Ifyebo Ififumine mu Mpapulo Shili mu Katabo ka Mikalile no Mulimo Tubomba
DECEMBER 7-13
ICUMA ICABA MU CEBO CA KWA LESA | UBWINA LEBI 10-11
“Tulingile Ukutemwa Sana Yehova Ukucila Ifyo Twatemwa Balupwa Wesu”
it-1-E ibu. 1174
Icishasuminishiwa
Umulilo ne Fyanunkila Ifyo Bashasuminishiwe. Abana ba kwa Aarone, Nadabu na Abihu balituuliile Yehova umutuulo wa pa mulilo uo ashabasuminishe ukutuula, kabili Yehova alibepeye pa mulandu ne fyo bacitile. Ishiwi lya ciHebere ilya kuti zar ilyaba pa Ubwina Lebi 10:1 balibomfeshe ilyo balelanda pa “mulilo uo bashasuminishiwe, uo [Lesa] ashabebele.” (Lebi 10:1, 2; Impe. 3:4; 26:61) Yehova aebele Aarone ukuti: “Ilyo waisa ku cikuulwa ca kukumaninako, wilanwa umwangashi nangu ifya kunwa fimbi ifikola, iwe na bana bobe abaume abali pamo na iwe, epali mwafwa. Ili e funde lya muyayaya ku nkulo shenu, pa kuti mulelekanya ica mushilo ne ca fye kabili icakowela ne casanguluka, kabili pa kuti mulesambilisha abana ba kwa Israele ifipope fyonse ifyo Yehova abebele ukupitila muli Mose.” (Lebi 10:8-11) Ifyo Yehova aebele Aarone filanga fye ukuti Nadabu na Abihu bafwile balikolelwe, kabili ifi e fyalengele batuulile Yehova umulilo uo ashabasuminishe. Icalengele Lesa akalipe pali ulya mulilo, nalimo ni nshita bautuulilepo, icifulo nelyo inshila bautulilemo. E lyo nalimo ifyanunkila ifyo babomfeshe fyalipusene ne fyanunkila ifyo Yehova abebele ukubomfya ukulingana ne fyaba pa Ukufuma 30:34, 35. Na lyo line ukukolwa bakolelwe takwali na kuba akabepekesho ka kucita ifyo bacitile.
Bushe Mwalingila mu Kutuusha kwa kwa Lesa?
16 Aarone ndume ya kwa Mose na o ica musango yu calicitike ku bana bakwe babili. Tontonkanyeni pa fyo aumfwile ilyo abana bakwe babili, Nadabu na Abihu baipaiwe pa mulandu wa kutuula umutuulo wa pa mulilo kuli Yehova uo bashasuminishiwe. Kuli bena, e papwilile ukubishanya na bafyashi babo. Lelo kwali na cimbi icalefwaikwa. Yehova aebele Aarone na bana bakwe bambi aba cishinka ukuti: “Mwilekelesha umushishi wenu, kabili mwilepula ifya kufwala fyenu [pa mulandu wa kuloosha] epali mwafwa no bukali bwa kwa Lesa bwaimina ulukuta lonse.” (Lebi 10:1-6) Icishinka icaumfwika bwino sana pali uyu mulandu ca kuti, tulingile ukutemwa sana Yehova ukucila aba mu lupwa lwesu abatamfiwa.
Ukufwayafwaya Icuma Icaba mu Cebo ca kwa Lesa
Tufwile Ukuba aba Mushilo mu Myendele Yesu Yonse
18 Pa kuba aba mushilo, tufwile ukulatontonkanya pa Malembo no kulacita ifyo Lesa aletweba. Tontonkanyeni pa bana ba kwa Aarone, Nadabu na Abihu abo baipeye pa kutuula umutuulo uo “bashasuminishiwe,” nalimo ninshi nabakolwa. (Lebi 10:1, 2) Moneni ifyo Lesa aebele Aarone. (Belengeni Ubwina Lebi 10:8-11.) Bushe ifyalandwapo muli ili lembo fitusambilisha ukuti tatufwile ukunwa ubwalwa ilyo tushilaya mu kulongana? Tontonkanyeni pali ifi fishinka: Ifwe tatukonka Amafunde ya kwa Mose. (Rom. 10:4) Mu fyalo fimo, bamunyinefwe balanwa ubwalwa mu kulinga pa nshita ya ca kulya ilyo bashilaya mu kulongana. Pa Ca Kucilila balibomfeshe amakapu yane aya mwangashi. Pa kusefya Umulaalilo, Yesu apeele abasambi bakwe umwangashi uwaleimininako umulopa wakwe. (Mat. 26:27) Baibolo yalilesha ukunwensha ubwalwa na bucakolwa. (1 Kor. 6:10; 1 Tim. 3:8) Kabili Abena Kristu abengi kuti kampingu yabo yabeba ukuti tabafwile ukunwa ubwalwa ilyo bashilatendeka ukubomba umulimo onse uwa kwa Lesa. Lelo ifyo bantu bacita fyalipusanapusana ukulingana ne calo bekalamo, nomba icacindama ku Bena Kristu ca kuti bafwile ‘ukulekanya ica mushilo ne ca fye’ pa kuti batwalilile ukuba aba mushilo no kulalenga Lesa ukusekelela.
it-1-E ibu. 111 para. 5
Inama
Ukulingana na Mafunde Lesa apeele Mose, kwali ifya kulya fimo ifyo baleseshe abena Israele ukulya. Pa Ubwina Lebi 11:8 balibebele umulandu bashalingile ukulafiliila, patila “mulefimona ukuti fyalikowela.” Apo ilambo lya kwa Yesu lyalifumishepo Ifunde lya kwa Mose, ne liline Ifunde ilyo Yehova apeele abena Israele lyalileke ukubomba. Kanshi abantu bonse ukubikako fye na bena Israele balitendeke ukukonka ifyo Yehova aebele Noa pa numa ye Lyeshi.—Kol. 2:13-17; Ukute. 9:3, 4.
Mulandu nshi Mose akalipile Eleasari na Itamari, abana ba kwa Aarone pa numa ya mfwa ya kwa Nadabu na Abihu bamunyinabo, kabili cinshi calengele umutima wakwe ukutontoloka?—Lebi 10:16-20.
Pa numa ya kubikako bushimapepo pe tempele, Yehova aipeye Nadabu na Abihu abana ba kwa Aarone pantu batuulile umutuulo bashasuminishiwe. (Lebi 10:1, 2) Mose aebele ba mwana Aarone abashele aba mweo ukuti beloosha bamunyinabo. Ilyo papitile fye inshita iinono, Mose akalipile Eleasari na Itamari pantu tabaliile imbushi ya mutuulo wa pa lubembu. (Lebi 9:3) Mulandu nshi Mose afuliilwe?
Amafunde Yehova apeele Mose yalandile ukuti shimapepo uwatuula umutuulo wa pa lubembu afwile ukulyako inama atuulile mu lubansa lwa cikuulwa ca mushilo. Ukucita ifyo kwali cilangililo ca kuti shimapepo nao nashingamwa imembu sha upeele umutuulo. Lelo nga ca kuti umulopa we lambo lya mutuulo bautwala mu Muputule wa Mushilo, e kuti umuputule wa kubalilapo, ninshi uyo mutuulo tabaulye, balaoca fye mu mulilo.—Lebi 6:24-26, 30.
Cimoneka kwati pa numa ya mfwa ya kwa Nadabu na Abihu, Mose alefwaya ukushininkisha ukuti nabacita fyonse ifyo Yehova abebele. Ilyo Mose aishibe ukuti imbushi ya mutuulo wa lubembu nabayoca, bukali bukali aipwishe Eleasari na Itamari umulandu bashaliliileko ilya mbushi ukulingana ne funde, pantu umulopa wa ilya nama tabautwele Umwa Mushilo ku ku-utuula kuli Yehova.—Lebi 10:17, 18.
Aarone e wayaswike icipusho ca kwa Mose, pantu e wasumininishe bashimapepo bashele ukucita ifyo bacitile. Pa mulandu wa kuti abana bakwe babili balipaiwe, Aarone nalimo aletwishika nga ca kuti kampingu ya bashimapepo bashele yalebasuminisha ukulya umutuulo wa pa lubembu pali bulya bushiku. Nalimo aletontonkanya ati Yehova ali no kufulwa nga balyako inama, nangu ca kuti te balengele ukuti Nadabu na Abihu babembuke.—Lebi 10:19.
Aarone afwile aletontonkanya ukuti pa bushiku ubo ulupwa lwakwe lwabalilepo ukubomba imilimo ya bushimapepo, nga caliwene lwabikako sana amano pa kuti lwatemuna Lesa na mutuntu utunono. Lelo te fyo cali, Nadabu na Abihu balisaalwile ishina lya kwa Yehova, no bukali bwa kwa Lesa bwalishile pali bena. Kanshi Aarone napamo alemona kwati aba mu lupwa lwa bushimapepo umwacitike ulubembu lwa musango yu tabali no kulyako umutuulo wa mushilo.
Mose afwile alyumfwile ifyo munyina amwebele, pantu ilembo litila: “Ilyo Mose aumfwile ci, e lyo caweme mu menso yakwe.” (Lebi 10:20) Ukwabula no kutwishika, na Yehova wine alitemenwe ifyo Aarone alandile.
DECEMBER 14-20
ICUMA ICABA MU CEBO CA KWA LESA | UBWINA LEBI 12-13
“Ifyo Twingasambilila ku Mafunde Ayalelanda pa Bulwele bwa Fibashi”
• Ukulabika abalwele beka.
Amafunde ya kwa Mose yalandile ukutila abalwele ba fibashi tabalingile ukulaba ukuli abantu bambi. Aba ku fipatala batendeke ukucita ifi ilyo kwali ifikuko imyaka nalimo 700 iyapita, kabili ukufika na pali ino inshita e fyo bacita.—Ubwina Lebi, ifipandwa 13 na 14.
Bushe Kuti Mwayasuka Ifi Fipusho?
Kale abaYuda baletiina sana abantu abalwele ubulwele bwa fibashi ubwaseekele sana pali ilya nshita. Ubu ubulwele bwalibipile sana ica kuti bwalelya inkanda kabili bwalelemanika umuntu. Ubu ubulwele tabwakwete umuti, kanshi bonse abalwele balebabika beka kabili babebele ukuti balingile ukulasoka abantu bambi ukuti balilwala.—Ubwina Lebi 13:45, 46.
it-2-E ibu. 238 para. 3
Ifibashi
Ku fya kufwala na mu mayanda. Ifibashi fyaleba na ku fya kufwala fya masako ya mpaanga, ku nsalu sha kolokondwe, e lyo na ku mpapa. Ifibashi limo fyalepwa nga bawasha ifya kufwala nelyo nga bafibiika fyeka pa nshiku shimo. Nomba nga kuli ifyafiitulukila napamo ifyakashikila ninshi ifyo ifibashi fyali fibashi fyabipisha kabili baleoca fyonse ifyakwete ifibashi ifyabipisha. (Lebi 13:47-59) Nga ca kuti ifibashi fili ku fibumba fya ng’anda, kabili umwafonka mulemoneka umwafiitulukila atemwa umwakashikila, ninshi abaleikalamo balingilile ukufumamo kabili shimapepo alingile ukusha aisalako. Pa kuisangulula balefumya amabwe umwali ifyapala ifibashi kabili balepala iyo ng’anda mu kati monse. Iloba ilyo balepala na mabwe ayo balefumya balefipoosa ku nse ya musumba ukwakowela. Nga ca kuti ifyapala ifibashi fyabwela na kabili mu ng’anda, kabili shimapepo alanda ukuti naikowela, iyo ng’anda baleibongolola kabili iloba, amabwe ne fimuti fya iko balefifumisha ku nse ya musumba ukwakowela. Nomba nga ca kuti shimapepo alanda ukuti ifibashi na fipwa, iyo ng’anda baleisangulula. (Lebi 14:33-57) Abantu bamo balanda ukuti ifibashi ifyaleba ku fya kufwala na mu ng’anda fyalemoneka kwati ni filya ifya kufwala ififufwime nelyo ing’anda iifufwime imoneka, na lyo line tatwaishiba bwino ifishinka.
Ukufwayafwaya Icuma Icaba mu Cebo ca kwa Lesa
Ifyo Twingafwaisha Ukwishiba mwi Buuku lya Ubwina Lebi
12:2, 5—Mulandu nshi ukupaapa kwalelengela umwanakashi ukuba “uwakowela”? Ifilundwa fya mfwalo fyapangilwe ku kuleta abantu bapwililika pe sonde. Lelo, pa mulandu wa fifuma mu lubembu ifyo twapyana, ubumi bushapwililika kabili ubwa lubembu bwalyambukile ubufyashi bonse. Ishi nshita sha kuba “uwakowela” pa mulandu wa kupaapa, ne milandu imbi, pamo ngo kuya ku mweshi no kufuma kwa bwaume bwa cupo, kwalecinkulako abena Israele ulwa lubembu bapyene. (Ubwina Lebi 15:16-24; Amalumbo 51:5; Abena Roma 5:12) Ifipope fyalekonkwa pa kusangululwa fyaleafwa abena Israele ukwishiba ukuti balekabila ilambo lya cilubula ilya kufimba pa membu sha bantunse no kubwesha ubumi bwapwililika. E co Amalango yaishileba ‘kafundisha wabo ukubatungulula kuli Kristu.’—Abena Galatia 3:24.
Bushe Ifyebo Fyaba Muli Baibolo Fyalileka Ukubomba?
• Ilyo balesembulula abana.
Amafunde ya kwa Mose yalandile ukuti umwana umwaume alingile ukusembululwa pa bushiku bwalenga 8 ukutula apo afyalilwe. (Ubwina Lebi 12:3) Ilyo umulungu umo taulapita apo umwana afyalilwe, umulopa ulasuma sana nga aicena. Nomba apo pa nshita balelemba Baibolo takwali ifya kubomfya ifingi pa kuti umulopa wilasuma, caleba bwino ukulolela papita umulungu ilyo tabalasembulula umwana.
DECEMBER 21-27
ICUMA ICABA MU CEBO CA KWA LESA | UBWINA LEBI 14-15
“Tulingile Ukuba Abasanguluka pa Kuti Tulepepa Yehova Ukulingana ne fyo Afwaya”
it-1-E ibu. 263
Ukusamba
Abena Israele balesamba pa milandu yalekanalekana. Onse uwapolele ku bulwele bwa fibashi, onse uwaikete conse ico “uuletonya fimo” aiketeko, umwaume uwalefumya amenshi ya bwaume, umwanakashi nga afuma ku mweshi nelyo alekonkoloka umulopa, nelyo umwaume nga asendama no mwanakashi baleba “abakowela” kabili balingile ukusamba. (Lebi 14:8, 9; 15:4-27) Uwaikata icitumbi nelyo uuli ne citumbi mwi tenti limo line aleba “uwakowela” kabili alingile ukusangululwa ukubomfya amenshi ya kusangulwilako. Nga ca kuti umuntu akaana ukukonka aya mafunde, Yehova atile: “Uyo muntu akalofiwe mu lukuta, pantu nakowesha umwa mushilo mwa kwa Yehova.” (Impe. 19:20) Uyu e mulandu wine Baibolo ibomfesha ishiwi lya kuti ukusamba nga ilelanda pa kuba uwasanguluka mu menso ya kwa Yehova. (Amalu. 26:6; 73:13; Esa. 1:16; Esek. 16:9) Filya amenshi yalesangulula abantu e fyo ne Cebo ca kwa Yehova cakwata amaka ya kusangulula umuntu.—Efes. 5:26.
it-2-E ibu. 372 para. 2
Ukuya ku Mweshi
Umwanakashi aleba uwakowela nga atwalilila ukufuma umulopa pa nshiku ishingi ilyo taili ni nshita yakwe iya makowesha iya ku mweshi, nelyo nga alekonkoloka umulopa “ukucila pa nshita yakwe iya kuba ku mweshi iya makowesha.” Pali iyi inshita yonse, conse ico aikatako, ico alaalapo nelyo ico aikalapo caleba icakowela ukubikako fye na bantu abaleikata ifyo fintu. Nga aleka ukufuma umulopa ali no kuleka papita inshiku 7 pa kuti asanguluke. Pa bushiku bwalenga 8 aletwala ifipele fibili nangu utwana twa nkunda tubili kuli shimapepo pa kuti amufutileko imembu kuli Yehova. Umutuulo umo waleba wa pa lubembu e lyo umbi waleba mutuulo wa koca.—Lebi 15:19-30.
it-1-E ibu. 1133
Incende ya Mushilo
2. Icikuulwa ca kukumaninako e lyo pa numa, itempele. Icikuulwa ca mushilo ne tempele ukubikako fye no lubansa yali ni ncende ya mushilo. (Ukufu. 38:24; 2 Imila. 29:5; Imil. 21:28) Ifipe ifyaleba mu lubansa lwa cikuulwa ca mushilo e lyo no lwe tempele pamo nga iciipailo ca kutuulilapo amalambo e lyo ne cakubikamo amenshi ya kusamba ica mukuba fyonse fyali fya mushilo. Abantu abali abasanguluka e balingile fye ukwingila mu lubansa lwa mushilo, kabili ifi fine e fyo cali na kwi tempele. Ku ca kumwenako, umwanakashi nga nakowela talingile ukwikata icili conse ica mushilo nelyo ukuya mu ncende ya mushilo. (Lebi 12:2-4) Na kabili nangu umuntu engakowela pa nshiku ishingi tabalemusuminisha ukuya mu cikuulwa ca mushilo pantu ninshi akowesha icikuulwa ica mushilo. (Lebi 15:31) Umuntu uwalwele ifibashi nga atwala umutuulo pa kuti bamusangulule kuli shimapepo, taleingila mu cikuulwa ca mushilo alepelela fye pa mwinshi. (Lebi 14:11) Umuntu uwakowela tali no kulyako umutuulo wa pa mutende uo balelila pa cikuulwa ca mushilo nelyo pe tempele, nga alya alingile ukwipaiwa.—Lebi 7:20, 21.
Ukufwayafwaya Icuma Icaba mu Cebo ca kwa Lesa
it-1-E ibu. 665 para. 5
Ukutwi
Ilyo balebikako bushimapepo mu Israele, Yehova aebele Mose ukuti akabuule umulopa wa kwa sukusuku uo batuulile no kuushinga pa kalebelebe ka ku kutwi ukwa kwa Aarone na bana bakwe, na pa cikumo ica ku kulyo, e lyo na pa cikondo ica ku kulyo. Ifi baleshinga umulopa fyalelangilila fye ukuti apo nomba bali ni bashimapepo bali no kulaumfwila Yehova ilyo balemubombela, kabili bali no kulaenda mu nshila shakwe. (Lebi 8:22-24) Ifi fine e fyo balecita na pa kusangulula uwalwele ifibashi. Ukulingana na Mafunde, shimapepo alingile ukubuula umulopa wa kwa sukusuku uo batuulile pa mutuulo wa pa lubembu pamo na mafuta, no kufishinga pa kalebelebe ka ku kutwi aka ku kulyo kwa walwele ifibashi.—Lebi 14:14, 17, 25, 28.
g-E 1/06 ibu. 14, akabokoshi
Ifintu Fimo nga Fyafufuma Filawama Nomba Fimo Filabipa
IFYO BALECITA MU NSHITA BALELEMBA BAIBOLO MU NG’ANDA NGA MULI IFIFUFWIME KU CIBUMBA
Baibolo yalilanda pa “bulwele bwa fibashi mu ng’anda.” (Lebi 14:34-48) Bamo batila ifi ifibashi ifyo beta no kuti “ifibashi fyabipisha,” fyalemoneka kwati fintu ififufwime ku cibumba ca ng’anda, lelo takwaba ubushininkisho ubuli bonse. Nampo nga fyalemoneka nge fyafufuma nelyo iyo, Amafunde ya kwa Lesa yatile abene ba ng’anda balingile ukufumya amabwe umwali ifyapala ifibashi, no kupala ing’anda mu kati monse kabili balingile ukuyapoosa iloba bapala na mabwe bafumya ku nse ya musumba “ukwakowela.” Nga ca kuti ifyapala ifibashi fyalibwelele na kabili, shimapepo alelanda ati ing’anda naikowela kabili baleibongolola no kupoosa amabwe, ifimuti, ne loba ifya iyo ing’anda. Ifi Yehova alandile fyalangile ukuti alitemwa abantu bakwe kabili alibikako amano ku bumi bwabo.
DECEMBER 28–JANUARY 3
ICUMA ICABA MU CEBO CA KWA LESA | UBWINA LEBI 16-17
“Ifyo Twingasambilila ku Fyalecitika pa Bushiku bwa Cifuta Mulandu”
Ifyo Twingasambilila ku Fyaba mwi Buuku lya Ubwina Lebi
4 Belengeni Ubwina Lebi 16:12, 13. Elenganyeni ifyo caleba pa bushiku bwa Cifuta Mulandu: Shimapepo mukalamba aleingila mu cikuulwa ca mushilo. Uyu e muku wa kubalilapo pa miku itatu iyo aleingila umwa Mushilo Nga Nshi pali bulya bushiku. Ku kuboko kumo alesendelako icipe umwaleba ifyanunkila, e lyo ku kuboko kumbi alesendelako icifutumwino ca golde icaleisulapo amalasha ayaleaka. Nga afika pa nsalu iyalecinga apa kwingilila umwa Mushilo Nga Nshi, alebala aiminina. Aleicefya sana pa kwingila umwa Mushilo Nga Nshi, kabili aleya mu kwiminina mupepi ne cipao ca cipangano. Nga acita ifi, caleba kwati aiminina pa ntanshi ya kwa Yehova! Lyena shimapepo aleitulwila bwino bwino ifyanunkila pa cifutumwino apaleba amalasha ayaleka, kabili mu muputule onse mwaleba icena icisuma. Pa numa aleingila na kabili mu muputule wa Mushilo Nga Nshi no mulopa wa malambo ya kwelela imembu. Twamona ukuti shimapepo aleoca ifyanunkila ilyo talaingila mu muputule no mulopa wa kwelela imembu.
Ifyo Twingasambilila ku Fyaba mwi Buuku lya Ubwina Lebi
5 Finshi tulesambilila kuli filya balebomfya ifyanunkila pa Bushiku bwa Cifuta Mulandu? Baibolo itila amapepo ya babomfi ba kwa Yehova aba cishinka yaba nge fyanunkila kuli ena. (Amalu. 141:2; Ukus. 5:8) Ibukisheni ukuti shimapepo mukalamba aleicefya sana pa kutwala ifyanunkila mu muputule wa Mushilo Nga Nshi. Na ifwe bene tufwile ukuicefya sana ilyo tulepepa kuli Yehova. Tufwile ukuba no mucinshi sana kuli Yehova. Tulatasha nga nshi ifi Kabumba wa muulu ne sonde atusuminisha ukulapepa kuli ena no kuba ifibusa fyakwe nga filya umwana aba icibusa na wishi. (Yako. 4:8) Yehova alitusuminisha ukuba ifibusa fyakwe! (Amalu. 25:14) Twalitemwa sana ifi twaba ifibusa fyakwe ica kuti tatufwaya no kucita ifingamukalifya.
Ifyo Twingasambilila ku Fyaba mwi Buuku lya Ubwina Lebi
6 Ibukisheni ukuti shimapepo mukalamba aleoca ifyanunkila ilyo talatuula amalambo. Nga acita ifi alelenga Yehova asekelela kabili Yehova alepokelela na malambo. Finshi tulesambililako? Ilyo Yesu ali pano isonde, kwali icacindama ukucila ne pusukilo lya bantunse ico alingile ukucita ilyo ashilapeela ubumi bwakwe nge lambo. Cinshi alingile ukucita? Alingile ukutwalilila ukuba ne cumfwila kuli Yehova pa kuti akapokelele ilambo lyakwe. Ifi Yesu ali no kucita fyali no kulanga ukuti caliwama ukulacita ifintu ukulingana ne fyo Yehova afwaya. Yesu ali no kulanga ukuti Wishi e walinga ukuteka mu muulu na pano isonde, no kuti imitekele yakwe e yawamisha.
Ukufwayafwaya Icuma Icaba mu Cebo ca kwa Lesa
it-1-E ibu. 226 para. 3
Asasele
Umutumwa Paulo alandile ukuti filya Yesu atuulile ubumi bwakwe ubwapwililika nge lambo pa membu sha bantu abashapwililika, acitile ifyo “umulopa wa ng’ombe ishilume no wa mbushi” wafililwe ukucita. (Heb. 10:4, 11, 12) Kanshi Yesu aishileba “umwa kufutukisha umulandu” pantu “asendele amalwele yesu,” kabili e ‘walashilwe pa mulandu wa filubo fyesu.’ (Esa. 53:4, 5; Mat. 8:17; 1 Pet. 2:24) Alisendele imembu sha bantu bonse abacetekela mwi lambo lyakwe ilya cilubula. Ifyo acitile e fyalengele Lesa afumyepo ulubembu umupwilapo. Kanshi imbushi ya “Asasele” yaleimininako ilambo lya kwa Yesu Kristu.
Umulandu Tufwile Ukubela Aba Mushilo
10 Belengeni Ubwina Lebi 17:10. Yehova aebele abena Israele ukukanalya “umulopa uwa musango onse.” Ukutaluka ku mulopa uwa nama nelyo uwa muntu lifunde ilyakuma na Bena Kristu bene. (Imil. 15:28, 29) Tulatiina ukwishiba ukuti Lesa kuti ‘aloshe icinso cakwe pali ifwe’ no kutufumya mu cilonganino cakwe. Twalitemwa Lesa kabili tulafwaya ukulamumfwila. Na lintu twalwala ubulwele ubwingatwipaya, tulatwalilila ukumfwila Lesa nangu ca kuti abantu abashaishiba Yehova kabili abashimumfwila baletupatikisha ukutoba ifunde lya kwa Lesa. Kwena, tufwile ukwenekela abantu ukutupumya nga twakaana ukubikwamo umulopa, lelo tufwile ukusalapo ukumfwila Lesa. (Yuda 17, 18) Cinshi cingatwafwa ‘ukupampamina fye’ pa kukanalya umulopa nelyo ukukaana ukubikwamo umulopa?—Amala. 12:23.