Nani Mukasala Ukuba Kateka Wenu?
1. Mulandu nshi Abena Kristu bayila mu kushimikila?
1 Pa kuti abantu bapingulepo bwino uulingile ukubateka, Yesu atumine abasambi bakwe ukushimikila ‘imbila nsuma iya bufumu’ ilyo impela ya cino calo ishilaisa.—Mat. 24:14.
2. Mulandu nshi twingasosela ukuti ilyo tulelanda pa Bufumu bwa kwa Lesa te kutila ninshi fwe Bena Kristu tulesaalula amabuteko ya bantunse?
2 Ilyo balelanda pa Bufumu bwa kwa Lesa, Inte sha kwa Yehova tabaipoosa mu fikansa fya calo nangu ukusongelekanya abantu pa kuti bapondokele amabuteko. (Tito 3:1) Lelo twesha ukwafwa abatemwa ubulungami ukulakonka ifisuma ifyo Baibolo isambilisha. Maka maka twesha ukubasambilisha ifya kukonka amashiwi ya mu Baibolo ayashaluka no kucetekela Ubufumu bwa kwa Lesa ukuti e bukapususha fye abantunse.
3. Mulandu nshi cabela icalinga kuli ifwe ukulatungilila Ubufumu bwa kwa Lesa?
3 Ifyo Abakatekwa no Bufumu Bakapaalwa: Lyonse fye Yesu alecita ifintu ukulingana ne fyo Lesa engacita. E mulandu wine ukucila ukufwaya inshila yakwe umwine no kwesha ukuwamya ifintu muli cino calo ukupitila mu mapolitiki, Yesu ena alebombesha nga nshi ukubila pa Bufumu bwa kwa Lesa, ukuti e bukapwisha fye amafya ya muli cino calo. Pa mulandu wa kuti ali ne cishinka, Yehova alimulambwile pa kumupeela icipuna ca Bufumu mu muulu. Mwandini ici cilambu cishaiwamina apokelele pa kunakila Lesa!—Dan. 7:13, 14.
4. Bushe Ubufumu bwa kwa Lesa bukacita shani pa kupwisha ificusha abantunse?
4 Abengi nga nshi pali lelo abapashanya Yesu mu kufwaya Ubufumu bwa kwa Lesa intanshi no kunakila ku kufwaya kwa kwa Lesa, na bo bakapokelela ica bupe cishaiwamina, e kutila ukuba abatekwa ba pe sonde aba Bufumu bwa kwa Lesa. (Mat. 6:33) Ilyo ubu Bufumu bukalateka mu kutemwa, abantu bakabuuka no kubafwa pa kuti bakabe abapwililika, abengapokelela umweo wa muyayaya. (Ukus. 21:3, 4) Ibuuku lya 1 Yohane 2:17 litila: “Ici cine calo cileya pamo no lunkumbwa lwa ciko, lelo uucita ukufwaya kwa kwa Lesa akekalilila umuyayaya.” Apo Satana na bamukonka bakaba nabafumishiwapo e lyo ne sonde lyonse nalyalulwa ukuba paradaise umo abantu bonse bakatemwana, umushakabe aba mafisakanwa, no kupepa kwa bufi, ala mwandini ikaba ni nshita ya nsansa nga nshi ukwikala pe sonde umuyayaya!—Amalu. 37:29; 72:16.
5. Mulandu nshi calingila ukwita ubukombe tushimikila ukuti “imbila nsuma”?
5 Ca cine, Ubufumu bwa kwa Lesa e bukalenga ukuti pano calo pakabe insansa sha cine cine, e mulandu wine calingila ukwita ubukombe ubulanda pa Bufumu ukuti imbila nsuma.