Busuma Nshi Tusanga mu Mafunde ya kwa Lesa?

1. Mulandu nshi tulingile ukulatungulwilwa na Lesa?

Kabumba wesu alikwatisha amano ukutucila. Apo ni Shifwe uwatutemwa nga nshi, alatusakamana. Na kabili tatupangile ukuti tuleitungulula. (Yeremia 10:23) E ico, bonse tufwile ukulatungululwa na Lesa nga filya fine umwana atungululwa na bafyashi bakwe. (Esaya 48:17, 18) Amafunde ya mu Baibolo yalatutungulula kabili yaba bupe ubwafuma kuli Lesa.—Belengeni 2 Timote 3:16.

Amafunde ya kwa Yehova yalatusambilisha inshila ishisuma kabili yalatulanga ifyo tufwile ukulacita pa kuti tukapokelele umweo wa muyayaya ku ntanshi. Apo Lesa e watupangile, tufwile ukulamumfwila ilyo aletutungulula.—Belengeni Amalumbo 19:7, 11; Ukusokolola 4:11.

2. Bushe Icebo ca kwa Lesa citutungulula shani?

Mu Cebo ca kwa Lesa mwaba ifyebo ifingatwafwa mu nshila ishalekanalekana. Kabili mwaba na mafunde ayatweba ifyo tufwile ukucita ne fyo tushifwile ukucita. (Amalango 22:8) Pa kwishiba ifyo Icebo ca kwa Lesa cingatutungulula ilyo tuli no bwafya tufwile ukulalingulula. (Amapinda 2:10-12) Ku ca kumwenako, Baibolo isambilisha ukuti ubumi bupe ubo Lesa atupeela. Nga twaishiba ukuti ubumi bupe, tatwakalecita ifingonaula ubumi bwesu ilyo tuli ku ncito, pa ng’anda, na lintu tuli pa lwendo.—Belengeni Imilimo 17:28.

3. Mafunde nshi yabili ayacindama?

Yesu alandile pa mafunde yabili ayacindama. Ilya kubalilapo litweba umulandu Lesa apangile abantu. Lesa apangile abantu ukuti bamwishibe, bamutemwe, no kulamubombela no mweo onse. Tufwile ukulatontonkanya pali ili funde muli fyonse ifyo tulefwaya ukucita. (Amapinda 3:6) Abakonka ili funde balaba ifibusa fya kwa Lesa, balaba ne nsansa, kabili bakaba no mweo wa muyayaya.—Belengeni Mateo 22:36-38.

Ifunde lya bubili kuti lyalenga tuleumfwana na bambi. (1 Abena Korinti 13:4-7) Nga tulekonka ili funde tukalamona abantu nge fyo Lesa abamona.—Belengeni Mateo 7:12; 22:39, 40.

4. Busuma nshi tusanga mu mafunde ya kwa Lesa?

Aba mu lupwa nga balekonka amafunde ya kwa Lesa balatemwana no kwikatana. (Abena Kolose 3:12-14) Na kabili balacingililwa nga balekonka ifunde na limbi ilyaba mu Cebo ca kwa Lesa ilitila icupo tacifwile ukupwa.—Belengeni Ukutendeka 2:24.

Nga tulekonka ifyo Baibolo isambilisha ifintu fikatuwamina kabili tatwakalesakamikwa. Ku ca kumwenako, abengisha incito abengi basalapo ukwingisha abantu abakonka amafunde ya mu Baibolo ayalanda pa kubombesha na pa kuba ne cishinka. (Amapinda 10:4, 26; AbaHebere 13:18) Na kabili Icebo ca kwa Lesa citusambilisha ukuteka imitima ku fintu fye ifyo tukabila no kucindamika bucibusa bwesu na Lesa ukucila ifyuma.—Belengeni Mateo 6:24, 25, 33; 1 Timote 6:8-10.

Nga tulekonka amafunde yaba mu Baibolo kuti twacingilila no bumi bwesu. (Amapinda 14:30; 22:24, 25) Ku ca kumwenako, ilyo tuleumfwila ifunde lya kwa Lesa ilyalesha ukukolwa te kuti tulelwala amalwele yabipisha kabili kuti twaicingilila na ku masanso. (Amapinda 23:20) Yehova alatusuminisha ukunwa ubwalwa mu kulinga. (Amalumbo 104:15; 1 Abena Korinti 6:10) Ubusuma bumbi ubo tusanga mu mafunde ya kwa Lesa bwa kuti yalatusambilisha ukuilama mu fyo tucita na mu fyo tutontonkanya. (Amalumbo 119:97-100) Abena Kristu ba cine tabakonka amafunde ya kwa Lesa pa kutila ifintu filebawamina, lelo icilenga ni co bafwaya ukucindika Yehova.—Belengeni Mateo 5:14-16.