Yehova Atemwa Uupeela ne Nsansa
1. Mulandu nshi uo Yehova abela Lesa wa nsansa?
1 Baibolo ilondolola Yehova ukuti ni “Lesa wa nsansa.” (1 Tim. 1:11) Cinshi cilenga ukuti Yehova abe ne nsansa? Cimo icalenga ca kuti lyonse ni kapekape, ‘alafumbatule minwe yakwe, no kwikusha conse ica mweo ifyo cilefwaya.’ (Amalu. 145:16) Ubupe bwakulisha ubo atupeela Mwana wakwe uo atupeele ukuti atulubule. (Yoh. 3:16) Kabili tontonkanyeni pa mapaalo ya ku mupashi na ya ku mubili ayo atupeela cila bushiku! Cine fye, ala Yehova e o twingapashanya ‘ukulapeela ne nsansa.’ (2 Kor. 9:7) Baibolo itukonkomesha ukuti: “Mube abapashanya Lesa.” (Efes. 5:1) Lekeni tupituluke mu nshila isho tulingile ukupashanya Yehova no kumona ifyo atupaala nga tulepeela ne nsansa.—Imil. 20:35.
2. Tumfwa shani nga twabila imbila nsuma ya Bufumu ku bantu bambi?
2 Tulomfwa bwino nga tulebila imbila nsuma ya Bufumu ku bo tusanga mu cifulo tushimikila. Tulaba ne nsansa sana nga tuleshimikila no kusambilishako bambi Icebo ca kwa Lesa. Abantu ba kwa Yehova balapoosa amaawala ayengi cila mwaka muli uyu mulimo wa kupeela. Mu mulimo wesu uwa kubila, tulapeela bantu bamagazini, amabroshuwa e lyo na mabuuku ukwabula ukubalipilisha.
3. Bushe ifilonganino mu fyalo ifipiina, ukubikako fye na muno Zambia, bafyafwa shani?
3 Kabili mu fyalo ifipiina, nge fi cino calo cesu caba, ukuteyanya kwa kwa Yehova kwalyafwa ifilonganino ifingi ukukuula Amayanda ya Bufumu. Ici e calenga ukuti tukwate ififulo fya kulonganinamo ifisuma. Pali ino nshita, Amayanda ya Bufumu ukucila pali 6,000 yalikuulwa mu fyalo ifipiina mu Africa fye. Ukufuma palya iyi programu yatendekele, papita imyaka 7 kabili ifilonganino 1,302, mu Zambia balifikuulila Amayanda ya Bufumu. Ifi filonganino filasunga bwino amayanda yabo aya Bufumu, e lyo kabili balasangula indalama sha kukuulila ukulingana na papelele amaka yabo. Iyi misangulo ilenga ifilonganino na fimbi na fyo ukukwata amayanda ya Bufumu ayapya.
4. Bushe ni kuli finshi uko amaofesi ya musambo icalo fye conse yabomfesha indalama?
4 Ibumba Litungulula, e lilolekesha pa mulimo wa Bufumu icalo fye conse ukupitila mu misambo ukucila pali 100. Bamunyina na bankashi ukucila pali 20,000 ebabomba pa maofesi ya musambo. Pa maofesi yamo yamo aya musambo balapulinta impapulo ukubomfya bamashini bangufyanya pa kuti tulekwata impapulo sha kubomfya mwi bala. Ni nomba line fye ukuteyanya kwashitile bamashini 7 aba kupulintilako bamagazini. Aba bamashini balangufyanya ukupulinta ica kuti mwi awala limo kuti bapulinta bamagazini 90,000. Taleni tontonkanyeni ifyaba muli uyu mulimo ukalamba uwa kupulinta. Ifikuulwa ifikalamba filafwaikwa pa kuti babikemo ifi fimashini fya kupulintilako. Amapepala ayengi nga nshi ne fipe fimbi filafwaikwa pa kupulinta bamagazini ne fitabo. Amakompyuta ne fibombelo fimbi filafwaikwa pa kuti umulimo wa kupilibula ne milimo imbi iya mu maofesi ileenda bwino. Kabili ababomfi ba pa Bethel balakabila umwa kwikala. Fyonse ifi filenga umulimo wa kubila imbila ya Bufumu ukuya pa ntanshi.
5. Milimo nshi imbi iifwaikwa indalama ishingi nga nshi icalo fye conse?
5 Indalama shimbi isha kuteyanya shibomba ku kusakamaninamo bamishonari abengi nga nshi na bapainiya baibela abo batuma ku fifulo ukwaba ukukabila kwa bakasabankanya. E lyo kabili kwaba na bakangalila benda abengi nga nshi abatandalila ifilonganino ku kukoselesha aba bwananyina ukutwalilila ukuba ne citetekelo no kubakoselesha ukucincila mu mulimo wa kubila imbila ya Bufumu. Te kuti tukumemo ukupendawila ifyo Yehova alelenga ababomfi bakwe ukubomba, ukubomfya indalama ishingi.
6. Bushe indalama shonse shifuma kwi pa kuti imilimo yonse mu kuteyanya ibombwe?
6 E ico nga mwatontonkanya pa mulimo ubukalamba uulebombwa icalo fye conse, limbi kuti mwapapa amuti, ni kwi ukufuma indalama sha kulipilila ifi fyonse? Ishi ndalama sha bupe tashifuma kuli bamunyinefwe abanono abakwata ifyuma nangu ukufuma ku fyalo ifikankaala. Iyi misangulo ifuma kuli bamunyinefwe amamilioni aba cuma na bapiina e lyo na ku bantu fye bambi abacindamika uyu mulimo ukalamba uo Yesu atile tufwile ukubomba. (Mat. 24:14; 28:19, 20) Ishi ndalama sha bupe shonse shaba nga matoni ya mfula aya kuti nga yafula yapanga umumana. Uyu mumana uya mu mumana umbi uukalamba, wasuka waba umukuku uukalamba nga nshi. Inte sha kwa Yehova tabapishamo imbale ya mutuulo pa kulongana kabili tabalombelesha indalama. Bonse abatungilila uyu mulimo ukalamba bacite fyo pa mulandu wa kuti balitemwa Yehova.
7. Bushe abantu ba kwa Lesa bomfwa shani ilyo balepeela ubupe ku mulimo wa kwa Yehova?
7 Abantu ba kwa Yehova kale batampa ukupeela ubupe ubwa kusandulwilako ukupepa kwa cine ukwa kwa Yehova. Ilyo Abrahamu acimfishe abalwani abasendele umwana wakwe Lote, alipeele ubupe kuli shimapepo Melkisedeke. (Ukute. 14:18-20) Imfumu Davidi yalipeele golde iingi, na silfere, umukuba, ifimiti, ne fisolobelo fimbi ifya mutengo ifya kukuulila itempele ilyo Solomone umwana wakwe, akuulile pa numa. (1 Imila. 29:1-5) Ilyo Yehova aebele Mose ukukuula ihema mu matololo, abantu balipeele ifya bupe ifingi. Pa Ukufuma 35:21 palembwa ifyebo fya kuti: “Awe baishileko umuntu onse uo umutima wakwe wamwimishe kabili onse uo umutima wakwe wamulengele ukuitemenwa, na bo balete ca musangulo ca kwa Yehova, ku mulimo.” Kanshi ‘imitima yabo e yali no kubeemya’ kabili yali no kubalenga ‘ukuitemenwa’ ukupeela ubupe ubwa fibekobeko fya mutengo e lyo ne fipe fimbi ifyo bashali na kupyanikishapo nga bafipeela. Balefwaya sana ukulenga ukupepa kwa cine ukuya pa ntanshi.
8. Lisambililo nshi ilyacindama ilyo tusambilila ku lyashi lyalembwa pali Luka 21:1-4?
8 E fyo na lelo bacita. Ukufuma indalama sha kubomfya ku mulimo wa Bufumu icalo fye conse ni ku bantu abo imitima yabo yimya ukuti bapeele ubupe. Abengi bapiina lelo balasangwilako indalama sha kwafwilisha umulimo wa kubila imbila nsuma, kabili ilingi line balaipeelesha pa kupeela ubupe nga filya mukamfwilwa umupiina acitile mu nshiku sha kwa Yesu. Ilyashi lyalembwa muli Luka 21 lyalilanda ifyo Yesu na basambi bakwe baletamba abantu balepoosa ubupe mu tubokoshi pe tempele. Lyena kwaishile mukamfwilwa umupiina, apooselemo utunyampuku tubili. Ilyo Yesu amwene ifi, aebele abatumwa bakwe ati: “Ndemwebe cine cine, nati, Uyu mukamfwilwa, nangu mupiina, apooselemo ishingi ukucila isho bonse bapooselemo. Pantu bonse ni pa shisheleko bapooselemo ifya bupe, lelo uyu mwanakashi, mu kubulwa kwakwe, apooselemo shonse isha kuliilamo isho acikwata.” (Luka 21:2-4) Alimutashishe pantu aliipeeleshe sana pa kupeela ubu bupe. Ili lyashi litulangilila ukuti ne misangulo iinono iyifuma kuli bamunyinefwe abapiina yalicindama nga nshi kabili Yehova no Mwana wakwe, Yesu Kristu balatemwa.
9. Bushe tufwile ukukwata umutima wa musango nshi pa kupeela?
9 Ilyo tulepeela ukuti tusandulule ukupepa kwa cine ukwa kwa Yehova, tufwile ukupeela no mutima wa nsansa. Ilyo abena Israele balekele ukucindika itempele lya kwa Yehova, mu cifulo ca kuleta inama ishisuma sana pa kupeela ilambo, baleleta isho balemona ukuti tapali ifyo bengacita na sho, e kutila ishalwala, ishapofula, e lyo ne shalemana. Bushe Yehova aletemwa amalambo ya musango uyu? Awe nakalya! Alandile ukuti balimusuulile pa kuleta amalambo ya musango uyu. (Lebi 1:10; Mal. 1:13) E ico na ifwe ilyo tuletungilila ukupepa kwa cine tatufwile ukupeelela fye ico cine iyo. Icifwile ukulenga ukuti tupeele ni co tulefwaya ukusandulula ukupepa kwa cine; imitima yesu ifwile ukutwimya ukupeela nga filya mukamfwilwa umupiina aipeeleshe pa kupeela ubupe. Yehova akatupaala, nga filya alaile abena Israele abali no kutungilila ukupepa kwakwe.—Mal. 3:10.
10. Londololeni ifyo ciba ilyo twapoka impapulo na bamagazini.
10 Bamo tabaishiba bwino ifyo ciba ku mpapulo na bamagazini tupoka fye ukwabula ukupingulwa umutengo. Nga twapoka impapulo nelyo bamagazini pa Ng’anda ya Bufumu, tulakwata ne shuko lya kusangwilako. Nga tulecite ifi, ninshi tulebweseshapo indalama shimo ishabomfiwe pa kupanga impapulo. Ilyo tulepeela abantu impapulo mu mulimo wa mwi bala, kuti twabalondolwela ulwa musangulo umuku wa kubalilapo fye twabatandalila, kuti calinga no kubeeba ifyo ishi ndalama shibomfiwa no kuleka basangwilako ku mulimo wa mwi sonde lyonse nga balefwaya. Abengi nga baishiba ukuti umulimo wesu waba fye icalo conse balaitemenwa ukusangwilako.
11. Bushe ilyo tulebomfya ifyuma fyesu ku kutungilila ukupepa kwa cine ukwa kwa Yehova, tulingile ukuyumfwa shani?
11 Nga twatontonkanya pa fyo twaipeela kuli Yehova, kuti twamona ukuti twaipeela no mweo onse na fyonse ifyo twakwata. Isonde na fyonse ifyabapo fya kwa Yehova. (Amalu. 24:1) E ico ilyo twapeela ubupe ku mulimo wa mwi sonde lyonse, ninshi tulebwesesha Yehova ifyo atupeela kale. Imfumu Davidi yalilandile bwino sana ilyo yena no luko lonse ulwa Israele bapeele ifyuma ifingi ifya kukuulila itempele. Apepele kuli Yehova ati: “Nine ani, kabili ni bani abantu bandi, ukuti twingaba na maka aya kupeela ku kuitemenwa ifya bupe nge fi? Pantu fifuma kuli imwe fyonse, kabili ifyafuma mu kuboko kwenu e fyo tupeelako kuli imwe.” (1 Imila. 29: 14) Kwena cila muntu afwile ukuipingwila mu mutima wakwe, ifyo alefwaya ukupeela ukulingana na papelele amaka yakwe. Yehova akapaala bonse abapeela ne nsansa mu mutima wabo.
12. Mulandu nshi cawamina ifwe bonse ukuceeceeta imitima yesu ukumona nga tuletungilila umulimo wa Bufumu?
12 Cisuma sana ifwe ukulaceeceeta imitima yesu pa fyo tutungilila umulimo wa Bufumu. Limo limo bamunyinefwe abatila tabakwata indalama sha kusangula ku mulimo wa mwi sonde lyonse nelyo ku kusakamaninamo Ing’anda ya Bufumu, balakwata indalama sha kubomfya ku fintu fimbi. Nga baleteyanya ubwinga, ilingi line indalama ishingi shilabomfiwa pa cintu icibako fye ubushiku bumo. Bushe ici tacilemoneka ukuti bamo tabacindamika umulimo wa Bufumu pa mulandu wa kuti tababikako amano?—Fil. 1:10.
13. Bushe kuti twacita shani pa kuti tulesangwilako ku mulimo wa mwi sonde lyonse, kabili icilonganino cifwile ukucita shani iyi misangulo nga yaisa?
13 Indalama sha bupe isha mulimo wa mwi sonde lyonse kuti shatumwa mu kulungatika kwi ofesi lya musambo nangu kuti mwashibika mu kabokoshi pa Ng’anda ya Bufumu. Ukulongana nga kwapwa fye bamunyina babili bafwile ukupenda ndalama mu kabokoshi no kulemba lisiti. Nga ca kutila bamunyinefwe abaleangalila bali ne cishinka mu kusakamana iyi misangulo, bamunyinefwe tabakaleshimba ukupoosamo indalama mu tubokoshi twa misangulo pa Ng’anda ya Bufumu. (1 Kor. 4:2) Imisangulo yonse iya mulimo wa mwi sonde lyonse iyo icilonganino capokelela ifwile ukutumwa kwi ofesi lya musambo pa mpela ya mweshi.
14. Bushe cinshi twingacetekela ukuti cikacitika nga twatungilila umulimo wa Bufumu ku ndalama shesu?
14 Yehova alipaalile uluko lwa Israele icine cine ilyo batungilile ukupepa kwakwe ukwa cine ku fyuma fyabo. Na ifwe kanshi akatupaala nga tuletungilila umulimo wa kubila imbila ya Bufumu mu cishinka no ‘kulacindika Yehova ku fyuma fyesu.’—Amapi. 3:9, 10.