Bushe Lesa wa Cine Cine Kuli Imwe?

LINTU amafya yalemulengo kumanama, bushe cilamwangukila ukulanda na Lesa mwi pepo? Nga e fyo, bushe mulashininkisho kuti umuntu mulelanda nankwe cine cine e ko aba?

Ukulanda pali Wishi wa ku muulu, Yesu Kristu atile: “Uwantumine wa cine.” (Yohane 7:28) Yehova Lesa cine cine e ko aba, kabili ukupepa kuli wene kufwile ukupala kuli filya tuya ku munensu uo twatemwa nga nshi ukuti atwafwilisheko nelyo ukutupandako amano. Nomba pa kuti Lesa atuumfwe, kano twakumanisha ififwaikwa fyaba mu Malembo pa kuti ipepo lipokelelwe. Ku ca kumwenako, tulingile ukulanda na ‘Komfwa we pepo’ mu kuicefya ukupitila mwi shina lya Mwana wakwe, Yesu Kristu.—Ilumbo 65:2; 138:6; Yohane 14:6.

Bamo kuti batontonkanya ati apo Lesa tatumumona, ninshi mu buntu tabamo. Bena balatwishika nga Lesa e ko aba. Limo limo nangu fye Bena Kristu abasambilila ne mibele yakwe iya kusungusha, balafilwa ukumfwikisha ukuti cine cine Lesa e ko aba. Bushe mwalitontonkanyapo ifyo? Nga e fyo, cinshi mwingacita pa kuti mulemone fyo cine cine Yehova Lesa e ko aba?

Sambilileni Ifyaba mu Malembo

Bushe lyonse mulabelengamo mu Malembo ya Mushilo? Ubwingi bwa miku musambilila ifyaba mu Baibolo, ne fyo mupoosako amano pa kubelenga, e cikalenga mulemona Yehova Lesa ukuti cine cine e ko aba. Icitetekelo cenu cikalakoselako, cikalenga no kuti ‘mukalemona Imfumu iishimoneka.’ (AbaHebere 11:6, 27) Lubali lumbi, ukulasambilila Baibolo limo limo fye, takwakakoshe icitetekelo cenu.

Umfweni ici ca kumwenako: Tutile dokota amweba ukulasuba umuti imiku ibili cila bushiku pa kuti ifimufulwime fikapole. Bushe kuti fyapola nga mulesuba fye limo nangu libili pa mweshi? Kuti muleibepa fye. Mu kupalako, kemba wa malumbo “alitulango muti” wa kuti tuleba abatuntulu mu fya ku mupashi. Ukulabelenga Icebo ca kwa Lesa “akasuba no bushiku.” (Ilumbo 1:1, 2) Pa kuti twingeshiba ifingi, tulingile ukulanwa “umuti,” e kuti ukubelenga Icebo ca kwa Lesa, cila bushiku. Ifya kutwaafwa ni mpapulo sha Bwina Kristu.—Yoshua 1:8.

Bushe kuti mwatemwo kuti inshita ye sambililo ikalekosha sana icitetekelo cenu? Inshila imo ni yi. Pa numa ya kubelenga icipandwa cimo muli New World Translation of the Holy Scriptures nelyo muli Baibolo umbi uwakwate fisontelelo, salenipo icikomo cimo apali fyo mwingatemwa ukwishibilapo na fimbi, lyene belengeni amalembo ayo balangilile mu cisontelelo. Nga mwacite fyo mukamwenamo mwi sambililo lyenu, kabili te ca kutwishika ukuti mukatemwa sana pa fyo mukamono kuti ifyaba mu Baibolo filomfwana. Kanshi cikalenga mukalundepo ukwishiba ukuti Katendeka wa iko Yehova Lesa cine cine e ko aba.

Ukubomfya ifisontelelo kuti kwamwaafwa fye no kubeleshanya na masesemo ya mu Baibolo ne fyo yafikilishiwe. Nalimo kuti mwalishibako amasesemo ya mu Baibolo yamo yamo, kwati yalya yalanda pa konaulwa kwa Yerusalemu ku bena Babele. Nomba mu Baibolo mwaba amasesemo ayengi ayapalana mu fyo yasosa na mu fyo yafikilishiwa. Yamo tayaishibikwa sana.

Ku ca kumwenako, belengeni ubusesemo pa lwa kukandwa kwa wali no kukuula Yeriko cipya cipya e lyo mumone no kufikilishiwa kwa buko. Pali Yoshua 6:26 patila: “Yoshua abalengele mu nshita ilya ukulapa, ati, Abe uwatiipwa ku cinso ca kwa Yehova umuntu uwaima no kukuulo yu mushi Yeriko: akausokola mu kufwilwe beli lyakwe lyaume, no kwimike fiibi fya uko mu kufwilwa kasuli wakwe umwaume.” Bwaishilefikilishiwa ilyo papitile imyaka 500, pantu pali 1 Ishamfumu 16:34 palanda ati: “Ni mu nshiku shakwe [Imfumu Ahabu] e mo Hiele umwina Betele akuulile Yeriko: mu kufwilwa Abiramu ibeli lyakwe e mo abikile ica kukuulapo, na mu kufwilwa Segubu kasuli wakwe e mo aimike amakoma ya uko, umwabelele icebo ca kwa Yehova ico asoseele mu kuboko kwa kwa Yoshua mwana Nuni.”a Ni Lesa wa cine eka fye e wingapuutamo amasesemo ya musango yo, no kushininkisho kuti yafikilishiwa.

Lintu mulebelenga Baibolo, limbi kuti mwafika pa cishinka cimo ico mwingafwaisha ukwishibilapo na fimbi. Ku ca kumwenako, kuti mwaipusha imyaka yapitilepo pa kuti ubusesemo bumo bufikilishiwe. Ukucilo kwipusha bambi, kosenipo fye mwe bene mpaka musange icasuko. Ukubomfya amacharti ne fya kwaafwa ukusambilila Baibolo, bombesheni ukusange fyasuko, kwati fintu mwingakolobonda muli mapu mpaka ukusanga apo bafise cuma. (Amapinda 2:4, 5) Ukusange fyasuko kukalenge citetekelo cenu ukukulilako, kabili mukalundapo no kumono kuti Yehova Lesa cine cine e ko aba.

Mulepepa Lyonse, Kabili Ukufuma ku Mutima

Te kwesha ukulamona kwati ipepo ne citetekelo tafyacindama. Abasambi ba kwa Yesu ukwabulo kulamba bamulombele abati: “Kusheni icitetekelo cesu.” (Luka 17:5) Nga mulamona kwati Yehova te wa cine cine, kuti cawama ukupepa kuli wene ukumulomba ukuti akushe icitetekelo cenu. Mu citetekelo mulepepa kuli Shinwe wa ku muulu ukumwaafwa ukuti mulemone fyo cine cine e ko aba.

Nga ca kuti amacushi yalemufulunganyo mutwe, pooseni inshita iyalinga ukulondolwela Cibusa wenu wa ku muulu ukufuma ku mutima. Yesu alipepele nga nshi lintu imfwa yakwe yapaleme. Nangu ca kuti alisuushishe ukupepa amapepo ayaleepa no kuilanga pa lwalaala ukwaseeka mu macalici, aikele e ka no kupepa ubushiku bonse pa kuti asale abatumwa 12. (Marko 12:38-40; Luka 6:12-16) Umbi uo twingasambililako ni Hana, nyina wa kwa kasesema Samwele. Ilyo alefwaisha ukukwatapo umwana mwaume, ‘alefusho kupepa ku cinso ca kwa Yehova.’—1 Samwele 1:12.

Finshi ifyacindama twingasambililako kuli Yesu na Hana? Nga mulefwaya amapepo yenu ukulayasukwa, mulepepa mu kupimpa, ukufuma ku mutima, ukwabulo kuleka e lyo na kabushe, ukulingana no kufwaya kwa kwa Lesa. (Luka 22:44; Abena Roma 12:12; 1 Abena Tesalonika 5:17; 1 Yohane 5:13-15) Nga mulepepe fyo cikamwaafwa ukumono kuti Lesa cine cine e ko aba.

Lolekesheni Ifyo Lesa Abumba

Bukalapashi bwa waishiba ifyakulengalenga tubumwena ku fyo alenga. Mu kupalako, “ifishimoneka” fya kwa Yehova, Kalenga kabili Kabumba wa kubumbwa konse, fyalimonekesha mu fyo abumba. (Abena Roma 1:20) Nga twalolekesha pa fyo Yehova apikaanya, kuti twacilapo ukumfwikisha ubuntu bwakwe, kabili tukacilapo no kwishibo kuti cine cine e ko aba.

Nga mwalolekesha ukucila pa kumona fye ifyo Lesa aabumba, kuti mwamona ifyo mwingomfwikisha nga nshi ukuti imibele yakwe yaba iya cine cine. Ku ca kumwenako, ukutontonkanya pa maka ifyuni fibomfya pa kupupuka ilyo filekuukila kumbi kuti kwalenga ukutasha kwenu pa mano ya kwa Yehova ukukulilako nga nshi. Ilyo mulesoma pa fyaba mu kubumbwa konse, kuti mwasambililapo ukuti icipinda bushiku ca Milky Way, icaba ukwaleepa ica kuti ulubuuto lufumako lupwa imyaka 100,000 pa kwisafika pano calo, ni cimo fye pa fipinda bushiku ifyaba amabilioni ayengi mu lwelele. Bushe ci te kuti cimusungushe pa kwishiba ukuti cine cine Kabumba wa ifi wa mano?

Te kuti tutwishike, cine cine Yehova alikwata amano! Nomba ayo mano ni ncito nshi yengamukwatila? E bushininkisho mwingakwata ubwa kuti pa mafya yonse ayo mwingeba Lesa mwi pepo, tapali ubo engafilwa. Cine cine, nangu kwishibapo fye utunono pa fyo Yehova apanga kuti kwalenga mwalundapo ukushininkisha ukuti e ko aba.

Muleenda na Yehova

Bushe kuti mwaimwena mu kwikala kwenu ukuti Yehova cine cine e ko aba? Kuti mwaimwena nga mwaikala ifyaikele icikolwe ca busumino Noa. Lyonse alekonka sana ifyo Yehova alemweba, ifyo alekonka kuti twatila: “Noa aleenda na Lesa.” (Ukutendeka 6:9) Ifyaikele Noa cimo ciine no kweba ati baleikala bonse na Lesa. Na kuli imwe e fintu cingaba.

Nga muleenda na Lesa, ifyo mukalacita fyonse fikalalango kuti mwalisumina mu fyo Amalembo yatulaya. Ku ca kumwenako, muli no kusumina amashiwi ya kwa Yesu aya kuti: “Mubale mufwaye ubufumu bwa kwa Lesa no bulungami bwakwe, ne fi fyonse [ifyo mukabila mu mikalile] fikalundwako kuli imwe.” (Mateo 6:25-33) Ukuba cishinka ukuti te lyonse Yehova akulamupeela ukulingana no mo mulefwaila. Nomba nga mwapepa e lyo amwaafwa, cikalaba fye kwati mwikala na Lesa.

Icikalenga ukwampana kwenu na Yehova ukuti kuleilako fye pa ntanshi, mukoosha wa kwenda nankwe. Umfweni kuli Manuela, Nte uulande ciSpanish uwapita mu mesho ya misango na misango. Atile: “Mu kubulwa na mu macushi yonse, ndakonka icishinte caba pa Amapinda 18:10. Lyonse Yehova alaba kuli ine ‘ulupungu lwakosa’ pantu e ko mbutukila.” Ni co Manuela aliimwena ifyo Yehova amwaafwa pa myaka 36 iyo ashintilila pali wene, e co alandiile fyo.

Bushe e lyo muletendeka ukucetekela Yehova? Nga mulemona kwati tamulafika pa kuba bacibusa ba kwa Yehova, te kwesha ukumona kwati tapali ifyo muli. Ifyo mulecita fyonse muleshininkisha ukuti nafilinga ku muntu uuleenda na Lesa. Lintu ifyo mukalacita fyonse fikalalangilako fye ukuti muli ba citetekelo, bucibusa bwenu na Yehova bukalakulilako fye.—Ilumbo 25:14; Amapinda 3:26, 32.

Cimbi ico mwingalacita pa kwenda na Lesa, kulabombesha sana imilimo yakwe. Ilyo mulebombako umulimo wa kushimikila Ubufumu, ninshi mukalabombela pamo na Yehova. (1 Abena Korinti 3:9) Ukwishiba ati mubombela pamo na Lesa kukalalenga sana ukushininkisha ukuti cine cine e ko aba.

Kemba wa malumbo atukoselesho kuti: “Konkomwena pali Yehova inshila yobe, kabili mutetekele, na o akacita.” (Ilumbo 37:5) Mufwile ukulakonkomwena pali Lesa fyonse ifilemucusha ne filemulangulusha. Lyonse fye muleshintilila pali wene ku kumwaafwa no kumutungulula. Nga ca kuti lyonse muleshintilila pali Yehova Lesa, lyonse ukulapepa kuli wene no kumucetekela ukuti nangu cibe shani akalamwaafwa, mukalayumfwa abacingililwa pantu ninshi namushininkisha ukuti tapali ico engafilwa ukumucitila. Bushe lintu mulondolwela Lesa mwi pepo ifilemucusha, mulacetekela ukuti alekutika? Mukalashininkisha, kulila mwasumina ukuti cine cine Lesa e ko aba.

[Amafutunoti]

[Icikope pe bula 21]

Mulebombesha pa kuti isambililo lilekoshe citetekelo cenu

[Icikope pe bula 22]

Mulepepa lyonse, amapepo aya kufuma ku mutima

[Ifikope pe bula 23]

Mulelolekesha pa kuti mwingamona ifyo imibele ya kwa Lesa imonekela mu fyo abumba

[Abatusuminishe]

Kasosa: U.S. Fish and Wildlife Service, Washington, D.C./Dean Biggins; intanda: Icikope: Copyright IAC/RGO 1991, Dr. D. Malin et al, Isaac Newton Telescope, Roque de los Muchachos Observatory, La Palma, Canary Islands