Ifyo Lesa Apekenye Ukulubula Abantunse

Lesa alaile umuntu wa cishinka Abrahamu ukuti mu lupwa lwakwe e mwali no kufuma “umwana” uo Lesa alaile abantunse. Muli uyu wine mwana, e mo abantu aba mu “nko shonse” baali no kupaalilwa. (Ukutendeka 22:18) Mu kupita kwa nshita, Yakobo umwishikulu wa kwa Abrahamu, akuukiile ku Egupti kabili kulya ulupwa lwakwe lwalikulile sana ica kuti batendeke ukubeta ukuti abena Israele.

Ilyo abena Israele baali mulya mwine mu Egupti, Farao umbi uwali umunkalwe alitendeke ukubacusha. Bapuswike fye lintu Lesa atumine Mose ukubafumya muli cilya calo. Pa kubapususha, Mose apaatwile amenshi ya pali Bemba wa Kashika mu cipesha amano. Pa numa, Lesa apeele abena Israele Amafunde Ikumi e lyo na mafunde yambi ayalebatungulula no kubacingilila. Amafunde abapeele, yalilandile pa malambo balekabila ukutuula pa kuti imembu shabo shelelwe. Lesa aebele Mose ukweba abena Israele ukuti aali no kubatumina kasesema na umbi. Uyu kasesema aali “mwana” uwalailwe.

Ilyo papitile imyaka mupepi na 500, Lesa alaile Imfumu Davidi ukuti “umwana” uwali no kwisa uo alandilepo mu Edeni, aali no kuba kateka wa bufumu ubukateka umuyayaya. Uyu “umwana” aali no kuba Mesia, Kalubula uwasalwa na Lesa ukupususha abantunse no kulenga isonde ukuba Paradaise.

Lesa alibomfeshe Davidi na bakasesema bambi ukusokolola panono panono ifintu na fimbi pali Mesia. Basobele ukuti Mesia aali no kuba uwaicefya kabili uwa luse kabili ilyo akalateka, takwakabe insala, ulufyengo e lyo ne nkondo. Abantu bakekala umutende na bantunse banabo e lyo ne nama. Apo Lesa talefwaya ukuti tulelwala, tulecula no kufwa, kanshi akafumyapo fyonse ifi kabili akabuusha na bafwa.

Lesa aebele kasesema Mika ukusobela ukuti Mesia aali no kufyalilwa mu Betelehemu kabili abomfeshe kasesema Daniele ukusobela ukuti abantu baali no kwipaya Mesia. Lelo Lesa aali no kubuusha Mesia no kumubika pa Bufumu mu muulu. Daniele na kabili alimwene ifimonwa ifyalelanga ukuti Ubufumu bwa kwa Mesia bukapyana amabuteko ya pano calo yonse kabili bukateka umuyayaya. Bushe ca cine Mesia alishile nga fintu casobelwe?

—Ifi ifyebo fifumine mu Ukutendeka ifipandwa 22 ukufika ku 50, e lyo na Ukufuma, Amalango, 2 Samwele, Amalumbo, Esaya, Daniele, Mika, na Sekaria 9:9.

[Akabokoshi pe bula 5]

ISHINA LYA KWA LESA ILYA MUSHILO

Ishina lya kwa Lesa ilya kuti Yehova, limoneka umuku wa kubalilapo mu Baibolo pa Ukutendeka 2:4. Ili ishina, ilyo Lesa wa cine fye eka akwata, lisangwa imiku nalimo 7,000 mu fimfungwa fya Amalembo ya Mushilo ifyalembelwe mu lulimi lwa kubalilapo ulo Baibolo yalembelwemo. Ili ishina lipilibula ukuti “Ailenga Ukuba,” ne ci cilenga twashininkisha ukuti Lesa kuti acita fyonse ifyo alefwaya ukucita no kuti akafikilisha na fyonse ifyo alaya.