Alebatamba

ABALUMENDO babili baile umo bashitishisha ifya kulya ukuti balyeko umwikulo mu musumba unono uwa mu Ohio, mu United States of America. Umwabelele umwata wabo, ilyo bashilatendeka kulya balineme no kupepa mu mutalalila.

Ilyo bapwile ukupepa, umwanakashi uwali alebatamba aile apo baleliila no kusenda ceke. Atile kuli bena: “Mu calo umo tuumfwa ifyabipa ifingi pa lwa bacaice te pa busuma ukumona abalumendo babili abatala bapepa kuli Lesa pa kubapeela ica kulya cabo. Nalamulipililako umwikulo.”

Abalumendo balisungwike lelo balishipikishe no kusosa abati twatasha. Pa numa bapelulwile ukuti te kuti ciwame ukuleka umwanakashi ukutontonkanya ukuti bacilapepa kuli Lesa yaweyawe. E co umo pali aba balumendo aile ku mwanakashi no kumutasha na kabili, no kumulondolwela ukuti ni Nte sha kwa Yehova.

Waba mwata wa Nte sha kwa Yehova ukusambilila Baibolo ne ndupwa shabo. Abafyashi ba aba balumendo e fyo bacitile. Ulupapulo lumo ulo indupwa shasambilila citabo ca Ukwishiba Uko Kutungulula ku Mweo wa Muyayaya. Pa fipandwa 19 ifyaba muli ici citabo paba ne cipandwa citila “Ifyo Wingapalama Kuli Lesa.”

Kuti mwalomba ukumutumina ici citabo ca mabula 192 icafwilisha ukusambilila Baibolo nga mwaisushisha akapepala kali pano no kukatuma ukubomfya akeyala kalipo nelyo akeyala kalinga pe bula 5 ilya uno magazini.

□ Ntumineniko icitabo ca Ukwishiba Uko Kutungulula ku Mweo wa Muyayaya.

□ Mukwai na ine kuti bantandalilako pa kuti nkatendeke ukusambilila Baibolo pa ng’anda ukwabula ukulipila.