Watchtower LAIBRARE YA PA INTANETI

Watchtower LAIBRARE YA PA INTANETI

LAIBRARE YA PA INTANETI

“Abatumwa na Bakalamba Balilongene”

Ukulabila Sana pa Bufumu bwa kwa Lesa
- ICIPANDE 5 • IMILIMO 15:1-35
  
  “Abatumwa na Bakalamba Balilongene”
  
  IMILIMO 15:6
  
  Kwaimine umulandu uwalengele ukuti bakansane nga nshi. Uku kukansana kwapene konaule umutende no kwikatana kwa filonganino. Ni kwi ifilonganino fyale-enekela ukuti e kwalafuma ubutungulushi pa kupwisha ukukansana? Muli cino cipande, twalasambilila pa fyo icilonganino mu nshita ya batumwa caletungululwa, kabili ifi fine e fyo abantu ba kwa Lesa muno nshiku bakonka.

“Balipusene Nga Nshi”

Ukulabila Sana pa Bufumu bwa kwa Lesa
- IFYO ABASUMINE MU BUYUDA BALESAMBILISHA
  
  Na lintu ibumba litungulula ilya mu nshita ya batumwa lyapwishishe umulandu wa kusembululwa, bamo abaleti Bena Kristu bapampamine fye pa kulanda ukuti abantu bafwile ukusembululwa. Umutumwa Paulo abetile ukuti “aba bwananyina ba bufi,” abalefwaya “ukwalula imbila nsuma ya kwa Kristu.”—Gal. 1:7; 2:4; Tito 1:10.
  
  AbaYuda abaletila Bena Kristu balefwaya ukuti abaYuda baleke ukukaanya ubuKristu. (Gal. 6:12, 13) Baleti pa kuti umuntu abe umulungami kano alekonka ifyalembwa mu Mafunde ya kwa Mose ifilanda pa fintu pamo nga ifya kulya, ukusembululwa ne mitebeto ya baYuda.—Kol. 2:16.
  
  Kanshi te kuti tupape umulandu abasumine muli aya mafunde yamo aya kwa Mose bashaleumfwila bwino ukulaampana pamo na Bena fyalo abasangwike Abena Kristu. Ica bulanda ca kuti, na bengi Abena Kristu abali abaYuda kabili abali abacindikwa na bo bene baletontonkanya cimo cine. Ica kumwenako fye, ilyo abeminishi abafumine ku cilonganino ca ku Yerusalemu baile ku Antioke, aba Abena Kristu abo bacindike mu cilonganino baliipaatwile kuli bamunyinabo Abena fyalo. Nangu fye ni Petro, uwaleumfwana fye bwino na Bena fyalo, na o wine aliipaatwileko, kabili alilekele no kulya nabo. Icapapwishe ca kuti filya fine aleeba abantu ukuti tabafwile ukucita, e fyo ena acitile. Ici calengele ukuti Paulo amukalipile sana.—Gal. 2:11-14.