Bushe Twaishilebako Shani?

Ibuuku lya kubalilapo mu Baibolo, ilya Ukutendeka, lyalilondolola mu mashiwi fye ayanono ifyo imyulu ne sonde fyaishilebako. Litila: “Pa kutendeka Lesa apangile umuulu e lyo ne sonde.” (Ukutendeka 1:1) Pa numa ya kupanga ifimenwa ne nama, Lesa apangile abantunse bakubalilapo, Adamu na Efa. Aba bantu balipusene sana ne nama pantu bena balikwete imibele iyo Lesa akwata kabili balikwete no buntungwa bwa kuisalila ifyo balefwaya. Kanshi ifyo balesalapo ukucita fyali no kubaletelela nelyo iyo. Ukumfwila ifyo Lesa abebele kwali no kulenga abafyashi besu aba kubalilapo ukutwalilila ukuba abapwililika, ukwikala mutende e lyo no kwikala umuyayaya nga fintu Lesa alefwaya.

Na lyo line, pa mulandu wa bukaitemwe, malaika umo abomfeshe abantu ukufulunganya ifyo Lesa alefwaya ukuti baleikala. E calengele ukuti abe Satana, icalola mu kuti “Uukaanya.” Satana alandiile mu cisoka pa kutunka Efa, amwebele ukuti ifintu fyali no kuwama sana nga ca kuti aleitungulula. Adamu na Efa balyumfwilile ifyo Satana abebele, ne ci calengele ukuti belaumfwana na Kabumba wabo. Pa mulandu wa fyo basalilepo ukucita, abafyashi besu aba kubalilapo balipanishe umweo wa muyayaya kabili balengele twapyana ulubembu, ukukanapwililika e lyo ne mfwa.

Ilyo ifi fyacitike, Lesa alilandile ifyo ali no kucita pa kupwisha ubu bwafya. Alipekenye ne fyo abana ba kwa Adamu baali no kuba no mweo wa muyayaya. Lesa alaile ukuti kwali no kuba “umwana” uwali no konaula Satana no kufumyapo amafya yonse ayo Satana, Adamu na Efa baletele pa bantunse. (Ukutendeka 3:15) Bushe uyu “mwana” ali no kuba nani? Aali no kwishibikwa ku ntanshi.

Na lyo line, Satana alitwalilile ukufulunganya ubufwayo bwa kwa Lesa. Ababifi balifulile nga nshi pano calo. Lesa apangile ukonaula ababifi ku lyeshi. Aebele Noa umulungami, ukukuula icibwato umo ali no kupusukila no lupwa lwakwe pamo ne nama isho bamwebele ukwingisha mu cibwato.

Ilyo Ilyeshi lyapwile ninshi palipita no mwaka umo, Noa no lupwa lwakwe balifumine mu cibwato no kwikala mu calo icali icasangululwa. Lelo “umwana” aali talamoneka.

—Ili lyashi lifumine pa Ukutendeka ifipandwa 1 ukufika ku 11; Yuda 6, 14, 15; Ukusokolola 12:9.