Ukwesha Ukufika Abantu pa Mitima

PA KUSHIMIKILA ku bantu, mufwile no kufwaya ukubafika pa mitima. Muli Baibolo, ilingi line umutima umonwa nge capusana na fintu umuntu amoneka ku nse. Umutima wa mampalanya ni fintu umuntu aba mu kati—ifyo omfwa, fyonse ifyo atontonkanya, umulandu atontonkanishishe fyo, na fintu ayo matontonkanyo yamulenga ukucita. Ni muli uyu mutima wa mampalanya e mutandwa ulubuto lwa cine. (Mat. 13:19) Kabili ni mu mutima e mufwile ukutuntuka icumfwila kuli Lesa.—Amapi. 3:1; Rom. 6:17.

Kanshi pa kuti ukusambilisha kwenu kupeke ukufika ku mutima, bombeleni sana pali ubu buyo: (1) Ishibeni ifyaba kale mu mutima wa muntu mulelandako. (2) Komaileni pa mibele isuma pamo ngo kutemwa no kutiina Lesa. (3) Koselesheni untu mulelandako ukulingulula ifya mu mutima wakwe pa kuti engafishapo ukutemuna Yehova.

Beni Aba Mucetekanya. Imilandu abantu bashilasuminina icine yaba iyapusanapusana. Pa kutungulula isambililo lya Baibolo ilya mu ng’anda, intanshi kuti mwakabila ukulanda ifishinka ku kupwisha impatila na ku kulungika ifya bufi ifyo umusambi aumfwa, atemwa kuti mwalanda fye pa bushininkisho. Ipusheni amuti: ‘Bushe uyu muntu alishiba ukuti apo muntunse ninshi alakabila ifya ku mupashi? Finshi acetekela kale? Finshi ashacetekela? Cali shani pa kuti acetekele ifyo fintu? Bushe alekabila ukwafwa pa kuti acincintile ulunkumbwa ulwingamucilikila ukucita fimo ifyendela pamo no kwishibe cine?’

Ilingi tacayanguka ukwishiba umulandu abantu basuminina ifintu fimo. Amapinda 20:5 yatila: “Ukupanda amano kwa mu mutima wa muntu menshi ayashika, lelo umuntu wa mucetekanya alatapulamo.” Umucetekanya e kutila ukwiluka icishayanguka ukumona. Pa kucite fi kano mulebebetesha no kubikako amano.

Te mashiwi fye yengamulenga ukwishiba ifyo umusambi aletontonkanya. Kuti mwamona fye icinso ca musambi cayaluka nelyo ishiwi lyakwe lyayaluka ilyo mwalanda fimo. Nga mwalikwata abana, mufwile mwalishiba ukuti imibele ya mwana nga yayaluka ninshi pali cimo icatendeka ukumucitikila ico aleankulako. Mwisuula ifi fishibilo. Fyaba citontonshi ca fili mu mutima wa muntu.

Amepusho ya kuti mwatontonkanya bwino ilyo mushilaipusha kuti yalenga umuntu amweba ifili mu mutima. Napamo kuti mwaipusha amuti: “Bushe muleti shani pali . . . ?” “Cinshi calengele mushininkishe ukuti . . . ?” “Cinshi mwingacita nga ca kuti . . . ?” Lelo, cenjeleni no kukanaipusha abantu amepusho ayengi ica kuti baumfwa no mwenso. Napamo ilyo mushilabepusha, mano mano kuti mwaipusha ati, “Bushe kuti mwanjebako . . . ?” Ukwishiba ifili mu mutima wa muntu mulimo wakosa uushili wa kukwankwanya. Ilingi line kano papita inshita ica kuti uyo muntu asuka amucetekela e lyo engaitemenwa ukusokolola ifya mu mutima. Nalyo line, mufwile ukusakamana epali uyo muntu amona kwati muleipusha ifya pa lwakwe ifyo mushilingile ukwishiba.—1 Pet. 4:15.

Mukabila no mucetekanya pa kwankula ku fyo mwaumfwa. Ibukisheni ukuti ubuyo bwenu bwa kwishiba abantu pa kuti mwishibe ifyebo fya mu Baibolo ifingabafika pa mitima. Mu kwangufyanya, ipatikisheni ukutekanya pa kuti tamubebelepo ukuti ifyo baletontonkanya filubo. Lelo pempwileni no kwiluka icalenga basose fyo. Lyene mukeshiba ifya kwasuka; kabili umusambi wenu akoomfwa ukuti mulemulangulukilako, ne co cikalenga akatontonkanyepo sana pa fyo mulesosa.—Amapi. 16:23.

Nangu mulelanda kwi bumba likalamba, bamo kuti mwabafika pa mitima. Nga mulelolesha ibumba pa kulanda, moneni ifyo baleankulako pa finso, no kwipusha amepusho ya mu lyashi ayalelenga baletontonkanya, ilingi line mukeshibako panono ifyo bakomfwa wenu baletontonkanya pa fyo mulelanda. Nga namwishiba bwino ibumba lyenu, balangulukileniko pa mibele babamo. Muletontonkanya na pa mibele ya ba mu cilonganino ilyo mulepelulushanya na bo ifya mu Cebo ca kwa Lesa.—Gal. 6:18.

Ukulenga Umuntu Amone Ubunonshi Bulimo. Ilyo mwaishiba ifyo umuntu asumina, ifyo ashasumina, no mulandu asuminina nelyo ukukanasumina ifyo fintu, ninshi mwakwata apa kutendekela. Pa numa ya kubuushiwa, Yesu afikile abasambi bakwe pa mitima ilyo ‘abakupukwilile amalembo’ ukukuma ku fyacitike ilya nshita. (Luka 24:32) Na imwe mulingile ukutukuta ukwampanya ifyo umuntu apitamo, ifyo afwaisha, na fintu alemona mu Cebo ca kwa Lesa. Ici cikafika umusambi pa mutima kabili cikamunonsha ilyo akamona bwino bwino ukuti: “Ici E CINE!”

Ilyo mwakomaila pa busuma bwa kwa Yehova, ukutemwa kwakwe, icikuuku atulanga apa fye, ifyo imibele yakwe yalungama, ninshi muleafwa abo mulesambilisha ukutemwa Lesa. Ilyo mwalondolwelako bakomfwa wenu imibele isuma iyo Lesa amona muli bene, ninshi mulebalanga ukuti na bo kuti baba na bucibusa na wene. Kuti mwacite fi pa kubebeta amalembo pamo nga Amalumbo 139:1-3, Luka 21:1-4, na Yohane 6:44, na pa kwafwa bakomfwa wenu ukwishiba bwino ifyo Yehova atemwa ababomfi bakwe aba busumino. (Rom. 8:38, 39) Londololeni ukuti Yehova tamona fye ifilubo fyesu lelo amona fyonse ifyo tucita mu bumi, ifyo twapimpila ukupepa kwasanguluka, ne fyo twatemwa ishina lyakwe. (2 Imila. 19:2, 3; Heb. 6:10) Alebukisha no tuntu tunononono mu mipangilwe yesu, kabili mu cipesha amano, akabuusha “bonse aba mu nshishi.” (Yoh. 5:28, 29; Luka 12:6, 7) Apo abantunse babumbwa mu cata ca kwa Lesa ne cipasho cakwe, ukulanshanya pa mibele yakwe ilingi line kukalenga umuntu ukwankulako bwino.—Ukute. 1:27.

Umuntu kuti camufika pa mutima nga ca kuti asambilila no kumona abantu nga fintu Yehova abamona. Kanshi Lesa nga alatusakamana pa lwesu, ninshi alasakamana na bambi, te mulandu ne nkulilo yabo, icalo bafumako, nelyo umushobo. (Imil. 10:34, 35) Ilyo umuntu aishibe fyo, akakwata inkosho ya mu Malembo iya kunukula impatila mu mutima wakwe. Ici cikamwafwa ukulaumfwana na bambi ilyo alesambilila ukucito kufwaya kwa kwa Lesa.

Na kabili mufwile ukwafwa bambi ukutiina Lesa. (Amalu. 111:10; Ukus. 14:6, 7) Akatiina ka musango yo aka kuli Lesa, kuti kacincisha umuntu ukucita ifyo ashingacita ku maka yakwe. Pa kulanshanya pa milimo ya kutiinya iya kwa Yehova ne cikuuku cakwe icabamo ukutemwa icapesha amano, kuti mwayafwa bambi ukulatiina ukufulwisha Lesa.—Amalu. 66:5; Yer. 32:40.

Shininkisheni ukuti bakomfwa wenu baumfwikisha ukuti imyendele yabo yalicindama sana kuli Yehova. Na o wine aliba ne myumfwile, kabili kuti twamulenga ubulanda nelyo ukumulenga asekelela pa fyo twankula ku kufunda kwakwe. (Amalu. 78:40-42) Londolweleni abantu ifyo imyendele yabo ingalenga Lesa ukwasuka Satana uumusonsomba.—Amapi. 27:11.

Afweni ibumba lyenu ukwishiba ukuti mwaba ubunonshi mu kucita ififwaya Lesa. (Esa. 48:17) Inshila imo mwingabomfya pa kubafwa ukwishibe ci yaba kulondolola ificitika lwa ku mubili na mu mutima nga umo akaana ukukonka amano ya kwa Lesa, nelyo fye pa kashita kanono. Londololeni ifyo ulubembu lututalusha kuli Lesa, ukupusula bambi ishuko lya kusambilila icine kuli ifwe, no kubapusula insambu shabo. (1 Tes. 4:6) Afweni abo mulelandako ukutasha amapaalo baleipakisha kale kale pa mulandu wa kubaka amafunde ya kwa Lesa. Bafweni baletasha sana pa fyo ukwenda mu nshila sha kwa Yehova ishalungama kutupususha ku macushi ayengi. Ilyo umuntu atetekela ukuti mwaliba amano mu nshila sha kwa Lesa, akapata fyonse ifyapusana ne nshila sha kwa Lesa. (Amalu. 119:104) Takamone cumfwila ukuti cisendo, lelo akacimona nge nshila ya kulangilamo ukuipeelesha kwabamo ukutemwa kuli Yehova umwine.

Ukwafwa Bambi Ukuiceeceeta. Pa kuti abantu batwalilile ukukula lwa ku mupashi, bakabila ukwankula ku fili mu mitima yabo. Balondolweleni ifyo Baibolo ingabafwa ukucite fi.

Afweni bakomfwa wenu ukwishiba ukuti Baibolo te citabo fye ca mafunde, ukupanda amano, imicitile ya bena kale, no kusesema. Cisokolola ne mitontonkanishishe ya kwa Lesa. Pali Yakobo 1:22-25, Icebo ca kwa Lesa capashanishiwa ku cilola. Ifyebo fya mu Baibolo fisokolola ifyaba mu mitima yesu ukupitila mu fyo twankula ku fintu isosa na ku fintu Yehova abomba ubufwayo bwakwe. E fyo isokolola fintu Lesa, “uulabule mitima,” atumona. (Amapi. 17:3) Koselesheni abo mulelandako ukulaibukishe ci. Bacincisheni ukutontonkanya pa fyo Lesa atulembela mu Baibolo no kwaluka bafwile ukwaluka mu mikalile yabo pa kuti bacishepo ukumutemuna. Bafweni ukumona ukubelenga Baibolo nge nshila ya kwishibilamo ifyo Yehova alingulula “amatontonkanyo na mapange ya mutima” pa kuti balealuka muli fimo ukulingana no kufwaya kwa kwa Lesa.—Heb. 4:12; Rom. 15:4.

Abasambi ba Baibolo bamo kuti bafwaya ukubomfya ifyo balesambilila; lelo balasakamikwa pa fyo bambi bali no kutontonkanya. Napamo kuti baleshomboka ne fya lunkumbwa lwa mubili ifyaluma. Atemwa kuti balefwaya akabepesho pa kuti basange nshila sha kubombela Lesa ilyo uku baletwalilila ukucita ifya pano isonde. Balondolweleni ubusanso bwaba mu kuba aba mitima ibili. (1 Isha. 18:21) Bacincisheni ukupepa kuli Lesa ukuti abalengule no kulengula imitima yabo.—Amalu. 26:2; 139:23, 24.

Balondolweleni ukuti Yehova alishiba sana ifyo baleshomboka no kuti Baibolo yalilondolola icilecitika. (Rom. 7:22, 23) Bafweni ukucenjela pa kuti belekelela ubufwayo bwa mutima wa lubembu ukubateka.—Amapi. 3:5, 6; 28:26; Yer. 17:9, 10.

Koselesheni umo umo ukulingulula icimulenga ukuti acite fintu. Basambilisheni ukuipusha abati: ‘Cinshi ndefwaila ukucite ci cintu? Bushe cili no kulanga Yehova ukuti cine cine ndatasha pali fyonse ifyo ancitila?’ Bafweni bashininkishe sana kuti bucibusa bwasenaminwa na Yehova e cintu cacindamisha pali fyonse ifyo umuntu engakwata.

Afweni ibumba lyenu ukumfwikisha umo calola ukubombela Yehova ‘ku mutima onse.’ (Luka 10:27) Ici cipilibula ukuti ukuyumfwa kwabo konse, ukufwaya kwabo, ne fyaba mu mitima yabo fifwile ukulingana ne nshila sha kwa Yehova. E ico afweni bakomfwa wenu ukulingulula ifyo bacita e lyo na fintu bayumfwa pa lwa fifwaya Lesa ne cibalenga ukumubombela. (Amalu. 37:4) Ilyo abasambi benu baleiluka umo balekabila ukuwamyako, bakoselesheni ukupepa kuli Yehova ati: “Lengeni umutima wandi ukusaminwo kuba na katiina kwi shina lyenu.”—Amalu. 86:11.

Ilyo umusambi aba cibusa wa kwa Yehova pa lwakwe, akomfwila Lesa pa mulandu wa citetekelo te pa mulandu fye wa kuti mulamucincisha. Lyene, umwine pa lwakwe, ‘akalaesha ukwishibe fintu ifitemuna Shikulu.’ (Efes. 5:10; Fil. 2:12) Icumfwila ca musango yo icifuma ku mutima cilalenga Yehova ukubekwa.—Amapi. 23:15.

Ibukisheni ukuti Yehova e ulingulule mitima no kukula abantu ukuti babe na bucibusa na wene. (Amapi. 21:2; Yoh. 6:44) Ifwe tubombela fye pamo nankwe. (1 Kor. 3:9) Caba “kwati ni Lesa e ulepaapaatila muli ifwe.” (2 Kor. 5:20; Imil. 16:14) Yehova tapatikisha muntu ukusumina icine, lelo ilyo tulebomfya Amalembo, kuti alenga abaletumfwa ukwiluka ukuti ifyo baleumfwa fyasuko ku mepusho yabo—nelyo ku mapepo yabo. Lyonse ilyo mulesambilisha muleibukishe ci, kabili paapaateni kuli Yehova ukuti amutungulule no kumwafwa.—1 Imila. 29:18, 19; Efes. 1:16-18.