Inte sha kwa Yehova

Ubulondoloshi: Ni sosaite ya bwina Kristu mu kusalala kwa calo abo mu kucincila basendo bunte ukulosha kuli Yehova Lesa ne mifwaile yakwe ukwambukilo mutundu wa muntu. Bashimpa ifisumino fyabo pali Baibolo yeka.

Fisumino nshi ifya Nte sha kwa Yehova fyababika pa lubali nga baibela ukufuma ku mabutotelo yambi?

(1) Baibolo: Inte sha kwa Yehova basumino kuti Baibolo yonse Cebo capuutwamo ca kwa Lesa, kabili mu cifulo ca kukonena ku cisumino cashimpwa pa cishilano ca muntu, baikatilila kuli Baibolo nge cipimo ca fisumino fyabo fyonse.

(2) Lesa: Bapepa Yehova nga Lesa umo eka uwa cine kabili mu kukakuka balanda kuli bambi pa lwa wene ne mifwaile yakwe iya kutemwa ukulola ku mutundu wa muntu. Uuli onse acitilo bunte apabuuta ulwa kwa Yehova lyonse aishibikwa ngo waba kwi bumba limo—“Inte sha kwa Yehova.”

(3) Yesu Kristu: Basumino kuti Yesu Kristu taba lubali lwa Bulesa butatu, lelo kuti, nga fintu Baibolo isosa, ali Mwana wa kwa Lesa, uwa kubalilapo mu kulenga kwa kwa Lesa; ukuti aikeleko pa ntanshi ya buntunse no kuti ubumi bwakwe bwalikuushiwe ukufuma ku mulu ukwisa mwi fumo lya kwa nacisungu, Maria; ukuti ubumi bwakwe bwapwililika ubwa buntunse bwalituulilwe mwi lambo ukucitikako ipusukilo ku bumi bwa muyayaya kuli abo ababeleshe icitetekelo; ukuti Kristu mu maka aleteka nge Mfumu, mu kuba no bulashi bwapeelwa na Lesa pe sonde ponse ukutula 1914.

(4) Ubufumu bwa kwa Lesa: Basumino kuti Ubufumu bwa kwa Lesa e subilo lyeka fye ilya mutundu wa muntu; ukuti buli ni kamfulumende iituntulu; ukuti bwangu bwangu bukonaula imicitile ilipo ibifi iya fintu, ukusanshako yonse amakamfulumende ya buntu, kabili ukuti bukaletako imicitile ipya umo ubulungami bukanana.

(5) Ubumi bwa ku mulu: Basumino kuti 144,000 abena Kristu basubwa ku mupashi bakakana na Kristu mu Bufumu bwa ku mulu, ukuteka nge shamfumu na wene. Tabasumino kuti umulu e cilambu ca uli onse uuli “umusuma.”

(6) Isonde: Basumino kuti imifwaile ya kubalilapo iya kwa Lesa iye sonde ikafikilishiwa; ukuti isonde umupwilapo likesulamo bakapepa ba kwa Yehova no kuti aba bakaba na maka ya kuipakisha ubumi bwa muyayaya mu kupwililika kwa buntunse; ukuti nangu fye abafwa bakemishiwa ukwisa kwi shuko ku kwakana muli aya mapaalo.

(7) Imfwa: Basumino kuti abafwa tabaishiba nangu cimo; ukuti tabakumanya kukalipwa nangu kumo nangu kusangalala mu bufumu bwa mipashi; ukuti tababako kano ukuba mu cibukisho ca kwa Lesa, e co isubilo lyabo ilya ku ntanshi ilya bumi lyalaala mu kubuuko kufuma ku bafwa.

(8) Inshiku sha kulekelesha: Basumino kuti twikele nomba, ukutula 1914, mu nshiku sha kulekelesha isha ino micitile ibifi iya fintu; ukuti bamo abamwene ifiponako ifya 1914 na kabili bakamonako ubonaushi bwa mupwilapo ubwa calo cilipo ica bubifi; ukuti abatemwo bulungami bakapusunsukila mwi sonde lyasanguluka.

(9) Ukupaatuko kufuma ku calo: Mu mukoosha balatukuta ukukaanabo lubali lwa calo, nga fintu Yesu asosele ifyo cingabe ca cine ku bakonshi bakwe. Balango kutemwa kwa cine cine kwa bwina Kristu ku bena mupalamano babo, lelo tabakana mu mapolitiki nelyo inkondo sha luko ululi lonse. Balapayanya ififwaikwa fya fimoneka ifya ndupwa shabo lelo basengauko kusupilo kufunuka kwa calo kwa fintu fimoneka no lulumbi lwa pa lwabo no kuibimba kwa ciko ukwacilamo mu musamwe.

(10) Ukubomfyo kufunda kwa Baibolo: Basumino kuti calibe cacindama ukubomfyo kufunda kwa Cebo ca kwa Lesa mu bumi bwa cila bushiku nomba—pa ŋanda, mu sukulu, mu ncito, mu cilonganino cabo. Te mulandu ne nshila ya kale iya muntu iya bumi, limbi kuti aba umo uwa Nte sha kwa Yehova nga ca kuti asha ifibelesho fyasenukwa mu Cebo ca kwa Lesa no kubomfyo kufunda kwa bukapepa ukwa ciko. Lelo nga ca kuti uuli onse pa numa acite cibelesho ca bucende, ubulalelale, ukulaalana kwa ba bwamba bumo bwine, ukubomfya bubi bubi imiti ikola, bucakolwa, ukubepa, nelyo ukwiba, alatamfiwa ukufuma mu kuteyanya.

(Ukutantika kuli pa mulu kulondolola mu kusupawila ifisumino fyapulamo fimo ifya Nte sha kwa Yehova lelo te fishinka fyonse ifyo ifisumino fyabo fyapusana ukufuma kuli ifyo ifya mabumba yambi. Ifitendekelo fya Malembo ifya fisumino fili pa mulu kuti fyasangwa mu fisontelelo fya ici citabo.)

Bushe Inte sha kwa Yehova butotelo bwa cina America?

Ni bakafwilisha ba Bufumu bwa kwa Lesa, te ba bupolitiki, aba bukumu, nelyo imicitile ya kwangalila capamo iya luko ululi lonse ulwa ici calo cikote.

Calibe ca cine ukuti Inte sha kwa Yehova bakwete ukutampa kwabo ukwa muno nshiku mu United States. Icifulo ica cishinte cabo ica calo kulya calyafwilisha ukupango kucitikako ukupulinta no kutuma impapulo sha Baibolo ku mbali ishingi isha calo. Lelo Inte tashasobolapo uluko lumo pa lunankwe; shasangwa mupepi no luko ululi lonse kabili balikwata maofesi mu mbali ishingi ishe sonde ukwangalile mibombele yabo muli isho ncende.

Languluka: Yesu pamo ngo muYuda afyalilwe mu Palestine, lelo ubuKristu tabuli butotelo bwa ciPalestine, bushe e fyo buli? Icifulo ica kufyalilwako ica buntunse ca kwa Yesu tacili ca kusangwilako kucilapo kucindama ukucilanguluka. Cintu Yesu asambilishe cafumine kuli Wishi, Yehova Lesa, uubomba mu kubulwa akapaatulula na bantu ba nko shonse.—Yoh. 14:10; Imil. 10:34, 35.

Ni shani umulimo wa Nte sha kwa Yehova wafwilishiwa mu fya ndalama?

Ni ku misangulo ya kuitemenwa, nga fintu cali ica cine na ku bena Kristu ba mu kubangilila. (2 Kor. 8:12; 9:7) Takuba ukulonganike indalama pa kulongana kwabo; tabalombelesha indalama ku bantu. Umusangulo uuli onse uo abalefwaya ukusangwilako basangwilako, wafwilisha umulimo wa mwi sonde lyonse uwa kusambilisha Baibolo uubombwa ne Nte.

Inte tashilipilwa pa kuya ku ŋanda ne ŋanda nelyo pa kutambika impapulo sha Baibolo pa misebo. Ukutemwa kwa kuli Lesa no kwa mwina mupalamano kulabakunto kulanda pa lwa mapayanyo ya kutemwa kwa kwa Lesa ku mutundu wa muntu.

Watch Tower Bible and Tract Society of Pennsylvania, ibumba lya butotelo ilya mwi funde ilibomfiwa ne Nte sha kwa Yehova, lyapangilwe mu 1884 mu kulingana mu kuba ne Funde lye Bumba Lishili lya bunonshi lya Commonwealth lya Pennsylvania, U.S.A. Muli fyo, mwi funde te kuti libe, kabili talyaba, lya ncito ya kupangilamo bunonshi, nelyo abantu umo umo tabapanga bunonshi ukupitila muli uyu Sosaite. Icipangano ca Sosaite cilondololo kuti: “Yena [Sosaite] tailanguluko bunonshi bwa fya ndalama nelyo ukunonka, mu kupumikisha nelyo fimbi, ku filundwa fya iko, badairekita nelyo abalashi.”

Bushe Inte sha kwa Yehova cakaniko atemwa imipepele ya kusefya?

Bamo balondolola icakaniko ukupilibule bumba ilyaputukako kufuma ku butotelo bwaimikwa. Bambi babomfye shiwi kwi bumba ilyakonka intungulushi ya buntunse iyaibela nangu kafundisha. Ishiwi ilingi line libomfiwa mu nshila ya kusuulwa. Inte sha kwa Yehova tabatuntuka kwi calici limo lelo basanshamo abantu ukufuma ku myendele yonse iya bumi no kufuma ku fifulo ifingi ifya butotelo. Tabalolesha ku muntunse uuli onse, lelo ukucila kuli Yesu Kristu, nge ntungulushi yabo.

Imipepele ya kusefya butotelo ubo bwalandwo bukokole atemwa ubo bukomaila pa kuipeelesha ukulingana no kusefya kwalondololwa. Ukupepo kwingi kukonka intungulushi ya buntunse iya mweo, kabili ilingi line abakonenako babo bekala mu mabumba ukufuma ku bashala aba sosaite. Icipimo ica ico cili ica bukokole, nangu cibe fyo, cifwile ukuba Cebo ca kwa Lesa, kabili Inte sha kwa Yehova bakonena na maka kuli Baibolo. Ukupepa kwabo ni nshila ya bumi, te kuipeelesha kwa kusefya. Tabakonka muntunse nangu ukuipaatulula ukufuma kuli sosaite yonse iyashala. Bekala no kubomba mu kati ka bantu bambi.

Ubutotelo bwa Nte sha kwa Yehova bwakokola shani?

Ukulingana na Baibolo, umutande wa nte sha kwa Yehova wafika ku numa kuli Abele uwa citetekelo. AbaHebere 11:4—12:1 atila: “Ni ku citetekelo e ko Abele atuulile kuli Lesa ilambo ilyacishe lya kwa Kaini . . . Ni ku citetekelo e ko Noa, ilyo asokelwe kuli Lesa pa fintu ifyali ifishilamoneka pa kuba na katiina ka kuli Lesa . . . Ni ku citetekelo e ko Abrahamu aumfwilile ilyo aitilwe ku kuya ku calo ico ali no kupokelela ica kukwata . . . Ni ku citetekelo e ko Mose ilyo akulile, akene ukwitwo mwana wa mwana mwanakashi wa kwa Farao; asalile ukucitwo bubi pamo na bantu ba kwa Lesa ukucilo kukwate nshita ya bwanalale iya lubembu . . . E ico na ifwe, pa kuba abashingulukwa kwi kumbi lya nte ilyakule fi, tube abafuule cifinine conse no lubembu ulwalambatila, tubutuke no mukoosha ulubilo ulwabikilwa ifwe.”

Mu kuba no kulosha kuli Yesu Kristu, Baibolo ilondololo kuti: “E fyo asosa Amene, inte ya cishinka kabili ya cine, ukutendeka kwa kulenga kwa kwa Lesa.” Kuli ani ali nte? Umwine wine atile alengele ishina lya kwa Wishi ukwishibikwa. Aali inte yapulamo iya kwa Yehova.—Ukus. 3:14; Yoh. 17:6.

Mu ca kusekelela, bamo aba baYuda balipwishe imibombele ya kwa Yesu Kristu napamo yaiminineko “isambilisho lipya.” (Marko 1:27) Pa numa, abaGreek bamo batontonkenye ukuti umutumwa Paulo aleteleko “icisambilisho ici cipya.” (Imil. 17:19, 20) Caali icipya ku matwi ya abo abalecumfwa, lelo icintu cacindamisha caali ca kuti caali cine, mu kuumfwana kutuntulu ne Cebo ca kwa Lesa.

Ilyashi lya muno nshiku ilya Nte sha kwa Yehova lyatendeke mu kuba no kupange bumba lya kusambilila Baibolo mu Allegheny, Pennsylvania, U.S.A., mu kubangilila kwa ba 1870. Pa kutendeka baishibwe fye nga Basambi ba Baibolo, lelo mu 1931 babuulile ishina lya mu Malembo Inte sha kwa Yehova. (Esa. 43:10-12) Ifisumino fyabo ne fibelesho tafili fipya lelo fyaba kubweseshapo ubuKristu bwa mwanda wa myaka uwa kubalilapo.

Bushe Inte sha kwa Yehova basumino kuti ubutotelo bwabo e bweka fye bumo ubwalungama?

Baibolo taisuminisha mu kuba ne mimwene ya muno nshiku ukuti kwalibako inshila ishapokelelwa ishingi ku kupepa Lesa. Abena Efese 4:5 asoso kuti “Shikulu umo, ukutetekela kumo.” Yesu alondolwele ukuti: “Inshila iitwala ku mweo ya kamfyemfye kabili yalifyenenkana, kabili banono abaisanga. . . . Te onse uutila kuli ine, Shikulu, Shikulu, akengila mu bufumu bwa mu mulu iyo; kano uucite cifwaya Tata wa mu mulu.—Mat. 7:13, 14, 21; mona na kabili 1 Abena Korinti 1:10.

Amalembo mu kubwekeshabwekeshapo yalosha kwi bumba lya fisambilisho fya bwina Kristu nge “cine,” kabili ubuKristu bwalandwa nge “inshila ya cine.” (1 Tim. 3:15; 2 Yoh. 1; 2 Pet. 2:2) Pantu Inte sha kwa Yehova bashimpa ifisumino fyabo fyonse, ifipimo fyabo ifya myendele, ne nshila sha kuteyanya pali Baibolo, icitetekelo cabo muli Baibolo iine yeka nge Cebo ca kwa Lesa icibapeela ubushinino ukuti cintu bakwata icine cine cili cine. E co icifulo cabo tacili ca kuituntumba lelo cilangilila ukucetekela kwabo ukwa kuti Baibolo cipimo calungama ku yo twingapiminako ubutotelo bwa umo. Tabali ba kaso lelo baliba ababilima ukwakane ifisumino fyabo na bambi.

Bushe amabutotelo yambi na yo tayakonka Baibolo?

Abengi balaibomfya ku cipimo cimo. Bushe mu cituntulu balasambilisha no kubelesha cintu yakwatamo? Languluka (1) Ukufuma ku mabupilibulo yabo ayengi aya Baibolo balifumyamo ishina lya kwa Lesa wa cine amakana na makana aya miku. (2) Icisambilisho ca Bulesa butatu, imfundo yabo iya kwa Lesa umwine, cabuulwo kufuma ku ntulo sha cisenshi kabili calundulwike mu musango wa ciko uulipo imyanda ya myaka pa numa ya kulembwa kwa Baibolo kwapililika. (3) Icisumino cabo muli bumunshifwa ubwa mweo wa buntunse nge cishinte ca bumi bwatwalilila tacafuma kuli Baibolo; cakwate mishila muli Babiloni wa pa Kale. (4) Umutwe wa lyashi uwa kushimikila kwa kwa Yesu wali Bufumu bwa kwa Lesa, kabili atumine abasambi bakwe ukulanda pa lwabo kuli bambi ulwa bwene; lelo amacalici ilelo te lingi balumbulo bo Bufumu kabili ifilundwa fyabo tafibomba mulimo wa kushimikila “imbila nsuma iyi ya Bufumu.” (Mat. 24:14) (5) Yesu atile abakonshi bakwe aba cine kuti baishibwa mu kwanguka ku kutemwa kwabo ukwa kupeele lambo. Bushe ico calibe ica cine ku mabutotelo ya Kristendomu ilintu inko shaya ku nkondo? (6) Baibolo isoso kuti abakonshi ba kwa Kristu tabengabo lubali lwa calo, kabili yasoko kuti uufwayo kuba cibusa wa calo aicito mwine umulwani wa kwa Lesa; lelo amacalici ya Kristendomu ne filundwa fya yako baliyobeka mu kushika mu milandu ya bupolitiki iya nko. (Yako. 4:4) Mu cilolwa ca calembwa ca musango uyo, bushe kuti calandwa mu kufumaluka kuti mu cituntulu bakonena kuli Baibolo?

Ni shani fintu Inte sha kwa Yehova bafika pa kulondolola kwabo kwa Baibolo?

Impikwe yasangwilako ya kuti Inte sha kwa Yehova mu cituntulu basumino kuti Baibolo Cebo ca kwa Lesa no kuti ico cakwatamo cabelamo ukusambilishiwa kwesu. (2 Tim. 3:16, 17; Rom. 15:4; 1 Kor. 10:11) E co tabaya ku kupaasha kwa maele ukusengauko bulondoloshi bwa liko bwalengama ubwa cine nelyo ukwebele nshila ya bumi bwa bantu abasha ifipimo fya mibele isuma ya liko.

Mu kusontamo ubupilibulo bwa lulimi lwa cimpashanya muli Baibolo, baleka Baibolo ukupayanya ubulondoloshi bwa luko, mu cifulo ca kupeela kwabo imfundo shabo ukukuma ku bucindami bwa luko. (1 Kor. 2:13) Ifilangisho ukukuma ku bupilibulo bwa mashiwi ya cimpashanya ilingi line fisangwa mu mbali shimbi isha Baibolo. (Pamo nge ca kumwenako, mono Ukusokolola 21:1, lyene ukulosha ku kupilibulwa kwa “bemba,” belenga Esaya 57:20. Pa kwishibisha “Umwana wa mpaanga” uwaloshiwako mu Ukusokolola 14:1, mona Yohane 1:29 na 1 Petro 1:19.)

Ukukuma ku kufikilishiwa kwa busesemo, babomfya cintu Yesu asosele pa lwa kuba abaibukila ku fiponako ifyumfwana ku cintu Yesu asobele. (Luka 21:29-31; linganyako 2 Petro 1:16-19.) Mu kusakamanishisha basonta ifyo fiponako no kubuulo kusakamana ku cintu Baibolo ilangisha ifyo filepilibula.

Yesu atile ifyo aali no kukwata pe sonde “umusha wa cishinka kabili uwashilimuka” (abakonshi bakwe abasubwa ukumonwa nge bumba), icibombelo ico engapayanishishamo ica kulya ca ku mupashi kuli abo bapange ŋanda ya citetekelo. (Mat. 24:45-47) Inte sha kwa Yehova shalishibo uko kutantika. Nga fintu caali ica cine ku bena Kristu ba mwanda wa myaka uwa kubalilapo, balolesha kwi bumba litungulula ilya ilyo ibumba lya “musha” ukupikulula amepusho yayafya—te pa cishinte ca mano ya buntunse, lelo mu kubuula ukwishiba kwabo ku Cebo ca kwa Lesa ne mibombele yakwe na babomfi bakwe, kabili mu kuba no kwaafwa kwa mupashi wa kwa Lesa, uo mu mukoosha bapepela.—Imil. 15:1-29; 16:4, 5.

Mulandu nshi kwabelako ukwalukaaluka pa myaka iingi mu fisambilisho fya Nte sha kwa Yehova?

Baibolo ilango kuti Yehova atungulula ababomfi bakwe ukuumfwikisha imifwaile yakwe mu mibele ya kulundulukilako. (Amapi. 4:18; Yoh. 16:12) Muli ifyo, bakasesema abo muli bulesa bapuutilwemo ukulemba imbali sha Baibolo tabaumfwikishe ubupilibulo bwa cili conse cintu balembele. (Dan. 12:8, 9; 1 Pet. 1:10-12) Abatumwa ba kwa Yesu Kristu balimwensekeshe ukuti kwali ifingi ifyo bashaumfwikishe mu nshita yabo. (Imil. 1:6, 7; 1 Kor. 13:9-12) Baibolo ilange fyo kuti kwabako ukwingilishiwako kukalamba mu kwishiba kwa cine mu kati ka “nshita ya mpela.” (Dan. 12:4) Ukwishiba kwaingilishiwako ilingi line kufwayo kuteuluka mu kutontonkanya kwa umo. Inte sha kwa Yehova mu bufuuke baliitemenwa ukucito kuteuluka kwa musango uyo.

Mulandu nshi Inte sha kwa Yehova bashimikilo kufuma ku ŋanda ne ŋanda?

Yesu asobele ku bushiku bwesu uyu mulimo kuti: “Ne mbila nsuma iyi ya bufumu ikabilwa ku fyalo fyonse ku kubo bunte ku nko shonse; e lyo impela ikesa.” Na kabili afundile abakonshi bakwe ukuti: “Kabiyeni, kalengeni aba nko shonse ukuba abasambi.”—Mat. 24:14; 28:19.

Lintu Yesu atumine abasambi bakwe ba mu kubangilila, abasontelele ukuya ku mayanda ya bantu. (Mat. 10:7, 11-13) Umutumwa Paulo atile ukulosha ku butumikishi bwakwe: “Nshakwindile ukulondolola kuli imwe conse ica kumwafwa, no kumusambilisha pa bantu na mu ŋanda ne ŋanda.”—Imil. 20:20, 21; mona na kabili Imilimo 5:42.

Ubukombe ubo Inte shibilisha bubimbamo imyeo ya bantu; bafwayo kuba abasakamana ukukanapanya uuli onse. (Sefa. 2:2, 3) Ukutandala kwabo kukuntwa ku kutemwa—intanshi Lesa, na kabili umwina mupalamano wabo.

Ukukumana kwa ntungulushi sha butotelo mu Spain kwalandile ici: “Nakalimo [amacalici] yali aya mulekelesha mu kucishapo pa lwa ico icili mu kulingana cabike ncito ishaikulila iya Nte—ukupempule ŋanda, iyaisa mu nshila ya butumwa iye calici lya kale. Ilyo amacalici, te pa tushita tunono, bapelela abene beka mu kulakuula amatempele yabo, ukulalishe nyenjele shabo ku kucebusha abantu no kulashimikila mu kati ka fifulo fyabo ifya kupepelapo, [Inte] shakonka umucenjelo wa butumwa uwa kuyo kufuma ku ŋanda ne ŋanda ne ya kubuule shuko lya kashita akali konse ukucitilo bunte.”—El Catolicismo, Bogotá, Colombia, September 14, 1975, ibu. 14.

Lelo mulandu nshi Inte mu kubwekeshabwekeshapo shitandalila nangu fye pa mayanda ya bantu abashakana na bo icitetekelo cabo?

Tabapatikisha bukombe pali bambi. Lelo balishibo kuti abantu baselela ku mekalo ayapya no kuti imibele ya bantu ilaaluka. Ilelo umuntu limbi kuti ali uwapamfiwa ku kukutikako; inshita imbi limbi kuti mu kutemwa akwate nshita. Icilundwa cimo ica ba mu ŋanda limbi te kuti cibe icasekelela, lelo bambi kuti baba. Abantu abene beka balaaluka; impika shakakala mu bumi limbi kuti shabimbula pa kusakamana kwa kukabila kwa ku mupashi.—Mona na kabili Esaya 6:8, 11, 12.

Mulandu nshi Inte sha kwa Yehova bapakashilwa no kubalwisha mu milandile?

Yesu atile: “Nga aba pano isonde bamupata, mwaishiba ukuti babala bapata ine. Amuba aba pano isonde, aba pano isonde nga batemwa ababo bene; lelo ico tamuli ba pano isonde, lelo ine namusalile mu ba pano isonde, e co aba pano isonde bamupatila.” (Yoh. 15:18, 19; mona na kabili 1 Petro 4:3, 4.) Baibolo ilango kuti icalo conse calaala pe samba lya kulama kwa kwa Satana; e kasongelekanya mukalamba uwa kupakaswa.—1 Yoh. 5:19; Ukus. 12:17.

Yesu na kabili aebele abasambi bakwe ukuti: “Mukaba abapatwa kuli bonse pa mulandu we shina lyandi.” (Marko 13:13) Ishiwi “ishina” pano lipilibula cintu Yesu ali mu bulashi, Imfumu ya buMesia. Ukupakaswa kwisa pa mulandu wa kuti Inte sha kwa Yehova shibika amakambisho yakwe pa ntanshi ya ayo aya kwa kateka uuli onse mwi sonde.

Nga Umo Asoso Kuti—

‘Cinshi imwe mwe bantu mushiibimbila mu kulacite fintu ukupange calo (ubwikashi) icifulo cawaminako ukwikalamo?

Pambi kuti wayasuko kuti: ‘Imibele mu bwikashi ili mu kumoneka iyacindama kuli imwe, kabili ili na kuli ine wine iyacindama. Kanjipushe, ni mpika nshi muleyumfwa ifwile ukuba pa kati ka kubalilapo ukukwato kusakamana?’ Lyene nakalimo lundako kuti: ‘Mulandu nshi muleyumfwile fyo iyi yaba ukukabila kukalamba kwa musango yo? . . . Ukwabulo kutwishika, incitilo ya mu kwangufyanya pa mulandu kuti yabe iya kunonsha, lelo ndi uwashininkisho kuti mulesumine fyo kuti mwatemwa ukumona ukuwamya pa cishinte ca ciputulwa ca nshita icalepa. Uko e kutununuka uko ifwe nge Nte sha kwa Yehova tubuula ukukuma ku mulandu. (Londolola cintu tucita ku kwaafwa abantu ukubomfya ifishinte fya Baibolo mu myeo yabo mu kuti bafike pa cishinte ca mulandu pa citendekelo ca pa lwabo; na kabili, cintu Ubufumu bwa kwa Lesa bukacita, kabili umulandu ubu mu kubelelela bukapikulule mpika.)’

Nelyo kuti wasoso kuti: ‘(Pa numa ya kufimba ifishinka fimo mu kwasuka kwafumako . . .) Abantu bamo basangwila ku kuwamyo bwikashi mu kupayanya indalama; bambi bacita mu kuitemenwa imibombele yabo. Inte sha kwa Yehova babomba fyonse fibili. Kanondolole.’ Lyene nakalimo lundako: (1) ‘Ukuba umo uwa Nte sha kwa Yehova, umuntu alingile mu kusakamanisha ukulipile misonko yakwe; iipayanye ndalama kuli kamfulumende ukupeela ku mibombele ikabilwa.’ (2) ‘Tuya ukucila pali ico, ukufika pa mayanda ya bantu, ukutambike sambililo lya Baibolo na bene ukwabulo kulipilisha. Lintu babeleshanya na cintu Baibolo isosa, basambilila ukubomfye ifishinte fya Baibolo no kucimfye mpika shabo.’

Ukucitikako kumbi: ‘Natemwa mwaletako ilyo lyashi. Abantu abengi tabatala abafwailisha ukusanga cintu Inte mu cituntulu balecita pa lwa milandu ya bwikashi. Mu kumoneka kwalibako nshila ukucila pali imo ukutambiko kwaafwa.’ Lyene nakalimo lundako: (1) ‘Bamo bacicita mu kwimika ifyaimikwa—ifipatala, amayanda ya bakoloci, incende sha kupuputula bakapeepa ba miti ikola, na fimbipo. Bambi kuti baitemenwa ukuyo kulungama ku mayanda ya bantu no kutambiko kwaafwa kwalinga nga fintu bakwete amaka. Ico e cintu Inte sha kwa Yehova bacita.’ (2) ‘Twalimona ukuti kwalibako icintu cimo icingalula imimwene yonse iya muntu pa bumi, kabili ico e kuti kwishiba cintu Baibolo yalanga ukube mifwaile ituntulu iya bumi na cintu inshita ya ku ntanshi yakwata.’

Imitubululo yalundwapo: ‘Natasha pa kwimyo ubo bwipusho. Kuti twafwayo kumona imibele ukuwama, bushe tatwingafwaya? Kanjipushe, Muyumfwa shani pa lwa cintu Yesu Kristu umwine acitile? Bushe kuti mwasoso kuti inshila intu ayafwililemo abantu yali iibomba? . . . Twesho kukonka ica kumwenako cakwe.’

‘Abena Kristu bafwile ukube nte sha kwa Yesu, te sha kwa Yehova’

Kuti wayasuko ukuti: ‘Ico cishinka ca kusekelela mwaletako. Kabili muli abalungika ukuti twalikwata icishingamo ku kube nte sha kwa Yesu. E mulandu ulubali lwa kwa Yesu mu mifwaile ya kwa Lesa lukomailwapo mu fitabo fyesu. (Kuti pambi watemwa ukubomfya icitabo ca nomba line nelyo magazini ku kulangilila ici.) Lelo pano pali icintu cimo ico limbi cingabe tontonkanyo lipya kuli imwe. (Ukus. 1:5) . . . Kuli ani Yesu ali “Nte ya Cishinka”? (Yoh. 5:43; 17:6) . . . Yesu abikile ica kumwenako ico tufwile ukupashanya, bushe taali ifyo? . . . Mulandu nshi cabele fyo icacindama ukwishiba bonse babili Yesu na Wishi? (Yoh. 17:3)’