Ifya Kucita pa Kupanga Abasambi
1. Ni kwi twingasanga abasambi abapya?
1 Paulo na Bena Kristu banankwe balefwaya ukulapanga abasambi ukupitila mu kushimikila ku ng’anda ne ng’anda, pa maliketi e lyo fye na pa lwendo, kanshi kuti twatila balefwaya ukupanga abasambi konse fye uko baleba. Apo mwaliba abacincila mu mulimo wa Bufumu uwa kupanga abasambi, bushe kuti mwalundako ifyo mubomba muli uyu mulimo? Bushe kuti twashukila ishuko lya kufwaya abayana no kubashimikila? Ni nshila nshi shimo isho bakasabankanya bambi aba mbila nsuma babomfya pa kusanga abasambi?
2. Londololeni icacitike icilelanga ifyo cacindama ukubika amano ku nshila shalekanalekana isha kushimikilamo imbila nsuma?
2 Bakasabankanya abengi balasanga abasambi abapya pantu balakonka ifyebo ifilanda pa fya kushimikila ku bantu konse uko mwabasanga. Bakasabankanya bamo balashimikila kubo babomba nabo. Munyinefwe Royd uwalebomba pa mukoti aleti pa nshita ya kutusha aleipusha abo alebomba nabo pa fyo baishibe pa malembo yamo. Alebepusha ukuti “Nani aba ‘icilibwe’ ico balandapo pali Mateo 16:18?” Nelyo “Nani aba ‘ilibwe lya kuipununako’ ilyo balandapo pa Abena Roma 9:32?” Ilingi line bashimaini abengi balelongana kukumfwa ifyo munyinefwe Royd alelondolola Amalembo. Pa mulandu wa fyo alelanshanya nabo, abengi abo alebomba nabo bali-ipeele no kubatishiwa. Filya fine balelanshanya na bo alebomba nabo calengele ukuti aleshimikila imbila nsuma.
3. Ni nshila nshi ilingi ibomba bwino pa kutendeka amasambililo ya Baibolo?
3 Bakasabankanya bamo aba mbila nsuma balatendeka amasambililo ya Baibolo pa muku wa kubalilapo fye balanshanya no muntu. Bushiku bumo ulucelo icilonganino icakwete bakasabankanya 105 cakwete ubuyo bwa kutendeka isambililo lya Baibolo kuli onse uo basanga. Bakasabankanya 86 e baile mu kushimikila, kabili ilyo bashimikile pa ma-awala yabili, basangile ukuti balitendeke amasambililo ya Baibolo ayapya 15.
4. Mashiwi nshi ayacindama Yesu alandile ayo tufwile ukulatontonkanyapo, kabili cinshi tufwile ukutwalilila ukucita?
4 Twalilileni Ukufwaya Abayana: Apo muli bakasabankanya ba Bufumu, kuti nalimo mwatemwa ukwesha inshila sha kutendekelamo amasambililo ya Baibolo ishili muli cino cipande. Nangu cibe fyo, ilyo muletontonkanya pa nshila sha kushimikilamo, caliwama ukulatontonkanya na pa ntambi isho abantu ba mu cifulo mushimikilamo bakonka. Lelo pali fyonse, icacindama kulaibukisha amashiwi Yesu alandile aya kufwaya abayana no kubafwa ukuba abasambi.—Mat. 10:11; 28:19.