Bushe Ukufyalwa Libili E Kulenga Umuntu Ukupusuka?

BUSHE nga bamwipusha ati, “Bushe mwalifyalwa libili?” kuti mwa-asuka shani? Abantu abengi abatila Bena Kristu mu calo conse kuti ba-asuka bwangu bwangu fye ati, “Ee!” Baishiba ukuti Umwina Kristu onse afwile ukufyalwa libili kabili nga afyalwa libili, e lyo engapusuka. Balisumina amashiwi ayo aba fya mapepo, pamo nga Robert C. Sproul balanda. Uyu muntu alembele ati: “Umuntu nga tafyelwe libili, . . . ninshi te Mwina Kristu.”

Bushe na imwe mwasumina ukuti nga mwafyalwa libili ninshi e lyo mukapusuka? Nga e fyo mwasumina, kuti mwafwaya ukwafwa balupwa lwenu ne fibusa ukuti na bo bafyalwe libili pa kuti bakapusuke. Lelo pa kuti bacite ifyo, bafwile ukwishiba ubupusano bwaba pa muntu uwafyalwa libili no ushafyalwa libili. Nomba bushe kuti mwabalondolwela shani umwalola ukufyalwa libili?

Abantu abengi basumina ukuti pa kuti umuntu afyalwe libili, afwile ukulaya no mutima onse ukuti akalabombela Lesa na Kristu, kabili ici cimulenga ukuba cibusa wa kwa Lesa, nangu ca kuti kale tali cibusa wakwe. Na kuba, abantu bamo batila umuntu uwafyalwa libili muntu wa kuti ayaluka no kupokelela Kristu ngo mupusushi wakwe, kabili Mwina Kristu uwakwata sana icitetekelo pa numa ya kupokelela umupashi.

Bushe kuti mwapapa nga bamweba ukuti ifi te fyo Baibolo ilanda? Bushe kuti mwatemwa ukwishiba ifyo Icebo ca kwa Lesa cisambilisha pa kufyalwa libili? Kuti mwatemwa nga mwasambilila sana pali ili lyashi. Mulandu nshi? Pantu nga mwaumfwikisha bwino umwalola ukufyalwa libili, kuti camwafwa pali nomba no kumwafwa ukwishiba ifikamucitikila ku ntanshi.

Bushe Cinshi Baibolo Isambilisha?

Apasangwa fye amashiwi ya kuti ‘ukufyalwa libili’ mu Baibolo ni pali Yohane 3:1-12, apaba ilyashi lisuma ilyo Yesu alandile na shimapepo umo mu Yerusalemu. Pe bula lyakonkapo ilyalenga 4, pali Yohane 3:1-12. Mukwai mubelengepo bwino bwino pali ili ilembo.

Muli ili lyashi, Yesu alilandile fimo pa ‘kufyalwa libili.’a Na kuba, ifyo Yesu alandile filatwafwa ukwasuka aya mepusho yacindama yasano:

◼ Bushe ukufyalwa libili kwacindama shani?

◼ Bushe ni fwe fwe bene tufwile ukuisalila ukufyalwa libili?

◼ Cinshi kwabela ukufyalwa libili?

◼ Bushe umuntu afyalwa shani libili?

◼ Bushe umuntu nga afyalwa libili aba shani?

Lekeni tulande pali ifi fipusho cimo cimo.

[Futunoti]

[Akabokoshi ne Cikope pe bula 4]

“Mufwile Ukufyalwa Libili”

“Awe kwali umuntu umo umuFarise, ishina lyakwe ni Nikodemo, intungulushi ya baYuda. Uyu aishile kuli Yesu ubushiku, no kumweba ati: ‘Rabi, twalishiba ukuti ni mwe kasambilisha uwafuma kuli Lesa; pantu takuli umuntu uwingacita ifipesha amano ifyo mucita kano Lesa ali nankwe.’ Na o Yesu amwaswike ati: ‘Ndekweba icine cine, nati, Umuntu nga tafyelwe libili, te kuti amone ubufumu bwa kwa Lesa.’ Nikodemo amwipwishe ati: ‘Umuntu umukalamba kuti afyalwa shani na kabili? Bushe kuti aingila mwi fumo lya kwa nyina na kabili, no kufyalwa?’ Yesu ayaswike ati: ‘Ndekweba icine cine, nati, Umuntu nga tafyelwe ku menshi na ku mupashi, te kuti engile mu bufumu bwa kwa Lesa. Uwafyalwa ku muntu, muntu, no wafyalwa ku mupashi, mupashi. Wipapa ifi nakweba, ati, Mufwile ukufyalwa libili. Umwela upuupila uko utemenwe, kabili ulomfwa uko ulepuupa, lelo tawishiba uko ulefuma no ko ulelola. E fyo ciba na kuli onse uwafyalwa ku mupashi.’ Na o Nikodemo amwipwishe ati: ‘Nge ca musango yu kuti cacitika shani?’ Yesu ayaswike ati: ‘Bushe we kasambilisha wa bena Israele, ni we ushaishiba ifi fintu? Ndekweba icine cine, nati, Tulanda ifyo twaishiba, kabili tushimika ifyo twamona, lelo imwe tamusumina ifyo tushimika. Nga namweba ifya pano calo, tamusumina, nga kuti mwasumina shani nga namweba ifya ku muulu?’”—Yohane 3:1-12

Bushe Ukufyalwa Libili Kwacindama Shani?

ILYO Yesu alelanshanya na Nikodemo, atile ukufyalwa cipya cipya, nangu ukufyalwa libili, kwalicindama sana. Bushe alangile shani ukuti kwalicindama?

Moneni ifyo Yesu akomaile pa fyo cacindama ukufyalwa libili, ilyo alelanshanya na Nikodemo. Atile: “Umuntu nga tafyelwe libili, te kuti amone ubufumu bwa kwa Lesa.” (Yohane 3:3) Amashiwi ya kuti “nga tafyelwe libili” na ya kuti “te kuti,” yaletulanga ukuti ukufyalwa libili kwalicindama icine cine. Natulangilile: Umuntu nga atila, “Akasuba nga takabalike, te kuti kube ulubuuto,” ninshi alepilibula ukuti akasuba kalafwaikwa pa kuti kube ulubuuto. Yesu na o apa aleti ukufyalwa libili kulafwaikwa pa kuti umuntu ‘amone Ubufumu bwa kwa Lesa.’

E lyo pa kulekelesha, Yesu alandile fye apabuuta ukutila: “Mufwile ukufyalwa libili.” (Yohane 3:7) Kanshi Yesu atile ukufyalwa libili kulafwaikwa pa kuti umuntu “engile mu bufumu bwa kwa Lesa.”—Yohane 3:5.

Apo Yesu alishibe ukuti ukufyalwa libili kwalicindama sana, Abena Kristu bafwile ukushininkisha ukuti baumfwikisha bwino ili ilyashi. Mulemona shani batini, bushe Umwina Kristu kuti asalapo umwine ukufyalwa libili?

[Amashiwi pe bula 5]

“Akasuba nga takabalike, te kuti kube ulubuuto”

Bushe Muntu Umwine Afwile Ukuisalila Ukufyalwa Libili?

NANI alenga ukuti umuntu afyalwe libili? Ilyo bashimapepo bamo balekoselesha Abena Kristu ukufyalwa libili, balabwekeshapo amashiwi ya kwa Yesu aya kuti: “Mufwile ukufyalwa libili.” (Yohane 3:7) Ciba kwati aba bashimapepo balapangila abantu ifunde ukuti bafwile fye ukufyalwa libili. Kanshi bena basambilisha ukuti cila muntu afwile ukusalapo umwine nampo nga kumfwila amashiwi ya kwa Yesu no kucitapo fimo pa kuti afyalwe libili nelyo iyo. Basambilisha ukuti abantu abene e bafwile ukusalapo ukufyalwa libili. Nomba bushe ifi e fyo Yesu aebele Nikodemo?

Nga twabelenga bwino amashiwi ya kwa Yesu, kuti twamona ukuti Yesu tatile umuntu umwine kuti asalapo ukufyalwa libili nangu ukukanafyalwa libili. Cinshi twalandila ifi? Amashiwi ya ciGriki ayo bapilibula ati “ukufyalwa libili” kuti yapilibulwa no kuti “ukufyalwa kwa ku muulu.”a Kanshi ukufyalwa libili kufuma “ku muulu,” e kutila ‘kuli Lesa.’ (Yohane 19:11; Yakobo 1:17) Ca cine Lesa e ulenga umuntu ukufyalwa libili.—1 Yohane 3:9.

Nga ca kuti tuleibukisha amashiwi ya kuti “ukufyalwa kwa ku muulu,” kuti twaishiba bwino bwino umulandu umuntu umwine ashingasalilapo ukufyalwa libili. Tontonkanyeni pa fyo cali pa kuti mufyalwe. Bushe ni mwe mwe bene mwasalilepo ukufyalwa? Awe! Abafyashi benu e balengele ukuti mufyalwe. E fyo caba na ku kufyalwa libili. Umuntu kuti afyalwa libili nga ca kuti fye Lesa, Shifwe wa ku muulu, amulenga ukufyalwa libili. (Yohane 1:13) E ico umutumwa Petro alilondolwele bwino ukutila: “Abe uwacindikwa Lesa kabili Wishi wa kwa Shikulwifwe Yesu Kristu, pantu pa kubuusha Yesu Kristu ku bafwa, Lesa atukwatile uluse ulukalamba no kutufyala cipya cipya.”—1 Petro 1:3.

Bushe Ukufyalwa Libili Lifunde?

Nomba bamo kuti baipusha abati, ‘Nga ca kuti ca cine takuli nangu umo uwingaisalila umwine ukufyalwa libili, mulandu nshi Yesu apeelele ifunde lya kuti: “Mufwile ukufyalwa libili”?’ Ici cipusho cisuma. Pantu kwena amashiwi ya kwa Yesu nga lifunde, ninshi aletweba ukucita icintu ico tushingacita. Kwena te kuti cilolemo ukucita ica musango yu. Ninshi amashiwi ya kuti mufwile “ukufyalwa libili” yalola mwi?

Nga twakonka sana aya mashiwi mu ciGriki, umo balembeele ili ilembo, kuti twamona ukuti te funde. Ilyo Yesu atile mufwile “ukufyalwa libili,” alelanda fye ifyo caba, talepeela ifunde iyo. Atile: “Muli no kufyalwa ukufyalwa kwa ku muulu.”—Yohane 3:7, Diocese of Mbala.

Natulangilile ubupusano bwaba pe funde na mashiwi ayo umuntu engalanda fye, ukubomfya icilangililo ca muntu uwaya ku calo cimbi mu kushita impanga. Muli ici calo, batila uwingashitamo fye impanga, muntu ekalamo. Nomba umuntu umo uushikala muli ici calo, aya ku maofeshi ya buteko no kutila alefwaya ukushita impanga. E lyo umulashi wa buteko amweba ukuti, “Nga wikala muno calo, e lyo wingashitamo impanga.” Aya mashiwi ya mulashi te funde iyo. Alelanda fye icifwaikwa pa kushita impanga muli ici calo. Talepatikisha uyu muntu ati, “Utampe ukwikala muno calo.” Kanshi Yesu na o ilyo atile “mufwile ukufyalwa libili,” alelanda fye icifwaikwa pa ‘kwingila mu Bufumu bwa kwa Lesa.’

Amashiwi ya kuti Ubufumu bwa kwa Lesa yalyampana na cimbi icacindama pa kufyalwa libili. Bushe cinshi kwabela ukufyalwa libili? Ukwishiba icasuko kuli ici cipusho kwalicindama nga tulefwaya ukumfwikisha umwalola ukufyalwa libili.

[Futunoti]

[Icikope pe bula 6]

Bushe ukufyalwa libili no kufyalwa kwa mwana fyapalana shani?

Cinshi Kwabela Ukufyalwa Libili?

ABANTU abengi basumina ukuti umuntu afwile ukufyalwa libili pa kuti akapusuke. Nomba moneni ico Yesu atile e co kwabela ukufyalwa libili. Atile: “Umuntu nga tafyelwe libili, te kuti amone ubufumu bwa kwa Lesa.” (Yohane 3:3) Kanshi umuntu afwile ukufyalwa libili pa kuti engile mu Bufumu bwa kwa Lesa, te pa kuti apusuke iyo. Nomba bamo kuti batila, ‘Bushe ukwingila mu Bufumu no kupusuka te fimo fine?’ Awe fyalipusana. Pa kuti twishibe ifyo fyapusana, natulande pa fyo amashiwi ya kuti “ubufumu bwa kwa Lesa” yapilibula.

Ubufumu buteko. Kanshi amashiwi ya kuti “ubufumu bwa kwa Lesa” yapilibula ukuti “ubuteko bwa kwa Lesa.” Baibolo itusambilisha ukuti Yesu Kristu, “umwana wa muntu,” e Mfumu ya Bufumu bwa kwa Lesa no kuti Kristu alikwata na bo ateka nabo. (Daniele 7:1, 13, 14; Mateo 26:63, 64) E lyo kabili mu cimonwa umutumwa Yohane amwene, bamulangile ukuti abateka na Kristu basalwa “ukufuma mu mitundu yonse ne ndimi na bantu ne nko” kabili “bakalateka isonde.” (Ukusokolola 5:9, 10; 20:6) Kabili Icebo ca kwa Lesa cilondolola ukuti abakaba imfumu baba “umukuni unono” uwa bantu 144,000 “abashitilwe pe sonde.”—Luka 12:32; Ukusokolola 14:1, 3.

Bushe Ubufumu bwa kwa Lesa bwabela kwi? “Ubufumu bwa kwa Lesa” babwita no kuti “ubufumu bwa mu muulu,” icilanga ukuti Yesu na bo ateka nabo batekela ku muulu. (Luka 8:10 Mateo 13:11) Kanshi Ubufumu bwa kwa Lesa buteko ubwaba ku muulu ubwapangwa na Yesu Kristu ne bumba lya bakateka abasalwa pa bantunse.

Bushe Yesu aloseshe mwi ilyo atile umuntu afwile ukufyalwa libili pa kuti ‘engile mu bufumu ba kwa Lesa’? Alepilibula ukuti umuntu afwile ukufyalwa libili pa kuti ateke pamo na Kristu mu muulu. Kanshi ico kwabela ukufyalwa libili kupanga ibumba ilinono ilya bantunse pa kuti bakateke mu muulu.

Pali ifi twalandapo, twamona ukuti ukufyalwa libili kwalicindama sana, Lesa e ulenga umuntu ukufyalwa libili, kabili ico kwabelako kupekanya abantu aba kuyateka mu muulu. Nomba ciba shani pa kuti umuntu afyalwe libili?

[Amashiwi pe bula 7]

Ico kwabela ukufyalwa libili kupanga ibumba linono ilya bantunse aba kuyateka mu muulu

[Icikope pe bula 7]

Yesu Kristu ne bumba lya bakateka abasalwa pa bantunse e bapanga Ubufumu bwa kwa Lesa

Bushe Ukufyalwa Libili Kucitika Shani?

ILYO Yesu alelanda na Nikodemo, talandile fye pa bucindami, icilenga, ne co kwabela ukufyalwa libili lelo alandile ne fyo ciba pa kuti umuntu afyalwe libili. Yesu atile: “Umuntu nga tafyelwe ku menshi na ku mupashi, te kuti engile mu bufumu bwa kwa Lesa.” (Yohane 3:5) Kanshi pa kuti umuntu afyalwe libili, kano pali amenshi no mupashi. Nomba bushe amashiwi ya kuti “ku menshi na ku mupashi” yalola mwi?

Bushe ‘Amenshi no Mupashi’ Ni Finshi?

Apo Nikodemo ali mu Yuda uwasambilile sana ifya mapepo, afwile alishibe ifyo Amalembo ya ciHebere yabomfya amashiwi ya kuti “umupashi wa kwa Lesa,” e kuti amaka Lesa abomfya ayengalenga abantu ukucita ifipesha amano. (Ukutendeka 41:38; Ukufuma 31:3; 1 Samwele 10:6) Kanshi ilyo Yesu alandile pa “mupashi,” Nikodemo alishibe ukuti alelanda pa mupashi wa mushilo.

Nomba menshi nshi Yesu alelandapo? Tontonkanyeni pa fyo Baibolo ilanda ukuti e fyacitike ilyo Yesu ashilatendeka ukulanda na Nikodemo e lyo na lintu apwishishe ukulanda nankwe. Itila Yohane Kabatisha na basambi ba kwa Yesu balebatisha abantu mu menshi. (Yohane 1:19, 31; 3:22; 4:1-3) Ishi mbatisho shalishibikwe sana mu Yerusalemu. Kanshi ilyo Yesu alandile pa menshi, Nikodemo afwile alilwike ukuti Yesu talelanda pa menshi fye, alelanda pa menshi ya lubatisho.a

Ukubatishiwilwa “ku Mupashi wa Mushilo”

Nga ca kuti ‘ukufyalwa ku menshi’ kupilibula ukubatishiwa mu menshi, ninshi ‘ukufyalwa ku mupashi’ kwena kwalola mwi? Ilyo Nikodemo ashilalanshanya na Yesu, Yohane Kabatisha abilishe ukutila abantu tabali no kubatishiwa fye ku menshi lelo na ku mupashi. Atile: “Ine ndemubatishisha ku menshi, lelo ena [Yesu] akamubatishisha ku mupashi wa mushilo.” (Marko 1:7, 8) Marko, uwalembele ibuuku limo ililanda pa bumi no mulimo wa kwa Yesu, alilondolola ifyo cali umuku wa kubalilapo ilyo umuntu abatishiwe ku menshi na ku mupashi. Alembele ati: “Mu nshiku shilya Yesu afumine ku Nasarete wa ku Galili kabili abatishiwe kuli Yohane mu Mumana wa Yordani. Kabili ilyo afumine fye mu menshi amwene umuulu uleisuka, e lyo no mupashi wa mushilo uleikila pali ena kwati ni nkunda.” (Marko 1:9, 10) Ilyo Yesu abatishiwe mu Yordani, abatishiwe ku menshi. Ilyo apokelele umupashi ukufuma ku muulu, e lyo abatishiwe no mupashi wa mushilo.

Ilyo papitile imyaka itatu apo Yesu abatishiwilwe, aebele abasambi bakwe ati: “Tapakapite inshiku ishingi, imwe mukabatishiwa mu mupashi wa mushilo.” (Imilimo 1:5) Ni lilali ici cacitike?

Pa bushiku bwa Pentekoste mu 33 C.E., abasambi 120 balilongene mu ng’anda mu Yerusalemu. “Mu kupumikisha mu muulu mwaumfwikike icongo kwati cipuupu icikali ica mwela, kabili cakumene ing’anda yonse umo baikele. Kabili indimi ishapala umulilo shamoneke kuli bena . . . , e lyo bonse baiswilemo umupashi wa mushilo.” (Imilimo 2:1-4) Bulya bwine ubushiku, bambi mu Yerusalemu bakoseleshiwe ukubatishiwa mu menshi. Umutumwa Petro aebele abantu abalongene ati: “Lapileni no kubatishiwa mwi shina lya kwa Yesu Kristu pa kuti mwelelwe imembu shenu, e lyo mwalapokelela umupashi wa mushilo, uwa bupe fye.” Bushe bacitilepo shani? “Bonse abatetekele amashiwi yakwe no mutima onse balibatishiwe, na pali bulya bushiku kwalundilweko abantu nalimo amakana yatatu (3,000).”—Imilimo 2:38, 41.

Ukubatishiwa Imiku Ibili

Bushe ishi mbatisho twalandapo shatulanga cinshi pa kufyalwa libili? Shatulanga ukuti pa kuti umuntu afyalwe libili, afwile ukubatishiwa imbatisho shibili. Yesu abalile abatishiwa mu menshi. E lyo pa numa apokelele umupashi wa mushilo. E fyo cali na ku basambi ba kubalilapo, intanshi babatishiwe mu menshi (bamo ni Yohane Kabatisha wababatishe), e lyo pa numa bapokelela umupashi wa mushilo. (Yohane 1:26-36) Na balya abasambi abapya 3,000 babalile babatishiwa mu menshi, e lyo pa numa bapokelela umupashi wa mushilo.

Nga twatontonkanya pa mbatisho shaliko pa Pentekoste mu 33 C.E., bushe cifwile ukuba shani pa kuti umuntu afyalwe libili? Filya fine cali ku batumwa ba kwa Yesu na ku basambi ba kubalilapo, e fyo cifwile ukuba na lelo. Intanshi umuntu afwile ukulapila pa membu shakwe, aleka ukucita ifyabipa, aipeela kuli Yehova ukuti akulamupepa no kumubombela, no kulanga ukuti naipeela pa kubatishiwa mu menshi. E lyo Lesa nga amusala ukuba kateka mu Bufumu bwakwe, ninshi asubwa no mupashi wa mushilo. Ukubatishiwa mu menshi muntu umwine asalapo, nomba ukubatishiwa ku mupashi, kwena ni Lesa e usala uwalabatishiwako. Umuntu nga abatishiwa imbatisho shonse shibili ninshi e lyo afyalwa libili.

Nomba ilyo Yesu alelanshanya na Nikodemo, cinshi alandiile ukuti umuntu afwile ‘ukufyalwa ku menshi na ku mupashi’? Alefwaya ukulanga ukuti ababatishiwa mu menshi na ku mupashi balaaluka nga nshi. Icipande cakonkapo calalanda pali uku kwaluka.

[Futunoti]

[Icikope pe bula 9]

Yohane alebatisha abena Israele abalapile mu menshi

Finshi Fifuma mu Kufyalwa Libili?

CINSHI Yesu alandiile ukuti umuntu afwile ‘ukufyalwa ku mupashi’ ilyo alelanda pa kubatishiwa no mupashi wa mushilo? (Yohane 3:5) Ishiwi lya kuti “ukufyalwa” nga lyabomfiwa mu mampalanya lipilibula “ukutendeka.” Kanshi “ukufyalwa cipya cipya” cipilibula “ukutendeka cipya cipya.” Kanshi amashiwi ya kuti “ukufyalwa” na “ukufyalwa libili” yalanga ukuti bucibusa bulatendeka cipya cipya pali Lesa na babatishiwa no mupashi wa mushilo. Bushe uku kwaluka kucitika shani?

Ilyo umutumwa Paulo alelondolola ifyo Lesa acita pa kusala abantunse ukuba bakateka ku muulu, apeele icilangililo ca ficitika mu lupwa. Aebele Abena Kristu baliko ilyo ali pano calo ukuti bali no ‘kupokelelwa nga bana’ no kuti Lesa ali no kubasunga “nga bana.” (Abena Galatia 4:5; AbaHebere 12:7) Pa kuti tumfwikishe bwino ifyo icilangililo ca kupokelelwa nga bana cingatwafwa ukumfwikisha ukwaluka kubapo ilyo umuntu abatishiwa no mupashi wa mushilo, natulande na kabili pa muntu uulefwaya ukuti ashite impanga mu calo cimbi.

Ifyo Baaluka Nga Bapokelelwa

Mu cilangililo, ulya muntu te kuti ashite impanga muli cilya calo pantu temo ekala. Nomba tontonkanyeni ukuti bushiku bumo, ifintu fya-aluka nga nshi. Abalashi bamweba ukuti balamusuminisha ukwikala mu calo. Nomba bushe ifintu fyalaba shani kuli uyu muntu? Apo nomba atendeka ukwikala muli ici calo, kuti acita fyonse ifyo abekalamo bacita, pamo nga ukushita impanga muli ici calo. Ifi bamusuminisha ukwikala muli ici calo, ifintu fyonse nomba fya-aluka.

Ici calangilila bwino ificitika kuli balya abafyalwa libili. Moneni ifyo fipalene. Umuntu twacilandapo mu cilangililo kuti ashita fye impanga nga ca kuti afikapo, e kutila atendeka ukwikala muli cilya calo. Lelo umwine e ka te kuti aisuminishe ukwikala muli cilya calo. Na bantunse bamo bakaba bakateka mu Bufumu bwa kwa Lesa, nelyo ubuteko bwa ku muulu, lelo pa kuti cikabe ifi kano bakumanisha ififwaikwa, e kuti ‘bafyalwa libili.’ Lelo abene beka te kuti bacite ifi pantu Lesa e wingalenga umuntu ukufyalwa libili.

Cinshi calenga ifintu ukwaluka kuli uyu mubomfi? Ni co bamusuminisha ukwikala mu calo. Kwena ukumusuminisha ukwikala mu calo takumwalwile iyo. Ilyo bamusuminisha ukwikala mu calo acili fye cimo cine. Nomba, ifintu kwena nafyaluka. Ifi bamusuminisha, atendeka cipya cipya, cili kwati afyalwa cipya cipya. Nomba kuti ashita ne mpanga muli ici calo.

Yehova na o alyalula ifintu ku abantunse bamo pa kubapokelela ukuba abana bakwe. Umutumwa Paulo, uwali muli ili ibumba, alembeele Abena Kristu banankwe ati: “Tamwapokelele umupashi wa busha uulenga umwenso, lelo mwapokelele umupashi wa kuba abana, uyu mupashi wine e utulenga ukubilikisha atuti: ‘Abba, Tata!’ Umupashi wa kwa Lesa ulashimika ubunte no mupashi wesu ukuti tuli bana ba kwa Lesa.” (Abena Roma 8:15, 16) Lelo apo balisalwa, aba Bena Kristu baba mu lupwa lwa kwa Lesa, nelyo “bana ba kwa Lesa.”—1 Yohane 3:1; 2 Abena Korinti 6:18.

Kwena, ifi basalwa te kuti balyaluka, pantu bacili bantunse abashapwililika. (1 Yohane 1:8) Nomba, nge fyo Paul alondolwele, ilyo basalilwe, kwali ifya-alwike. Umupashi wa kwa Lesa walengele aba bana ukusumina ukuti bakekala na Kristu mu muulu. (1 Yohane 3:2) Ifi umupashi wa mushilo wabalenga ukusumina fyalengele ubumi bwabo ukwaluka. (2 Abena Korinti 1:21, 22) Nga batendeka cipya cipya, ciba kwati bafyalwa libili.

Baibolo ilanda pali aba bana ba kwa Lesa ati: “Bakaba bashimapepo ba kwa Lesa kabili aba kwa Kristu, kabili bakateka pamo nankwe imyaka ikana limo (1,000).” (Ukusokolola 20:6) Aba bana ba kwa Lesa bakaba imfumu pamo na Kristu mu Bufumu bwa kwa Lesa, nangu ubuteko bwa ku muulu. Umutumwa Petro aebeele Abena Kristu banankwe ukuti ‘bakapyana icishingabola kabili icishakowela kabili icishingakota’ e kuti “ubupyani bwaba mu muulu” ubo babasungila. (1 Petro 1:3, 4) Ubu, bupyani ubwacindama icine cine!

Nomba kuti twaipusha icipusho na cimbi. Nga ca kuti abafyalwa libili bakaba imfumu mu muulu, ni bani bakalateka? Twala-asuka ici cipusho mu cipande cikonkelepo.

[Icikope pe bula 10]

Cinshi Paulo alandile pa kupokelelwa nga bana?

Bamo Bakalateka, E lyo Abengi Bakasekelamo

UKUTULA mu nshita ya batumwa, Lesa alasala Abena Kristu bamo, no kubabuula ukuba abana bakwe. Uku kwaluka ukukalamba nga nshi ica kuti Baibolo ikwita ati ukufyalwa cipya cipya. Ico kwabela ukufyalwa cipya cipya kupekanya ababomfi ba kwa Lesa abafyalwa libili ukuyateka ku muulu. (2 Timote 2:12) Pa kuti babe bakateka, balababuusha ku bafwa no kubapeela ubumi ku muulu. (Abena Roma 6:3-5) Kulya, “bakaba bashamfumu abakalateka isonde” pamo na Kristu.—Ukusokolola 5:10; 11:15.

Lelo, Icebo ca kwa Lesa citila no kuti ukulunda pa bafyalwa libili, bambi nabo bakapusuka. Mu Baibolo (mu Malembo ya CiHebere na ya CiGriki aya Bena Kristu), balilandapo ukuti Lesa akapususha amabumba yabili aya bantu, ibumba linono ilya bakateka ku muulu, ne bumba likalamba ilya bakekala pe sonde. Natulande pa fyo umutumwa Yohane alembeele Abena