Abacaice Bepusha Ukuti

Kuti Nacita Shani pa Kuti Ifyo Mfwaya Fikacitike?

BUSHE pali ifi, ni finshi wingatemwa sana?

● Ukuicetekela sana

● Ifibusa ifingi

● Insansa ishingi

Na kuba kuti wakwata fyonse ifi fitatu! Kuti wacita shani? Ulingile ukupanga mu mutima ifyo ufwaya ukucita no kubombesha ukuti ukaficite. Tontonkanya pali ifi twalalandapo.

Ukuicetekela sana Nga ca kuti mu mutima ulepangila libela ifinono ifyo ulefwaya ukucita kabili uleficita, ukalaicetekela ica kuti ukalakwanisha no kucita ifikalamba. Ukulaicetekela na lintu ulekwata amafya ya cila bushiku pamo nga ukukaana ilyo abanobe balekupatikisha ukucita ifyo uushilefwaya. Nga ulecita ifi, bambi bakamona ifyo waicetekela kabili bakulakucindika. Bambi tabakulakupatikisha sana ukucita ifyo ushilefwaya. Na kuba, bakatampa no kulakukumbwa.—Linganyako Mateo 5:14-16.

Ifibusa ifingi Abantu balomfwa bwino ukulasangwa na bapangila libela ifya kucita mu bumi, e kutila abaishiba ifyo bafwaya ukucita mu mikalile yabo kabili abaipelesha ukubomba pa kuti ifyo bapanga ukucita ficitike. Kabili abantu nga balepalama kuli iwe pa mulandu wa fyo wapanga ukucita mu bumi, ilingi line e baba abakukwafwa ukufika pa buyo bobe.—Lukala Milandu 4:9, 10.

Insansa ishingi Natulande fye icishinka: Ukuba ne citendwe nelyo ukwikala fye ulelolela ukuti ifintu fikawame ku ntanshi mu bumi takumfwika bwino nakalya. Nomba nga mu mutima wapanga ica kucita e lyo wakwanisha no kucicita, kulaba ukumfwa bwino sana. E mulandu wine umutumwa Paulo inshita imo atile: “Ifyo mbutuka nshibutuka ngo ulebutuka icibutukebutuke.” (1 Abena Korinti 9:26) Kabili uleibukisha ukuti, nga ca kuti ifyo ulefwaya ukucita fikalamba, ne nsansa ukakwata nga ca kuti wakwanisha ukuficita shikaba ishingi nga nshi!

Bushe nauipekanya ukutendeka ukucita ifyo ufwaya mu bumi bobe? Putula ili ipepala no kupeta ibula ukulola ku kulyo, lyena konka ifyebo filembelwe.a

Ifipande na fimbi ifya “Abacaice Bepusha Ukuti” filasangwa na pa Intaneti ukubomfya adresi ya www.watchtower.org/ype

[Futunoti]

IFYA KUTONTONKANYAPO

● Bushe kuti wakwata ifya kucita ifingi pa muku umo?—Abena Filipi 1:10.

● Bushe ukupanga ifya kucita cipilibula ukuti cila nshita ufwile ukulatantika fyonse ifyo wakulacita mu bumi?—Abena Filipi 4:5.

[Akabokoshi ne Fikope pe bula 25, 26]

Ifyo Wingafikilisha Ifyo Ufwaya

FISHIBE Amapinda 4:25, 26 1

“Wilatiina ukutontonkanya pa kucita ifintu fimo mu bumi ifyo ulemona kwati te kuti uficite. Nga ca kuti bambi balikumanisha ukuficita, ninshi na iwe wine kuti wakumanisha.”—E fyasosele Roben.

1. Tontonkanya pa fyo wingakwanisha ukucita ku ntanshi. Cita fye kwati uleangala! Wilatontonkanyapo sana, lemba fye ifintu ifingi ukufika apo wingapela. Mona nga kuti walemba ifintu nalimo 10 nelyo 20 ifyo wingacita.

2. Pituluka mu fyo walemba. Finshi watemwapo sana ifilemoneka ukuti e fingawama ukubombelapo? Pali ifi ulembele, finshi fyafishepo sana? Finshi maka maka ifingakulenga ukuba ne nsansa nga ca kuti walificitile? Ibukisha ukuti ifyawamisha ukucita ni filya ifyo wacindika sana.

3. Tantika ifyo ukabalilapo. Intanshi sala ifya kucita ifyo wingakwanisha ukucita mu nshiku fye ishinono. Lyena sala ifya kucita ifyo wingakwanisha ukucita ku ntanshi (ifyo wingacita mu milungu nelyo mu myeshi). Tantika ifyo ufwaya ukucita, balilapo ne fyo ufwaisha.

Ica kumwenako ca fyo wingapanga ukucita

Ukupanga ifibusa Ndefwaya ukupanga icibusa no muntu umukalamba nangu umwaice. Ndefwaya ukupanga icibusa na kabili no wali umunandi kale.

Ubumi busuma Ukulatukusha umubili amamineti 90 cila mulungu. Cila bushiku ukulasendama ama-awala 8.

Isukulu Ndefwaya ukupoosako amano ku nsamushi. No kuba ne cishinka nga ca kuti abana be sukulu bambi balefwaya ukuti mbepe pa kulemba amashindano.

Ifya kwa Lesa Ndefwaya ukulabelenga Baibolo amamineti 15 cila bushiku. Ukwebako uo nsambilila nankwe pa fyo nasuminamo uno mulungu.

TANTIKA Amapinda 21:5 2

“Cilawama ukupanga ifya kucita, lelo pa kuti ukabombele pa fyo upanga ukucita kano watantika bwino. Nga tautantike, ninshi ukapelela fye mu kupanga ukwabula no kucita icili conse.”—E fyasosele Derrick.

Kuli fyonse ifyo wapanga ukucita, cita ifyakonkapo:

1. Lemba ifyo ulefwaya ukucita.

2. Sala ubushiku ubo ukapwishishapo Pantu nga tausalile ubushiku ufwile ukupwilapo ifyo wapanga ukucita ninshi cimo no kuti ulelota fye!

3. Tantika inshila ukabombelamo.

4. Uleenekela ukuti kukaba ifya kukupumfyanya. Lyena tontonkanya pa fyo wingacimfya ifya kupumfyanya.

5. Pampamina pa fyo wapanga. Mu mutima obe laya ukuti ukabombesha pa kuti ukafikilishe ifyo wapanga ukucita. Nomba saina kabili lembapo no bushiku.

Nsambilile iciSwahili pa kuti nkaye mu kulanda ilyo nkaya ku Tanzania July 1

Ifya kucita

1. Nkafwaya ibuuku umwaba amashiwi ayepi aya citundu ndesambilila.

2. Cila mulungu nkalasambililako amashiwi ayapya 10.

3. Nkalakutika ku bantu bambi ilyo balelanda iciSwahili.

4. Nakulaipusha umuntu umbi ukunjeba umo ndelufyanya.

Ifingakucilikila ukusambilila

Takwaba nangu umo mupepi uulanda iciSwahili

Ifya kucita pa kutwalilila ukusambilila

Fwaya ifyebo pa Intaneti ifya ciSwahili ifyo wingalakutikako, ifyaba pali adresi ya www.jw.org.

․․․․․ ․․․․․

Saina Ubushiku

BOMBELAPO! Yohane 13:17 3

“Limo limo kuti walaba ku fyo ulepanga ukucita, e co kano wabika amano pa fyo wapanga ukucita no kutwalilila ukubombelapo.”—E fyasosele Erika.

Tendeka ili line. Ipushe we mwine auti, ‘Cinshi ningacita lelo, pa kuti ningatendeka ukucita ifyo napanga ukucita?’ Kwena, nalimo te kuti utantike fyonse ifyo ufwaya ukucita, nomba wifuupulwa ica kuti ufilwe no kutendeka ukucita ifyo ufwaya. E fyo na Baibolo ilanda pantu itila: “Uulolekesha imikuukile ya mwela takatande; no umona imyendele ya makumbi takaseepe.” (Lukala Milandu 11: 4) Sala ico wingacita lelo line, nangu ca kuti cinono, cicite.

Cila bushiku pituluka mu fyo ufwaya ukucita. Uleibukisha umulandu fyonse ifyo upanga ukucita fyacindamina. Bika amano ku fyo ufwaya ukucita kabili nga wakwanisha ukuficita, conga ukubomfya ici cishibilo ✔ (nelyo conga ubushiku wapwilapo).

Ulealula nga fyayafya. Nangu ca kuti walitantika bwino bwino ifya kucita, kuti wakabila ukwalulako mumo mumo mu kuya kwa nshita. Kuti caba fye bwino ukwalula. Witila kano fye ukonke filya fine fye watantike. Ulingile ukubika amano ku fyo wapanga ukucita no kutwalilila mpaka fye ukafike pa buyo bobe.

Ule-elenganya. Tontonkanya pa fyo cikaba ku ntanshi kabili elenganyeni ukuti naucita ifyo wapangile ukucita. Tontonkanya na pa nsansa wingakwata nga wafika pa buyo bobe. Nomba tala pituluka mu fyo watantika fyonse ifyo ufwaya ukucita, kabili tontonkanya pali cimo na cimo. Nga wapwisha, tendeka ukubombela pali cimo cimo ico upanga ukucita kabili elenganya ifyo ukomfwa bwino nga wafika pa buyo bobe. Ale nomba tendeka ukubomba!

[Icikope]

Ifyo upanga ukucita fyaba fye kwati ni pulani ya cikuulwa, lelo ufwile ukucita fimo pa kuti ifyo upanga fikacitike!

[Akabokoshi ne Fikope pe bula 25]

IFISOSA ABANOBE

“Calyanguka ukufuupulwa nga ca kuti tapali nangu fimo ifyo ukutontonkanya ukucita mu bumi. Nomba walitontonkanyapo ukucita fimo e lyo wakwanisha no kuficita, cilomfwika bwino sana.”—E fyasosele Reed.

“Wilaipeela umulandu nga ca kuti ulefilwa ukucita ifyo ulefwaya nelyo taficitike pa nshita walemona ukuti epo fikacitikila. Nga uletontonkanya muli uyo musango ninshi tapali ifyo ukacita. Twalilila fye ukwesha!”—E fyasosele Cori

“Landa na bantu abacitapo ifyo ulefwaya ukucita. Kuti bakukoselesha kabili kuti bakulangako fimo ifyo ufwile ukucita ifingakwafwa sana. Na kabili, ebako balupwa lobe ifyo ulefwaya ukucita pantu kuti balekwafwa ukufishapo ifyo ufwaya ukucita.”—E fyasosele Julia.

[Icikope pe bula 24]

(Nga mulefwaya ukumona icikope, moneni muli magazini)

Putula

Peta