Ifyo Baibolo Isambilisha
Mulandu Nshi Lesa Ashaonawila Satana Kaseebanya?
NGA ca kuti mwalikwete amaka ya kwafwa umuntu uulecula, bushe te kuti mumwafwe? Ababomba umulimo wa kupususha abantu, ilingi line babutukila ku cifulo ukucitike ubusanso ku kupususha abantu abo bashaishiba. Umuntu kuti pambi aipusha ukuti, ‘Mulandu nshi Lesa ashaonawila bwangu Satana Kaseebanya uwalenga abantu ukucula icabipisha?’
Pa kuti tusange icasuko kuli ici cipusho, natwelenganye umulandu uukalamba uulecitika mu cilye ca milandu. Kuli shimilandu, uwipeye umuntu, uulefwaisha ukuti baleke ukumulubulwisha, pantu aletila kapingula tali uwa cishinka mu nshila alelubulwishishamo umulandu kabili atila ne bumba lya balelubulwisha nabapoka amafisakanwa ukufuma kuli kapingula. E co basuminisha inte ishingi pa kuti shilande ifyo shishibe.
Kapingula naishiba ukuti umulandu nga wakokola kuti kwaba ubwafya, kabili kuti afwaisha ukuti umulandu upwe ukwabula no kupoosa inshita. Lelo kwena, naishiba ukutila pa kuti apingule bwino bwino uyu mulandu ica kuti na ku ntanshi ilyo kukaba imilandu ya musango yu akapingule bwino, alingile ukupeela inshita iikalamba iya kuti bonse babili abali mu mulandu balondolole ifishinka.
Bushe ici ica kumwenako kuti calingana shani ne fyo Kaseebanya uwitwa, “icing’wena,” “icisoka” kabili “Satana” atungenye Yehova ‘Uwapulamo pano isonde ponse’? (Ukusokolola 12:9; Amalumbo 83:18) Bushe uyu wine Kaseebanya nani? Kabili finshi ifyo Satana atungenye Yehova Lesa? Kabili, ni lilali Lesa akamonaula?
Ico Umulandu Walekabila Ukupwila Bwino
Pa kutendeka fye uwaishileba Kaseebanya ali muntu wapwililika uwa ku mupashi, kabili ali ni malaika wa kwa Lesa. (Yobo 1:6, 7) Aipangile fye umwine ukuba Kaseebanya ilyo atendeke ukukumbwa ukupepa uko abantu balepepa Lesa. Atwishike inshila Lesa atekelamo, no kulanda fye ukuti abantu tabalingile ukumfwila Lesa. Atile abantu babombela fye Lesa nga ca kuti abapaala. Satana asosele no kuti abantu nga bacula, bonse fye kuti ‘batuka’ Kabumba wabo.—Yobo 1:8-11; 2:4, 5.
Pa kupwisha umutunganya wa musango yu uwa kwa Satana, Lesa talekabila ukubomfya amaka. Na kuba Lesa onaula Satana mwi bala lya Edeni bambi nga batontonkenye ukuti Satana wine e walungike. Apo Lesa e Wa Maka Yonse, atendeke ukulubulwisha shimilandu pa kuti na baleumfwako beshibe ifishinka no mulandu upwe bwino bwino.
Ukulingana na mafunde yakwe ayapwililika no mulinganya, Yehova Lesa alangilile ukuti bonse abali mu mulandu balingile ukuleta inte isha kulanda ifishinka. Lesa alileka papita inshita iikalamba iya kuti abana ba kwa Adamu babe no mweo no kulanga bonse ukuti abene balisalapo ukuba ne cishinka kuli Lesa mu kuitemenwa fye te mulandu na mafya bengakwata.
Ukufika Lilali?
Yehova Lesa alishiba ukuti abantu bakatwalilila ukucula ilyo kucili uyu mulandu. Lelo, alipampamina pa kupwisha umulandu mu kwangufyanya. Baibolo ilondolola ukuti Yehova ni “Shifwe wa nkumbu kabili Lesa wa cisansamushi conse.” (2 Abena Korinti 1:3) Ukwabula no kutwishika, “Lesa wa cisansamushi conse” takasuminishe Satana ukutwalilila ukubako pa nshita ntali kabili takamusuminishe ukutwalilila ukulatunka abantu. Lelo Lesa takonaule Satana ilyo umulandu wakuma ifibumbwa fyonse ucili mu cilye ca milandu, ukwabula uku-upwisha bwino bwino.
Ilyo imilandu yonse ikapwa, Yehova uwakwata insambu ya kuteka akaba nafuma mu milandu bamubepeshe. Ifyo Lesa aacita pa kupingula Satana e cipimo ca kukonka pa kupingula imilandu imbi umuyayaya. Nomba umulandu wapalako nga wabako na kabili, Lesa kuti acita nga filya fine acitile pa kupwisha ubwafya ubo Satana aletele.
Nomba line, Yehova Lesa akeba Umwana wakwe uwabushiwa, ukonaula Satana no konaula imilimo yakwe yonse. Baibolo ishimika pa lwa nshita ilyo Kristu “akalubwila ubufumu kuli Lesa kabili Wishi, ilyo akonaula ubuteko bonse no butungulushi bonse na maka. Pantu ali no kuteka mpaka Lesa akabike abalwani bonse pe samba lya makasa yakwe. No mulwani wa kulekelesha ukonaulwa ni mfwa.”—1 Abena Korinti 15:24-26.
Tulasansamuka ukwishiba ukuti Baibolo yalaya ukuti isonde lyonse likaba Paradaise. Nge fyo Lesa afwaile pa kutendeka, abantu bakekala muli paradaise umukaba umutende! Baibolo itila: “Abafuuka e bakekala mu calo kabili bakasekelela nga nshi pantu umutende ukafula.” Ee, “abalungama e bakekala mu calo, kabili bakekalamo umuyayaya.”—Amalumbo 37:11, 29.
Tontonkanyeni pa mapaalo ubwingi ayo ababomfi ba kwa Lesa bakaipakisha ayalondololwa muli Baibolo: “Moneni! Itenti lya kwa Lesa lili pamo na bantunse, kabili akekala pamo na bo, kabili bakaba abantu bakwe. Na Lesa umwine akaba pamo na bo. Kabili akafuuta ifilamba fyonse ku menso yabo, ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili. Ifya ntanshi nafiya.”—Ukusokolola 21:3, 4.
BUSHE MWALIPUSHAPO AYA MEPUSHO?
● Bushe Satana abepesha shani Lesa na bantu?—Yobo 1:8-11.
● Mibele nshi iya kwa Lesa iilenga twashininkisha ukuti mu kwangufyanya akonaula Satana?—2 Abena Korinti 1:3.
● Finshi Baibolo yatulaya?—Ukusokolola 21:3, 4.
[Icikope pe bula 10]
Pa kuti kapingula apingule bwino bwino uyu mulandu ica kuti na ku ntanshi ilyo kukaba imilandu ya musango yu akapingule bwino, alingile ukupeela inshita iikalamba iya kuti bonse babili abali mu mulandu balondolole ifishinka