Amepusho Ukufuma ku Babelenga

Ilyo Satana aebele Efa ukuti tali na kufwa nga alya ku muti wa kwishiba ubusuma no bubi, bushe aloseshe mu kuti abantu bakwata umweo uushifwa nga fintu abengi muno nshiku baishiba?

Afwile te mo aloseshe. Satana Kaseebanya taebele Efa ukuti nga alya icisabo ico Lesa abaleseshe, umubili wakwe wali no kufwa lelo umupashi wena wali no kutwalilila ukubako ku cifulo cimbi. Satana alandile ukupitila mu nsoka ukuti nga ca kuti Efa alya icisabo ca kuli ulya muti tali no kufwa. Ifi alandile fyalolele mu kuti Efa tali na kufwa, ali no kutwalilila ukwikala bwino pano isonde ukwabula ukuti Lesa alemutungulula.—Ukute. 2:17; 3:3-5.

Nga ca kuti icisambilisho ca bufi ica kuti abantu bakwata umweo uushifwa ico basambilisha muno nshiku tacatendekele mu Edeni, ninshi ni lilali catendeke? Kwena tatwaishiba bwino. Ico twaishiba ca kuti imipepele yonse iya bufi yalilobele ilyo kwali Ilyeshi mu nshita ya kwa Noa. Kanshi takwali icisambilisho nangu cimo ica bufi icatwalilile ukubako pa numa ya Lyeshi pantu ni Noa fye no lupwa lwakwe abalepepa Yehova e bapuswike.

Kanshi icisambilisho ca kuti abantu bakwata umweo uushifwa cifwile catendeke pa numa ya Lyeshi. Ilyo Lesa afulungenye ululimi abantu balelanda pa Babele, kabili abantu basalanganina na “pe sonde lyonse,” ukwabula no kutwishika bafwile baile ne cisambilisho ca kuti abantu bakwata umweo uushifwa. (Ukute. 11:8, 9) Nangu ca kuti tatwaishiba ilyo ici cisambilisho catendeke, twalishiba ukuti Satana Kaseebanya “wishi wa bufi,” e waleta ici cisambilisho kabili alitemenwe ilyo amwene casalanganina pano isonde ponse.—Yoh. 8:44.