Ubusesemo

Ubulondoloshi: Ubukombe bwapuutwamo; ukusokolola kwa kufwaya kwa bulesa ne mifwaile. Ubusesemo kuti bwaba kusobela kwa cintu icili no kwisa, ukufunda kwapuutwamo ukwa mibele isuma, nelyo ukulumbulula kwe kambisho lya bulesa nelyo ubupingushi.

Kusobela nshi ukwalembwa muli Baibolo ukwafikilishiwa kale?

Ku fya kumwenako fimo mona imitwe ikalamba “Baibolo,” “Inshiku sha Kulekelesha,” na “Inshiku,” na kabili icitabo “All Scripture Is Inspired of God and Beneficial,” amabu. 343-346.

Masesemo nshi yamo ayapulamo aya mu Baibolo ayali no kufikilishiwa?

1 Tes. 5:3: “Ilyo balesosa, abati, Mutende [no mutelelwe], e lyo uboni ubwa kupumikisha bwabemina, filya fine ubucushi bwa kupaapa bwisa pa mwanakashi uuli ne fumo; kabili takwakabe ukupusuka nakalya.”

Ukus. 17:16: “Insengo ikumi isho umwene, shene ne ciswango fikapata uyo cilende, [Babiloni Mukalamba], fikamupomona, no kumucito bwamba; fikalya no mubili wakwe, no kumulungulushisha mu mulilo.”

Esek. 38:14-19: “No kutila kuli Goge, E fyo Shikulu Yehova atila: Bushe muli ubo bushiku, pa kwikala abantu bandi Israele [wa ku mupashi] umutelelwe, tawakaibuushe, no kwisa ukutula ku cifulo cobe mu mbali sha ku kapinda ka ku kuso, iwe na bantu na bantu abengi abali na iwe, . . .” Nomba, mu bushiku ubo, mu bushiku Goge akesa pa calo ca kwa Israele, cisemo ca kwa Shikulu Yehova, e mo cipyu candi cikema mu myona yandi; awe, ku kupimpa kwandi, ku mulilo wa kububuka kwandi, nasosa.”

Dan. 2:44: “Ubufumu [ubwaimikwa na Lesa] . . . bukashonaula no kupesha aya mabufumu yonse [aya buntunse], kabili bukeminina umuyayaya.”

Esek. 38:23: “Kabili nkaikusha no kuishisha no kuilengo kwishibikwa ku menso ya nko ishingi; e lyo shikeshibo kuti ni ne Yehova.”

Ukus. 20:1-3: “Namwene malaika aleika mu mulu, ali no lufungulo lwa ku cilindi ca ku Mbo no munyololo ukalamba mu minwe yakwe. Wene aikete iciŋwena, icisoka cikote (e Kaseebanya kabili Satana), no kucikaka imyaka ikana limo, no kucipoosa mu cilindi ca ku Mbo, no kwisalako no kukakatikapo pa mulu wa ciko, ukuti ciilufya kabili inko ikasuke aifishiwapo imyaka ikana limo: pa numa ya ifi ali no kukakulwa inshita inono.”

Yoh. 5:28, 29: “Mwisunguka pali ici; pantu inshita ileisa, iyo bonse aba mu nshishi bakomfwamo ishiwi lyakwe, no kufumamo; abalecite fisuma bakabuukila ku mweo, na balebombe fibi bakabuukila ku bupingushi.”

Ukus. 21:3, 4: “Naumfwile ne shiwi likalamba lya mu cipuna ca bufumu, lileti, Moneni, ubwikalo bwa kwa Lesa buli pamo na bantu, kabili akekalilila pamo na bo; na bo bakaba abantu bakwe, na Lesa umwine akaba pamo na bo: kabili akafuute filamba fyonse ku menso yabo, ne mfwa tayakabeko kabili iyo; takwakabe kabili ukuloosha nangu kukuuta nangu kucululuka; pa kuti ifya ntanshi nafiya.”

1 Kor. 15:24-28: “E lyo pakonke mpela, . . . Kabili ilyo fyonse fikalengwo kulamba kuli wene, e lyo no Mwana umwine akalamfiwa ku walamfiishe fyonse kuli wene, ukuti Lesa akabe fyonse muli fyonse.”

Mulandu nshi abena Kristu balingile ukubela abasekelela apakalamba mu kusobela kwa Baibolo?

Mat. 24:42: “Loleni, pa kuti tamwaishibo bushiku Shikulwinwe akesamo.”

2 Pet. 1:19-21: Kabili twakwate cebo ca kusesema caikashiwo kucila [pamo nge ca kufumamo ca cacitike pa kwaluka kwa kwa Yesu]. Kuti cawama nga mwayangwako; . . . pantu ku kufwaya kwa buntu takwaletwa kusesema nangu limo, lelo ni pa kobelwa ku mupashi wa mushilo e po abantu ba mushilo balandile.”

Amapi. 4:18: “Inshila ya balungami yaba ngo lubuuto ulwabalika, ululeya no kubuuta kasuka akasuba kasaama.”

Mat. 4:4: “Te ku cilyo ceka umuntu ekalila no mweo, lelo ku cebo conse icifuma ku kanwa ka kwa Lesa.” (Ico cisanshamo amalayo yakwe yakalamba aya busesemo.)

2 Tim. 3:16: “Amalembo yonse yantu yapuutwamo kuli Lesa kabili ya mulimo ku kusambilisha, ku kwebaula, ku kulungika, ku kufunda kwa mu bulungami.” (Muli ifyo Icebo conse icalembwa ica kwa Lesa cawamina ukusambilila kwesu ukwa mukoosha.)

Nga Umo Asoso Kuti—

‘Mulakomailapo sana pa busesemo. Icikabilwa fye kupokelela Kristu ngo Mupusushi obe no kukwata ubumi busuma ubwa bwina Kristu’

Pambi kuti wayasuka ukuti: ‘Ukutesekesha ulubali lwa kwa Yesu Kristu mu kushininkisha calibe cakatama. Lelo bushe mwalishiba ukuti umulandu umo abaYuda mu mwanda wa myaka uwa kubalilapo bafililwe ukumupokelela wali wa kuti tabapeeleko kusakamana kwalinga ku busesemo?’ Lyene nakalimo lundapo ukuti: (1) ‘Amasesemo mu Malembo ya ciHebere yasobele nshita lintu Mesia (Kristu) aali no kumoneka na cintu aali no kucita. Lelo abaYuda mu cinkumbawile tabapeeleko kusakamana ku cintu ayo masesemo yasosele. Bakwete imfundo shabo ukukuma ku cintu Mesia alingile ukucita, kabili pamo nge ca kufumamo balikene Umwana wa kwa Lesa. (Mona ibula 211, pe samba lya “Yesu Kristu.”)’ (2) ‘Ifwe ilelo tuleikala pa nshita lintu Kristu atendeka ukuteka pamo nge Mfumu ya ku mulu kabili alepatukanya abantu ba nko shonse, mu kuba ne cilolwa ca bumi nelyo ubonaushi. (Mat. 25:31-33, 46) Lelo abantu bafulisha balefwaya icintu cimbi.’

Nelyo kuti wasosa ukuti: ‘Ndesumina ukuti ukuba umwina Kristu musuma calicindama. Lelo bushe kuti naba umwina Kristu musuma nga nacitile ifintu fimo ifyo Yesu asambilishe lelo nasuulile cintu asosele ukuti tulingile ukubika pa ntanshi mu bumi? . . . Moneni cintu asosele nga fintu calembwa pano pali Mateo 6:33.’ Lyene nakalimo lundapo ukuti: ‘Bushe tacili ica cine ukuti Yesu atusambilishe ukupepela ubo Bufumu, ukububika fye na pa ntanshi ya kulomba kwesu ukwelelwa pa mulandu wa citetekelo cesu muli wene pamo ngo Mupusushi? (Mat. 6:9-12)’