Ifyo Icine ca mu Baibolo Cafikile mu Japan

PA September 6 mu 1926, kangalila enda umwina Japan uwalebombela mu United States, abwelele ku Japan ku kubomba bumishonari. Uwamupokele ni munyinefwe uwalepokelela impapulo sha Watch Tower, kabili uwatendeke ibumba lya basambi ba Baibolo mu Kobe. Aba Basambi ba Baibolo bakwete ukulongana kwa muputule ukwa kubalilapo pa 2 January, mu 1927 mu musumba wa Kobe. Abantu abasangilweko bali 36 kabili ababatishiwe bali 8. Uku kutendeka kwali fye bwino, lelo bushe ili ibumba ilinono lyali no kushimikila shani imbila nsuma ku bantu ba mu Japan abalefwaya ukusambilila icine abali amamilioni 60?

Mu May 1927, Abasambi ba Baibolo batendeke kampeni ya kubila ku cintubwingi ilyo balesabankanya amalyashi ya Baibolo. Iyashi lya kubalilapo, lyabelele mu Osaka, bamunyinefwe balimike ifipampa ifinono ne fikalamba mu mbali ya misebo mu musumba monse kabili balilalike na bashimucindikwa 3,000 ukwisasangwako. Balipeele abantu utupepala 150,000 utwakwitilapo abantu kabili balisabankenye ili lyashi mu manyunshipepala ayo abantu balebelenga sana mu Osaka kabili balembele umutwe we lyashi na pa matiketi 400,000 ayeshitima. Pa bushiku ili lyashi lyalelandwa, indeke shibili shaliponeshe utupepala 100,000 utwakwitilapo abantu mu musumba. Abantu abengi balishile mu kukutika ku lyashi ica kuti icikuulwa ca Osaka Asahi umwabelele ilyashi ilyaleti “The Kingdom of God Is at Hand.” (Ubufumu bwa kwa Lesa Nabupalama) caliswile na bantu bali 2,300. Abantu na bambi abengi tabakwete apakwikala kabili balibebele ukubwelelamo. Ilyo ilyashi lyapwile abantu ukucila 600 balishele baleipusha ifipusho no kukutika ku fyasuko. Mu myeshi yakonkelepo, amalyashi ya ku cintubwingi yalelandwa mu Kyoto na mu misumba imbi iyabela ku masamba ya Japan.

Mu October mu 1927, Abasambi ba Baibolo bateyenye ukuti amalyashi yakalandwe mu Tokyo. Na kabili, balitumine utupepala twakwitilapo abantu kuli kateka, bashicilye ba mu ng’anda ya mafunde, ku ntungulushi shamapepo na ku bakalamba ba bashilika. Pa kwita abantu kuli uku kulongana balilembele pa fipampa, mu manyunshipepala, na pa tupepala twakwitilapo abantu 710,000, kabili abantu 4,800 baishilekutika ku malyashi yatatu ayalandilwe mu musumba ukalamba uwa mu Japan.

BAPAINIYA ABACINCILA

Bapainiya balebombesha pa kubila imbila nsuma ku abantu pa mayanda yabo. Ba Matsue Ishii abali pali bapainiya ba kubalilapo mu Japan na balume babo ba Jizo, balibilile imbila nsuma mu ncende ishingi sana mu Japan, batendekele mu Sapporo ukufika ku Sendai, mu Tokyo, mu Yokohama, mu Nagoya, mu Osaka, mu Kyoto, mu Okayama, na mu Tokushima. Nkashi Ishii na nkashi wa cikalamba Sakiko Tanaka, bafwele ifya kufwala ifyo abena Japan bafwala ifyo beta ati kimono, ilyo baile mukwita aba mu buteko ukwisasangwa kuli uku kulongana. Umulashi umo alombele ukuti bakamupeeleko ifitabo 300 ifya The Harp of God na Deliverance ifya kubika mu laibrare ya mu cifungo.

Ba Katsuo na ba Hagino Miura balipokele ifitabo ifyo nkashi Ishii abapeele kabili ilyo babelengele balisumine ukuti ifyo babelengele, e cine. Balibatishiwe mu 1931, kabili balitendeke ukubomba bupainiya. Ba Haruichi na bena mwabo baTane Yamada na balupwa wabo abengi balisambilile icine pa Bufumu ilyo umwaka wa 1930 ushilafika. Aba mu lupwa lwaba ba Yamada bonse balitendeke ukubomba umulimo wa bupainiya, kabili umwana wabo Yukiko aile mu kubombela pa Bethel ya mu Tokyo.

“AMAYEHU” AYANONO NA YAKALAMBA

Pali ilya nshita imyotoka shalikosele sana mutengo kabili imisebo yalibipile sana. E ico, ba Kazumi na ba Minoura na bapainiya bambi abacaice baleikala mu fyo bapangile ifyalemoneka kwati matolokoshi ifyo baleita abati “AmaYehu.” Bainike aya matolokoshi ishina lya muntu uwalebutusha sana amaceleta kabili uwaishileba imfumu mu Israele. (2 Isha. 10:15, 16) Mwi tolokoshi limo na limo ilikalamba mwaleikala bapainiya 6. Kabili kwali amaYehu ayanono yabili ayo balekulika ku macinga 11, ayo bapangile pa musambo ya ku Japan. Ba Kiichi Iwasaki abalepangako amaYehu, batile “AmaYehu yonse yalekwata itenti na batri ya motoka iyo balebomfya ku malaiti ubushiku.” Bapainiya balebila imbila nsuma mu ncende shonse isha mu Japan. Baleninika no kutentemuka impili, baleyabuka imimana ukufuma ku Hokkaido ukufika ku Kyushu.

Ba Ikumatsu Ota abali bapainiya batile: “Nga twafika mwi tauni, twaleimika amatolokoshi mupepi no mumana nelyo pa ncende apashili imiti. Twalebalilapo ukubila imbila nsuma kuli bashimucindikwa pamo nga umukalamba we tauni kabili pa numa twaleya mu kubila imbila nsuma ku bantu pa mayanda no kubapeela impapulo. Nga twabila mwi tauni lyonse, twaleya kwi tauni limbi.”

Bwali “bushiku bwa ntendekelo iinono” ilyo Abasambi ba Baibolo 36 balongene ukulongana kwa muputule pa muku wa kubalilapo. (Seka. 4:10) Ilyo papitile imyaka 5, mu 1932, bapainiya na bakasabankanya 103 aba mu Japan balitumine lipoti ya fyo babombele mu mulimo wa mwi bala umo bashalike ifitabo ukucila pali 14,000. Pali lelo mu Japan baliteyanya bwino umulimo wa kushimikila ku cintubwingi mu ncende umusangwa sana abantu, kabili bakasabankanya 220,000 e baleshimikila imbila nsuma mu Japan.—Ilyashi lya kale ilya mu Japan.