“Amafupa Ayauma” Ne ‘Nte Shibili’ Bushe Fya-ampana Shani?

MU MWAKA wa 1919 mwalifikilishiwe amasesemo yabili aya-ampana: ubusesemo bumo bulanda pa “mafupa ayauma,” e lyo bumbi bulanda pa ‘nte shibili.’ Icimonwa ca “mafupa ayauma” calesobela inshita iikalamba (iyali myaka iingi nga nshi) iyapwile ilyo abantu ba kwa Lesa abali ibumba ilikalamba baishileba no mweo. (Esek. 37:2-4; Ukus. 11:1-3, 7-13) Ubusesemo bwa pa ‘nte shibili’ bulanda pa nshita iinono (bwafikilishiwe ku kupwa kwa mwaka wa 1914 ukufika ku kutendeka kwa mwaka wa 1919) iyapwile ilyo ababomfi ba kwa Lesa abali ibumba ilinono baishileba no mweo. Amasesemo yonse yabili yaleimininako ukubuushiwa kwa mampalanya, kabili yonse yabili yalifikilishiwe mu mwaka wa 1919 ilyo Yehova alengele ababomfi bakwe abasubwa “baiminina,” lintu bafumine muli Babiloni Mukalamba umo bali bankole, kabili balonganikwa mu cilonganino icaishilebako na kabili.—Esek. 37:10.

Na lyo line kwaliba icikalamba icalenga aya amasesemo yabili yapusane mu fyo yafikilishiwe. Ubusesemo bulanda pa “mafupa ayauma” bwalesobela ifyo abasubwa bonse bali no kuba no mweo. Lelo ubusesemo bulanda pa ‘nte shibili’ bwalesobela ifyo abasubwa bamo aba kwa Lesa bali no kuba no mweo, e kutila abaletungulula mu cilonganino kabili abo baishilesonta ukuba “umusha wa cishinka kabili uwashilimuka.”—Mat. 24:45; Ukus. 11:6a

“Impanga Iyabatama . . . Umwali Fye Amafupa Yeka Yeka.”—Esek. 37:1

1. PA NUMA YA 100 C.E.

   Ukutendekela mu myaka ya ba 100 ninshi Yesu alibwelelamo ku muulu ilyo icilonganino ca Bena Kristu basubwa bacipeye mu mampalanya, mu “mpanga iyabatama” mwaiswile fye “amafupa”

2. KU KUTAMPA KWA 1919

   1919: “Amafupa ayauma” yaishileba no mweo ilyo Yehova alengele abasubwa bonse bafuma muli Babiloni Mukalamba kabili balonganikwa mu cilonganino icaishilebako na kabili

‘Inte Shibili’—Ukus. 11:3

1. KU MPELA YA 1914

   baleshimikila ‘ninshi nabafwala insamu’

   1914: ‘Inte shibili’ shaleshimikila “ninshi nashifwala insamu” pa myaka itatu na hafu. Ilyo iyi myaka yapwile, balishipeye mu mampalanya

2. bafwa mu mampalanya

3. KU KUTAMPA KWA 1919

   1919: ‘Inte shibili’ shaishileba no mweo ilyo bamunyinefwe abasubwa abaletungulula mu cilonganino abali ibumba ilinono babasontele ukuba “umusha wa cishinka kabili uwashilimuka”