Amepusho Ukufuma ku Babelenga

Umwaka wa ntandala uwalumbulwa mu Ubwina Lebi icipandwa 25 wimininako cinshi?

Ifunde lya kwa Mose lyapeele icipope ca kuti: “Mu mwaka wa cinelubali mukabele isabata ilya kutushamo icalo.” Pa lwa uyo mwaka abena Israele bakonkomeshiwe ukuti: “Wikatandamo amailime yobe, ne bala lyobe lya myangashi wikatungwilamo; cimbuka wa kuseepa kobe wikaseepa, ne myangashi ya ku muti obe uushatungwilwa wikatondolako: ukabe umwaka wa kushikitalamo icalo.” (Ubwina Lebi 25:4, 5) Kanshi umwaka onse uwalenga 7 waleba mwaka we Sabata. Pa numa ya masabata 7 uko e kuti yonse pamo nga yakumana 49, e lyo umwaka wakonkapo uwalenga 50 waleba Umwaka wa ntandala. Cinshi cali no kucitika muli uyo mwaka?

Yehova aebele Mose ukweba abena Israele ati: “Mukaleshisho mwaka wa makumi yasano, no kubilo kulubuka mu calo ku bekashi ba ciko bonse; wene ukaleba uwa ntandala kuli imwe; e lyo umuntu onse akabwelele ku camaniwa cakwe, kabili umuntu onse akabwelele ku lupwa lwakwe. Umwaka wa makumi yasano ukaleba uwa ntandala kuli imwe; mwikatandamo, nangu kuseepamo cimbuka, nangu kusabamo imyangashi iishatungwilwa.” (Ubwina Lebi 25:10, 11) Kanshi ukukonkana kwa masabata 7 ukufushiwa imiku 7 uko e kuti umwaka walenga 49 na o waleba mwaka we Sabata. Lelo ku bekashi ba uko uyu mwaka wa ntandala waleleta ukulubuka. AbaYuda bonse abasendelwe mu busha baali no kulubulwa ukufuma muli bunkole. Ifikwatwa fya lupwa ifyo umo nalimo apatikishiwe ukushitisha na fyo fyali no kubweshiwa ku lupwa lwakwe. Umwaka wa ntandala wali mwaka wa kubweshiwa no kulubulwamo kwa bena Israele ba pa kale. Cinshi uyu mwaka wa ntandala wimininako ku Bena Kristu?

Ukupondoka kwa muntu wa kubalilapo Adamu, kwalenga abantunse bonse ukuba abasha ku lubembu. Lesa alipekanya ilambo lya cilubula ilya kwa Yesu Kristu pa kuti alubule abantunse ku busha bwa lubembu.a (Mateo 20:28; Yohane 3:16; 1 Yohane 2:1, 2) Ni lilali Abena Kristu balubukako kwi funde lya lubembu? Ilyo Paulo alelanda na Bena Kristu basubwa, atile: “Ifunde lya mupashi ulya uupeela ubumi muli Kristu Yesu lyalimulubula kwi funde lya lubembu kabili ilya mfwa.” (Abena Roma 8:2) Abakwata isubilo lya bumi bwa ku muulu baba abantungwa lintu basubwa no mupashi wa mushilo. Nangu baba ne mibili ya buntunse kabili tabapwililika, Lesa alabalungamika no kubabuula ku kuba abana bakwe aba ku mupashi. (Abena Roma 3:24; 8:16, 17) Kwi bumba lyonse ilya basubwa, Intandala ya Bwina Kristu yatendeke pa Pentekoste wa 33 C.E.

Ni shani pa lwa “mpaanga shimbi” ababa ne cilolelo ca kwikala ku ciyayaya pano pene pe sonde? (Yohane 10:16) Ukuteeka kwa Myaka Ikana Limo ukwa kwa Kristu ikaba ni nshita ya kubweshiwa no kulubulwa ku mpaanga shimbi. Muli uku Kuteeka kwa Myaka Ikana Limo ukwaba kwati mwaka wa ntandala, e mo Yesu akabomfya ukumwenamo kwe lambo lyakwe ilya cilubula ku bantunse aba citetekelo kabili akafumyapo fyonse ifyafuma mu lubembu. (Ukusokolola 21:3, 4) Lintu imyaka Ikana Limo iya Kuteeka kwa kwa Kristu ikapwa, abantunse bakafika ku kupwililika kabili bakalubuka umupwilapo ku lubembu ne mfwa ifyo bapyana. (Abena Roma 8:21) Lintu ifi fyonse fikacitika, apa pene e pakapwila ne ntandala ya Bena Kristu.

[Futunoti]

[Icikope pe bula 26]

Ukuteeka kwa Myaka Ikana Limo ukwaba ngo mwaka wa ntandala—ikaba ni nshita ya kubweshiwa no kulubulwa kwa “mpaanga shimbi”

“Uwacenjela Acitila mu Kwishiba”

UKUPANDA mano ukwaba mu Cebo ca kwa Lesa, Baibolo, ‘kwatemwikwo kucila golde, ukucila golde uwalopolwa uwingi.’ (Amalumbo 19:7-10) Cinshi kwawamina ukucila golde? Pantu “amalango ya wa mano [Yehova] kamfukumfuku ka mweo, ku kuleko kufumako ku fiteyo fya mfwa.” (Amapinda 13:14) Ilyo twaumfwila ukufunda kwaba mu Malembo, imyeo yesu ilawaminako e lyo kabili kulatwafwa ukutaluka ku fiteyo ifingatonaula. Nacicindama kanshi ukufwayafwaya ukwishiba kwa mu Malembo no kucita ifyo tulesambilila!

Nge fyo calembwa pa Amapinda 13:15-25, Imfumu Solomone iya ku Israele wa pa kale yafundile ukufunda ukwingatwafwa ukunonka ukwishiba pa kuti twingaba no bumi busuma kabili ubwatantalila.a Abomfya amapinda ayepi ku kulangilila ukuti Icebo ca kwa Lesa kuti catwafwa ukusenaminwa, ukutwalilila aba cishinka mu mulimo wesu, ukupokelela ukusalapula, no kusala bwino aba kubishanya na bo. Kabili alanda na pa mano yaba mu kushiila abana besu ubupyani e lyo na pa kubasalapula mu kutemwa.

Ukushilimuka Kusuma Kupeela Ububile

Solomone atila, “Ukushilimuka kusuma kupeelo bubile; ne mibele ya bafutika ileto lupato.” (Amapinda 13:15) Icitabo cimo citila ukulingana no lulimi amashiwi ya “ukushilimuka kusuma,” nelyo umucetekanya