Ubufumu

Ubulondoloshi: Ubufumu bwa kwa Lesa kulumbulula kwa bumulopwe bwa kwa Yehova ukulola ku fibumbwa fyakwe, nelyo inshila iibomfiwa na wene ku kulumbulula ubo bumulopwe. Ili shiwi lilabomfiwa ukucilisha ku kulangilila ukumoneka kwa bumulopwe bwa kwa Yehova ukupitila muli kamfulumende wa cifumu uwakwata Umwana wakwe ngo mutwe, Yesu Kristu. “Ubufumu” kuti bwalosha ku mitekele ya umo uwasubwa nge Mfumu nelyo ku ciputulwa ca pe sonde icitekwa kuli uyo kamfulumende wa ku mulu.

Bushe Ubufumu bwa kwa Lesa ni kamfulumende wa cine cine?

Nelyo bushe, mu cifulo ca ico, mibele mu mitima ya bantu?

Luka 17:21: “Kabili tabakatile, Moneni, pano e po buli, nangu, Palya e po buli; pantu moneni, ubufumu bwa kwa Lesa buli mu kati ka imwe [na kabili TEV, Dy; lelo “muli imwe,” KJ ukulembwa kwa mu mbali, NE, JB; “pa kati kenu,” RS; mu kati kenu,” NW].” (Mona ukuti, nga fintu calangwa mu cikomo 20, Yesu alelanda ku baFarise, abo na kabili asenwike pamo nga ba bumbimunda, e co te kuti apilibule ukuti Ubufumu bwali mu mitima yabo. Lelo Ubufumu nga fintu bwaimininweko na Kristu bwali mu kati kabo. Muli ifyo The Emphatic Diaglott ibelengwo kuti: “Ubukata bwa cifumu ubwa kwa Lesa buli pali imwe.”)

Bushe Baibolo mu cishinka ilanda ulwa Bufumu bwa kwa Lesa ukuba kamfulumende?

Esa. 9:6, 7, RS: “Kuli ifwe umwana nafyalwa, kuli ifwe umwana mwaume napeelwa; na kamfulumende [na kabili KJ, AT, Dy; “imitekele,” JB, NE; “imitekele ya cifumu,” NW] ikaba pa kubeya kwakwe, kabili ishina lyakwe akenikwa ‘Kabilo wa Cipesha amano, Lesa Wa maka, Wishi wa Muyayaya, Cilolo wa Mutende.’ Ku kusanduluka kwa kamfulumende wakwe na ku mutende takwakabe mpela.”

Ni bani baba bakateka mu Bufumu?

Ukus. 15:3: “Ikalamba kabili yapesha amano imilimo yenu, mwe [Yehova] Lesa wa maka yonse. Yalilungama kabili ya cine imibele yenu, mwe Mfumu ya muyayaya.”

Dan. 7:13, 14: “Umo uwaba ngo mwana wa muntu [Yesu Kristu; mona Marko 14:61, 62] aleisa na makumbi ya mu mulu, aisa afika na ku Mukote wa nshiku ne nshiku [Yehova Lesa], e lyo apalamikwa pali wene, no kupeelwo kuteka, no bukata, no bufumu [kuli Yesu Kristu], ukuti abantu na bantu bonse, na bantu ba nko, ne ndimi, bamupyungile.”

Ukus. 5:9, 10: “[Mwe Yesu Kristu] mwaipaiwe, kabili mashitiile Lesa mu mulopa wenu aba mu mikowa yonse na ba ndimi, na bantu na bantu, na ba nko; kabili mwabacita kuli Lesa wesu ukube shamfumu kabili bashimapepo, kabili bakaba no bufumu pe sonde.” (Pa Ukusokolola 14:1-3 aba “abalubwilwe pe sonde” ku kuba bakateka pamo no Mwana wa mpaanga pa Lupili lwa Sione ulwa ku mulu basoswa ukuba impendwa ya 144,000.)

Ca kufumamo nshi ubu Bufumu bukakwata pa makamfulumende ya buntunse?

Dan. 2:44: “Mu nshiku sha shamfumu ishi Lesa wa mu mulu akemyo bufumu ubushakonaulwe umuyayaya, no bufumu bwa buko tabwakashilwe ku bantu bambi; bukashonaula no kupesha aya mabufumu yonse, kabili bukeminina umuyayaya.”

Amalu. 2:8, 9: “Lomba, na ine ndekupeele nko e cikwatwa cobe, ne mpela sha pano isonde e camanimwa cobe; ukabafuna ku nkonto ya cela, ukabatobaula nge nongo ya mubumfi.”

Cinshi cintu Ubufumu bwa kwa Lesa bukapwishishisha?

Ukushisha ishina lya kwa Yehova no kusumbula bumulopwe bwakwe

Mat. 6:9, 10: “E ico imwe pepeni ifyo, amuti: Shifwe wa mu mulu, ishina lyenu libelwe akatiina. Ubufumu bwenu bwise.” (Pano ukushishiwa kwe shina lya kwa Lesa kwalilundanishiwa mu kupalamisha no kwisa kwa Bufumu bwakwe.)

Esek. 38:23: “Kabili nkaikusha no kuishisha no kuilengo kwishibwa ku menso ya nko ishingi; e lyo shikeshibo kuti ni ne Yehova.” (Ishina lya kwa Lesa likasangululwa ukufuma ku museebanya onse; likasungwa ilya mushilo kabili ilyawamina umucinshi, kabili bonse abakaba aba mweo bakaba bantu abo mu kuitemenwa basumbula bumulopwe bwa kwa Yehova, ukusekelela mu kucito kufwaya kwakwe. Ni pa kushishiwa kwa musango yo ukwe shina lya kwa Yehova e po umutende no busuma bwa kubumbwa konse fyashintilila.)

Ukuleta impela ku mitekele yasuminishiwa iya kwa Satana pa calo

Ukus. 20:2, 3: “Wene [Imfumu ya ku mulu, Yesu Kristu] aikete iciŋwena, icisoka cikote (e Kaseebanya kabili Satana), no kucikaka imyaka ikana limo, no kucipoosa mu cilindi ca ku Mbo, no kwisalako no kukakatikapo pa mulu wa ciko, ukuti ciilufya kabili inko ikasuke aifishiwapo imyaka ikana limo: pa numa ya ifi ali no kukakulwa inshita inono.” (Muli ifyo umutundu wa muntu ukalubulwa ukufuma ku kusonga kwa busatana ukwalenga ubumi ukubo bwayafya nga nshi ku bantu abafwaya ukucita icalungama. Kukaba nakuya ukusonga kwa buciwa ukwalenga incitilo shacishamo isha bunkalwe no kusonga kwa fibanda ukwaisusha umwenso mu bumi bwa bengi.)

Ukwikatanya ububumbo bonse mu kupepa Lesa umo uwa cine

Ukus. 5:13; 15:3, 4: “Ne fibumbwa fyonse fya mu mulu na pe sonde na pa nshi ye sonde na pali bemba, na fyonse ifilimo, nafyumfwile fileti, Ku waikala pa cipuna ca bufumu [Yehova Lesa] na ku Mwana wa mpaanga [Yesu Kristu], kube ipaalo, no bukata, no mucinshi, no kuteka, umuyayaya, umuyayaya.” “Ikalamba kabili yapesha amano imilimo yenu, mwe [Yehova] Lesa wa maka yonse. Yalilungama kabili ya cine imibele yenu, mwe Mfumu ya muyayaya. Ni ani uushakatiine ishina lyenu, mwe [Yehova], no kulicindika, ico ni mwe mweka uwa mushilo? Awe abena fyalo fyonse bakesapepela ku menso yenu; ico nafimoneka ifya bulungami fyenu.”

Ukubwesesha umutundu wa muntu mu kwampana kwa kumfwana na Lesa

Rom. 8:19-20: “Ifibumbwa [umutundu wa muntu] filolela no kufulukisha ukusokololwa kwa bana ba kwa Lesa. [ubushininkisho bwa kuti abo babuushiwa ku bumi bwa ku mulu pamo na Yesu Kristu nabatendeka ukubomba nga bakateka]. Pantu ifibumbwa fyalengelwe ukulamba ku kuicusha fye, te ku kuitemenwa iyo, lelo pa mulandu wa wafilamfishe, pa kutetekelo kwa kuti ifibumbwa [umutundu wa muntu mu cinkumbawile] na fyo fikalubulwa ku busha bwa kubola no kutwalwa mu buntungwa bwa bukata bwa bana ba kwa Lesa.”

Ukulubula umutundu wa muntu ukufuma ku cintiinya conse ica nkondo

Amalu. 46:8, 9: “Iseni mumone imilimo ya kwa Yehova, ifyo acito kupomona mu calo: aputulo bulwi ukufika ku mpela ya calo.”

Esa. 2:4: “Bakasuke abafule mpanga shabo shibe ifya kuliminako umushili, na mafumo yabo yabe ifya kutungwilako imiti; lukasuke uluko alubulo kusumbwilo lupanga ku luko, nangu kusambilila kabili ubulwi.”

Ukufumyapo pe sonde bakateka babola no kutitikisha

Amalu. 110:5: “[Yehova] uuli pa kwa kulyo kobe akabongaule shamfumu mu kasuba ka bukali bwakwe.”

Amalu. 72:12-14: “[Imfumu ya kwa Yehova iya buMesia] ipokololo mubusu uwakuuta, no mulanda, no ushikwete wa kumwafwa; ilililo bulanda umulanda no mubusu, ne myeo ya babusu ilapususha; ilubule myeo yabo mu kunyanyantilwa na mu kufyengwa; no mulopa wabo walifinisha mu menso ya iko.”

Ukupayanya ukufulisha kwa fya kulya ifya mutundu wa muntu onse

Amalu. 72:16: “[Mukaba] ukupaka kwa ngano mu calo, na pa mulu wa mpili.”

Esa. 25:6: “E lyo mu lupili ulo [mu Lupili lwa Sione wa ku mulu], Yehova wa milalo akacitile nko shonse umutebeto wa fya mafuta, umutebeto wa myangashi ya pa fisekwa, ifya mafuta ifyaisulamo ubufyompo, imyangashi ya pa fisekwa iyalengululwa.”

Ukufumyapo ukulwala no kulemana kwa misango yonse

Luka 7:22; 9:11: “Kabiyeni, kalondololeni kuli Yohane ifyo mwamona no kuumfwa: impofu shilelolesha, abalemana amolu baleenda, aba fibashi balesangululwa, bankomamatwi baleuumfwa, abafwa balebuushiwa, ababusu balebililwe mbila nsuma.” “[Yesu Kristu] abasengela, no kubebo lwa bufumu bwa kwa Lesa, no kuposha abalekabilo kuundapwa.” (Muli ifyo Yesu alangile cintu wene pamo nge Mfumu ya ku mulu akacitila umutundu wa muntu.)

Ukupayanya amayanda yasuma ku uuli onse

Esa. 65:21, 22: “Bakakuula amayanda no kwikalamo, bakalima na mabala ya myangashi no kulye fisabo fya yako; tabakakuule na bambi abekalamo, tabakalime na bambi abalyako.”

Ukwebekesha incito ya kwikusha kuli bonse

Esa. 65:23: “Tabakacucutikile ibusha, nangu kufyalila abana itentula, pantu bene bufyashi bwa bapaalwa ba kwa Yehova na bafuma mu nda shabo bakaba pamo na bo.”

Ukwebekesha umutelelwe, ubuntungwa ukufuma ku busanso ku buntu bwa umo nelyo icipe

Mika 4:4: “Bakekalo muntu onse mwi samba lya mwangashi wakwe, kabili mwi samba lya mukunyu wakwe, tapakabe na wa kututumya; pantu akanwa ka kwa Yehova nakasosa.”

Amalu. 37:10, 11: “Pashala panono, e lyo umubifi takabepo; awe ukalolekesha apo ali, no kusanga tabapo: lelo abalanda bakapyaninine calo, no kuilemeno bwingi bwa mutende.”

Ukulenga ubulungami no bulungi ukwanana

2 Pet. 3:13: “Imyulu ipya ne [sonde lipya] e fyo tulolela, umwaikalo bulungami, umwabele cilayo cakwe.”

Esa. 11:3-5: “Te ku kumona kwa menso yakwe akapingwila [Imfumu ya buMesia], kabili te ku kuumfwa kwa matwi yakwe akakalulwila, lelo akapingwilo mulanda mu bulungami, no kukalulwila mu kutambalala abafuuka ba mu calo; . . . Ubulungami bukabe lamba lya mu musana wakwe, ne cishinka cikabe lamba lya pa mutima wakwe.”

Ukucingilila umutundu wa muntu ukufuma ku kucenwa ukuli konse pa mulandu wa maka ya cifyalilwa

Marko 4:37-41: “Kabili kwaimine icikuuku ca mwela, na mabimbi yaumapo yalasempukila mu bwato, e ico nomba ubwato bwalaisula. . . . Awe [Yesu] alishibwike, akalipile umwela, aebele na bemba, ati, Ba tondolo, talala. Awe umwela walinakile, kwali no kukutama kukalamba. . . . Nabo bapeshiwe amano nga nshi, balaebana, abati, Nga kanshi uyu ni ani, apo no mwela na bemba filemubela?” (Muli ifyo Kristu alangilile amaka ayo wene pamo nge Mfumu ya mu mulu akabelesha pa fintu fya musango yo ifya cifyalilwa.)

Ukubuusha abafwa

Yoh. 5:28, 29: “Mwisunguka, pali ici; pantu inshita ileisa, iyo bonse aba mu nshishi bakomfwamo ishiwi lyakwe [ilya kwa Kristu Imfumu] no kufumamo.”

Ukus. 20:12: “Namwene na bafwa, abakalamba na banono, nabeminina ku cinso ca cipuna ca bufumu, na mabuku yalikupukwilwe: ne buku limbi, ibuku lya Mweo, lyalikupukwilwe; na bafwa bapingwililwe ku fyalembelwe mu mabuku aya, umwabele milimo yabo [iyacitilwe pa numa ya kubuushiwa kwabo; linganyako Abena Roma 6:7].”

Ukufumyapo imfwa yonse iya pa mulandu wa lubembu lwa kwa Adamu

Esa. 25:8: “Akamine mfwa ukumina kwa pe. Shikulu Yehova akafuuta ne filamba pa finso fyonse.”

Ukus. 21:4: “Akafuute filamba fyonse ku menso yabo, ne mfwa tayakabeko kabili iyo; takwakabe kabili ukuloosha nangu kukuuta nangu kucululuka; pa kuti ifya ntanshi nafiya.”

Ukupayanya icalo umo abantu batemwana mu cine cine

Yoh. 13:35: “Muli ici e mo bonse bakeshibilo kuti muli basambi bandi [e ico, mu mutande wa kubishanya na Yesu mu Bufumu bwa mu mulu nelyo abatekwa ba pe sonde aba ubo Bufumu], nga mwaba no kutemwana.”

Ukuleta inama na bantunse mu kwampana kwa kumfwana

Esa. 11:6-9: “E lyo umumbulu ukalebela ku mwana wa mpaanga, ne mbwili ikayolola ukuli umwana wa mbushi; umwana wa ŋombe no musepela wa nkalamo na katekwa kaina fikekala pamo, kabili umwaice akaba kakumba wa fiko; iŋombe nkota na bere fikaba bucibusa, abana ba fiko bakayolola pamo, ne nkalamo ikalye cani nga cilume wa ŋombe; umwana uwonka akaangala pa musombo wa ngoshe, no wasumunwa akatambaliko kuboko kwakwe pa bwendo bwe folo. Tafyakacite bubi, kabili tafyakonaule, mu lupili lwandi lwa mushilo monse.” (Na kabili Esaya 65:25)

Hos. 2:18: “Muli bulya bushiku nkabapinganine cipingo ne nama sha mu mpanga, ne fyuni fya mu lwelele, ne fikulika pa nshi; . . . no kubalengo kusendamo mutelelwe.”

Ukucite sonde paradise

Luka 23:43, NW: “Icine cine ndekweba ilelo, Ukaba na ine mu Paradise.”

Amalu. 98:7-9: “Bemba abulume ne fyaisulamo, pano nse ne fyaikalapo, imilonga yombe indupi, impili shawile pamo, ku cinso ca kwa Yehova, pantu naisa, ku kupingula aba pano isonde; alepingula aba pano nse mu bulungami, na bantu na bantu mu kutambalala.”

Linganyako Ukutendeka 1:28; 2:15; Esaya 55:11

Ni lilali lintu Ubufumu bwa kwa Lesa bwali no kutendeka?

Bushe caali no kuba mu mwanda wa myaka wa kubalilapo?

Kol. 1:1, 2, 13: “Paulo, umutumwa wa kwa Kristu Yesu mu kufwaya kwa kwa Lesa, na munyinefwe Timote, ku ba mu Kolose bamunyinefwe aba mushilo [abo abaali impyani sha Bufumu bwa mu mulu] . . . [Lesa] uwatupokolwele ku lupaka lwa mfifi, no kutupilibwila [aba mushilo, ifilundwa fya cilonganino ca bwina Kristu] mu bufumu bwa Mwana wakwe uwatemwikwa.” (E co, mu cishinka, Kristu atendeke ukuteka pa cilonganino cakwe ica bwina Kristu mu mwanda wa myaka uwa kubalilapo, pa ntanshi ici tacilalembwa, lelo ukwimikwa kwa Bufumu ku kuteka pe sonde lyonse kwali kucili ku ntanshi.)

1 Kor. 4:8: “Mwaikuta kale! Mwacindama kale! Mwakwato bufumu ukwabula ifwe! Iye, nga mwakwata no bufumu, ukuti na ifwe tukwate ubufumu pamo na imwe!” (Cili icabulo kutwishika ukuti umutumwa Paulo alebebaula pa kukwata imimwene yalubana.)

Ukus. 12:10, 12: “Nomba fyaise pusukilo na maka, no bufumu bwa kwa Lesa wesu, no lupaka lwa kwa Kristu wakwe; ico apooselwe kashinina wa bamunyinefwe, uubashinina ku cinso ca kwa Lesa wesu akasuba no bushiku. E co sangalaleni, mwe myulu, na mwe baikalamo. Kalanda kuli imwe, mwe calo na bemba! pa kuti Kaseebanya naikila pali imwe, ali ne cipyu cikalamba, pa kwishibo kuti ali ne nshita inono fye.” (Ukwimikwa kwa Bufumu bwa kwa Lesa pano kwalundanishiwa no kutamfya Satana ukufuma mu mulu. Ici tacacitike pa nshita ya kupondoka mu Edene, nga fintu calangwa muli Yobo ifipandwa 1, 2. Ukusokolola kwalembelwe mu 96 C.E., kabili Ukusokola 1:1 kulango kuti kubomba ne fiponako ifyo iyo nshita fyali ku ntanshi.)

Bushe ukwisa mu maka ukwa Bufumu bwa kwa Lesa kufwile ukupembelela ukupilibuka kwa calo?

Amalu. 110:1, 2: “Icisemo ca kwa Yehova kuli shikulu [Yesu Kristu]: Ikala ku kwa kulyo kwandi, nkasuke ncita abalwani bobe icipuna ca makasa yobe. Umulumbu wa bukose bobe Yehova akautambika ukufuma mu Sione, akatila, Ube no bufumu mu kati ka balwani bobe.” (E co kwali no kubako abalwani kuli wene abakutekapo; te bonse benganakila ku mitekele yakwe.)

Mat. 25:31-46: “Ilyo Umwana wa muntu [Yesu Kristu] akesa mu bukata bwakwe, na bamalaika bonse pamo nankwe, e lyo akekala pa cipuna ca bukata bwakwe, ne nko shonse shikalonganikwa ku cinso cakwe; kabili akabapaatukanya, ifyo umucemi apaatukanye mpaanga ku mbushi. . . . Kabili aba [abashalangile kutemwa kuli bamunyina bakwe abasubwa] bakafumapo, bakaya ku kulimunwa kwa muyayaya; lelo abalungami bakaya ku mweo wa muyayaya.” (Ukwabulo kutwishika, te mutundu wa muntu onse wali no kupilibuka pa ntanshi Kristu talabuula icipuna cakwe ica bufumu; te bonse bengashininkisha ukuba abalungama.)

Bushe Baibolo ilalangilila lintu Ubufumu bwingatendeka ukuteka kwa buko?

Mona amabula 168-170, pe samba lya mutwe ukalamba “Inshiku” na mabula 171-176, pe samba lya “Inshiku sha Kulekelesha.”

Nga Umo Asoso kuti—

‘Tabwakese mu nshita yandi iya bumi’

Pambi kuti wayasuko kuti: ‘Lelo bukesa mu nshita ya bumi bwa umo, bushe te ifyo? . . . Bushe uuli onse kuti aba na maka ya kwishiba ukuti inkulo yakwe e imo iyali no kumona bwene? Abatumwa ba kwa Yesu wine balefwaya ukwishiba ico, kabili icasuko abapeele calicindama nga nshi kuli ifwe ilelo. (Mat. 24:3-14; Luka 21:29-32)’

Nelyo kuti wasoso kuti: ‘Iyo mimwene yaliseeka nga nshi. Lelo Inte sha kwa Yehova basumina mu kushangila, pa cishinte ca Baibolo, ukuti Ubufumu bwa kwa Lesa kale kale buleteka mu myulu no kuti cili kuli ifwe nampo nga tulefwaya ukutwalilila ukwikala aba mweo pe samba lya kamfulumende walungama uwa kwa Lesa nelyo iyo. Uyo e mulandu njishile pa mwinshi wenu ilelo. Moneni icalondololwa pano pali Mateo 25:31-33.