“Lesa Aletwafwa Ukulabako”

BA NATALYA no mwana wabo umwaume Aslan uwa myaka 9, baikele mupepi na ba Zarina abali no mwana umwanakashi Anzhelika uwa myaka 12. Abana na bakalamba ukucila pali 1,000 baikele pamo mupepi ninshi balebalonda ku baume abali ne mfuti shakalala mukokote.

Pa September 1, mu 2004, pali Citatu ulucelo abana na bafyashi mu Beslan umusumba uunono uwabela mu Alania ku Russia, bali pa sukulu balepekanya ukusefya ukwa kwisula isukulu. Mu kupumikisha fye kwaishile ifipondo ifyali ne mfuti na mabomba ifyaishile apo bali kabili fyatendeke ukupika imfuti mu muulu uku ninshi filepunda. Ifi fipondo ifyacilile pali 30, fyaingishe abantu bonse mu cikuulwa ca pa sukulu umo baletukushisha umubili kabili fyate-ele amabomba mu cikuulwa.

Babakomena mu Cikuulwa

Pa nshiku shitatu abashilika balelanshanya ne fipondo ukuti fileke abantu baye, lelo fyalikeene. Ba Natalya batile: “Ala pali bulya bushiku napepele ifyo nshabala mpepapo.” Pali iyi nshita ninshi ba Natalya balasambilila Baibolo ne Nte sha kwa Yehova.

Ilyo ifi fyalecitika cali ni mu lusuba, kanshi mu cikuulwa bababikile mwalikabile icine cine. Ukutendeka ulucelo pa bushiku bwalenga bubili, ifipondo tafyapeele abantu ifya kulya na menshi, ica kuti pa bushiku bwalenga shitatu pali Cisano, bamo abali muli ici cikuulwa batendeke ukunwa imisu no kulya amaluba abana baleteele bakafundisha. Ba Natalya batile: “Akalumendo akaikele mupepi na ifwe, kampeele ibula. Lyene nayakenye Anzhelika e lyo na Aslan.”

Pa bushiku bwine ubu ubwalenga shitatu kwaishileba icimfulunganya. Ba Natalya batile: “Amabomba yalipuulike ica kuti yangwisha na pa nshi. Lyena mu cikuulwa mwaishileba icushi, kabili imfuti shalitendeke ukulila.” Ilyo abashilika ne fipondo balelwa, ba Natalya na Aslan batendeke ukwamfula mpaka bafuma. Lyena ba Alan abekala kuli ilya ncende balibafwile ukufuma. Lelo abengi balifwile.

Ifyacitike pa Numa

Abana abengi na bakalamba balifwile ukubikako fye na Anzhelika. Pa milungu iingi, mu Beslan mwali ukuloosha ne misowa. Ing’anda ya ba Natalya yaloshanya fye neli isukulu. Lelo nangu ni lintu bakuulile isukulu ilipya lwa mupepi, Aslan alefilwa ukuya ku sukulu kabili alefilwa no kuya pa nse mu kwangala. Ba Natalya batile: “Twalepepa ukuti Yehova atwafwe ukuleka ukuba no mwenso.” Mu kupita kwa nshita, Aslan alitendeke ukuya ku sukulu.

Ba Natalya nabo balefilwa ukuya mu kulongana ku Ng’anda ya Bufumu. Batile: “Nga ndi pa bantu abengi mu cikuulwa, nalemona kwati kwalaba abalatusansa. Naleikalila fye ukupepa ukuti kwicitika icili conse icibi. Mu kuya kwa nshita, nalileke ukuya mu kulongana kabili nga naibukisha ukuti abantu abengi balifwile lelo ifwe twapusuka, naleumfwa ububi.”

Ukuleka Ukuba no Mwenso

Ba Natalya batile: “Ndatasha sana aba mu cilonganino abashalekele ukungafwa. Nte uwe shina lya Tatyana alentandalila lyonse pa numa ya nshiku shitatu. Pa numa, aliletele Nte na umbi umwanakashi uwe shina lya Ulyana, uwa cikuuku, uwaishiba ifya kulanda, uwanakilila kabili uwaishiba sana Baibolo. Alentasha pa fyo naleesha ukucita kabili alekutika nga ndelanda.

“Ba Ulyana bambelengele amashiwi Paulo alembele ayaba pali 2 Abena Korinti 1:9. Pa numa ya macushi Paulo akwete mu Asia, atile: ‘Twalishininwe mu mitima yesu ukuti ukufwa tulefwa.’ Na kabili bambelengele Esaya 40:31, apaba amashiwi ya kuti: ‘Abalecetekela Yehova bakaba na maka na kabili. Bakapupuka na mapindo kwati ni bakapumpe.’ Amalembo ya musango uyu, e lyo no kunkoselesha ba Ulyana na ba Nte bambi balenkoselesha, fyalengele ine na bana bandi tutendeke ukulongana na kabili. Na lyo line, ncili ndomfwa umwenso ukuba mu cikuulwa umuli abantu abengi.”

Pa numa ba Zarina baishileba Inte ya kwa Yehova kabili balafwaisha ukwisasengela Anzhelika ilyo akabuushiwa, ku kwikala mu calo icisuma, ica mutende, icikalatekwa no Bufumu bwa kwa Lesa. (Mateo 6:9, 10; Imilimo 24:15) Ba Natalya na bana babo babatishiwe mu 2009. Bacili bekala mupepi ne fibumba ifyatobaika ifya cikuulwa babesalilemo lelo balileka ukumfwa sana ububi no mwenso. Ba Natalya batile: “Nomba ndalanda pa fyacitike pali bulya bushiku ukwabula ukumfwa icikonko nelyo ukuba no mwenso. Lesa aletwafwa ukulabako.”