“Sunga Umutima Obe!”

Ukulongana kwa Citungu Ukwa Nte sha kwa Yehova

UMUTWE WA PALI CISANO

“Yehova Ena, Amona mu Mutima”—1 SAMWELE 16:7.

UMUTWE WA PA CIBELUSHI

“Umuntu Alanda Ifyaisula mu Mutima Wakwe”—MATEO 12:34.

UMUTWE WA PA MULUNGU

‘Bombeleni Yehova no Mutima Onse’—1 IMILANDU 28:9.

Ishiwi lya kuti umutima, lilasangwa mu Baibolo mupepi ne miku 1,000. Ilingi umutima Baibolo ilandapo, te mutima uyu wine twaishiba lelo wa mampalanya. Bushe uyu mutima wa mampalanya e cinshi? Ili shiwi kuti lyalosha ku fyo umuntu aba mu kati, e kutila ifyo atontonkanya, ifyo omfwa pa fintu, ne fyo atemwa.

Mulandu nshi tulingile ukusungila umutima wesu uwa mampalanya? Lesa alengele Imfumu Solomone ukulemba ukuti: “Sunga umutima obe ukucila pa fintu fyonse ifyo ufwile ukusunga, pantu mu mutima e mwaba utumfukumfuku twa mweo.” (Amapinda 4:23) Ifyo ubumi bwesu bwaba pali nomba ne fyo bukaba ku ntanshi fishintilila pa fyo umutima wesu uwa mampalanya waba. Cinshi twalandila ifi? Pantu Lesa alamona ifyaba mu mitima yesu. (1 Samwele 16:7) Ifyo twaba, e kutila “ubuntu bwa mu kati,” e fipima ifyo Lesa atumona.—1 Petro 3:4.

Kuti twasunga shani umutima wesu? Pa kulongana kwa citungu uko ba Nte bakakwata mu calo conse e po bakasuka bwino bwino ici cipusho. Uku kulongana kuli no kutendeka uno wine mweshi. Mukwai tulemwita ukwisalongana na ifwe inshiku shonse shitatu.a Ifyo mukasambilila fikamwafwa ukulacita ifintu ifikalalenga umutima wa kwa Yehova Lesa ukusekelela.—Amapinda 27:11.

Bushe Kuti Mwatemwa Ukumutandalila?

Nelyo fye ni muli ici calo ca macushi, kuti mwasanga insansa nga mwaishiba bwino bwino fintu Baibolo isosa pa lwa kwa Lesa, Ubufumu bwakwe, no bufwayo bwakwe ubwawamisha ubo akwatila abantunse. Nga mwingatemwa ukwishiba na fimbi nelyo nga mwingafwaya umuntu umo ukwisasambilila na imwe Baibolo apa fye, mukwai lembeleni Inte sha kwa Yehova pa watchtower.org/cw