Kalata Ukufuma kwi Bumba Litungulula

Ku Nte sha kwa Yehova Shinensu:

Mwandini shino nshiku twikelemo shisuma nga nshi! Kabili tulasekelela nga nshi! Tulaipakisha icine cine ukubombela pamo na imwe bamunyinefwe na bankashi batemwikwa, ukubomba “no mutima umo” ilyo tuleshimikila sana icine pali Shifwe wa ku muulu Yehova.—Sefa. 3:9; Yoh.14:12.

Ifi tubombela Yehova ne nsansa tacipilibula ukuti tatwakwata amafya ayakalamba. Mu mwaka wa mulimo uwapwile, bamo mwaliculile pa mulandu wa kuponenwa ne finkukuma, ukubunda, ifikuuku fya mwela ne finkunka fimbi. (Mat. 24:7) Cila bushiku, abengi balacululuka ku malwele yabipisha e lyo no bukoloci. Ifwe bonse tulashipikisha ‘ubucushi ububa ngo kucula kwa pa kupaapa.’ (Mat. 24:8) Mu fyalo ifingi ukusanshako na Armenia, Eritrea, na South Korea, bamunyinefwe balibapoosa mu cifungo pa mulandu wa kupepa Lesa.—Mat. 24:9.

Cinshi catwafwa ukutwalilila abakosa nangu ca kuti tulaba na aya amafya? Ilembo lya mwaka ilya mu 2010 lyatucinkwileko icishinka cimo icacindama, ica kuti ‘Ukutemwa kushipikisha fyonse. Ukutemwa takupwa.’ (1 Kor. 13:7, 8) Ca cine, ukutemwana kwesu, no kutemwa twatemwa Yehova, kulatukoselesha ukushipikisha lyonse.

Abengi abaitunga ukuba Abena Kristu balapapa ukumona ifyo twatwalilila ukubomba umulimo uwa kushimikila ne fyo wenda busaka busaka. Nangu ca kuti twalipusana mu fyo twasumina ne fyo tusambilisha, abengi bafika fye na ku kutila, “Imwe mwe bantu mulebomba umulimo uo ifwe tufwile ukubomba!” Bushe cinshi cilenga Inte sha kwa Yehova ukutwalilila ukushimikila cila bushiku? Na kabili kuti twatila, kutemwa. Filya fine Shifwe wa ku muulu aba na ifwe tatufwaya umuntu nangu umo ukonaika. (2 Pet. 3:9) Mu mwaka wa mulimo uwapwile bakasabankanya bonse twafikile impendwa iyo tushatala atufikapo iya 7,508,050. Iyi mpendwa ilelangilila ukuti tulafwaisha abantu ukulapila no kwisapusuka. Batini, mipepele nshi iyakwata abantu bafule fi ababombesha kabili abaitemenwa ukwafwa abantu ukwishiba icine pali Lesa?

Tulakoseleshiwa ukumona uko ubusesemo bwa pali Esaya bulefikilishiwa ubutila: “Mu nshiku sha ku mpela, e mo ulupili lwa ng’anda ya kwa Yehova lukapampamikwa ukucila pa muulu wa mpili, kabili lukasumbulwa ukucila utupili; kabili inko shonse shikakonkomokelako.” (Esa. 2:2-4) Pa balekonkomokela ku ng’anda ya kwa Yehova pali na babatishiwe 294,368 mu mwaka wa mulimo uwapwile. Twapokelela aba bamunyinefwe batemwikwa mu kuteyanya kwesu. Shi ukutemwa kwesu ukwa Bwina Kristu kutwalilile ukubafwa ukukaana amatunko ya mulwani wesu Satana Kaseebanya.—1 Pet. 5:8, 9.

Bonse fwe basangilwe ku Cibukisho pali Cibili, pa March 30, 2010, twali 18,706,895 kabili tatwatala atufikapo pali iyi mpendwa e lyo iyi mpendwa ilelangilila ukuti kucili abantu abengi nga nshi abaleilunda kuli ifwe ku kupepa Yehova. Kanshi kuti twatemwa ifi Yehova ashaleeta ubonaushi kuli buno bwikashi bwabipa! Nomba ilyo tulelolela impela, ukutemwa kulatwafwa ukutwalilila ukushipikisha.—2 Tes. 3:5.

Ukulongana kwa Citungu ukwaleti, “Ikalilileni Kuli Yehova!” ukwaliko mwi sonde lyonse mu mwaka wa 2010 kwalitwafwile ukukosha icibusa cesu na Shifwe wa ku muulu, Yehova. Amashiwi ayo uwaimbile amalumbo alandile, ya cine. Atile: “Abapaalwa bantu abo Yehova e Lesa wabo!” (Amalu. 144:15) Te mulandu ne fyo inshita yesu iya ku ntanshi ikaba, ifwe twalicetekela ukuti nga Yehova aba ku lubali lwesu, tapali nangu cimo ico twingatiina. (Amalu. 23:4) Nomba line Yehova ukupitila mu Mwana wakwe ‘akonaula imilimo ya kwa Satana Kaseebanya.’ (1 Yoh. 3:8) Cine cine tulafuluka iyo nshita! Lelo ilyo iyo nshita ishilafika, twalikwata ifingi ifya kucita pa kuti tutwalilile ukucincila.—1 Kor. 15:58.

Ishibeni ukuti tulamulumbula “lyonse” mu mapepo yesu. (Rom. 1:9) Shi “ikalilileni mu kutemwa kwa kwa Lesa, ilyo mulelolela uluse lwa kwa Shikulwifwe Yesu Kristu ulwalola ku mweo wa muyayaya.”—Yuda 21.

Twalimutemwa bonse!

Ni fwe bamunyinenwe,

Ibumba Litungulula Ilya Nte sha kwa Yehova