Finshi Abantu Basambilila Kuli Imwe?
1. Finshi abasambi ba kwa Yesu balesambilila kuli Yesu?
1 Yesu atile: “Sendeni ikoli lyandi no kusambilila kuli ine.” (Mat. 11:29) Kanshi Yesu talesambilisha fye ku mashiwi, lelo na ku mibele yakwe iisuma. Tontonkanyeni pa fyo abasambi balesambilila kuli Yesu ilyo balemona ifyo alecita. Ali uwanakilila, uwa cikuku, kabili ali no kutemwa. (Mat. 8:1-3; Marko 6:30-34) Ukuicefya kwa kwe kwali ukwa cine cine. (Yoh. 13:2-5) Ilyo abasambi balebomba na Yesu mu mulimo, balemona ukuti Yesu alebombesha kabili alesambilisha bwino bambi icine. (Luka 8:1; 21:37, 38) Bushe bambi banonkelamo shani nga balemona ifyo tulecita pa kushimikila?
2. Bushe imifwalile yesu ne mibele yesu ilyo tuli mu mulimo wa mwi bala kuti fyaafwa shani abantu?
2 Abene ba Ng’anda: Imifwalile yesu ne mibele yesu iisuma, no kubika sana amano kubo tushimikila kuti fyalenga baumfwa Icebo. (2 Kor. 6:3; Fili. 1:27) Balamona ukuti libili libili tulabomfya Baibolo. Bambi nabo balomfwa bwino ukumona ukuti tulakutika mu mucinshi lintu balelanda. Kanshi muleibukisha ukuti ukuba ne mibele iisuma muli ifi fintu ifyapusanapusana ifyo twalandapo kuti kwaafwa abantu ukumfwa ubukombe bwa Bufumu.
3. Ukubombesha kwesu mu mulimo wa mwi bala kukakuma shani bamunyinefwe?
3 Bamunyinefwe: Tontonkanyeni na pa fyo twingafwa bamunyinefwe. Nga tulebombesha mu mulimo, bambi nabo bakalacita cimo cine. Nga filya fine icela cinoona icela, e fyo cikaba na kuli bamunyinefwe nga ca kutila balemona ifyo tulepekanya bwino ifya kuyalanda pa kushimikila abantu, nabo bene bakakoseleshiwa ukulabomba bwino mu mulimo. (Amapi. 27:17) Nga tulebika amano ku kulemba amashina ya bantu abalefwaya ukusambilila Baibolo no kubwelelako mu kwangufyanya kuti kwalenga bambi ukulacita cimo cine. Tukalenga bamunyinefwe na banakashi ukulabombesha mu mulimo.—2 Tim. 4:5.
4. Mulandu nshi mu nshita mu nshita tufwile ukulaibebetela?
4 Kanshi mu nshita mu nshita muleibebeta no kumona ifyo mucita ne fyo mulanda nga fyaba ca kumwenako cisuma kuli bambi! Ica kumwenako cesu icisuma cikalenga Yehova ukutemwa kabili tukalanda nge fyo umutumwa Paulo alandile ukuti: “Mulempashanya, ifyo na ine mpashanya Kristu.”—1 Kor. 11:1.