calengele umwanakashi asumina ukulanshanya na nkashi amashiwi ya mu Baibolo kabili alisumine ne sambililo. Kumbi nako, munyina umo ilyo alebwelela ku muntu uo ashimikile asangile nakalipa pantu alefwaya ukupisha umupando uwafina pa mwinshi lelo walipatile. Munyinefwe alimwafwile ukupisha umupando pa mwinshi. Ulya mwaume alisumine ukumfwa ifyo munyinefwe aendele kabili amwebele ukwikala pali ulya wine mupando ne sambililo lya Baibolo lyalitendeke.
5 Ilyo tulebomba umulimo wa kubila, tulanga apabuta ukuti twalitemwa Lesa na bantu banensu. (Mat. 22:36-40) Nga tulelanda na bantu kabili tulebacitila fimo, ababa ne cishinka baleluka ukuti ni fwe twaishiba icine.