Ukubila pa Bufumu—Ukusabankanya Imbila Nsuma mwi Sonde Lyonse

ELENGANYENI ukuti bushiku bumo tamwile ku ncito lelo mwabuuka lucelocelo, mwatendeka no kuipekanya ukuya ku kushimikila. Mwabala mwashimunukako panono pa mulandu wa kunaka. Mwatampa ukutontonkanya ukutila kuti cawama fye ukutushako! Lelo mwapepa kabili mwapingulapo ukuya mu kushimikila. Mu mulimo, mwabomba na nkashi umukoloci uwabomba umulimo wa kushimikila pa myaka iingi, kabili mwakoseleshiwa nga nshi pa cikuuku no kushipikisha kwakwe. Ilyo muleshimikila ku ng’anda ne ng’anda, mwaibukisha ukuti aba bwananyina mwi sonde lyonse nabo bene balisambilila ifya kushimikila iyi mbila nsuma ukubomfya impapulo shimo shine. Ilyo mwafika ku ng’anda, mwaumfwa bwino ica kuti na maka yabwela. Mwaumfwa bwino ukuti tamwacikala fye pa ng’anda, lelo namushimikilako!

Pali ino nshita umulimo wa kushimikila e mulimo uukalamba uwa Ubufumu bwa kwa Lesa. Yesu asobele ukuti mu nshiku sha kulekelesha, imbila nsuma yali no kubilwa sana. (Mat. 24:14) Bushe ifyo asobele fyafikilishiwa shani? Muli ici cipande twalalanda pa fintu fitatu, abantu, inshila sha kushimikililamo, e lyo ne fisolobelo ifyo babomfya pa kwafwa abantu abengi mwi sonde lyonse ukwishiba ukuti Ubufumu bwa kwa Lesa bwa cine cine.