Bushe Imipepele Ifwile Ukupatikisha Abantu Ukutuula Indalama?

Ba Estellea abakwata abana abengi kabili abatemenwe sana ukuya ku calici batile: “Bushiku bumo, naebele shimapepo wa ku calici ku mwesu ukuti nalefwaya ukulasambilila Baibolo.” Lelo uyu shimapepo alifililwe ukulabasambilisha, ne ci calengele ukuti baleke ukuya ku calici. Ba Estelle na kabili bashimika ukuti: “Abakalamba be calici balinembeele kalata umo banjebele ukuti nangu nshileya ku calici kuti ndetuma fye indalama. Mu mutima natile, ‘Tabambikako na mano nga naya ku calici, ico bafwaya fye ni ndalama.’”

Ba Angelina abatemwa sana ifya kwa Lesa, batile: “Ku calici nalepepa, lyonse ilyo twaleya ku mapepo, balepishamo imbale ya mutulo imiku itatu kabili bale-enekela ukuti lyonse tufwile fye ukutuula. Natendeke ukutontonkanya ukuti, ‘Aba bantu tabakwata umupashi wa kwa Lesa.’”

Bushe intungulushi sha macalici uko mwikala, baleba abantu mu kulungatika nelyo mu mucenjelo ukutuula indalama? Bushe ifi e fyo Baibolo isambilisha?

BUSHE CINSHI BAIBOLO ISAMBILISHA?

Yesu, uwatendeke ubuKristu atile: “Mwapeelwe fye ubupe, na imwe mulepeela fye.” (Mateo 10:8) Ubukombe bwa mu Baibolo bwalicindama sana, e co bonse abalefwaya ubu ubukombe, bafwile ukusambilila fye apa fye.

Bushe Abena Kristu ba kubalilapo balefumya kwi indalama sha kushitamo ifyalekabilwa mu cilonganino?

Cila muntu alesangula “umo apangile mu mutima wakwe, te kupeela na mutimako nangu mu kupatikishiwa, pantu Lesa atemwa uupeela ne nsansa.” (2 Abena Korinti 9:7) Umutumwa Paulo atile: “Pa kushimikila imbila nsuma twaleibombela fwe bene ubushiku na kasuba, pa kuti twilamusakamika sana ukwa kufumya indalama sha kutusungilamo.” (1 Abena Tesalonika 2:9) Paulo alepanga amatenti pa kusanga indalama sha kubomfya pa kuti alebomba bwino umulimo wa kushimikila.—Imilimo 18:2, 3.

BUSHE INTE SHA KWA YEHOVA BENA BAFUMYA KWI INDALAMA?

Inte sha kwa Yehova ilingi line balonganina mu fikuulwa ifyo beta ati Amayanda ya Bufumu. Bushe bafumya kwi indalama isho babomfya mu cilonganino? Tabapishamo imbale nelyo amaenifulupu ya kulombelamo umutuulo. Lelo bonse abalefwaya ukutungilila icilonganino, balasangula indalama isho babika mu tubokoshi utuba mu Mayanda ya Bufumu.

Ino magazini pa kuti baipulinte no kuituma mu fyalo na mu ncende shimbi, palaposwa indalama. Na lyo line, tamwakabale amumona ba Nte balesabankanya ku bantu nelyo ukubalomba ukuti babapeeleko indalama. Ico babikako sana amano kusabankanya icine ca mu Baibolo.

Bushe kuti mwatila ifyo Inte sha kwa Yehova shicita pa kusanga indalama, filomfwana na mashiwi Yesu alandile e lyo ne fyo Abena Kristu ba kubalilapo balecita pa kusanga indalama?

[Futunoti]

[Amashiwi pe bula 4]

Bushe ifilonganino fya mapepo fifwile ukulafumya kwi indalama?