“Nalelolesha Ifi Ifya Mweo”

Ukwabula no kutwishika Esekiele alimwenepo ing’ombe ishilume ne nkalamo ifya kupanga ifyakwete amapindo ne mitwe ya bantu ifyo balebika pe sano na pa matempele. Ifi ifinama fya kupanga e mo fyali ifingi mu Asiria na mu Babiloni. Nga filya fine abantu bambi balepapa nga bamona ifi finama, Esekiele na o alipapile ilyo amwene ifi ifinama fya kupanga, fimo fyalelepa ukufika na ku mamita 6. Nangu ca kuti ifi finama fyalemoneka bwino kabili fyalemoneka kwati fya maka, fyali fya kupanga fye ukubomfya amabwe, tafyali ifya mweo.

Lelo filya ifintu 4 ifyo Esekiele amwene mu cimonwa fyena fyali “ifya mweo.” Ubu bwali bupusano ubukalamba nga nshi! Ubu bupusano amwene bwalengele alanda amashiwi ya kuti “ifya mweo” ukucila pa miku 10 mu mashiwi ya kubalilapo ayo alembele mu busesemo. (Esek. 1:5-22) Icimonwa Esekiele amwene ica fya mweo 4 ifyaleya kumo kwine pa nshita imo ine ninshi fili mwi samba lya cipuna ca Bufumu ica kwa Yehova, cifwile calengele Esekiele ashininkisha ukuti Yehova alikwata amaka pa fibumbwa fyonse. Na muno nshiku mwine, ici cimonwa cilalenga twatontonkanya sana pa fyo Yehova akula na pa fyo akwatisha amaka na pa fyo amaka yakwe aya kuteka ku muulu na pano isonde yakula.—1 Imila. 29:11.