Afweni Abasambi ba Baibolo Ukutendeka Ukulashimikila Imbila Nsuma iya Bufumu
1 Umulimo Yesu apeele abasambi bakwe uwalembwa pali Mateo 28:19, 20, bali no kuubomba isonde lyonse fye. Abasambi ba kwa Kristu babebele ukupanga abasambi bambi. Aba na bo bali no kulapanga abasambi na bambi. Umulimo abasambi batendeke uwa kushimikila imbila nsuma iya Bufumu bwa kwa Lesa wali e ntendekelo fye iya mulimo uwali no kubombwa mu nshiku sha kulekelesha ishaibela mwi sonde lyonse. Uyu e mulimo na ifwe tulebombako muli shino nshiku isho tuleikalamo.—Mat. 24:14.
2 Abasambi besu aba Baibolo nalimo kuti baba bana besu nelyo abantu bambi abalefwaya ukusambilila Baibolo na ifwe. Tulefwaya ukwafwa aba musango uyo no mutima wesu onse pa kuti balebomba umulimo uo bafwile ukulabomba uwa kwafwa bambi ukuba abasambi ba kwa Yesu Kristu.—Luka 6:40.
3 Kansheni Abasambi ba Baibolo pa Kuti Baleshimikila: Koselesheni abo musambilila nabo ukulaebako bambi ifyo balesambilila. Mulebashimikila ifisuma ificitika ilyo muli mu mulimo wa mwi bala. Sambilisheni abana benu ilyo bacili fye abaice ukulashimikila bwino pa kuti ilyo balebomba mulefuma ifisuma, kabili lekeni bashimikile ukulingana napapelele amaka yabo. (Amalu. 148:12, 13) Kuti mwabalanga ukuti mwalitemwa umulimo wa kushimikila ku fyo musosa ne fyo muubomba.—1 Tim. 1:12.
4 Yehova abomfya fye abasumina amafunde yakwe ayalungama no kuyakonka. Kwena, bakasabankaya abapya tabaishiba ifingi nge fyo bakasabankanya abaipeela, ababatishiwa kabili abaishiba sana ukushimikila baishiba. Nangu cibe ifyo, abapya bafwile ukusumina mu masambililo yacindama aya kubalilapo ayaba mu Baibolo kabili bafwile ukwishiba ifya kuyalondolola. (Moneni icitabo ca Abaiteyanya, amabu. 79-82.) Apo nomba aba basambi abapya balifumamo kale muli “Babiloni Mukalamba” kabili tabaisanshamo mu fikansa fya calo, bafwile balelongana lyonse.—Ukus. 18:2, 4; Yoh. 17:16; Heb. 10:24, 25.
5 Ilyo mwamona ukuti umusambi wenu nafikapo ukuba kasabankanya uushabatishiwa, mufwile ukweba kangalila wa kutangilila. Akeba baeluda babili ukumukumanya pamo no musambi wenu pa kuti bakamone nga nafikapo ukulashimikila pamo ne cilonganino nga kasabankanya uushabatishiwa uwa mbila nsuma iya Bufumu. Nga basuminisha umusambi wenu ukutendeka ukushimikila, mukatwalilila ukulamukansha ilyo mulebomba nankwe mu mulimo wa mwi bala.