Ulubuuto lwa Kasuba Lulalenga Ukulaalo Tulo

BUSHE mulafufiwo utulo? Ubwafya kuti bwaba kubulwa ulubuuto lwa kasuba, no kucilisha nga muli bacikoloci. Abasapika mu Japan nomba line bafwailishe mu bacikoloci abafufiwa utulo abekala mu mayanda ya kulelelamo abakoloci, kabili basangile ukuti icilenga ukuti balefufiwa utulo kukanapokelela ulubuuto lwa kasuba ulwafikapo cila bushiku. Pa nshita imo ine, ilyo babapimine umulopa basangile ukuti insandesande batila melatonin shalicepele.

Insandesande sha melatonin shipangwa muli bongobongo. Lipoti wa The Journal of Clinical Endocrinology & Metabolism atile ngo bumi buli bwino, insandesande sha melatonin “shilafula sana mu mulopa mu nshita ya bushiku kabili mu nshita ya kasuba tacishibikwa no kwishibikwa nge nsandesande emo shili.” Lelo abacikoloci nga tabalepokelela ulubuuto lwa kasuba, melatonin alacepa mu mulopa. Cimoneka ukuti ngo mubili taulepokelela ulubuuto lwa kasuba ulwalinga cilakosa ukwishiba ubupusano pa kati ka kasuba no bushiku, kabili abasapika batontonkanya ukuti ico kuti calenga ukufufiwa utulo.

Ilyo aba bacikoloci abalefufiwa utulo bapokelele ulubuuto lwa malaiti pa maawala yane mu nshita ya kasuba pa kati (pa 10:00 hrs ukufika ne nshita ya kasuba pa kati kabili na pa 14:00 hrs ukufika ku 16:00 hrs) mu milungu ine, lipoti yatile melatonin wabo atendeke ukufula ukufika “ku cipimo ca melatonin wa bacaice.”a Pa nshita imo ine, balelalako eyefilya.

Uku kufwailisha kwalengele abasapika “ukutungo kuti abacikoloci, ukucilisha abalefufiwa utulo, abaleikala sana mu ng’anda umwali ulubuuto lwa malaiti, balepokelela ulubuuto lunono, icalelenga umubili ukukanaishiba inshita ya kulaala. Apo abacikoloci bamo balanwa umuti wa melatonin uwa kubafwilisha ukulaalo tulo, lipoti atile: “Ukwishiba ububi bwaba mu kunwa umuti wa melatonin pa nshita ntali, kuti kwalenga abakoloci abafufiwa utulo ukutemwapo ukundapwa fye ku lubuuto lwa kasuba ulufusha melatonin mu mulopa ukwabula ubwafya.”

E co nga ilingi mwikala mu ng’anda kabili mulafufiwa utulo, muleikalako pa nse inshita iikalamba—nangu fye muleleka ulubuuto ukwisa mu ng’anda mu nshita ya kasuba no kushimya amalaiti pa kulaala. Mukasango kuti ulubuuto lwa kasuba lukalenga mulelaala.

[Futunoti]