bashali Bena Kristu.” Kwaba ifitabo na fimbi ifyatila umusalaba walebomfiwa ku balepepa ifibumbwa e lyo na bashalepepa Lesa, abasuminishe ubulalelale mu kupepa kwabo.

Nomba, cinshi calengele ukuti abantu batemwe umusalaba? Ni pa kuti cangukile abasenshi ukusumina bwangu ubuKristu bwa bufi. Lelo icishinka ca kutila Baibolo yalibinda ukuipeelesha kuli conse icafuma ku bashipepa Lesa wa cine. (2 Abena Korinti 6:14-18) Kabili Amalembo yalilesha umusango onse uwa kupepa utulubi. (Ukufuma 20:4, 5; 1 Abena Korinti 10:14) E ico kanshi, Abena Kristu bene bene tababomfya umusalaba.a

Umulaalilo wa kwa Shikulu Ulenga Lesa Ukucindikwa

ABENA KRISTU baebwa ukuti balesefya Icibukisho ca Mfwa ya kwa Kristu. Ici cine cibukisho citwa no kuti “umulaalilo wa kwa Shikulu.” (1 Abena Korinti 11:20) Cinshi umulaalilo wa kwa shikulu wacindamina? Ni lilali ufwile ukubako kabili tulingile ukusefya shani uyu mulaalilo?

Yesu Kristu e watendeke uku kusefya pa bushiku bwa Ca Kucilila ca baYuda mu 33 C.E. Ica Kucilila, mutebeto walebako limo fye pa mwaka, pa bushiku bwalenga 14 mu mweshi wa baYuda uwa Nisani. Pa kupenda ukufika pali ubu bushiku, cimoneka kwati abaYuda balelolela ukufika ku kupwa kwa March nelyo ku kutendeka kwa April. Muli iyi nshita mwaleba ubushiku bumo ilyo kwaleba ulubuuto pa maawala 12, ne mfifi pa maawala 12. Umweshi nga waikala fye, ninshi umweshi wa Nisani watendeka. Ica Kucilila calebako pa numa ya nshiku 14, cilya akasuba kawa.

Yesu asefeshe Ica Kucilila na basambi bakwe, lyene pa numa ya kweba Yuda Iskariote ukufumapo e lyo atendeke Umulaalilo wa kwa Shikulu. Uyu mulaalilo, e wapyene pa Ca Kucilila ca baYuda, e mulandu wine tufwile ukusefesha wena umuku umo pa mwaka.

Ibuuku lya kwa Mateo litila: “Yesu abuulile umukate, kabili ilyo apaalile, aliumokawile, no kupeela abasambi, ati: ‘Buuleni, mulye. Uyu mubili wandi.’ Kabili abuulile ulukombo, kabili ilyo atootele, alibapeele, ati: ‘Nwenimo imwe bonse; pantu lwene “mulopa wandi uwa cipingo,” uulesuumina pa mulandu wa bengi ku kulekelelwa imembu.’”—Matthew 26:26-28.

Bamo batila Yesu asangwile umukate waba umubili wakwe no mwangashi waba umulopa wakwe. Lelo ilyo Yesu abapeele umukate umubili wakwe wali fye umo wabelele. Bushe abatumwa ba kwa Yesu cine cine balile umubili wakwe ulya wine fye no kunwa umulopa wakwe? Iyo, ico nga calilubene pantu ifunde lya kwa Lesa lyalilesha ukulya umunofu wa muntu. (Ukutendeka 9:3, 4; Ubwina Lebi 17:10) Ukulingana na Luka 22:20, Yesu atile: “Ulu lukombo cipingo cipya ica pa mulopa wandi, uuleitililwa pa mulandu wenu.” Bushe ulo lukombo cine cine lwalisangwike “icipingo cipya”? Ico te kuti cicitike, apo icipingo cipangano, te cintu ico wingamona nelyo ukwikata.

E ico, umukate no mwangashi wine fimpashanya fye. Umukate wimininako umubili wa kwa Kristu. Yesu abomfeshe umukate washeleko ku Ca Kucilila. Muli uyu mukate tamwali icitutumushi. (Ukufuma 12:8) Mu Baibolo icitutumushi cimininako ulubembu nelyo ububifi. E ico, umukate wimininako umubili wapwililika uo Yesu apeele, umubili wabula ulubembu.—Mateo 16:11, 12; 1 Abena Korinti 5:6, 7; 1 Petro 2:22; 1 Yohane 2:1, 2.

Umwangashi wakashika wimininako umulopa wa kwa Yesu. Uyo mulopa ulakosha icipingo cipya. Yesu atile umulopa wakwe wapongolwelwe pa kuti kube “ukulekelelwa imembu.” Kanshi abantunse kuti baba ababula ulubembu mu menso ya kwa Lesa kabili kuti bapangana icipingo cipya na Yehova. (AbaHebere 9:14; 10:16, 17) Ici cipingo nelyo icipangano, e cilenga Abena Kristu basubwa, ba144,000 ukuya ku muulu. Kulya, bakaba ishamfumu kabili bashimapepo pa kuti abantunse bonse bakapaalwe.—Ukutendeka 22:18; Yeremia 31:31-33; 1 Petro 2:9; Ukusokolola 5:9, 10; 14:1-3.

Ni bani bafwile ukulyako ifi fimpashanya? Kwena ni balya fye ababa mu cipingo cipya, balya abakwate subilo lya kuya ku muulu, e bafwile ukulyako umukate no kunwako umwangashi. Umupashi wa mushilo uwa kwa Lesa ulabashinina ukuti balisalwa ukuyabe shamfumu ku muulu. (Abena Roma 8:16) Kabili baliba na mu cipingo ca Bufumu na Yesu. (Luka 22:29)

Nga balya abakwata isubilo lya kwikala mu Paradaise pe sonde umuyayaya? Balomfwila ifunde lya kwa Yesu kabili balasangwa ku Mulaalilo wa kwa Shikulu. Nomba bena tabalyako, basangwako fye. Cila mwaka pa Nisani 14 cilya akasuba kawa, Inte sha kwa Yehova balasefya Umulaalilo wa kwa Shikulu. Nangu ca kutila banono fye icalo conse abaitwa ukuya ku muulu, uku kusefya kwalicindama ku Bena Kristu bonse. Iba ni nshita ilyo abantu bonse batontonkanya pa kutemwa kwapulamo ukwa kwa Yehova Lesa na Yesu Kristu.—Yohane 3:16.

Bushe “Umweo” no “Mupashi” Finshi?

NGA mwaumfwa umuntu atila “umweo” nangu “umupashi,” bushe mutila ni finshi alelandapo? Abengi batila cintu icishimoneka kabili icishifwa icaba mu mibili yesu. Batontonkanya ukutila pa mfwa ifi fintu ifishimoneka mu muntu filafuma mu mubili no kutwalilila ukubako ku cifulo cimbi. Apo ifi e fyo abengi basumina, abengi balapapa nga baishiba ukutila te fyo Baibolo isambilisha. Nomba ninshi Baibolo itila umweo no mupashi ni finshi?

“UMWEO” UKULINGANA NE FILANDA BAIBOLO

Natulande pa mweo intanshi. Limbi kuti mwaibukisha ukutila Baibolo, yalembelwe mu ciHebere na mu ciGriki. Ilyo balelanda pa mweo, abalelemba Baibolo babomfeshe ishiwi lya ciHebere neʹphesh nelyo ilya ciGriki psy·kheʹ. Mu Malembo, aya